Пайвандҳои дастрасӣ

Хабари нав

Хабарҳо

Майли раҳбари Куриёи Шимолӣ ба гуфтугӯҳои бештар

Ким Ҷон Ун

Ким Ҷонг Ун, раҳбари Куриёи Шимолӣ хостааст, ки соли оянда мулоқотҳо бо раҳбарони Куриёи Ҷанубӣ бештар шавад. Ӯ дар ин бора дар як номае ба унвони Мун Ҷае, раиси ҷумҳури Куриёи Ҷанубӣ суҳбат кардааст. Ким Ҷонг Ун ҳамчунин аз он изҳори таассуф кардааст, ки натавонист, то охири имсол ба Сеул сафар кунад. Ким Эй Кум, сухангӯи раиси ҷумҳури Куриёи Ҷанубӣ дар ин бора гуфт:"Ким Йонг Ун мегӯяд, майл дорад, ки гуфтугӯҳо бо раиси ҷумҳур Мун Ҷае дар соли 2019 дар бораи сулҳу тараққиёт ва орӣ аз аслиҳаи атомӣ кардани нимҷазираи Куриё бештар шавад."

Раҳбарони ду кишвар дар соли 2018 се дафъа мулоқот карданд. Дар ин сол Куриёи Шимолӣ ҳамчунин се дафъа озмоишҳои атомӣ ва мушакӣ анҷом дод ва мавриди интиқоди ғарб ва ҳамсокишвараш қарор гирифт.

Ким Ҷонг Ун ҳамчунин бо Доналд Трамп, раиси ҷумҳури Амрико мулоқот кард. Ду тараф дар бораи даст кашидани Куриёи Шимолӣ аз озмоишҳои атомӣ суҳбат карданд, аммо ин масъала то кунун пешрафте надоштааст.

Боздошти панҷ муттаҳам ба терроризм дар Ҳолланду Олмон

Чаҳор нафар дар шаҳри Роттердам дастгир шудаанд. Акс аз бойгонӣ

Нерӯҳои амниятии Ҳолланд ва Олмон мегӯянд, панҷ нафарро, ки қасд доштанд дар Ҳолланд “амалҳои террористӣ” анҷом бидиҳанд, дастгир карданд.

Пулиси ин кишвар рӯзи 29-уми декабр бо нашри як баёнияи расмӣ гуфт, ки чаҳор нафар аз онҳо дар шаҳри Роттердам дастгир шуданд. Ба гуфтаи мақомоти Олмон як тани дигари муттаҳамонро, ки 26 сол дорад, бо дархости Ҳолланд дар шаҳри Майнз боздошт карданд.

Ному насабашро нагуфтанд, вале ба қавли пулиси Олмон “Ӯ ба омодагӣ барои ҳамла ба Ҳолланд муттаҳам мешавад.” Мақомоти ду кишвар дар бораи кӣ ва аз куҷо будани муттаҳамон ҷузъиёт надодаанд ва пулиси Ҳолланд гуфтааст, ки онҳо ба “омодагӣ барои ҷиноятҳои террористӣ муттаҳам мешаванд” ва тафтиш дар ин замина идома дорад.

Лукашенко: "Шӯхӣ кардам, ки гуфтам, мо аз ҳам безор шудаем"

Мулоқоти Владимир Путин ва Александр Лукашенко дар рӯзи 25-уми декабр.

Владимир Путин, раиси ҷумҳури Русия ва ҳамтои беларуси ӯ, Александр Лукашенко рӯзи 29-уми декабр дар шаҳри Маскав ҷанҷол сари қимати нафту газ ва дигар масоилеро баррасӣ кардаанд, ки ба робитаҳои наздики ду кишвар латма задаанд.

Дар чанд рӯзи гузашта бори дуввум аст, ки ду раҳбар мулоқот мекунанд. Аввали имсол Русия низоми молиётситониро иваз кард, ки сабаб шуд, Ҷумҳурии Беларус барои газу нафту воридотӣ аз Русия пули бештар бипардозад. Минск ин амалкардро танқид кард, вале Маскав гуфт, ки бо вуҷуди ин ҳама, Ҷумҳурии Беларус газу нафтро назар ба кишварҳои дигар бо қимати поинтар мегирад.

Хабаргузории “Интерфакс” рӯзи 29-уми декабр аз қавли Александр Лукашенко навишт, “Ман шӯхӣ кардам, ки мо аз ҳамдигар безор ва хаста шудаем. Аммо ғолибан мо аз ҳамдигар безор намешавем, чун масъалаҳое ҳаст, ки бояд баррасӣ шаванд ва ин кори мо аст.”

Шореҳон мегӯянд, Русия мехоҳад, Белорус бар асоси аҳдномаи иттиҳоди ду тараф аз соли 1999 ҳамгироии бештаре дошта бошад. Аммо Маскав гуфтааст, ҳеҷ гуна барномае барои ба бахше аз Русия табдил додани Ҷумҳурии Беларус вуҷуд надорад.

Русия талаби Олмону Фаронсаро рад кард

Киштиҳои боздоштшудаи Украина

Вазорати умури хориҷии Русия талаби Олмону Фаронса барои раҳоии маллоҳони украиниро ғайриқобили қабул номид ва рад кард. Баёнияи вазорат дар ин бора рӯзи 29-уми декабр ва баъди он нашр шуд, ки Ангела Меркел, садри аъзами Олмон ва Эммануел Макрон, раиси ҷумҳури Фаронса рӯзи 28-уми декабр хостанд, маллоҳони украинӣ озод карда шаванд.

