Пайвандҳои дастрасӣ

Хабари нав

Хабарҳо

Нафаре, ки ҷойгузини Хоманеӣ номбар мешуд, даргузашт

Шаҳрудӣ дар бемористони Олмон

Рӯҳонии саршиноси Эрон ва раиси пешини Вазорати адлия Оятуллоҳ Маҳмуд Ҳошими Шаҳрудӣ баъди бемории тӯлонӣ дар Теҳрон даргузашт. Дар ин бора телевизиони давлатии Эрон рӯзи 24 декабр хабар дод.

Шаҳрудии 70 сола моҳи январ дар Олмон табобат мегирифт ва дар ҳоле ба Теҳрон баргашт, ки фаъолон аз додситонии Олмон тафтиши қарорҳои эъдомро, ки Шаҳрубӣ қабул карда буд, дархост карданд. Фаъолон нақши ӯро дар қарорҳои эъдом ҷиноят алайҳи башарият унвон мекунанд.

Ӯ шахси наздик ба Оятуллоҳ Алӣ Хоманеӣ ва аз ҷойгузинҳои эҳтимолии Раҳбари Олӣ унвон мешуд.

Шаҳрудӣ солҳои 1999 то 2009 раҳбари Вазорати адлияи Эрон буд. Ҳарчанд Шаҳрудӣ баъзе ислоҳлот, аз ҷумла ҳукми қатл тавассути сангсорро мамнуъ кард, аммо фаъолони ҳуқуқ ӯро ба боздоштҳои ғайриқонунии фаъолон ва азобу шиканҷаи зиндониҳо муттаҳам мекунанд.

Соли 2017 Хоманеӣ ӯро ба мақоми раиси Шӯрои нозирон - миёнҷии баҳсҳои байни қонугузорон ва Шӯрои нигаҳбон таъин кард.

Шаҳрудӣ дар Наҷаф аз падару модари эронӣ ба дунё омад. Ӯ соли 1970 аз тарафи нерӯҳои амниятии диктатори Ироқ Саддом Ҳусейн зиндонӣ ва шиканҷа шуда буд.

Теъдоди қурбониҳои сунами дар Индонезия ба 429 нафар расид

Индонезия - минтақае, ки аз сунамӣ осеб дид

Теъдоди қурбониҳои сунамӣ дар гулӯгоҳи Зонда афзоиш ёфта, мақомоти маҳаллӣ рӯзи 25-уми декабр марги 429 нафарро тасдиқ карданд. Як ҳазору чорсад нафар захмӣ буда, 128 нафар нопадид шудааст.

Офати табии шаби якшанбе дар тангнои Зонда, ки ҷазираҳои Ява ва Суматраро аз ҳам ҷудо мекунад, ба вуқуъ пайваст. Зилзиласанҷҳо мегӯянд, ки мавҷҳои бузургро оташфишонии вулқони Анак-Кракатау баланд кард.

Гурӯҳҳои наҷот бо ҳадафи пайдо кардани зиндаҳо оворҳоро кофтукоб мекунанд. Президенти Индонезия аз макони офати табиӣ дар вилоятҳои Лампунг ва Бантенд боздид кард. Ӯ гуфт, мақомот имкон надоштанд мардумро аз ин хатар огоҳ кунанд.

Сунамӣ дар тангнои Зонда чанд рӯз пеш аз солгарди фоҷеаи соли 2004 рух дод. 26-уми декабри он сол дар пайи заминларза ва боло шудани мавҷҳои бузург дар чанд кишвар, бо шумули Индонезия, 230 нафар ҷон бохт.

Биноба суқути бозори бурс Трамп эҳтимол вазири молияро барканор мекунад

Трамп ва Мнучин

Дар пасманзари сарозер шудани шохисҳои аслии ИМА дар бозорҳои бурс, президент Доналд Трамп имкони барканор шудани вазири молия Стивен Мнучинро баррасӣ мекунад.

Дар ин бора Bloomberg рӯзи 24-уми декабр хабар дод. Гуфта мешавад, ки раҳбари Кохи Сафед қарори барканории вазирро вобаста ба вазъ дар бозори бурс қабул хоҳад кард. Аз ҷумла, будани Мнучин дар ҳукумат акнун ба чигуна коҳиш ёфтани шохисҳои аслӣ бастагӣ хоҳад дошт.

Рӯзи душанбе шохиси DowJones дар бозорҳои ҷаҳонӣ 2,9 дар сади арзишашро аз даст дод, S&P то 2,7 дар сад коҳиш ёфт ва рӯзи сешанбе қиммати нафт низ рӯ ба камшавӣ овард. Ба гуфтаи як идда таҳлилгарон, моҳи декабри соли 2018 аз соли 1993 бадтарин марҳила барои бозори бурси ИМА буд.

Вазъи феълии бозори бурс ба қарори Бонки марказии Амрико бастагӣ мегирад, ки қимати баҳраро дар як сол чаҳор дафъа боло бурд. Ба ғайри ин, коҳиш аз номуайянӣ дар бозорҳои бурс аз қисман қатъ шудани фаъолияти ҳукумати ИМА маншаъ мегирад.

Доналд Трамп натавонист дар масъалаи буҷаи давлатӣ бо демократҳои Конгресс забон ёбад ва идораҳои ҳукуматӣ бинобар набудани сармоя корро қатъ карданд.

Даҳҳо кушта аз ҳамлаи ҷангҷӯён ба идораи давлатӣ дар Афғонистон

Пулиси Афғонистон дар саҳнаи ҳамлаи рӯзи 24 декабр

Дар натиҷаи як ҳамла ба бинои ҳукуматӣ дар шарқи шаҳри Кобул, ки рӯзи 24-уми декабр рух дод, дастикам 43 нафар кушта шуд. Ба гуфтаи Вазорати тандурустии Афғонистон дар ҳамла 25 нафар захм бардошт.

Дар биное, ки ба он ҳамла шуд, Вазорати кори Афғонистон ва чанд идораи давлатӣ ҷойгир аст. Ҷангҷӯён дар ҳоле ба бино ҳамла карданд, ки қабл аз он як интиҳорӣ худро дар даромадгоҳ тарконд кард ва мардум рӯ ба фирор оварданд.

Ба гуфтаи ноиби сухангӯи Вазорати корҳои дохилии Афғонистон Нусрат Раҳимӣ, баъди даргирии ҳаштсоата бо ҷангҷӯён 350 нафар, ки дар бино буд, наҷот ёфтанд. Се ҳамлагар аз тири нерӯҳои амниятӣ кушта шуд. Намояндаи Вазорати умури дохилии Афғонистон гуфт, чанд асири дигар дар дасти гаравгирон боқӣ монда, амалиёти озодсозии онҳо идома дорад.

