Пайвандҳои дастрасӣ

Хабари нав

Хабарҳо

Украина танҳо ба шаҳрвандони худ иҷозаи сафар ба Қримро медиҳад

Петр Порошенко

Хадамаоти марзбони Украина рӯзи 29 ноябр гуфт, ки дар пайи эълони ҳолати низомӣ сафар ба Қрими ишғолшуда танҳо бо санадҳои кишвари Украина имконпазир аст. Ҳолати низомӣ, ки қарор аст 30 рӯз идома кунад, баъди он эълон шуд, ки Русия киштиҳои Украинаро дар Баҳри Сиёҳ тасарруф ва маллоҳони украиниро боздошт кард.

Субҳи имрӯз президенти Украина Петр Порошенко аз НАТО даъват кард, ки барои кумак дар ҳимояи Украина ба баҳри Азов киштӣ фиристад.

Ӯ гуфт, ки президенти Русия Владимир Путин худро "Иператори Руссия" ва Украинаро "мустаъмара"-и Русия мебинад.

Президент Порошенко дертар дар твиттер навишт, ки Киев барои шаҳрвандони Русия дар Украина маҳдудият ҷорӣ мекунад.

Равобити Маскав ва Киев моҳи марти соли 2014, баъди ишғоли нимҷазираи Қрим аз тарафи Русия ва кумаки Маскав ба ҷудоиталабони шарқи Украина, хароб шуд. Аз моҳи апрели соли 2014 дар низои Украина беш аз 10 ҳазор нафар кушта шуд.

Бачаи бабре дар маркази шаҳр гаштугузор мекард. ВИДЕО

Акс аз бойгонӣ

Бачаи бабре, ки чанд рӯз пеш ногаҳон дар кӯчаҳои серодами шаҳри Шимлуи Ҳиндустон пайдо шуд, сокинони маҳаллиро ба даҳшат овард, вале аз онҳо дида ин ҷонвари нодир бештар ваҳшатзада шуд. Ҳангоми фирор аз маҳалли серодам зери як мошине дар майдони канори додгоҳи шаҳр барои худ паноҳгоҳ интихоб кард.

Эҳтимолан, бачаи бабр дар ҷустуҷӯи модараш ба шаҳр ворид шуд. Шаҳри Шимлу замоне пойтахти тобистонаи мустамликадорони Бритониёи Кабир ва бешазорҳояш макони зисти бабру дигар ҷонварҳои нодир буд.

Мақомот баъди муддате ҷангалбонҳои мамнуъгоҳи маҳаллиро даъват карданд ва мутахассисон бабрбачаро аз зери мошин берун оварда ва дасти байторон супурданд. Феълан ин гурбаи ваҳширо пушти панҷара дар макони амн ва таҳти назорат қарор додаанд.

Бабраки раҳгумзада як шаҳрро ба по хезонд
лутфан мунтазир бошед
### Эмбед ###

### Феълан кор намекунад ###

0:00 0:00:51 0:00

Фиристодаи ИА барои музокироти густариши равобит ба Бишкек рафт

Петер Буриан

Намояндаи вежаи Иттиҳоди Аврупо дар умури Осиёи Марказӣ Петер Буриан бо ҳадафи баррасии роҳҳои рушди ҳамкории иттиҳод бо Қирғизистон вориди Бишкек шуд.

Дафтари намояндагии Иттиҳоди Аврупо дар Бишкек рӯзи 29 ноябр гуфт, ки Буриан заминаҳои ҳамкории иттиҳод бо Қирғизистонро бо раиси порлумон Достонбек Ҷумъабеков, нахуствазир Муҳаммадқулӣ Абдулғозиев ва вазири умури хориҷӣ Чингиз Айдарбеков баррасӣ мекунад.

Мулоқоти Петер Буриан ҳамчунин бо намояндагони ҷомеаи маданӣ ва дипломатҳои хориҷӣ барномарезӣ шудааст. Сафари қаблии Буриан ба Қирғизистон моҳи феврал, ду моҳ баъди оғози музокироти ин кишвар бо Иттиҳоди Аврупо дар бораи қарордоди нави дуҷонибаи ҳамкорӣ, ҷараён гирифт.

Иттиҳоди Аврпуо моҳи декабри соли 2017 эълон кард, ки созишномаи нав санади соли 1999-ро иваз хоҳад кард, ки Иттиҳоди Аврупо ва Қирғизистон имзо карда буданд. Федерика Моғеринӣ - раҳбари сиёсати хориҷии Иттиҳоди Аврупо баъди сафари моҳи нобяри соли гузашта ба Бишкек ин қарордодро "баланпарвозона" унвон карда буд.

Иттиҳоди Аврупо ва кишвари дигари Осиёи Марказӣ - Қазоқистон, созишномаи пешбурди ҳамкориҳои танготангро моҳи декабри соли 2015 имзо карданд.

Ҳарду кишвар- Қазоқистон ва Қирғизистон бо Маскав пайванди наздик доранд ва ба созмони таҳти назорати Маскав -Иттиҳоди АвроОсиё шомил шудаанд.

Арзиши нафти Brent дар бозор аз марзи 58 доллар поён рафт

Субҳи рӯзи панҷшанбе арзиши як бушка нафти навъи Brent бори аввал аз 25 октябри соли 2017 аз марзи 58 доллар поён рафт ва бинобар натиҷаи муомилот то баъд аз зуҳр дар ҳамин сатҳ боқӣ монд.