Русия 24 маллоҳро моҳи гузашта бо ду киштиашон дар гулугоҳи Керч дастгир кард. Гулугоҳи мазкур Баҳри Сиёҳро бо Баҳри Азов мепайвандад. Мақомоти Русия гуфтанд, киштиҳои украинӣ дар наздикиҳои нимҷазираи Қрим ғайриқонунӣ ба қаламравҳои обии Русия ворид шудаанд. Ин нимҷазираи Украинаро Русия соли 2014 ба қаламрави худ шомил кард.

Ангела Меркел ва Эммануэл Макрон дар баёнияи муштарак гуфтанд, “тафтишҳои беш аз ҳади Русия” мояи нигаронии амиқ аст ва хостанд барои тамоми киштиҳое, ки аз гулӯгоҳи Керч мегузаранд, “ҳаракати бемамониат, озоду амнро” фароҳам созад ва маллоҳони украиниро бе ҳеҷ шарте раҳо кунад.

Дмитрий Песков, сухангӯи раиси ҷумҳури Русия гуфт, ки Путин масъалаи озодии маллоҳонро бо Ангела Меркел баррасӣ кардааст, вале ба қавли ӯ, Русия дар ин замина “бар асоси қонунҳои кишвар” амал мекунад.

Пулиси Миср гуфт, баъди ҳамла ба сайёҳон 40 ҷангҷӯро куштааст

Пулиси Миср мегӯяд, ки дар пайи амалиёти хос дар он кишвар чиҳил ҷангҷӯи эҳтимолиро куштаанд.

Вазорати корҳои дохилии Миср рӯзи 29-уми декабр дар баёнияи расмӣ гуфт, чиҳил нафар дар амалиёти ҳамоҳангшудаи нерӯҳои амниятӣ дар минтақаи Ҷиза ва нимҷазираи Синой кушта шуданд.

Бино ба хабари телевизиони давлатии Миср, "унсурҳои террористӣ" қасд доштаанд, ки ба ниҳодҳои давлатӣ, бахши сайёҳӣ, нерӯҳои амниятӣ ва калисоҳо ҳамла кунанд.

Амалиёти нерӯҳои пулиси Миср баъди як рӯзи таркиш дар наздикии Аҳроми бостониии Қоҳира сурат гирифт. Дар ин таркиш чаҳор нафар кушта шуда ва 12 тан маҷруҳ шуданд.

Қаблан Вазорати корҳои дохилии Миср гуфта буд, ки кушташудаҳо сайёҳони ветнамӣ буданд. Дар миёни захмиҳо низ ёздаҳ ветнамӣ ва як ронандаи мисрӣ ҳастанд.

Масъулияти ҳамларо то ба ҳол касе ё гуруҳе бар дӯш нагирифтааст. Дар ду соли гузашта бори аввал аст, ки сайёҳони хориҷӣ дар Қоҳира ҳадаф қарор мегиранд.

Нерӯҳои Миср чандин сол боз дар нимҷазираи Синой бо ифротгароён даргир ҳастанд.

Дар Узбекистон омӯзгореро шавҳараш бо табар зад. ВИДЕО

axe

Омӯзгореро дар шаҳри Каттақурғони вилояти Самарқанди Узбекистон шавҳараш бо табар задааст. Мақомоти интизомии Узбекистон гуфтанд, ки ҳодиса рӯзи 25-уми декабр рух дода, зан бо ҷароҳатҳои зиёд зинда мондааст.

Омӯзгорро субҳи 25-уми декабр дар назди дарвозаи мактаб пайдо карданд.

Як ҳамкори омӯзгори маҷруҳ ба бахши узбекии Радиои Озодӣ гуфт, “дар ноҳияи мо деҳае бо номи "Сталин" ҳаст. Марде аз ҳамин деҳа бо омӯзгор робитаи заношӯӣ дошт. Субҳ аз садои доду фарёд бедор шудем ва дидем, ки ҳамкори мо назди дарвозаи мактаб хоб аст. Баъдтар фаҳмидем, ки ӯро шавҳараш бо табар задааст.”

Мақомоти интизомии шаҳри Каттақурғон мегӯянд, марди гумонбар боздошт шудааст.

“Гумонбар П.М. рӯзи 26-уми декабр боздошт ва ба ҳабс гирифта шудааст. Зан зинда монда, айни ҳол дар бемористон аст. Нисбат бар мард бар асоси моддаи "Барқасдона расонидани зарари ҷисмонӣ" парванда боз шуд. Бино ба иттилои ибтидоӣ, мард аз рӯи рашк ба ҳамсараш ҳамла кардааст”, - хабар доданд мақомоти интизомӣ.

Мард бо табар дар сару рӯ ва дасту пои зан задааст. Қисме аз захмҳо амиқ ва қисми дигар сатҳӣ шумурда мешаванд. Дар ҳоли ҳозир вазъи вай муътадил арзёбӣ мегардад.

Марди сезана бо табар яке аз ҳамсарҳояшро захмӣ кард
лутфан мунтазир бошед
### Эмбед ###

### Феълан кор намекунад ###

0:00 0:03:07 0:00

Интихоботи президентии Украина 31 март баргузор мешавад

Маъракаи интихоботи президентии Украина 31 декабр шуруъ мешавад. Комисияи марказии интихоботии он кишвар чунин қароре қабул кард. Бино бар қарори Комисия, раъйдиҳӣ рӯзи 31 марти соли 2019 баргузор мегардад.

Пешбарӣ ва қабули ҳуҷҷатҳо аз номзадҳо то 3 феврал идома мекунад. Комисияи марказӣ то санаи 8 феврал ҷараёни сабти ном анҷом медиҳад ва номзадҳои интихоботиро эълон мекунад.