Масъулияти ҳамларо то ҳол ҳеҷ гурӯҳ бар дӯш нагирифтааст.

​Ҳамлаи мусаллаҳонаи рӯзи 24-уми декабр 22-юмин ҳодисаи хунини Кобул аз моҳи январи имсол ба ин сӯ аст. Дар натиҷаи ин ҳамлаҳо беш аз 500 кас ҷон дода, зиёда аз ҳазор нафари дигар захмӣ шуданд.

Намояндаи Амрико 20-уми декабр тасмими президент Доналд Трампро барои ихроҷи 5 ҳазор низомии амрикоӣ аз Афғонистон расман эълон кард. Ин хабар пас аз он нашр шуд, ки Трамп гуфт, ду ҳазор низомии кишвараш Сурияро тарк мекунанд.

Писари афсари пешини КГБ мегӯяд, расми 15-миллионии Рембрандт моли ӯст

Рембрандт

Додгоҳи шаҳри Тошканд рӯзи 25-уми декабр даъвои писари афсари пешини КГБ Андрей Плужниковро баррасӣ хоҳад кард, ки мегӯяд, "соҳиби воқеии расми Рембрандт аст".

Додгоҳи ноҳияи Яккасаройи Тошканд 21-уми ноябр Комил Юлдошевро 52 миллион сӯм (беш аз $6 ҳазор) ва Рафаэл Фузайловро 34 миллион сӯм ($4 ҳазор) барои ҳаннотии асари марбут ба Рембрандт ба нафъи давлат ҷарима кард.

Андрей Плужников, муҳандиси 50-сола аз Тошканд мегӯяд, расми "15-миллионевроии Рембрандт ба ӯ тааллуқ дорад ва ӯ аз ҳуқуқаш дар додгоҳ ҳимоят хоҳад кард". Ба қавли Плужников, расм 50 сол дар хонаи онҳо нигаҳдорӣ мешуд. "Молики ягонаи ин расм ман ҳастам", - афзуд ӯ.

"Расм ба падари ман тааллуқ дорад, ки аз соли 1953 дар Кумитаи амнияти давлатии Узбекистон кор кардааст. Он аз падарам ба ман мерос мондааст. Расмро соли 2014 ба Комил Юлдошев, ки бо хариду фурӯши асарҳои ҳунарӣ машғул буд, додам, то дар музоядаи ҷаҳонӣ 12 миллион евро фурӯшад. Вале Юлдошев расмро гирифта, ғайб зад", - афзуд ӯ.

Ба гуфтаи Плужников, ӯ соли 2014 ба Вазорати умури дохилӣ ва додситонии Узбекистон шикоят кард ва дар натиҷа парвандаи ҷиноӣ боз шуда, 14 июни имсол расмро аз бағочи Рафаэл Фузайлов, ки мехост аз Тошканд ба Исроил сафар кунад, пайдо карданд. "Қурбонии ин ҷиноят шудам, вале ҳоло мақоми шоҳидро касб кардаам", - афзуд вай.

Сухангӯи Вазорати фарҳанги Узбекистон Мавлуда Аскархоҷаева гуфт, коршиносони Sotheby's бо дархости онҳо ба Тошканд рафта, наққоширо аз ташхис гузарондаанд. "Бар пояи хулосаи ташхиси онҳо, расм 15 миллион евро арзиш дорад ва он моликияти Узбекистон шумурда мешавад", - афзуд Аскархоҷаева.

Вале ба гуфтаи Плужников, "мақомоти Узбекистон мехоҳанд, расмро мусодира кунанд ва бинобар ин, дуруғ мегӯянд". "Бар пояи қоида, давлат бояд расмро аз ман бихарад", - мегӯяд ӯ.

Парвандаи мусодираи асари ҳунарӣ таҳти назорати Додситонии кулли Узбекистон қарор дорад.

Чеченҳои "ҳамҷинсгаро" аз пушти сарашон парронда шуданд

Сокинони Чеченистон Шото-Шамил Акаев ва Аюб Иброҳимов, ки дар "маҳбаси пинҳонӣ" барои "ҳамҷинсгароҳо" дар қаламрави ҷумҳурӣ нигаҳдорӣ мешуданд, 30-юми марти соли 2017 аз фосилаи наздик, аз паси сарашон парронда шуданд.

Дар ин бора нашрияи "Новая Газета" чопи Маскав, рӯзи 23-юми декабр бо такя ба гузориши пизишки қонунӣ хабар дод, ки ҳангоми таҳқиқи Кумитаи тафтишот дарёфт шуд. Кушташудаҳо бо худ чизе надоштанд, аммо фарзияи расмӣ мегӯяд, ки онҳо ҳангоми ҳамла ба ходимони пулис ҳадафи тир қарор гирифтанд.

Бозҷӯии Кумитаи тафтишот бо дархости шаҳрванди Русия, сокини водии Перм Максим Лапунов оғоз шуд, ки ду сол дар Чеченистон зиндагӣ кардааст.

Моҳи октябри соли 2017 ходимони пулиси маҳаллӣ Лапуновро боздошт карда, ба Идораи ҷустуҷӯи ҷиноӣ бурданд ва ду ҳафта ғайриқонунӣ дар таҳхонае нигаҳ доштанд. Лапунов мегӯяд, ӯро барои ҳамҷинсгаро буданаш латту кӯб ва талаб карданд исми чеченҳоеро ошкор кунад, ки бо онҳо ҳамхоба шуда буд. Ӯ дар аризааш ҳамчунин навишт, ки дар таҳхона Акаев ва Иброҳимовро дид.

Тафтишот маълум кард, ки Акаев ва Иброҳимов 6-уми феврали соли 2017 боздошт ва баъди якуним моҳ парронда шуданд.

Рӯзи панҷшанбеи гузашта гузориши нақзи ҳуқуқи инсон дар Чеченистон ба Шӯрои САҲА пешниҳод шуд. Яке аз бандҳои гузориш маъракаи зидди "ҳамҷинсгароҳо"-и чечен буд. Дар ду мавҷи таъқиб садҳо нафар боздошт шуд. Машкук шудан ба тамоюли ҷинсии нафаре ягона асос барои саркӯб кардан буд. Ҳамаи боздоштшудаҳо дар "маҳбаси махфӣ" ҷойгир шуданд. Онҳоро латту кӯб, таҳқиқ ва шиканҷа карданд. Далели содир шудани ҷиноят дар гузориш сабт шудааст.