Рӯзи гузашта президенти Русия Владимир Путин гуфт, ки қиммати бушкаи нафт дар ҳудуди 60 доллар барои кишвараш қобили қабул аст. Ба гуфтаи ӯ, бахши хароҷоти буҷаи Русия бо назардошти 40 доллар таҳия шудааст.

Коҳиши босуръати нархи ин навъи энержӣ нимаи аввали моҳи октябр мушоҳида шуд. Аввали моҳи гузашта нархи як бушка нафти Brent беш аз 82 доллар буд. Дар камтар аз ду моҳ Brent сеяки арзишашро гум кард. Коҳиши феълӣ босуръаттарин дар се соли ахир ба шумор меояд.

Дар як соли ахир нархи нафт дар бозори ҷаҳонӣ бинобар нигарониҳо аз таҳримҳои ИМА зидди Эрон ва ҳамчунин тааҳуди кишварҳои ОПЕК барои кам кардани истеҳсолот боло рафт. Таъғироти ногаҳонӣ дар бозор ба думболи пахши хабарҳо аз афзоиши истеҳсоли нафти хоми Амрико ба миён омад. Гузашта аз ин маълум шуд, ки афзоиши истеҳсоли нафт дар се кишвар - Арабистони Саудӣ, ИМА ва Русия камбуди эҳтимолии нафти Эронро пурра мепӯшонад.

"Интихоботи Гурҷистон одилона, аммо Зурабишвилӣ мавриди алоқаи мақомот буд"

Саломе Зурабишвилӣ

Даври дуюми интихоботи президентии Гурҷистон пуррақобат буд ва ҳарду номзад тавонистон маъракаи худро озодона ба роҳ монанд. Аммо яке аз номзадҳо бартарии бештар дошт ва табиати манфии маърака аз ҳарду тараф ба раванди интихобот таъсир гузошт. Ин аст хулосаи гузориши ибтдоии нозирони Идораи равандҳои демократӣ ва ҳуқуқи башари Созмони Амният ва Ҳамкории Аврпуо.

Дар гузориш гуфта нашудааст, ки мақомот ба кадом номзад алоқамандии бештар нишон доданд ва ба ӯ "бартарии аз ҳад беш" доданд, аммо ба эҳтимоли қавӣ сухан аз боби Саламе Зурабишвилӣ аст, ки ҳизби ҳокими "Орзӯи гурҷӣ" аз ӯ пуштибонӣ мекард.

Бар поияи натиҷаҳои аввалияи интихобот, дар овоздиҳии рӯзи чоршанбе маҳз Зурабишвилӣ пирӯз шуд .Ӯ аз рақиби худ Григол Вашадзе бо дастикам 20 дарсади райъҳо пеш гузашт.

Саламе Зурабишвилӣ гуфт, ки пирӯзӣ дар интихобот "пирӯзии Аврпуо" аст ва ҳамзамон афзӯд, ӯ аввалин занест, ки раҳбари давлати Гурҷистон интихоб шудааст. Вашадзе, ки тарафдорони президенти пешин Михайил Саакашвилӣ аз ӯ пуштибонӣ мекарданд, мақомотро ба тақаллуб ва фишор ба овоздиҳандаҳо муттаҳам кард. Ба гуфти ӯ, ҳизби "Орзӯи гурҷӣ" ба хотири пирӯзӣ бо олами ҷиноӣ созиш кард. Тарафдорони Вашадзе мехоҳанд, ки бегоҳи панҷшанбе намоиши эътирозӣ баргузор кунанд.

СММ аз музокироти бенатиҷаи Остона оиди Сурия хабар дод

Стаффан де Мистура дар музокироти Сурия

Русия, Туркия ва Эрон натавонистанд дар музокироти ҳалли сиёсии низои Сурия, ки дар Остона ҷараён дошт, пешрафт кунанд. Дар ин бора фиристодаи вежаи Созмони Милали Муттаҳид дар умури Сурия Стаффан де Мистура рӯзи 29 ноябр хабар дод.

Ба гуфтаи Reuters, Мистура бо таассуфи амиқ гуфт, ки тарафҳо натавонистанд дар робита ба таъсиси кумитаи Қонуни асосии Сурия созиш кунанд.

Қарор буд ин сохтор якҷо бо Мистура тарҳи нави Қонуни асосиро таҳия кунад. Ниҳоди машваратӣ бояд 150 кафилро аз тарафи ҳукумат ва мухолифин баҳам биёрад. Баъди таъсиси кумита, на пештар аз он, оғози музокироти Женева таҳти раҳбарии СММ дар назар аст.

Чанде пеш Стаффан де Мистура гуфта буд, ки дар сурати таъсис нашудани кумита то охири соли равон, аз талошҳояш ҷиҳати таъсиси он даст мекашад.

Раванди сулҳсозӣ барои Сурия моҳи январи соли гузашта бо ибтикори Русия оғоз шуд. Ҳадафи аслии он - анҷоми ҷанги шаҳрвандӣ дар Сурия гуфта шудааст. ИМА борҳо Маскав ва Димишқро барои музокироти бенатиҷаи Остона танқид кардааст. Намояндаи Департаменти давлатии ИМА Ҳезер Нойерт гуфтушуниҳои Остонаро "кори бефоида" номид. Нокомии дипломатии ахир дар пасманзари ташаннуҷ дар канораҳои Ҳалаб ҷараён гирифт. Барои бори аввал дар чанд моҳи ахир ҳамлаҳои ҳавоӣ дар ин минтақа дубора оғоз шуданд.

Дар Узбекистон ҳабси кормандони Оҷонсии муҳоҷирати хориҷӣ идома дорад

Кормандони Идораи муҳоҷирати хориҷии Узбекистон

Боздошти роҳбарият ва кормандони Оҷонсии муҳоҷирати кории хориҷии Узбекистон дар пайи ришваситонӣ аз муҳоҷирон, фаъолияти ин оҷонсиро фалаҷ кард.