Агар интихобот дар як давра ҷамъбаст шавад, натиҷаи он 10 апрел эълон мешавад. Дар сурати дар даври аввал муайян нашудани ғолиб, даври такрории интихобот 21 апрел барпо мешавад. Дар ин сурат, натиҷаи интихобот 1 май эълон ва маросими савгандёдкунии президенти нав 31 май доир мешавад.

Бино бар натиҷаҳои назарпурсӣ, тақрибан 21 дарсади пурсидашудаҳо омодаанд, ба ҷонибдорӣ аз роҳбари ҳизби "Баткившина" Юлия Тимошенко овоз диҳанд. Владимир Зеленский, коргардон ва шоумен миёни номзадҳои эҳтимолӣ мақоми дувумро касб мекунад. 13 дарсади пурсидашудаҳо гуфтаанд, ба ҷонибдорӣ аз вай раъй хоҳанд дод. 11 дарсади дигари пурсидашудаҳо гуфтаанд, барои президенти амалкунандаи Украина Петр Порошенко раъй медиҳанд.

Даниел Рустамов ба даври ниҳоии “Голос”-и Русия роҳ наёфт. ВИДЕО

Даниел Рустамов

Даниел Рустамов, шаҳрванди 23-солаи Тоҷикистон, ба даври ниҳоии озмуни овозхонии “Голос”-и Русия роҳ наёфт. Вай шоми 28-уми декабр дар даври ниманиҳоии озмун дар муқоиса ба рақибаш Рушана Валиева раъйи камтари мардумро ба даст овард ва аз озмун берун шуд.

Дар озмуни “Голос” дар баробари доварон, сокинон низ ҳақ доранд, ки тавассути фиристодани паёмак ё смс аз овозхони писандидаи худ ҳимоят кунанд. Даниел Рустамов маҳз бо смс-ҳои зиёде, ки ба тарафдорӣ аз ӯ фиристода шуд, ба даври ниманиҳоӣ роҳ ёфта буд.

Шоми ҷумъа Даниел Рустамов таронаи Бруно Марс Treasure ва Рушана Валиева таронаи Земфира “Ариведерчи”-ро иҷро карданд.

Даниел Рустамов дар сухани охиринаш дар саҳнаи “Голос” аз мардуми Тоҷиикстон барои ҳимоят аз ӯ сипосгузорӣ намуд.

Даниели 23-соларо дар Тоҷикистон аксарият тавассути ҳунарнамоиаш дар лоиҳаҳои маъруфи мусиқии телевизионҳои Украина ва Русия мешиносанд. Қабл аз озмуни "Голос" ӯ дар лоиҳаи X-Factor-и Украина ва баъдан дар барномаи “Песни”-и телевизиони ТНТ низ рақобат дошт.

Даниел Рустамов моҳи ноябри соли 1995 дар хонаводаи пизишк дар Душанбе ба дунё омадааст. Ҳоло донишҷӯи Донишкадаи давлатии ҳунарҳои зебои Маскав аст.

Даниел Рустамов: Интизори муъҷиза ҳастам
лутфан мунтазир бошед
### Эмбед ###

### Феълан кор намекунад ###

0:00 0:04:42 0:00

Қонуни нав. Зиндони террористонро аз дигарон ҷудо карданд

Бино ба қонуне, ки раиси ҷумҳури Русия Владимир Путин имзо кард, аз ин ба баъд афроди муҷрим ба терроризм аз зиндониҳои дигар ҷудо нигаҳдорӣ хоҳанд шуд. Қоннун дар пойгоҳи расмии иттилооти ҳуқуқии Русия нашр шуда ва мавриди иҷро қарор гирифтааст.

Мақомоти Русия мегӯянд, муқаррароти нав ба онҳое дахл дорад, ки барои мусоидат ба иҷрои таркишҳо, даъват ба терроризм, гаравгонгирӣ ва иштирок дар гуруҳҳои ифротгаро маҳкум шудаанд.

Пойгоҳи “Медиазона” рӯзи 28-уми декабр хабар дод, ки қонуни нав барои афроди гунаҳкор ба терроризм маҳдудияти дигаре дар назар гирифтааст. Агар дар гузашта ҳангоми тафтишот як рӯзи боздоштшудаҳо якуним рӯз ҳисоб карда мешуд, ҳоло афроди муҷрим ба терроризм аз он маҳрум гардидаанд.

Русия як тоҷики муттаҳам ба терроризмро ба “Интерпол” дод

Аббос Байнаев

Русия боз як зодаи Тоҷикистонро барои иштирок дар ҳайати созмонҳои террористӣ муттаҳам карда, ба ҷустуҷӯи байналмилалӣ супурд. Аббос Байнаев, зодаи шаҳри Истиқлол (Табошаҳри собиқ)-и вилояти Суғд 27-сола буда, шаҳрвандии Тоҷикистону Русияро дорад. Бино ба иттилои расмии “Интерпол” – пулиси байналмилалӣ – Байнаев забонҳои тоҷикиву русӣ ва узбекиро хуб медонад.

Дар саҳифаи расмии “Интерпол” дар интернет дастикам 31 шаҳрванди Тоҷикистон бо дархости Русия ҷустуҷӯ мешаванд. Аксари ин афрод барои фаъолиятҳои террористӣ, ташвиқ ва тарғиби терроризм дар хоки Русия, узвият дар гурӯҳҳои ифротгаро ва куштору қочоқи маводи мухаддир муттаҳаманд.