Дар ин гузориш ҳамчунин рафтори ғайримаъмулии мақомоти Русия нисбат ба ин маърака ва бетамоюлӣ барои тафтиши ин қазияҳо зикр шудааст.

Сарфи назар аз маъракаи густардаи муҷозоти гумонбарҳои ҳамҷинсгароӣ Лапунов танҳо нафарест, ки ба мақомоти тафтишот расман шикоят бурд. Ягон нафар аз чеченҳо дар ин бора ба мақомоти Русия шикоят накарданд. Танҳое онҳоее, ки тавонистанд фирор кунанд, бо ваколатдори ҳуқуқи инсони Русия Татяна Москалкова мулоқот карданд. Онҳо омода буданд бо тафтишот ҳамкорӣ кунанд. Аммо сарфи назар аз муроҷиати расмии Москалкова ба Кумитаи тафтишоти Русия ҳеҷ чорае барои боз кардани парванда дида нашуд.

Туркия ба марзи Сурия нерӯи бештар фиристод

Сарбози Туркия дар гузаргоҳи марзӣ бо Сурия

Туркия ба марзи Сурия нерӯи изофӣ фиристод. Дар ин бора рӯзи 24-уми декабр расонаҳои Туркия хабар доданд. Ба навиштаи расонаҳо, нерӯи изофӣ аз сарбозон ва техникаи низомӣ иборат аст, ки ба минтақаи ҷанубу шарқи Туркия - вилояти Килиси ҳаммарз бо Сурия интиқол ёфт.

Ба навиштаи Нашрияи Hurriyet-и Туркия, қисме аз нерӯҳои ирсолшуда ба минтақаи шимоли Сурия - ноҳияи Ал-Боб ворид шудаанд.

Дар ҳамин ҳол, ба навиштаи расонаҳо, мухолифони мусаллаҳи Сурия, ки аз ҷониби Туркия ҳимоят мешаванд, дар наздикии шаҳри курднишини Манбиҷ дар шимоли Сурия ҷамъ шудаанд.

Манбиҷ дар ихтиёри нерӯҳои мухолифи курдии "Отряди мудофиаи мардумӣ" қарор дорад, ки ин нерӯҳоро Амрико ҳимоят мекунад. Анкара "Отряди мудофиаи мардумӣ"-ро дар ҳамдастӣ бо курдҳои шӯришии Туркия айбдор ва ҷангҷӯёни ин отрядро террорист унвон мекунад.

Ҳафтаи гузашта президенти ИМА Доналд Трамп ғайриинтизор эълон кард, ки артиши Амрико аз Сурия хориҷ мешавад.

Додситонҳо барои мудирони пешин Telia ҷазои сахт талаб карданд

Додгоҳи Стокҳолм

Додситонҳои Шветсия 19 декабр дар додгоҳи Стокҳолм, ки парвандаи мудирони пешини Telia-ро баррасӣ мекард, барои айбдоршавандаҳо ҷазои аз ҳама сахттарро талаб карданд.

Баррасии парвандаи фасодкории мудирони пешини ширкати Telia ҳудуди чаҳор моҳ пеш, 4 сентябр дар додгоҳи Стокҳолм оғоз шуда, 19 декабр ба поён расид.

Дар курсии айбдорӣ се роҳбари пешини ширкати Telia - мудири пешини иҷроия Ларс Нюберг, мудири пешини молӣ ва ноиб-президенти пешин Теро Кивисаарӣ, инчунин мушовири пешини асосӣ дар умури тиҷорати Авруосиё Улӣ Туима нишастаанд.

Ҳар сеи онҳо ба он айбдор мешаванд, ки гӯиё ба хотири ворид кардани ширкати Telia бо бренди маҳаллии Ucell ба бозори Узбекистон ва "ҳимоят" шудан аз тарафи ниҳодҳои давлатӣ ба духтари калонии президенти пешини ин кишвар Гулнора Каримова 350 миллион доллар пора додаанд.

Додситонҳо дар мурофиаи ахир гуфтанд, Теро Кивисаарӣ, ки раванди воридшавии Telia-ро ба бозори алоқаи Узбекистон раҳбарӣ мекард, яке аз чеҳраҳои калидӣ дар нақшаи фасодкории мазкур аст. Айбдоркунандаи давлатӣ аз додрас хост, ӯро 7 солу 9 моҳ аз озодӣ маҳрум кунад.

Қонунҳои Шветсия барои ҷиноятҳои коррупсионӣ аз 6 моҳ то 6 соли зиндонро пешбинӣ мекунанд.

Додситонҳо ҳамчунин барои ду мудири пешини дигари ширкат -- Ларс Нюберг ва Улӣ Туима низ ҳукми зиндонро талаб кардаанд. Бино ба хабарҳо, барои ин ду тан ҳукми камтар аз Кивисаарӣ дархост шудааст.

Дар Узбекистон низ Каримоваро ба ҷиноятҳои молӣ дар ҳаҷми 53 миллион доллар айбдор мекунанд. Додгоҳи Тошканд ӯро ба саркашӣ аз супурдани андоз, дуздӣ, тамаъҷӯӣ ва маҳви ҳуҷҷати ширкатҳои оффшорӣ, ба муҳлати 5 сол аз озодӣ маҳрум кард.

Консулгарии Чин дархости наздикони "маҳбусони Шинҷон"-ро қабул накард

Қазоқистон - Ризбек Тохтасин нома ба консулгарии Чинро қироат мекунад. 24 декбар, 2018

Дар шаҳри Алмато як гуруҳи фаъолони иттиҳодияи ҷамъиятии "ал-Амонат" рӯзи 24 декабр дар назди бинои консулгарии Чин ҷамъ шуданд, то дархостномаеро бо имзои 26 қазоқтабор, ки аз минтақаи Шинҷон баргаштаанд, ба намояндагии Чин супоранд.

Фаъолон мегӯянд, наздикони онҳо дар Чин боздошт шудаанд. Муаллифони нома аз Пекин қатъи таъқибу раҳоии наздиконашонро талаб кардаанд. Вале масъулони консулгарии Чин аз қабули нома худдорӣ карда, гуфтанд, муаллифон аллакай шаҳрвандии Қазоқистонро қабул кардаанд ва минбаъд бояд ба Вазорати умури хориҷии ин кишвар муроҷиат кунанд.

Раҳбари иттиҳодия Рисбек Тохтасин мегӯяд, пештар номаи ҳамсонеро ба Вазорати умури хориҷии Қазоқистон фиристода буданд ва ҳоло мехоҳанд, як номаи дигарро ба масъулони консулгарии Чин диҳанд.