Беш аз 3 ҳазор муҳоҷири Узбекистон, ки қасди муҳоҷирати корӣ ба Кореяи Ҷанубиро доштанд, ҳамакнун аз ин сафар маҳрум шуданд.

Ба гуфтаи мақомоти Вазорати меҳнат ва шуғли аҳолии Узбекистон, рӯзи 27 ноябр дар Оҷонсии муҳоҷирати хориҷии ин кишвар ҳабси масъулон идома доштааст.

"Имрӯз панҷ нафари дигарро боздошт карданд. То кунун дақиқ нест, ки мақомоти Оҷонсии муҳоҷирати хориҷӣ аз 3 ҳазор шаҳрванд чи қадар маблағ гирифтаанд", - гуфт як манбаъ аз Тошканд.

Ба иттилои мақомоти Узбекистон, дар натиҷаи созиши ҳосилшуда миёни ин кишвар ва Кореяи Ҷанубӣ, Сеул ваъда дода буд, ки 5 ҳазор узбекистониро бо кор таъмин мекунад.

Сенати ИМА мавқеи нарми Кохи Cафед дар баробари Риёзро танқид кард

Сенатор Линдси Грэм

Сенаторҳои Амрико рӯзи чоршанбе мавқеи маъмурияти Доналд Трампро дар робита ба Арабистони Саудӣ, баъди куштори журналист Ҷамол Хошуқҷӣ, танқид карданд.

Ҷамол Хошуқҷӣ моҳи гузашта дар консулгарии Саудӣ дар Истамбул кушта шуд ва дар куҷо будани ҷасадаш ҳоло маълум нест.

Рӯзи гузашта дар нишасти Сенат намояндагони аршади маъмурияти президент - вазири умури хориҷӣ Майк Помпео ва раҳбари Пентагон Ҷеймс Мэттис гузориш доданд. Онҳо бар сари муҳим будани шарикии Вашингтон бо Риёз, аз ҷумла дар заминаи суботи Ховари Миёна ва муқовимат ба Эрон, таъкид карданд.

Вазирони ИМА ҳамчунин гуфтанд, ки ҷомеаи истихбороти Амрико дар бораи даст доштани валиаҳди Саудӣ Муҳаммад бин Салмон дар барномарезии ин куштор шавоҳиди мустақим надорад.

Суханони вазирон на танҳо сенаторҳои демократ, балки ҷумҳурихоҳонро низ қонеъ накард ва онҳо аз ин ноумед шуданд, ки раҳбари Идораи Марказии Истихборот Ҷина Ҳаспел дар нишаст иштирок накард.

Дар натиҷа, Сенат бо аксари овоз пешнависи қатъномаеро қабул кард, ки дар он аз маъмурияти Кохи Сафед талаб шудааст, дигар ба амалиёти Саудӣ дар Яман кумак накунад.

Арабистони Саудӣ ва шариконаш якҷо бо ҳукумати Яман алайҳи ҳусиҳо, ки Эрон аз онҳо пуштибонӣ дорад, амалиёт пеш мебаранд. Сенаторҳо ба теъдоди бузурги қурбониҳо дар байни аҳолии мулкии Яман, аз ҷумла дар натиҷаи бомбаборонҳо, ишора карданд. Тарҳи ниҳоии санад рӯзҳои наздик тасвиб мешавад.

Президенти ИМА Доналд Трамп пештар ба аҳамияти равобит бо Риёз таъкид кард ва гуфт, ки куштори Ҷамол Хошуқҷӣ наметавонад ба қатъи робитаҳо сабаб шавад.

Киев баъди ғасби киштиҳояш ба Додгоҳи байналмилалӣ шикоят бурд

Эьтирози украиниҳо алайҳи Русия

Украина баъди ғасби киштиҳояш аз сӯи марзбонони Русия дар таърихи 24-уми ноябр ба Додгоҳи байналмилалии СММ дар умури ҳуқуқи баҳрӣ шикоят бурд.

Дар ин бора сомонаи Вазорати корҳои хориҷии Украина рӯзи 29-уми ноябр хабар дод. Дар хабар гуфта шудааст, ки феълан шикояти Украина дар ҳоли баррасӣ қарор дорад.

Дар изҳороти Вазорати корҳои хориҷии Украина омадааст, Русия ба "дунболагирии табъизомез"-и киштиҳои украинӣ ва хориҷӣ, ки мехоҳанд гулугоҳи Керчро убур кунанд, идома медиҳад.

Марзбонони Русия рӯзи 25-уми ноябр се киштии ҳарбии Украинаро тасарруф карданд. 24 маллоҳ боздошт ва баъдтар додгоҳи Қрими ишғолшуда онҳоро то ду моҳ ҳабс кард. Мақомоти Русия маллоҳони Украинаро дар марзшиканӣ айбдор мекунанд.

Ба дунболи ин таҳаввулот, ки Киев онро тавтеаи Русия унвон кардааст, президенти Украина дар қаламрави кишвар ҳолати низомӣ эълон кард.

Туркманистон меъёри фурӯши орд ба аҳолиро коҳиш дод

Камбуди орд дар Туркманистон

Дар мағозаҳои давлатии Туркманистон меъёри фурӯши орд бо нархи муайянкардаи давлатӣ коҳиш ёфт.