Тоҷикистон дар навбати худ рӯйхати алоҳидаи афроди таҳти ҷустуҷӯро таҳия кардааст, ки он шомили садҳо нафар аст. Бисёре аз онҳо тавассути “Интерпол” ва қисме бо ёрии пулиси Туркия ва Русия ҷустуҷӯ мешаванд.

Бино ба омори охирине, ки мақомоти Тоҷикистон эълон карданд, аз соли 2014, аз оғози таъсиси гурӯҳи худхондаи "Давлати исломӣ", тақрибан 1900 ҷангҷӯи тоҷик ба ҳайати ин гуруҳ дар Ироқу Сурия шомил шудаанд.

Пулиси Русия даҳҳо роҳрӯби эътирозгарро дар Маскав боздошт кард

Поккориҳо дар кӯчаҳои пур аз барфи Маскав

Пулиси Русия дастикам 30 роҳрӯбро, ки бо шикоят аз пардохт нашудани соатҳои изофии корӣ дар назди идораи ҳокимияти ноҳияи Нагорний ҷамъ шуда буданд, боздошт кард.

Роҳрӯбҳо мегӯянд, ки онҳоро маҷбур мекунанд, ба ҷойи кормандони буҷавӣ кӯчаҳоро аз барф тоза кунанд, аммо пул намедиҳанд. Ба гуфтаи ин коргарон, вазифаи онҳо танҳо аз тоза кардани ҳавлии биноҳо иборат аст, на поккории кӯчаҳо.

Пойгоҳи "ОВД-Инфо" рӯзи 29-уми декабр хабар дод, ки раиси Шӯрои ноҳия бо эътирозгарон мулоқот кард.

Варвара Грязнова, фаъоли ҳуқуқи башари Русия гуфт, дар эътироз асосан шаҳрвандони Узбекистон ва Қирғизистон иштирок карданд. Боздоштшудаҳо ҳадди ақал ба ду идораи пулис интиқол ёфтанд.

Курдҳои Сурия Манбиҷро ба нерӯҳои Башор Асад супурданд

Аксбардории низомиён бо парчами Сурия

Нерӯҳои президенти Сурия Башор Асад рӯзи ҷумъа ба шаҳри шимолии Манбиҷ ворид шуданд, ки муддати тӯлонӣ таҳти назорати дастаҳои худдифои Курд буд.

Дар изҳороти фармондеҳии Сурия гуфта мешавад, ки нерӯҳо дар заминаи созиши пешакӣ бо Курдҳо "барои ҳимояи аҳолӣ" аз ҳамлаи Туркия ба Манбиҷ ворид шуданд. Тибқи хабарҳо, дар шаҳр парчами Сурия баланд шудааст.

Пештар аз ин фармондеҳии дастаҳои Курд аз хуруҷи Манбиҷ хабар дод ва нерӯҳои Сурияро расман ба шаҳр даъват кард.

Кремл аз гузаштани шаҳр ба назорати нерӯҳои Асад истиқбол кард.

Манбиҷ шаҳре дар вилояти Ҳалаб аст, ки чанд сол таҳти тасарруфи гурӯҳи террористии "Давлати исломӣ" (ДИИШ) қарор дошт. Соли 2016 дастаҳои Курд бо пуштибонии эътилофи байналмилалии таҳти раҳбарии Амрико Манбиҷро аз тундравони "Давлати исломӣ" бозпас гирифтанд.

Анкара борҳо гуфтааст, ки ҳузури курдҳо дар Манбиҷ ба амнияти Туркия хатар дорад ва таҳдид кард, ки шаҳрро аз роҳи амалиёти низомӣ тасарруф хоҳад кард.

Чанде пеш президенти ИМА аз хуруҷи нерӯҳи амрикоӣ аз Сурия хабар дод. Ба гуфтаи президент, саркӯби ДИИШ-ро дар қаламрави он кишвар бояд Туркия ба охир расонад. Президенти Туркия Раҷаб Таййиб Эрдуғон омодагии кишварашро барои мубориза бо ҷангҷӯёни ДИИШ ва ҳамчунин дастаҳои курд баён дошт.

Дар чунин ҳолат, курдҳо тасмим гирифтанд, ки Манбиҷро ба нерӯҳои ҳукумати Сурия супоранд. Онҳо ҳамчунин барои муқовимат ба вуруди эҳтимолии нерӯҳои Сурия ба минтақа изҳори омодагӣ карданд.

Раиси ФФА барои дастдарозӣ ба бозигарони зан мамнуъулхуруҷ шуд

Занҳои варзишгари Афғонистон

Мақомоти Афғонистон раҳбари Федератсияи футболи ин кишварро дар заминаи иттиҳоми озори ҷинсӣ ва ҷисмонии бозигарони зан, дар гузашта ва ҳоло, мамнуъулхуруҷ эълон карданд.

Додситони кулли ин кишвар рӯзи 28-уми декабр эълон кард, ки раҳбари Федератсияи футбол Киромиддин Карим ва чаҳор узви федератсия ҳақ надоранд аз кишвар хориҷ шаванд.

Додситонии кулли Афғонистон рӯзи 5-уми декабр, чанд рӯз баъди нашри матлаби The Guardian, дар робита ба озори ҷинсии занҳои футболбози Афғонистон, ин панҷ нафарро аз мақом барканор ва ба таҳқиқи қазия оғоз кард.

Рӯзи 9-уми декабр Федератсияи Байналмилалии Футбол - FIFA, Киромиддин Каримро аз фаъолият дар сатҳи кишвар ва миқёси байналмилалӣ барои 90 рӯз маҳрум кард.