"Ал-Амонат" соли 2007 таъсис ва дар Вазорати адлияи Қазоқистон сабти ном шудааст. Ба гуфтаи Тохтасин, иттиҳодия бо ҳадафи кумак ба қазоқҳои бозгашта аз Чин таъсис ёфтааст.

Дар бораи боздошту ҳабси қазоқтаборон дар Чин аз соли гузашта ба ин сӯ хабар дода мешавад. Қазоқистониҳое, ки наздиконаш дар Чинанд, нишастҳои нишастҳои хабарӣ баргузор карда аз Остона ва Пекин раҳоии хешу пайвандони худро дархост мекунанд. Пекин боздошти дастаҷамъии ақалиятҳоро рад мекунад. Мақомоти Чин фаъолияти "урдугоҳҳо"-и минтақаи Шинҷонро тасдиқ мекунанд, вале онҳоро "марказҳои бозомӯзии сиёсӣ" меноманд, ки гӯиё "барои пешгирӣ аз вуруди экстремизми динӣ ба минтақа" ташкил шудаанд.

Баррасии парвандаи куштори Денис Тен дар Қазоқистон оғоз шуд

Додгоҳи куштори Денис Тен. 25 декабри соли 2018

Додгоҳи шаҳри Алмато субҳи 25 декабр баррасии парвандани куштори варзишгари маъруф Денис Тенро оғоз кард.

Дар курсии айбдорӣ се ҷавон Ормон Қудойбердиев, Нуралӣ Киясов ва Жанар Толибоева нишастаанд. Қудойбердиев ва Киясов дар "авбошӣ" ва "куштор" айбдор мешаванд. Толибоеваро ба он айбдор мекунанд, ки дар бораи куштор ба мақомот хабар надодааст.

Модари Денис – Оксана Тен, ки дар мурофиа ҳузур дошт, акс наворгирии худро манъ кард. Гумонбарон низ гуфтанд, зидди наворгирӣ ҳастанд ва додрас ҳам дархости онҳоро пазируфт.

Парванда аз 38 ҷилд иборат аст. Расонаҳо дар бораи ба додгоҳ ирсол шудани парвандаи куштори варзишгар рӯзи 14 декабр хабар дода буд.

Вазири корҳои дохилии Қазоқистон Калмуханбет Қосимов 25 октябри соли равон хабар дода буд, ки тафтиши ин парванда ба поён расидааст.

Варзишгари маъруфи қазоқ ва барандаи ду медали чемпионати ҷаҳон, аз ҷумла бозиҳои олимпии шаҳри Сочии Русия Денис Тени 25-сола 19 июли соли ҷорӣ дар бемористони шаҳри Алмато вафот кард. Ӯ бо чанд захми корд ба бемористон интиқол ёфта буд. Ба ӯ афроде ҳамла карданд, ки мехостанд, шишаи мошинашро ба яғмо баранд.

"Ифтихори Узбекистон" борои истифодаи допинг муваққатан аз бозиҳо маҳрум шуд

Нахустин қаҳрамони ҷаҳони Узбекистон, соҳиби унвони "Ифтихори Узбекистон" Руслан Нуриддинов бо гумони истифодаи допинг муваққатан аз иштирок дар мусобиқаҳои варзишӣ маҳрум шуд.

Тавре Федератсияи байналхалқии варзиши вазнин (IWF) хабар медиҳад, баъди дубора санҷидани варзишкорон, ки ҳангоми Олимпиадаи Лондон дар соли 2012 баргузор шуда буд, натиҷаҳои Руслан Нуриддинов мусбат баромаданд. Санҷиши дубораи Руслан Нуриддинов нишон дод, ки вай аз доруҳои нерӯафзо истифода кардааст.

Руслан Нуриддинов дар Лондон дар вазни 105 кг. мақоми чаҳорумро соҳиб шуд. Нуриддинов ҳамзамон қаҳрамони олимпии Рио-де-Женейро ва барандаи медали тилои Қаҳрамони ҷаҳон дар соли 2013 аст.

Вай нахустин варзишкори Узбекистон аст, ки унвони қаҳрамони ҷаҳонро дар мусобиқаи Лаҳистон дар октябри соли 2013 соҳиб шудааст. Баъди он мусобиқа ӯро "Ифтихори Узбекистон" ҳам номиданд.

Пештар аз ин Кумитаи байналхалқии Олимпӣ ҳангоми бозтафтиши допинг медалҳои олимпии ду варзишкори ӯзбекистонӣ - Сослан Тигиев (нуқра) ва Артур Таймазовро (тило) бекор кард.

Дар Русия аъзои “Ҳизб-ут-Таҳрир” ба зиндон маҳкум шуданд

Мурофиаи додгоҳии чаҳор тотори Қрим. Симферопол, соли 2016

Додгоҳи низомии Қафқози Шимолӣ чор тотори Қримро барои ширкат дар фаъолияти созмони мамнӯи “Ҳизб-ут-Таҳрир” гунаҳгор эълон кард. Маҳкумшудаҳо барои роҳандозии фаъолияти ин созмони мамнӯъ дар қаламрави шаҳри Боғчасарои минтақаи Қрим муҷрим дониста шуданд.

Додгоҳ ин нафаронро инчунин дар талоши ғасби қудрат гунаҳгор кард. Бар асоси қарори додгоҳ аз рӯзи 24 декабр, Ремзӣ Меметов, ки дар Тоҷикистон таваллуд шудааст, ҳамроҳ бо Рустам Абилтаров ва Зеврӣ Абсеитов ба 9 соли зиндони низомаш сангин маҳкум шуданд. Энвер Мамутов, ки ӯро муассиси гурӯҳи “Ҳизб-ут-Таҳрир” дар Боғчасарой номиданд, ба 17 соли зиндон маҳкум шуд. Ин се нафар ба Қрим аз Узбекистон рафтаанд.

Чор маҳкумшуда ба узвияти созмони мамнӯи динӣ соли 2016 боздошт шуданд. Баъди ғасби нимҷазира дар соли 2014, мақомоти Русия дар қаламрави ин минтақа дар манзили тоторҳои Қрим санҷишу тафтишҳо барпо карданд.

Тафтишот гуфт, ки Мамутов ҳамроҳ бо дигар маҳкумшудаҳо нақшаи барканор кардани ҳукуматро таҳия мекард. Антон Наумлюк, хабарнигори Радио Свобода, ки дар мурофиа ширкат кард, мегӯяд, ки иттиҳоми додситонҳо бар асоси шаҳодати се шоҳиди махфӣ ва як санҷише таҳия шудааст, ки бо фармоиши ФСБ баргузор шуд.