Хабарнигори бахши туркмании Радиои Озодӣ арзиш ва меъёри нави фурӯши ордро дар вилоятҳои Лебап, Дашоғуз ва Марӣ муқоиса кард. Ба гуфтаи ӯ, то ин замон дар мағозаҳои давлатӣ 1 сокин ҳақ дошт 4-5 килограм орд харидорӣ кунад, аммо ҳоло ордро вобаста ба шумори аъзои оила мефурӯшанд.

"Барои ҳар оила бо нархи муайянкардаи давлат вобаста ба шумори аъзои оила харидани 8-12 килограм орд иҷозат шудааст", - гуфт хабарнигор.

Дар мағозаҳои давлатии Туркманистон 1 кило орд 2 манат (муодили тақрибан 5 сомонӣ) арзиш дорад. Ин нархро давлат муайян кардааст. Қимати орд дар мағозаҳои хусусӣ ба маротиб гаронтар аст.

Сокинони Туркманистон сар аз моҳи декабри соли гузашта ба камбуди орд рӯ ба рӯ шудаанд.

Харҷи бунёди "шаҳри ҳушманд"-и Тошканд $2,5 млрд муайян шуд

Як ширкати сингапурӣ бо харҷи 2,5 миллиард доллар дар вилояти Тошканди Узбекистон "шаҳри ҳушманд" месозад.

Ба иттилои расонаҳои маҳаллӣ, тафоҳумномаи сохтмон байни ширкати Universal Success Enterprises ва ҳукумати Узбекистон дар нахустин форуми байналхалқии сармоягузорӣ имзо шуд. Ин форум рӯзҳои 19-21-уми ноябр дар шаҳри Тошканд баргузор гардид.

Интизор меравад, ки лоиҳа то охири соли 2021 амалӣ шавад.

Ширкати Universal Success Enterprises дар сохтани "шаҳрҳои ҳушманд" таҷрибаи зиёд дорад. Ба вижа, ин ширкат лоиҳаи Kolkata West International City ва Dholera Special Investment Region-ро дар Ҳиндустон сохтааст.

Вакли қирғиз ба тафтиши дороиҳои Отамбоев даъват кард

Алмосбек Отамбоев ва Исо Омурқулов

Вакили порлумони Қирғизистон Исо Омурқулов гуфт, бояд манбаи дороиҳои президенти пешини ин кишвар Алмосбек Отамбоев санҷида шавад.

"Наметавонам бигӯям, ки Отамбоев чи қадар сарват дорад. Бар пояи қонун, ҳар мансабдори давлатӣ бояд даромад ва дороиҳои худро дар эъломия қайд кунад. Агар маълумоти нодуруст диҳад, ба ҷавобгарӣ кашида мешавад. Бояд санҷид, ки даромадҳои ӯ аз кадом ҳисобанд. Агар аз ҳисоби ширкате аст, бояд ҳисоботи даромад, харҷ ва ҳаҷми маҳсулотро дошта бошад. Агар бидуни ин ҳама шахс гӯяд, ки даромаде дорад, бояд онро санҷид", - афзуд Омурқулов.

Ба гуфтаи и вакил, сухан аз миллионҳо доллар меравад. "Оё ин қадар даромад дар як муддати кутоҳ имкон дорад? Ин масъала саволҳоеро ба миён меорад. Бинобар ин, бояд санҷид", - изҳор дошт вакили қирғиз.

Президенти пешини Қирғизистон Алмосбек Отамбоев борҳо гуфта буд, ки пеш аз президент шуданаш миллионер буд. Ӯ ахиран бо телевизиони "Апрел" дар бораи манбаи даромадҳои худ муфассал суҳбат кард.

Додситонии кулли Қирғизистон 23 ноябр ба Кумитаи давлатии амнияти миллии ин кишвар дастур дод, ки даромади Отамбоев аз ҳисоби фурӯши тиҷораташ дар Туркияро тафтиш кунад.

Пирӯзии Зурабишвилӣ дар даври дувуми интихоботи Гурҷистон

Саломе Зурабишвилӣ

Дар даври дувуми интихоботи президентии Гурҷистон Саломе Зурабишвилӣ аз ҳизби "Орзуи гурҷӣ" баранда эълом шуд.

Бар пояи ҳисоби тақрибан 100%-и варақаҳои овоздиҳӣ 59 дар сади раъйдиҳандагон аз Зурабишвилӣ ҷонибдорӣ кардаанд. Танҳо 40% ба Григол Вашадзе аз ҳизби "Нерӯ дар иттиҳод" раъй додаанд.

Бино ба маълумоти пешакӣ, иштироки раъйдиҳандагон дар даври дувуми интихоботи президентии Гурҷистон, ба ҷуз аз онҳое, ки дар хориҷ раъй доданд, 56%-ро ташкил медиҳад. Ба огаҳии Комиссияи марказии интихоботи Гурҷистон, Саломе Зурабишвилӣ тақрибан дар тамоми шаҳрҳои бузурги ин кишвар, аз ҷумла Тифлис, Кутаисӣ, Потӣ, Батумӣ, Зугдидӣ ва Горӣ аксари раъйи мардумро ба даст овардааст.

Зурабишвилӣ ва Вашадзе дар гузашта вазири умури хориҷии Гурҷистон буданд. Банди асосии барномаи пешазинтихоботии Зурабишвилӣ шомил шудани Гурҷистон ба НАТО ва иттиҳоди сулҳомези кишвар аст. Номзадии Вашадзеро эътилофи мухолифин ба раҳбарии “Ҳаракати ягонаи миллӣ”-и президенти пешини Гурҷистон Михаил Саакашвилӣ пешниҳод карда буд.