Қарори додситонӣ дар робита ба мамнуъулхуруҷ шудани раҳбар ва чаҳор узви дигари Федератсияи футболи Афғонистон як рӯз баъд аз нашри бахши дигари гузориши The Guardian содир шуд.

Нашрияи британиягӣ дар гузориши ахираш шикояти занҳои футболбози афғон алайҳи Киромиддин Каримро нашр кард, ки аз дастдарозии ҷинсӣ то озори ҷисмонӣ ва таҳдид ба хонаводаҳои онҳоро фаро гирифтааст.

Вакилони Ҷохар Тсарнаев лағви ҳукми қатли ӯро дархост карданд

Ҷохар Тсарнаев

Вакилони Ҷохар Тсарнаев - ҳамлагари марафони Бостон, аз додгоҳ дархост карданд, ки ҳукми қатли зерҳимояи онҳо бекор шавад. Ба гуфтаи вакилон, баргузор шудани мурофиа дар макони ҳамлаи террористии моҳи апрели соли 2013 баррасии мунсифонаи қазияро ғайриимкон кард.

Вакилони Тсарнаев рӯзи 27-уми декабр бо ироаи дархости худ ба додгоҳи Бостон эътироф карданд, ки Ҷохар Тсарнаев ва бародари ӯ Темирлан Тсарнаев дар ҳамла ба марафон ё дави Бостон се нафарро кушта, 250 тани дигарро маҷруҳ карданд.

Аммо онҳо далел оварданд, ки баррасиҳои густардаи ин ҳодиса дар матбуот, бо шумули "қиссаҳои дилхароши қурбониҳо", ба маъное буд, ки қариб тамоми ҳайати мунсифаи додгоҳ таҳти таъсир қарор гирифт.

"Ин қазия бояд дар Бостон баррасӣ намешуд", - навиштаанд вакилони Тсарнаев. Онҳо ҳамчунин ба мушкилоти дигари ҷараёни мурофиаи додгоҳӣ ишора карданд.

Ҷохар Тсарнави чечентабор, ки шаҳвандии ИМА-ро дарёфт кард ва дар донишгоҳи Массачусеттс мехонд, баъди ду соли ҳамла ба марафони Бостон, ки онро ҳамроҳ бо бародараш Темирлан Тсарнаев таҳррезӣ карда буд, ба марг маҳкум шуд.

Темрилан Тсарнаев дар ҷараёни амалиёти амниятӣ кушта шуд ва бародари ӯ Ҷохар Тсарнаев, ки ҳоло 25 сол дорад, ба гуноҳаш иқрор кард. Ӯ дар маҳбаси амнияташ шадиди Колорадо нигаҳдорӣ мешавад.

Президент Трамп ба суолҳои додситони махсуси ИМА посух намедиҳад

Руди Ҷулианӣ

Президент Доналд Трамп ба суолҳои додситони махсуси ИМА Роберт Мюллер дар бораи эҳтимоли дахолати Русия ба интихоботи президентии соли 2016 дигар посух намедиҳад.

Ин нуктаро вакили дифои президенти ИМА Рудолф Ҷулианӣ дар суҳбат бо Hill TV баён дошт. Ҷулианӣ гуфт, раҳбари Кохи сафед ба гуруҳи додситон иттилои кофӣ пешниҳод кардааст.

Вакили дифои Трамп пештар дар суҳбат бо Fox News гуфта буд, ки ба мулоқоти шахсии президент бо муфаттишон мухолиф аст. Зеро ба гуфтаи ӯ, онҳо эҳтимол дорад, бо суолҳои худ Трампро ба иштибоҳ андозанд. Ҷулианӣ гуфт, ки вакилони дифоъ тавони посухдиҳӣ ба суолҳои иловагии тими Мюллерро доранд.

Ҷулианӣ додситони махсусро ҳамчунин ба он айбдор кард, ки ба пок кардани мукотибаи ҷосуси пешини Бюрои федеролии тафтишотӣ Питер Стржок иҷозат додааст. Стржок дар паёмакҳои худ гӯё гуфтааст, ки мехоҳад, ба интихоби Трамп ба мақоми президентӣ монеъ шавад. Мукотиба замоне пок карда шуд, ки ҷосуси пешин дар тими додситони махсус кор мекард. Ба иттилои Вазорати адлияи ИМА, паёмакҳо дар бойгонии бюро нигаҳдорӣ мешуданд, вале ба иллати нуқси техникӣ пок шуданд.

Тафтиши дахолати эҳтимолии Русияро ба интихоботи президентии соли 2016 дар ИМА идома дорад. Додситон Мюллер мехоҳад маълум кунад, ки ситоди интихоботии Трамп барои шикасти рақиби ӯ Ҳилларӣ Клинтон аз Ҳизби демократ, бо Русия созише дошт, ё не. Москва дахолати худро ба интихоботи кишварҳои хориҷӣ рад мекунад.

Раиси пешини Хадамоти гумруки Қирғизистон аз Боку ба Бишкек истирдод шуд

Истирдоди Адамқул Жунусов - раҳбари пешини Хадамоти гумруки Қирғизистон. 28 декабр, 2018

Кормандони Хадамоти давлатии мубориза бо ҷиноятҳои иқтисодии Қирғизистон рӯзи 28 декабр Адамқул Жунусов, раҳбари пешини Хадамоти давлатии гумруки ин кишварро аз Озарбойҷон ба Бишкек оварданд.