Ҳамаи маҳкумшудаҳо иттиҳоми воридаро эътироф накарданд ва гуфтанд, ки ҳеҷ гоҳ ба созмони террористӣ рабте надоштанд. Онҳо мехоҳанд, ки аз болои ҳукми додгоҳ ба додгоҳи зинаи болоӣ шикоят кунанд. Барои пуштибонии ин чор нафар ба додгоҳ даҳҳо тоторҳои Қрим омаданд.

Тасаллияти Эмомалӣ Раҳмон ба президенти Индонезия. ВИДЕО

Президенти Тоҷикистон Эмомалӣ Раҳмон дар робита бо офати табиии пурқурбонӣ дар Индонезия ба раиси ҷумҳурии ин кишвар изҳори тасаллият кард. Дар барқияе, ки рӯзи 24 декабр ба номи Ҷоко Видодо ирсол шудааст, президенти Тоҷикистон навишт, ки “аз шунидани хабари ҳалокату маҷруҳ шудани шумори зиёди шаҳрвандон” андӯҳгин шудааст.

Рӯзи 24-уми декабр президенти Индонезия Йоко Видодо аз қисмати ғарбии ҷазираи Ява дидан кард, ки шоҳиди шадидтарин зарбаи сунамӣ шудааст. Мавҷи бузурги об, ки бар асари лағжиши зериобии замин ба амал омадааст, боиси фавти камаш 280 нафар ва хасороти зиёди молӣ гардид. Раҳбари Индонезия эътироф кард, ки барои пешгирӣ аз қурбониҳои зиёд, низоми огаҳӣ аз офат зарур аст. Ӯ гуфт:

"Ҳозир мо наметавонем хулоса барорем. Эҳтимол заминҷунбӣ боиси сунамӣ шуда бошад, вале ин дақиқ нашудааст. Дар оянда агентии ҳавосанҷӣ таҷҳизоти огаҳкунанда тақдим хоҳад кард, ки ҳар нафари алоҳидаро аз офат огаҳ мекунад".

Хадамоти наҷоти Индонезия бо истифода аз техникаи вазнин амалиёти наҷот ва поккории минтақаро давом медиҳанд. То субҳи 24-уми декабр ҷасади камаш 280 нафар ёфт шуд. Агентии ҳавосанҷии Индонезия тасдиқ кардааст, ки фурӯрезии бахше аз вулқони Анак Кракатау боиси сунами ё ҳуҷуми мавҷи 2-3 метраи обҳои уқёнуси Ҳинд ба соҳилҳо шуд. Дар натиҷа, дар фоҷеаи шоми 22-уми декабр дар ҷазираҳои Суматра ва Ява даҳҳо нафар осеб дид. Дар ин офат камаш 1 ҳазор каси дигари ҷароҳат бардошта, наздик ба 12 ҳазор нафар ба ҷойҳои амн интиқол ёфтанд.

Хавф аз такрори сунами дар Индонезия
лутфан мунтазир бошед
### Эмбед ###

### Феълан кор намекунад ###

0:00 0:02:17 0:00

Сокинони соҳили Каритаи вилояти Бантени Индонезия иброз доштанд, ки касе онҳоро аз зарбаи сунами огаҳ накард. Мақомот сокинони деҳоти назди обро ба теппаҳо кӯчонидаанд, зеро хавфи сунамии такрорӣ аз байн нарафтааст.

Моҳи сентябри имсол дар натиҷаи заминларза ва сунамӣ дар шаҳри Палу дар ҷазираи Сулавеси - 2500 нафар кушта шуд. 26 декабри соли 2004 сунамии азиме, ки аз Уқёнуси Ҳинд бархост, дар Индонезия, Шри Ланка, Ҳинд ва Таиланд 230 ҳазор нафар ҳалок шуд.

Ҷангҷӯён ба вазорати кори Афғонистон ҳамла карданд

Акс аз бойгонӣ

Шоҳидони айнӣ гуфтанд, ки рӯзи 24 декабр гурӯҳи ҷангиён нахуст як мошини ҳомили бомбаро тарконда баъдан ба як сохтмони ҳукуматӣ дар маркази Кобул, пойтахти Афғонистон ҳамла карданд.

Нусрат Раҳимӣ, сухангӯи вазорати умури дохилӣ гуфт, ки чанд фарди мусаллаҳ вориди сохтмон шуда, бо нирӯҳои амниятӣ, ки ба макони ҳодиса расиданд, вориди даргирӣ шуданд. Дар ин бино вазорати корҳои ҷамъиятӣ ва инчнин вазорати меҳнат, умури иҷтимоӣ ва афроди маъюб ҷойгир аст.

Феълан иттилое дар заминаи хисорот дар даст нест ва ҳамчунин маълум нест, ки масъулияти ин ҳамларо кӣ ба ӯҳда дорад. Як корманди вазорати корҳои ҷамъиятӣ бо номи Ашраф ба хабаргузории AFP гуфтааст, ки ҳамлагарон инчунин ба сохтори ҳамсояи раёсати миллии амният ҳам ҳамла карданд. Басир Муҷоҳид, сухангӯи полиси Кобул хабари ҳодисаро тасдиқ кард, вале аз гуфтани ҷузъиёт худдорӣ намуд.

Марзбонони тоҷику узбек дар Гулистон мулоқот карданд

Дар нахустин ҷаласаи Шӯрои ҳарбии муштараки Қӯшунҳои сарҳадии Тоҷикистон ва Узбекистон, ки рӯзҳои 21-22 декабр дар шаҳри Гулистон (Қайроқуми собиқ) баргузор шуд, лоиҳаи нақшаҳои муштарак ва ҳамкории мақомоти сарҳадии ду кишвар барои соли 2019 муҳокима ва таҳия шуд. Дар ин бора рӯзи душанбе ба Радиои Озодӣ раиси маркази матбуоти Қӯшунҳои сарҳадии КДАМ Муҳаммадҷон Улуғхоҷаев хабар дод.

Ҷаласа бо иштироки фармондеҳи Қӯшунҳои сарҳадии КДАМ Тоҷикистон генерал-полковник Раҷабалӣ Раҳмоналӣ ва фармондеҳи Қӯшунҳои сарҳадии Хадамоти давлатии амнияти Узбекистон генерал-майор Руслан Мирзоев баргузор шуд.

Дар ҷараёни нахустин ҷаласаи шӯрои ҳарбии муштарак масоили марбут ба ҳамкориҳои дуҷониба баррасӣ гардид. Ҷонибҳо ба беҳтар шудани кори комиссияи байниҳукуматӣ оид ба делимитатсия ва демаркатсияи сарҳади давлатии Тоҷикистону Узбекистон ва фаъолияти гурӯҳҳои кории байни мақомоти сарҳадии ҳарду давлат даъват карданд.