Дар даври аввали интихобот низ Зурабишвилӣ баранда эълом шуд, вале мухолифон ҳукуматро ба кушиши сохтакорӣ айбдор карданд.

Президенти Гурҷистон барои шаш сол интихоб мешавад. Ин охирин раъйдиҳӣ аст, ки президент мустақиман интихоб мешавад: дар оянда роҳбари давлатро аъзои порлумон ва намояндагони мақомоти маҳаллӣ муайян хоҳанд кард.

BBC: Муфаттиши кушташуда "парвандаи чиптаҳо"-ро таҳқиқ мекард

Муфаттиши Вазорати корҳои дохилии Русия Евгения Шишкина, ки моҳи гузашта дар Маскав кушта шуд, парвандаи тақаллубии билетҳои қатори Роҳи оҳани Русияро таҳқиқ мекард. Дар ин бора рӯзи 28-уми ноябр Би-би-сӣ хабар дод.

Ба гуфтаи ин расона, бинобар мавқеи қотеи Шишкина шаст мавриди ҷиноят дар минтақаҳои мухталифи Русия дар як парванда ҷамъоварӣ шуд. Ин ҳолат ба тафтишот иҷозат медиҳад, ки барои ҷинояти дастҷамъона ҷазои сангин талаб кунад.

Бар пояи далелҳое, ки Евгения Шишкина ошкор кард, ҷинояткорон сохтори электронии хадамоти фурӯши билетҳоро шикаста, қимматарин билетҳоро мехариданд ва баъдан онҳоро ба кассаи истгоҳҳои роҳи оҳан месупурданд.

Хисороти умумии 31 ширкат беш аз 17 миллион рубл ҳисоб шудааст. Чанд ҳафта баъди куштори Шишкина мурофиаи се гумонбари қазия: барномсоз Кирилл Калабухов, Андрей Жданов ва Максим Матюшев оғоз шуд.

Евгения Шишкина аз охири соли гузашта таҳдид дарёфт мекард. Дар онҳо аз муфаттиш талаб мешуд, ки тафтишоти қазияи "чиптаҳо"-ро қатъ ва боздоштшудаҳоро озод кунад. Дар ин бора писари муфаттиш хабар дод. Он замон Шишкина аз ҳакер Максим Матюшев гумонбар шуд, ки ҳоло аз ҷавобгарҳои аслии парванда аст.

Аммо Алексей Карабанов, вакили Шишкина мегӯяд, муаллифи таҳдидҳо Ярослав Сумбаев аст, ки дар ҳоли фирор қарор дошт. Моҳи ноябр ӯро дар Тбилиси боздошт карданд ва бояд истирдод шавад. Сумбаев ҳамлаҳои ҳакериро эътироф мекунад, аммо мегӯяд дар куштори муфаттиш даст надорад. Ӯ аз Гурҷистон паноҳгоҳи сиёсӣ хостааст.

Рӯзи 10-уми октябр Олег Шишкин, ҳамсари муфаттиш Евгения Шишкина, ӯро бо захмҳои сангин дар наздикии маҳалли зисташон пайдо кард. Муфаттиш то расидани мошини "Ёрии таъҷилӣ" вафот кард. Аз даҳҳо дурбини назоратии атроф танҳо яке кор мекард. Ин дурбин гумонбари ҳамларо сабт кардааст, ки аз ҷойи ҳодиса фирор мекард. Ин мард шими ҷинс, болопӯш ва дар чеҳрааш маскаи беҳдоштӣ пӯшида буд.

Пештар аз ин нашрияи "Новая Газета" навишт, ки куштори Евгения Шишкина ба фасод дар фурӯши электронии билети роҳи оҳан рабт дорад. Ба навиштаи "Коммерсант" Шишкина ҳамчунин бо парвандаи тақаллуби ҷоизапулии "Аэрофлот" машғул буд.

Рӯзи 28-уми ноябр Кумитаи тафтишоти Русия эълон кард, ки куштори Евгения Шишкина бо ҷанбаи "эҷоди монеа барои пешбурди фаъолияти ҳирфаӣ" анҷом шудааст.

Президенти Афғонистон ҳайатеро ба музокироти Толибон мефиристад. ВИДЕО

Рӯзи 28-уми ноябр дар шаҳри Женева президенти Афғонистон Ашраф Ғанӣ гуфт, ки як ҳайати 12-нафариро барои музокироти сулҳ бо Толибон сафарбар хоҳад кард. Раҳбари Афғонистон ҳангоми суҳат бо хабарнигорон дар конфронси зери сарпарастии СММ гуфт, сардори дафтари идораи раёсатҷумҳурии Афғонистон раҳбарии ҳайати музокиракунандаро бар дӯш мегирад.

Ашраф Ғанӣ илова кард, ки дар ҳамин чаҳорчӯб як шӯрои машваратӣ низ ташкил хоҳад шуд, ки дар он намояндагони нуҳ кумитаи мухталиф шомил хоҳанд шуд. Раиси ҳукумати иҷроияи Афғонистон Абдуллоҳ Абдуллоҳ мегӯяд, ки иқдомҳои ҳукумат аз панҷ марҳила иборат хоҳанд буд - ибтидо музокироти миёни тарафҳои афғон, сипас машварат бо Покистон, Амрико ва дигар кишварҳои муҳими минтақа. Ҳамчунон дар ин машваратҳо кишрварҳои арабӣ, паймони НАТО ва муттафиқони паймони НАТО ҳамроҳ мешаванд.