Нисбати Жунусов моҳи августи соли ҷорӣ бо айби "Сӯистифода аз мақоми хизматӣ" ғоибона айб эълон шуда буд. 28 августи имсол додгоҳи ноҳияи Якуми майи шаҳри Бишкеки Қирғизистон қарори ҳабси Жунусовро содир кард.

Ба иттилои тафтишот, аз соли 2013 то 2016 Жунусов бо намояндагони ширкати "А." ва дигар масъулони хадамоти гумрук робитаи фасодолуд барқарор кардааст. Ӯ дар сохтакории сандаҳои ширкат кумак кард ва ширкат аз ин роҳ дар пардохтҳои гумрукӣ соҳиби афзалият шуд.

Зиёне, ки Жунусов ба буҷаи давлат расонд, 2,3 млн доллар ҳисоб шудааст.

Жунусовро 4 декабр дар фурудгоҳи байналмилалии Боку боздошт карданд.

Ифтитоҳи бинои нави шӯъбаи КДАМ дар ноҳияи Шоҳмансур

Биноҳои нави шӯъбаҳои КДАМ дар ноҳияи Шоҳмансури Душанбе, ифтитоҳ шуд. Расонаҳои давлатии Тоҷикистон иттилоъ доданд, ки рӯзи 27-уми декабр дар маросими ифтитоҳи ин бино раиси КДАМ Саймуъмин Ятимов ва раиси шаҳри Душанбе Рустами Эмомалӣ ширкат карданд.

Манобеи расмӣ мегӯянд, ки ин бино бо маблағи 3,5 миллион сомонӣ аз сӯи ширкати сохтмонии "Сабр-Аф" бунёд шудааст. Гуфта мешавад, ки бино аз 4 ошёна, аз ҷумла, 8 ҳуҷраи корӣ, бойгонӣ, анбор, ҳаммом, толори варзишӣ ва иншооти ёрирасон иборат мебошад.

"Имрӯз беҳсозии шароити хизматӣ барои кормандони сохторҳои қудратӣ аз ҳадафҳои аслии роҳбарияти Ҳукумати мамлакат ба ҳисоб меравад",-омадааст дар хабарҳои расмӣ.

Раиси шаҳри Душанбе Рустами Эмомалӣ бинои нави шӯъбаи КДАМ дар ноҳияи Шоҳмансурро "тӯҳфаи арзишманд"-и президент Эмомалӣ Раҳмон ба кормандони амниятӣ дар "Рӯзи кормандони амнияти миллӣ", гуфтааст.

Таъсиси муассисаи давлатии "Бизнес-инкубатори Тоҷикистон"

Рӯзи 28-уми декабр дар Душанбе маҷлиси ҳукумати Тоҷикистон баргузор шудааст. Тибқи иттилои дафтари матбуоти раёсати ҷумҳури Тоҷикистон, дар ин нишаст нақшаи кории ҳукумат дар нимсолаи аввали соли оянда мавриди баррасӣ қарор гирифтааст.

Манбаъ мегӯяд, ки дар ин нишаст вазири молияи Тоҷикистон дар бораи будҷаи давлатӣ барои соли 2019 ва ҳамчунин таҳияи нишондиҳандаҳои будҷаи давлатӣ барои солҳои 2020-2022 гузориш додааст. Ҳамчунин вазири рушди иқтисод ва савдо Неъматулло Ҳикматуллозода роҷеъ ба масълаҳои марбут ба иқтисоди кишвар, гузориш ироа кардааст. Аъзои ҳукумат дар ин нишаст шуморе аз лоиҳаҳои қонунҳоро баррасӣ намуда ва барои баррасӣ ба Маҷлиси намояндагон ирсол кардаанд.

Дафтари раёсати ҷумҳури Тоҷикистон мегӯяд, ки дар маҷлиси ҳукумати Тоҷикистон инчунин масъалаҳо дар бораи Стратегияи миллӣ оид ба паст кардани хавфи офатҳои табиӣ барои солҳои 2019-2030, тартиби додани кафолатҳо ба кормандони тиб ва дигар кормандоне, ки дар расонидани кумаки зидди бемории сил иштирок менамоянд баррасӣ шуданд. Қарор шудааст, ки дар кишвар муассисаи давлатии "Бизнес-инкубатори Тоҷикистон" таъсис дода шавад.

Додситонии Ишқобод ҷамъоварии пул аз волидонро барои Соли нав тафтиш дорад

Дар шаҳри Ишқободи Туркманистон мудирони мактаб ва боғчаҳое, ки барои чорабиниҳои солинавӣ аз волидон пул ҷамъ карданд, ба бозпурсӣ даъват мешаванд. Пештар хабар дода шуд, ки дар боғчаҳои пойтахти Туркманистон аз волидон барои таҷлили соли нав 80-манатӣ (ҳудуди 23-долларӣ) талаб доранд.

"Додситонии Ишқобод дар асоси шикояти волидон мудирони мактабу боғчаҳоро ба бозпурсӣ даъват мекунад. Волидон шикоят кардаанд, ки мудирҳо барои чорабиниҳои солинавӣ аз онҳо пул талаб доранд", - хабар додааст "Хроника Туркменистана" бо истинод ба як манбаи худ.

Дар додситонии Ишқобод ба мудирон ҳушдор доданд, ки барои ин амалашон ба онҳо парвандаи ҷиноӣ ё ҳадди ақал маъмурӣ таҳдид мекунад. Мудирони мактабу боғчаҳои ноҳияи "Хитровка" аллакай бозпурсӣ шудаанд. Ба иттилои расонаҳо, дасти кам дар ду боғчаи Ишқобод аз волидон барои туҳфаи солинавӣ 70-манатӣ ва барои даъвати Бобои барфиву наберааш 10-манатӣ талаб шудааст.