Улуғхоҷаев гуфт, ки дар Шӯрои ҳарбӣ вазъи ду сарҳад, инчунин масоили таъмини амният дар сарҳади ин кишварҳо бо Афғонистон баррасӣ шудааст.

Равобити Тоҷикистону Узбекистон моҳи марти соли ҷорӣ баъди сафари президент Шавкат Мирзиёев ба Душанбе ва имзои даҳҳо созишномаи ҳамкорӣ бо Тоҷикистон аз сар гирифта шуд.

Дар парлумон иҷлосияи 17-уми Маҷлиси миллӣ баргузор мешавад

Рӯзи 25 декабр дар Душанбе иҷлосияи ҳабдаҳуми Маҷлиси миллии Маҷлиси Олии Тоҷикистон баргузор мешавад. Дар ин иҷлосия ширкати ҳама аъзои Маҷлиси миллӣ тақозо мешавад. Дар ҷараёни кори иҷлосия ширкати аъзои ҳукумат ҳам дар назар аст.

Рӯзи баъдӣ, 26 декабр қарор аст дар ҷаласаи якҷояи Маҷлиси миллӣ ва Маҷлиси намояндагон – палатаҳои болоиву поёнии парлумони Тоҷикистон президент Эмомалӣ Раҳмон суханронӣ кунад. Паёми президент ба парлумон, ба навиштаи оҷонсии “Ховар”, фарогири самтҳои асосии сиёсати дохилию хориҷии Тоҷикистон хоҳад буд. Бархе манобеи Радиои Озодӣ қаблан гуфтанд, ки президент дар ин паёмаш ба зарурати роҳандозии ислоҳоти иқтисодӣ ва зинда кардани саноату бахши истеҳсолот, инчунин кори бонкҳои Тоҷикистон даъват хоҳад кард.

Навоз Шариф ба 7 соли зиндон маҳкум шуд

Тарафдорони Навоз Шариф аз ҳукми додгоҳ эътироз карданд

Додгоҳи зиддикоррупсионии Покистон рӯзи 24 декабр нахуствазири собиқи ин кишвар Навоз Шарифро дар нигаҳдошти дороиҳое, ки манбаи даромадаш барои ӯ номаълум аст, гунаҳгор ва ӯро ба 7 соли зиндон маҳкум кард.

Додгоҳе дар Исломобод дар ҳукми рӯзи душанбеи худ гуфт, ки Навоз Шариф аз ду иттиҳоми коррупсионие, ки алайҳи ӯ эълон шуда буд, бар асоси як иттиҳом гунаҳгор ва аз рӯи моддаи дигар сафед карда шуд.

Худи Навоз Шариф ҳама иттиҳомоти зидди худро рад мекунад. Моҳи июл Навоз Шариф ба 10 соли зиндон маҳкум шуд ва додгоҳ гуфт, ки ин иттиҳом ба хотири дар шаҳри Лондон доштани хонаи боҳашамате содир мешавад. Навоз Шариф аз болои ин ҳукм шикоят карду бар ивази гаравпулӣ моҳи сентябр ба озодӣ баромад.

Баъди эълони ҳукм, додрас ҳукм кард, ки Навоз Шариф ба зиндони Адиалаи воқеъ дар канораҳои Исломобод бурда шавад. Дар ҳамин зиндон Навоз Шариф аз июл то сентябри соли ҷорӣ нигаҳдорӣ шудааст.

Шариф соли гузашта аз мақоми нахуствазирӣ барканор шуд.

Дар арафаи содир шудани ҳукми додгоҳ Эҳсон Иқбол, раҳбари ҳизби Лигаи мусалмонии Покистон, ки Навоз Шариф узви он аст, гуфт, агар ӯ зиндонӣ шавад, “хеле бад аст”.

Матбуоти Покистон гузориш дод, ки дар атрофи қасри додгоҳ тадбирҳои амниятӣ хеле шадид буд.

Додгоҳи Лондон истирдоди соҳибкори русро рад кард

Алексей Шматко

Додгоҳе дар Лондон гуфт, ки дархости Русия барои истирдоди соҳибкор Алексей Шматкоро рад мекунад. Дар ҳукми рӯзи 23 декабр додгоҳ гуфт, ки агар Шматко ба шаҳри Пенза истирдод шавад, ӯ, ба эҳтимоли зиёд, дар шароите қарор мегирад, ки хилоф бо эъломияи ҳуқуқи башари Аврупо мебошад.

Додгоҳе дар Пенза гуфтааст, ки Шматко дар тақаллуб айбдор мешавад, вале худи соҳибкор гуфтааст, ки вақте ӯ талаби раҳбари ФСБ – Хадамоти амнияти федеролиро барои тақсими тиҷораташ рад кард, алайҳи ӯ парванда боз карданд.

Шматко гуфт, ки соли 2010 ӯро ба ҳукми шартии зиндон маҳкум карданд ва дар замони боздошт латукӯб ва шиканҷа шуд. Ӯ дар азиятҳои худ муфаттиши ФСБ Валерий Токаревро айбдор кардааст. Соли 2011 соҳибкор аз кишвар берун рафт ва соли 2014 аз Бритониё паноҳандагии сиёсӣ дархост кард.

Сайфулислом Қаззофӣ муддаии курсии президентии Либия аст

Сайфулислом (аз чап) ва падараш Муаммар Қаззофӣ

Сайфулислом, писари собиқ раҳбари Либия Муаммар Қаззофӣ, ки мехоҳад дар интихоботи президентии соли 2019 иштирок кунад, аз Русия дархости кӯмак кардааст. Дар ин бора оҷонсии Bloomberg бо такя ба як манбаи худ хабар додааст. Ин манбаъ гуфтааст, ки Сайфулислом бо дасти муовини вазири хориҷаи Русия Михаил Богданов ба унвонии президент Владимир Путин нома фиристодааст. Мулоқоти онҳо моҳи декабр барпо шуд. Сайфулислом аз Русия пуштибонии сиёсӣ дархост кардааст. Дар нома ӯ изҳори умед кардааст, ки Маскав метвонад дар музокирот бо гурӯҳҳои мухталифи сиёсӣ дар Либия нақши миёнҷиро бозӣ кунад. Писари Қаззофӣ инчунин аз Русия кӯмаки молӣ хостааст.

Вазорати хориҷаи Русия ин хабарро шарҳ намедиҳад. Манбаи Bloomberg гуфтааст, ки ҳанӯз Русия намедонад, ки кадом номзадро дар интихобот пуштибонӣ хоҳад кард.