Ҳукумати Афғонистон ба музокироти сулҳ бо Толибон омода мешавад
лутфан мунтазир бошед

### Феълан кор намекунад ###

0:00 0:00:53 0:00

Як омӯзгори ҷавон дар Душанбе барои "гаппартоӣ" ҳабс шуд

Додгоҳи ноҳияи Синои пойтахт як омӯзгори ҷавони Донишгоҳи давлатии молия ва иқтисоди Тоҷикистонро барои "гаппартоӣ" ва "дашноми қабеҳ" ба панҷ рӯзи ҳабс маҳкум кард.

Мақомоти Раёсати корҳои дохилии Душанбе рӯзи 28-уми ноябр хабар доданд, ки Шарифҷон Розиқов як духтари 23-соларо дар маҳзари ом дашном додааст.

Ба қавли манбаъ, "ӯ рӯзи 22-юми ноябр, ҳангоме ки ин духтари ҷавон дар назди маркази бозии "Sony" интизори мошин буд, ҳақорат карда ва шаъну шарафи номбурдаро дар назди дигар шаҳрвандон паст задааст."

Мақомот гуфтанд, нисбат ба Шарифҷон Розиқов бо иттиҳоми майдаавбошӣ парванда боз шуд ва ӯ бо ҳукми додгоҳ ба 5 шабонарӯз ҳабс маҳкум шудааст.

Маълум нест, ки худи Шарифҷон Розиқов гуноҳи худро эътироф кард ё на.

Вале донишҷӯи Донишгоҳи молия ва иқтисод, ки дар ин парванда ба ҳайси даъвогар ширкат кардааст, дар сӯҳбат бо Радиои Озодӣ рӯзи 28 ноябр гуфт, дар ҳодисаи ҳафтае пеш аз рафтори омӯзгори ҷавон хеле нороҳат шуд. Ин донишҷӯ, ки нахост номаш нашр шавад, гуфт, хабарҳои гаппартоии фаҳши мардонро борҳо шунидааст, аммо ҳеҷ тасаввур намекард, ки як омузгори донишгоҳи олӣ ҳам метавонад чунин рафтор кунад. Ӯ гуфт, рафтори омӯзгор пеш аз ҳама ба обрӯи касби муаллимӣ латма мезанад. Вай гуфт: "Ин омӯзгор аз алфози хеле қабеҳ истифода кард, ки ба забон оварданаш ҳам имкон надорад".

Дар Вазорати корҳои дохилии Тоҷикистон гуфтанд, тайи се моҳи охир ҳадди ақал чаҳор мард барои бадрафторӣ бо занон боздошту муҷозот шуданд. Ҳамаи шикоятҳо аз тарафи бонувони пойтахт будааст.

Путин ҳодисаи Баҳри Сиёҳро тавтеа номид ва Порошенкоро гунаҳгор кард

Владимр Путин

Президенти Русия Владимир Путин ҳодисаи тасарруфи киштиҳои Украина дар Баҳри Сиёҳро тавтеае номид, ки ба гуфтаи ӯ мақомоти феълии Украина ва президент Порошенко дар остонаи интихобот созмон доданд.

Путин зимни суханронӣ дар форуми "Русия даъват мекунад", ки дар Маскав баргузор шуд, бори аввал ҳодисаи гулугоҳи Керчро шарҳ дод. Ба гуфтаи президенти Русия, дараҷаи маъруфияти президенти Украина Петр Порошенко бисёр коҳиш ёфтааст ва ӯ мехоҳад ба рақибони худ дар интихоботи қарибулвуқуъ монеа бунёд кунад.

Мақомоти расмии Киев дар ҳодисаи гулугоҳи Керч Маскавро масъул медонанд ва онро амалкарди таҷовузкорона номидаанд. Президенти Украина имрӯз Қонун дар бораи ҷорӣ шудани ҳолати низомӣ дар кишварро имрзо кард.

Украина аз Русия талаб дорад, маллоҳони украиниро, ки рӯзи 25 ноябр ҳангоми убури гулугоҳи Керч боздошт шуданд, оҷилан озод кунад. Мақомоти Русия маллоҳони украиниро ба убури ғайриқонунии марзи давлатӣ муттаҳам мекунанд. Онҳо дар Қрими ишғолшуда мавриди муҳокимаи додгоҳӣ қарор мегиранд.

Дар Гурҷистон даври дувуми интихоботи президентӣ баргузор мешавад

Интихоботи Гурҷистон

Имрӯз дар Гурҷистон даври дувуми интихоботи президентӣ бо ширкати ду номзад баргузор мешавад.

Номзадҳо Саломе Зуробишвилӣ аз ҳизби "Орзуи гурҷӣ" ва Григол Вашадзе аз ҳизби "Нерӯ дар иттиҳод" ҳастанд. Зуробишвилӣ намояндаи ҳизби ҳоким ва Вашадзе намояндаи мухолифон аст. Дар таърихи Гурҷистон бори аввал аст, ки интихобот ба даври дувум меравад. Шаҳрвандон панҷумин президентро барои 6 сол интихоб хоҳанд кард. Ин охирин раъйдиҳӣ аст, ки президент мустақиман интихоб мешавад: дар оянда роҳбари давлатро аъзои порлумон ва намояндагони мақомоти маҳаллӣ муайян мекунанд.

Дар даври аввали интихобот, ки 28 октябр барпо шуд, ҳеч кадом аз 25 номзад бештар аз 50 дарсад раъй нагирифт. Он замон Зуробишвилӣ 38,6 ва Вашадзе 36,7 овоз гирифтанд ва ба даври дувум рафтанд.