Бархе аз волидон ба иллати надоштани пул гуфтанд, ки ба фарзандонашон дар хона туҳфа медиҳанд ё он рӯз кӯдаконро ба боғча намебаранд. Вале мудирони боғчаҳо пешниҳоди волидонро рад карда, гуфтаанд, ки бояд пулро супоранд, чун аз боло фармон шудааст.

"Сомон Эйр" ба Миср парвоз мекунад

Ширкати ҳавоии "Сомон Эйр" аз субҳи фардо, 29-уми декабр парвозҳо ба масири Шарм-ул-Шайхи Мисрро оғоз мекунад. Темур Бандишоев, раҳбари раёсати иттилооти ин ширкат ба Радиои Озодӣ бо тасдиқи ин хабар гуфт, ки парвозҳо чартерӣ, яъне дар 10 рӯз як маротиба сурат мегирад.

Вай афзуд, ки "масъулони ин парвозҳо ширкати сайёҳии "Компас" аз Қазоқистон буда, дар Тоҷикистон ба ҷалби мусофирон ва сайёҳон ширкати маҳаллие машғул аст". Ба гуфтаи Темур Бандишоев, нархи парвоз бо шумули истироҳати 10-рӯзаи сайёҳон аз 600 доллари амрикоӣ шурӯъ мешавад.

Ду моҳ қабл ширкати "Сомон Эйр" чунин парвозҳо ба самти Анталияи Туркияро шурӯъ кард, ки феълан алоқамандони зиёди истироҳат аз миёни сокинони Тоҷикистонро пайдо кардааст.

Шабнами Сурайё ва Нигина Амонқулова – маҳбубтарин овозхонҳои соли 2018

Як пурсиши солинавии маркази пурсиши афкори умуми “Z-alalytics Group” исми маъруфтарин овозхонҳои тоҷикро муайян кард. Бар асоси ин пурсиш, ки 27 декабр нашр шуд, Шабнами Сурайё бештар дар миёни ҷавонони 18 то 29-сола маъруфият доштааст. Нигина Амонқуловаро бештар сокинони аз 30-сола болои кишвар ба унвони овозхони маҳбуб ёд кардаанд.

Нигина Амонқулова
Нигина Амонқулова

Дар маҷмӯъ, дар миёни панҷ овозхони маҳбубтарини тоҷик исми Нигина Амонқулова, Шабнами Сурайё, Зиёвиддини Нурзод, Афзалшоҳи Шодӣ ва Зулайҳо Маҳмадшоева ёд шудааст.

Пурсиши телефонии “Z-alalytics Group” аз 13 то 17 декабри соли ҷорӣ дар миёни 408 сокини Тоҷикистон ва дар манотиқи мухталифи кишвар барпо шудааст.

Ҳамчунин бихонед:

Даниэл, Мадина, Қадами Қурбон... Шоубизнеси тоҷик дар соли 2018. ВИДЕО​

Баъди се моҳи куштори Хошуқҷӣ шоҳ Салмон дар ҳукумат тағйирот ворид кард

Шоҳ Салмон бо писараш Муҳаммад бин Салмон

Баъди се моҳи куштори журналист Ҷамол Хошуқҷӣ дар консулгарии Арабистони Саудӣ дар Истамбул ва вокунишҳои шадиди ҷомеаи ҷаҳонӣ ба ин куштор, шоҳ Салмон ба тағйироти густарда дар ҳукумат дастур дод.

Тағйироти кадрӣ, ки рӯзи 27 декабр эълон шуд, аз ҷумла ба вазири умури хориҷӣ, иттилоот, матбуот ва маориф дахл дорад.

Шоҳи Саудӣ ҳамчунин ба тағйирот дар ду Шӯрои олии салтанат - дар умури масоили иқтисодӣ ва амният дастур дод. Ин ду ниҳод таҳти назорати валиаҳди Саудӣ Муҳаммад бин Саломон қарор доштанд.

Тағйирот ба вазифаҳои дигари валиаҳд, аз ҷумла ба мақоми ноиби нахуствазир ва вазири дифо дахл накард.

Ҷобаҷогузории нави мақомҳо зоҳиран мавқеи валиаҳди Саудиро, ки акнун дар иҳотаи аъзои салтанат фаъолият хоҳад кард, таҳким медиҳад.

Бар поияи фармони шоҳ, Иброҳим ал-Ассаф, вазири пешини молия, Абдул ал-Ҷубейр вазири хориҷиро иваз мекунад. Ал-Ҷубейр дар ҳамин вазорат ба мақоми поёнтар таъин шуд.

Ёвари наздики валиаҳди Саудӣ Туркӣ ал-Шайх, раҳбари бахши ташкили корҳои тафреҳии салтанат таън шуд. Ин ниҳодро валиаҳд солҳои ахир ба хотири ташкили консертҳо ва барномаҳои тафреҳӣ созмон дод, ки дар ин кишвари муҳофизакор мамнуъ буданд.

Ҷамол Хошуқҷӣ, рӯзноманигори Саудӣ ва интиқодгари аслии шоҳзода Муҳаммад бин Салмон аввали моҳи октябр дар консулгарии Арабистони Саудӣ дар Истамбул кушта шуд. Риёз гузоришҳоро, ки куштор бо амри валиаҳд сурат гирифтааст, рад мекунад.

Сухангӯи ДИИШ дар Афғонистон аз ҳамлаи бесарнишин кушта шуд

Мошини пулиси Афғонистон -"ғанимати ҷангӣ"- и ДИИШ

Артиши Афғонистон мегӯяд, ки сухангӯи гурӯҳи тундрави "Давлати Исломӣ" дар натиҷаи ҳамлаи бесарнишин кушта шуд.