Маи соли 2014, додгоҳи Сайфулислом
Маи соли 2014, додгоҳи Сайфулислом

Интихоботи президентии Либия, ки зери назари СММ ба оғози соли 2019 таъин шудааст, қарор буд аввал моҳи декабр барпо шавад. Мувофиқа бар сари тағйири мӯҳлати баргузории интихобот дар конфронси Палермо даст дод. Дар ин нишаст нахуствазири Русия Дмитрий Медведев ва сарфармондеҳи артиши Либия Халифа Хафтар ширкат карданд. Хафтар бо Маскав ҳамеша дар тамос аст ва яке аз муддаиёни асосии курсии президентӣ ба шумор меравад.

Сайфулислом соли 1972 дар Триполӣ таваллуд шуда, дар мактабҳои олии Либияву Швейсария таҳсил кардааст. Ӯ доктори улуми фалсафа мебошад. Охири солҳои 1990 – аввали 2000-ум ба ҷонибдории баргузории ислоҳоти либералӣ дар кишвар баромад кардаанд. Баъди суқут ёфтани режими падараш Муаммар Қаззофӣ дар соли 2011, раҳбарии гурӯҳи мухолифи ҳукумати муваққатиро ба ӯҳда гирифт, вале базудӣ боздошт шуд. Соли 2015 писари Қаззофиро ба марг маҳкум карданд, вале баъди як сол матбуот хабар дод, ки ӯ афв ва озод шуд. Соли 2018 Сайфулислом Қаззофӣ гуфт, ки номзади интихоботи президентии кишвар мешавад.

Додгоҳе дар Мянмар аризаи бозбинии ҳукми журналистонро баррасӣ мекунад

Чжо Со У (аз чап) ва Ва Лоун

Додгоҳе дар Мянмар аризаи бозбинӣ шудани ҳукми 7 соли зиндони ду хабарнигори оҷонсии Рейтерро баррасӣ кард, ки дар фош кардани маълумоти махфӣ ба ҳангоми амалиёти низомии ҳукуматӣ гунаҳгор шудаанд.

Шаҳрвандони Мянмар - Ва Лоуни 32 ва Чжо Со Уи 28-сола декабри соли 2017 боздошт ва сентябри соли ҷорӣ барои фош кардани асрори давлатӣ ба мӯҳлати 7 соли зиндон маҳкум шуданд. Ин ҳодиса боиси интиқоди шадиди ҷомеаи байналмилалӣ ва фаъолони ҳуқуқи башар шуд.

Вакилони журналистон дар аризае моҳи гузашта аз додгоҳи зинаи болоӣ хостанд, ки ҳукм бо далели набуди ҷурми ҷиноӣ дар амали журналистон ва доштани ангезаҳои сиёсӣ бозбинӣ шавад. Рӯзи 24 декабр вакилон ва додситонҳо дар муҳокимаи беш аз яксоата аз мавқеи худ ҳимоят карданд. Ҳанӯз маълум нест, ки ҳукми нави додгоҳ кай содир мешавад.

Журналистони Рейтер дар бораи амалиёти низомии артиши Мянмар алайҳи беш аз 700 ҳазор мусалмони роҳинҷа гузориш доданд, ки маҷбур шуданд дар Бангладеш паноҳ баранд.

Аун Сан Су Чӣ, яке аз раҳбарони Мянмар гуфт, ки журналистон на барои фаъолияти касбӣ, балки барои содир кардани ҷиноят айбдор шуданд.

Оҷонсии Рейтерс ин ҳукмро ба чолиш кашид, созмонҳои ҳомии ҳуқуқи инсон, аз ҷумла Human Rights Watch, СММ, дигар ташкилони журналистӣ ва давлатҳои ғарбӣ ҳукми додгоҳи Мянмар дар нисбати журналистонро шадидан маҳкум ва озод шудани журналистонро талаб карданд.

Макрон тасмими Трампро барои ихроҷи нирӯҳои ИМА аз Сурия таассуфовар номид

Президенти Фаронса Эммануэл Макрон дар робита ба тасмими ҳамтои амрикоияш Доналд Трамп барои бурунрафти нирӯҳои ИМА аз Сурия ибрози таассуф кард.

Макрон 23 декабр дар як нишасти хабарӣ дар Чад гуфт, "ҳампаймон бояд боэътимод бошад". "Тасмими гирифташуда дар бораи Сурия хеле таассуфовар аст", - изҳор дошт ӯ.

Президенти ИМА рӯзи чаҳоршанбеи гузашта эълом кард, ки нирӯҳои Амрико тайи ду моҳи оянда аз Сурия бароварда мешаванд. Ба гуфтаи Трамп, нигаҳдории низомиёни ИМА дар минтақа харҷи зиёдеро талаб мекунад ва ҳузури онҳо дар Сурия ба амнияти миллии Амрико нафъе надорад. Низомиёни амрикоӣ дар ҷангҳо зидди гуруҳи тундрави "Давлати исломӣ" курдҳо ва мухолифони мусаллаҳро дастгирӣ мекарданд.

Вазири дифои ИМА Ҷеймс Мэттис ҳафтаи гузашта эълом кард, ки аз мақоми худ истеъфо медиҳад, чун бо тасмими Трамп розӣ нест.

Вакили зиндонии қирғиз аз шаҳрвандии Қазоқистон маҳрум шуд

Вакили пешини порлумони Қирғизистон Дамирбек Асилбек уулу, ки бо гумони қочоқбарӣ боздошт ва дар маҳбаси шаҳри Алмаатои Қазоқистон нигаҳдорӣ мешавад, аз шаҳрвандии Қазоқистон маҳрум ва шиносномааш бекор гардид. Дар ин бора рӯзи 22 декабр бахши Қирғизии Радиои Озодӣ хабар дод.

Дар додгоҳ вай ба ҳайси шаҳрванди Қирғизистон ҳозир шуд.

Асилбек уулу аз зумраи 29 гумонбарест, ки 15 ва 16 феврали соли равон дар натиҷаи як амалиёти муштараки мақомоти қудратии Қазоқистон дар вилоятҳои Қазоқистони Ҷанубӣ, Ҷамбул ва шаҳри Алмаато бо ҷурми қочоқи мол боздошт шуданд. Яке аз онҳо Дамирбек Асилбек уулу, вакили порлумони Қирғизистон аз ҳизби "Қирғизистон" буд.

Вазорати умури хориҷии Қазоқистон пештар гуфта буд, ки Асилбек уулу шиносномаи қазоқӣ дорад. Вале наздикону пайвандони Асилбек уулу хабари шаҳрвандии дуввуми ӯро бофта номиданд.