Ба иттилои Комисияи марказии интихоботии Гурҷистон, имрӯз, 28 ноябр дар 3703 қитъа раъйдиҳӣ шуруъ шуд. Ба иттилои мақомот, 3 миллиону 528 ҳазору 658 шаҳрванд дар ин интихобот ҳаққи раъй доранд.

Имрӯз дар Гурҷистон истироҳат эълон шудааст.

1300 нозири байналмилалӣ, наздики 17 ҳазор намояндаи субъектҳои интихоботӣ ва бештар аз 48 ҳазор нозири маҳаллӣ интихоботро назорат мекунанд.

Маросими савганди президентии номзади ғолиб 16 декабр баргузор хоҳад шуд.

Словения як занро фармондеҳи неруҳои низомӣ таъин кард

Аленка Ерменс

Словения аввалин кишвари узви НАТО аст, ки як занро фармондеҳи неруҳои низомӣ таъин кардааст.

Генарл-майор Аленка Ерментс фаъолияташро дар мақоми раҳбари ситоди кулли артиш рӯзи 29 нобяр, расман дар як маросим оғоз мекунад. Ерменси 55 -сола дар гузашта муовини фармондеҳи артиш буд.

Президенти Словения Борут Паҳор, фармондеҳи аршади кишвар, рӯзи 27 ноябр аз таъини Ерментс ба ин мақом истиқбол ва изҳори умед кард, ки фаъолияти артиш таҳти раҳбарии Ерментс беҳтар хоҳад шуд.

"Ҳарчанд Словения ба таҳдиди мустақими низомӣ рӯ ба рӯ нест, аммо тамоюли умумӣ ва вахим шудани вазъи амниятӣ идома дорад ва кишвар бояд амнияти низомиашро дар кутоҳтарин замон тақвият диҳад",-гуфт Паҳор дар як изҳорот.

Нахуствазир Марян таъини Ермантс ба ин мақом баёнгари булуғи ҷомеаи Словения арзёбӣ кард.

Аленка Ерментс таҳсилкардаи Британия буда, фаъолияти низомиашро соли 1991, баъди як соли эълони истиқлолияти Словения аз Югославия оғоз кард.

Словения аввалин кишвари Югославияи собиқ аст, ки соли 2004 ба НАТО ва Иттиҳоди Аврупо шомил шуд.

Словения ду миллион аҳолӣ ва 7.500 сарбози фаъол ва эҳтиётӣ дорад.

The Guardian: Манафорт чанд дафъа бо Ассанҷ мулоқот карда буд

Пол Манафорт

Пол Манафорт, сиёсатмадори амрикоӣ ва раҳбари пешини ситоди интихоботии Доналд Трамп, якчанд дафъа бо бунёдгузори Wikileaks Ҷулиан Ассанҷ мулоқот карда буд. Дар ин бора нашрияи The Guardian рӯзи 27-уми ноябр хабар дод.

Гуфта мешавад, ки Манафорт дастикам се дафъа дар соли 2013, 2015 ва 2016 дар сафорати Эквадор дар Лондон бо Ассанҷ мулоқоти пинҳонӣ дошт. Ассанҷ бинобар таҳдиди боздошташ аз ҷониби Британия аз Эквадор паноҳгоҳи сиёсӣ гирифт ва чанд сол боз дар сафорати ҳамин кишвар зиндагӣ мекунад.

Манбаҳои The Guardian нагуфтаанд, ки муҳтавои гуфтушуниди Манафорт бо Ассанҷ аз чӣ иборат буд. Аммо санадҳои Ҳизби Демократи ИМА-ро, ки ба гуфтаи хадамоти махсуси Амрико аз роҳи ҳамлаҳои ҳакерии Русия берун омаданд, маҳз Wikileaks нашр кард. Аз ин рӯ, нашрияи британиявӣ фарз мекунад, ки мулоқоти Манафорт бо Ассанҷ метавонад барои прокурори вежаи таҳқиқи дахолати эҳтимолии Русия ба умури интихоботи соли 2016 ҷолиб бошад.

Вакилони Манафорт рӯзи гузашта аз номи ӯ изҳорот доданд, ки дар он Пол Манафорт ҳамагуна мулоқот бо Ассанҷро қотеъона рад кардааст. Ӯ гуфтааст, ки нашрияи The Guardian ба додгоҳ мебарад. Дар Wikileaks низ ин хабарро тасдиқ накарданд.

Пол Манафорт соли 2016 якчанд моҳ раҳбари ситоди интихоботии президент Трамп буд ва қабл аз баргузории интихобот барканор шуд. Ӯ бо чандин ҷурм, аз ҷумла тақаллуби бонкӣ ва молӣ таҳти боздошт қарор дорад.

Гумонбарони парвандаи "ҷиҳодиён" дар додгоҳ рагҳояшонро буриданд

Мурофиаи гумонбарони терроризм дар Қазоқистон

Муттаҳамони парвандаи "ҷиҳодиён" дар додгоҳи шаҳри Алматои Қазоқистон рӯзи 27 ноябр бо нишони эътироз ба амалҳои ғайриқонунии муфаттишон ва додрасҳо рагҳои дасти худро буриданд.

Алмат Жумагулов, Оралбек Омиров ва Кенҷабек Абишев дар додгоҳ гуфтанд, ки иттиҳоми эълоншуда сохтакорӣ буда, ангезаи сиёсӣ доранд. Ба гуфтаи айбдоршавандаҳо, ҳуқуқҳои онҳо борҳо поймол шуда, додрасҳо дархости онҳоро ба инобат нагирифтаанд.

Дар саҳифаҳои шабакаҳои иҷтимоӣ ҷараёни додгоҳи ин се тан мустақиман пахш мешуд. Дар наворҳо дида шуд, ки чи гуна онҳо рагҳои дастонашонро мебуранд.