Дар изҳороти нерӯҳои Афғонистон, ки рӯзи 27 декабр пахш шуд, гуфта мешавад, ки Султон Азиз Аъзам як рӯзи пеш дар паноҳгоҳи ДИИШ дар яке аз ноҳияҳои вилояти шарқии Нангарҳор кушта шуд.

Дар изҳорот омадааст, ки бар поияи маълумоти истихборотӣ ҳавопаймоҳои беном Султон Азиз Аъзам - сухагӯи ин гурӯҳи тундравро ҳадаф қарор дод.

Насрат Раҳимӣ, муовини сухангӯи Вазорати дохилии Афғонистон гуфт, ки Аъзам ҳамчунин ҷангиёнро барои ҳамлаҳои пурсару садо дар шаҳрҳо истихдом мекард.

Дар робита ба ин куштор вокуниши ДИИШ ва нерӯҳои ИМА дар Афғонистон дастрас нашудааст.

Нангарҳор аз пойгоҳҳои гурӯҳи террористии "Давлати Исломӣ" аст ва онҳо дар ин минтақаи ҳаммарз бо Покистон фаъол шудаанд.

Низомиёни ИМА теъдоди ҷангиёни ДИИШ дар Афғонистонро 2,000 арзёбӣ мекунанд.

Ин гурӯҳи тундрави суннимазҳаб аз соли 2015, аз замони зуҳураш дар хоки Афғонистон, ақалиятҳои шиамазҳаб ва нерӯҳи амниятии кишварро дар ҳамлаҳои пурқурбонӣ ҳадаф қарор додааст.

Марги ду кӯдаки тоҷик дар рахти хоб, ҳангоми сӯхтор дар Русия

Акс аз бойгонӣ

Ду кӯдаки тоҷик аз ноҳияи Абдураҳмони Ҷомии вилояти Хатлон дар натиҷаи сӯхторе дар Бошқирдистони Русия ҷон бохтаанд Мақомоти Тоҷикистон гуфтанд, ки ҳодиса рӯзи 25-уми декабр рух дода, ҷасади Амина Додова ва Амриннисо Додоваро дар Русия гӯронданд.

Иброҳим Аҳмадӣ, сухангӯи намояндагии Вазорати меҳнат ва муҳоҷирати Тоҷикистон дар Русия, рӯзи 27-уми декабр хабар дод, ки Амина чаҳорсола ва Амриннисо ҳамагӣ дусола буд. "Онҳо дар сӯхтори хонаи истиқоматӣ дар рахти хобашон ба ҳалокат расидаанд", - афзуд ӯ.

Аҳмадӣ мегӯяд, маъмурони Хадамоти ҳолатҳои фавқулодаи Русия дарҳол ба ҷойи ҳодиса расида, вале ба сабаби пурра оташ гирифтани манзил натавонистаанд кӯдакҳоро наҷот диҳанд.

Мақомоти Русия гуфтаанд, дар робита ба ин ҳодиса парвандаи ҷиноӣ боз шуда, сабабҳои сӯхторро таҳқиқ мекунанд.

Намояндагии Вазорати меҳнат ва муҳоҷирати Тоҷикистон мегӯяд, падари хонавода Раҳимҷон Додов ҳангоми рух додани ҳодиса ба супурдани санад барои гирифтани шаҳрвандии Русия ба шаҳри Қазон рафта буд. Модари кӯдакон Замира Ҷӯраева ҳангоми огоҳ гаштан аз сӯхтор имкони наҷот додани фарзандонро надоштааст.

Ҳар сол бино бар ҳодисаҳои нохуш ба мисли садама ва сӯхтор даҳҳо шаҳрванди Тоҷикистон дар ҳудуди Русия ба ҳалокат мерасанд.

Бино ба иттилои мақомот то як ва бино ба иттилои манобеи ғайрирасмӣ беш аз як миллион шаҳрванди Тоҷикистон дар Русия кору иқомат мекунанд.

Хабарнигори собиқи Радиои Озодӣ муовини раиси парлумон шуд. ВИДЕО

Аида Қосималиеваи 34-сола, собиқ хабарнигори бахши Қирғизии Радиои Озодӣ дар овоздиҳии пӯшида рӯзи 27 декабр муовини раиси парлумони Қирғизистон интихоб шуд. Ба пуштибонии Қосималиева дар овоздиҳӣ 91 вакил раъйи мусбат ва 16 нафар раъйи манфӣ додааст.

Интихоби муовини раиси парлумон баъди он сурат гирифт, ки рӯзи 14 декабр аъзои ҳизби Сотсиал-демократи Қирғизистон дар ҷаласаи пӯшидааш Асел Кодурановаро аз ин мақом барканор кард. Кодуранова дар мақоми муовини раиси маҷлис давоми як сол кор кардааст.

Аида Қосималиева дар Қирғизистон ба унвони журналисти Радиои Озодӣ шинохта шуда, баъди тарки кор дар ин муассиса ба фаъолияти сиёсӣ пардохт ва аз номи ҳизби ҳокими сотсиал-демократ ба парлумон роҳ ёфт.

Ёфтҳои бештар

Гузоришҳои видеоӣ

Кор аз дохили хона. Соҳибхоназанҳо ҳунари комютеру интернетро азхуд карданд
лутфан мунтазир бошед

### Феълан кор намекунад ###

0:00 0:02:24 0:00
XS
SM
MD
LG