Комиссияи марказии интихобот ва раъйпурсии Қирғизистон 16 апрели соли равон мандати вакилии Дамирбек Асилбек уулуро ба далели доштани шаҳрвандии Қазоқистон бекор кард. Баррасии парвандаи вакили пешини қирғиз дар додгоҳи Алмаато 19 октябри соли ҷорӣ шуруъ шуд.

Дар Тошканд хонаҳои сохти қадима тахриб мешаванд

Сарвазири Узбекистон Абдулло Орипов хабар дод, ки тамоми хонаҳои қадимӣ дар шаҳри Тошканд тахриб ва ба ҷои онҳо биноҳои нав бунёд карда мешаванд. Дар ин бора рӯзи 24 декабр бахши Узбекии Радиои Озодӣ хабар дод.

Ӯ ҳангоми суханронӣ дар бораи рушди босуръати бахши сохтмони Узбекистон рӯзи 22 декабр суханони муовини раиси Кумитаи меъморӣ ва сохтмони кишвараш Козим Тулягановро иқтибос овард.

"Туляганов, ки дар гузашта муовини аввали сарвазир, шаҳрдори Тошканд, мудири иттиҳодияи "Тошкандстрой" буд, дирӯз гуфт, ҳатто дар беҳтарин даврони Иттиҳоди Шӯравӣ дар Тошканд дар ҳаҷми 1 миллион метри мураббаъ манзили зист бунёд ва ба истифода дода нашудааст. Мо сол ба поён нарасида, аллакай ин рақамро гузаштем", - изҳор дошт Орипов.

Ба гуфтаи ӯ, президенти Узбекистон Шавкат Мирзиёев дастур додааст, ки ба ҷои хонаҳои қадимии пойтахти кишвараш биноҳои наву замонавӣ бунёд карда шавад. "Президент гуфт, биноҳо бояд бо оби гарму низоми гармидиҳӣ таъмин бошанд. Мардум барои омода кардани ғизо дигар набояд аз чӯбу ангишт истифода кунанд", - афзуд сарвазир.

Орипов мегӯяд, Мирзиёев ҳангоми боздид аз хонаҳои ноҳияи Сергелии Тошканд ӯро сарзаниш кардааст, ки чаро бо мошинҳои либосшӯӣ таъмин нестанд.

"Президент гуфт, натавонистед, хонаҳоро бо мошинҳои либосшӯӣ таъмин кунед? Ӯ метавонад бихарад? Шавҳараш ба ӯ мехарида бошад? Чаро ту ҳамчун раиси ҳукумат ба ин масъала диққат намедиҳӣ? Албатта, ин корҳоро анҷом хоҳем дод. Президент ошкоро намегӯяд, ки барои бонувон, вале дар ҳама суханҳояш таваҷҷуҳ ба бонувон дида мешавад", - гуфт Орипов.

Ёдрас мешавем, президенти Узбекистон 21 декабр аз биноҳои навбунёди ноҳияи Сергелӣ боздид кард.

Дар Эрон вакили мунаққиди ҳукумат аз зиндон озод шуд

Фарҳод Майсамӣ, Насрин Сутуда ва Ризо Хандон

Фаъоли эронӣ Ризо Хандон, ҳамсари ҳомии ҳуқуқи инсон Насрин Сутуда аз зиндон раҳо шуд. Дар ин бора вакили дифои Хандон рӯзи 23 декабр дар саҳифаи Фейсбукаш хабар дод. Ҳуқуқшинос Муҳаммад Муқимӣ навишт, ки дар паи озод шудани Хандон, хонум Сутуда ва фаъоли дигар Фарҳод Майсамӣ ба гуруснанишинӣ хотима доданд. Муқимӣ гуфт, ки Хандон рӯзи 23 декабр ба озодӣ баромад, вале ҷузъиёти бештаре надод.

Аз ҷумла нагуфт, ки вазъи саломатии ӯ чӣ гуна аст ва бар асоси кадом шарту шурут озод шудааст. Хандон рӯзи 4 декабр ва баъди он боздошт шуд, ки дар саҳифаи Фейсбукаш аз мавридҳои поймол шудани ҳуқуқи инсон дар Эрон, ҳабси ҳомиёни ҳуқуқи инсон ва таъқиби бонувоне, ки зидди муқаррароти пӯшидани либоси исломӣ садо баланд мекунанд, интиқод кард. Ба Ризо Хандон иттиҳоми фаъолиятҳои хилоф бо манфиатҳои миллӣ ва таблиғи фаъолиятҳои зидди ҳиҷобпӯшии занон таҳдид мекард.

Суруди нави президенти Туркманистон. Ин бор бо забони олмонӣ

Президенти Туркманистон Қурбонгулӣ Бердимуҳаммадов боз ҳамроҳи наберааш Каримгулӣ ба саҳна баромада, ин бор суруди нави эҷодкардаашро бо се забон иҷро карданд.

Бино ба иттилои расонаҳои расмии Туркманистон, таронаи "Орзу"-ро президенту наберааш 21-уми декабр дар чорабинии бахшида ба Соли нав дар маркази "Мизон"-и Ишқобод суруданд. Матни сурудро президенти Туркманистон навишта, наберааш Бердимуҳаммадови хурдӣ ба он оҳанг бастааст.

"Бо сабки замонавии худ фарқ мекард ва бо се забон -- туркманӣ, англисӣ ва олмонӣ иҷро шуда, бо оҳангу калимаҳои зебояш ба дили тамошобинон роҳ ёфт", - навиштааст расонаи расмии "Туркманистони Асри Тилоӣ".

Дар барномаи консертии президенту наберааш аъзои ҳукумат, порлумон, намояндагони мақомоти низомиву ҳифзи ҳуқуқ, вазоратҳо, созмонҳои ҷамъиятӣ, дипломатҳои хориҷиву дохилӣ ва ҳунармандон иштирок доштанд.

Баҳори соли равон низ суруди "Қарақум" дар иҷрои президенти Туркманистон "вокунишҳои гарм" ба бор оварда, мавриди таваҷҷуҳи расонаҳои расмӣ қарор гирифту ба шабакаҳои иҷтимоӣ низ роҳ ёфт. Пеш аз ин, суруди дигари ӯ "Ба пеш, ба пеш, танҳо ба пеш, Туркманистони азиз!" барои он ки дар як вақт онро беш аз 4 ҳазор одам хонданд, шомили Китоби рекордҳои Гиннес гашт.

Ёфтҳои бештар

Гузоришҳои видеоӣ

Марги шубҳабарангеҳи сарбози 20-сола дар Роғун
лутфан мунтазир бошед
### Эмбед ###

### Феълан кор намекунад ###

0:00 0:00:16 0:00
XS
SM
MD
LG