Алмат Жумагулови 44-сола дар таблиғи терроризм ва барангехтани адовати миллӣ айбдор мешавад. Кенҷабек Абишеви 52-сола ва Оралбек Омирови 48-сола дар таблиғи терроризм айбдор ҳастанд. Айбдоршавандаҳо ин иттиҳомҳоро рад мекунанд ва онҳоро сиёсӣ меноманд. Ҳар сеи муттаҳамон тирамоҳи соли 2017 боздошт шуданд.

Алмат Жумагулов эътироф мекунад, ки вай ҷонибдори ақидаҳои ҳаракати "Интихоби демократии Қазоқистон" аст. Фаъолияти ин ҳаракат дар Қазоқистон мамнуъ шудааст.

Рӯҳонии суннимзҳаб дар Эрон кушта шуд

Ҷангале дар вилояти Гулистони Эрон

Матбуоти Эрон хабар дод, ки рӯҳонии суннимазҳаб Абдулғаффор Ҷамолзай дар вилояти Гулистон кушта шуд.

Дар гузоришҳо омадааст, ки Ҷамолзай, имоми намози рӯзи ҷумъа дар деҳкадаи Ризообод, субҳи 27-уми ноябр мавриди ҳамлаи мусаллаҳона қарор гирифт. Ӯро аз пушт бо камони шикорӣ куштанд.

Хабаргузории давлатии Эрон - IRNA навишт, ки ба сӯи Ҷамолзай, намояндаи қавми Балуч, дар назди масҷиди шаҳри Ромиён, 20-километрии шимолу шарқи Теҳрон чаҳор дафъа тир кушоданд.

IRNA аз қавли як манбаи беном гуфтааст, ин куштор эҳтимол бар пояи хусумати шахсӣ ва ихтилофҳои қабилаӣ ба вуқуъ пайваст.

Мақоми баландпояи пулис аз оғози таҳқиқи қазия хабар додааст.

Абдулризо Чароғалӣ, мақоми маҳаллии Гулистон гуфт, ки ангезаи куштор маълум нест, аммо эҳтимоли "ҳамлаи террористӣ"-ро рад кард.

Сунниҳо 10 дар сади аҳолии 80-миллионии Эрони асосан шиамазҳабро ташкил медиҳанд. Моҳи июл як ҳамлагари мусаллаҳ рӯҳонии суннимазҳабро дар қисмати ҷанубу шарқи Эрон мавриди ҳамла қарор дод ва ба ҳалокат расонд.

$148 ҳазор – маоши миёнаи футболбозон дар Қазоқистон

Сомонаи Sporting Intelligence ҳаҷми маоши миёнаи футболбозонро дар саросари ҷаҳон дар соли 2018 нашр кард.

Аз ҳама маоши баланд футболбозони лигаи олии Англия мегиранд. Ҳаҷми маоши миёнаи солонаи онҳо 3,93 миллион доллар аст.

Ба сегонаи аз маошҳои баланд лигаи Испания (2,89 миллион доллар) ва Силсилаи А-и Италия (1,99 миллион доллар) низ шомил шуданд. Лигаи олии Қазоқистон дар ин раддабандӣ мақоми 25-умро ишғол кард, ки ҳар як бозигари он солона ба ҳисоби миёна 148 ҳазор доллар маош мегирад.

Бинобар ин, нишондиҳандаҳои чемпионати Қазоқистон аз нишондодҳои Куриёи Ҷанубӣ, Лаҳистон, Австралия ва Хорватия баландтар аст. Узбекистон шомили раддабандии мазкур нашудааст.

10 кишваре, ки бозигарони лигаҳои олияшон аз ҳама маоши баланд мегиранд:

Англия – $3,93 млн;

Испания – $2,89 млн;

Италия – $1,99 млн;

Олмон – $1,83 млн;

Фаронса – $1,3 млн;

Чин – $1,05 млн;

Русия – $877 ҳазор;

Туркия – $864 ҳазор;

Бразилия – $670 ҳазор;

Канада – $519 ҳазор.

Узбекистон узви Созмони ҷаҳонии муҳоҷират шуд

логои Созмони Ҷаҳонии Муҳоҷират

Узбекистон узви 173-уми Созмони ҷаҳонии муҳоҷират (СБМ) шуд. Созмон дар ҷаласаи рӯзи 27 ноябр дар Женева дархости Узбекистонро барои узвият пазируфт. Дар ин бора маркази матбуотии СБМ иттилоъ дод.

"Бо изҳори хушнудии амиқ ман Узбекистонро ба узвияти СБМ хайрамақдам мегӯям. Кишвари шумо яке аз роҳҳои қадимӣ ва муваффақонаи тиҷорати ҷаҳонӣ бархурдор аст, ки аз қадимулайём муҳоҷирон аз он убур мекарданд", - гуфт мудири кулли созмон Антонио Виторино.

Дар ҷаласаи охири шӯрои СБМ Узбекистонро муовини вазири шуғли аҳолӣ ва муносибатҳои меҳнатии ин кишвар Баҳодир Низомов намояндагӣ кард.

Узбекистон - яке аз кишварҳои пурнуфуси Осиёи Марказӣ аст, ки бештар аз давлатҳои минтақа муҳоҷири корӣ дорад, охирин кишвари Осиёи Марказӣ буд, ки узви СБМ шуд.

СБМ бар ин бовар аст, ки рушди иқтисоди Узбекистон дар оянда роҳро барои корёбии муҳоҷирони давлатҳои дигар дар он боз хоҳад кард.

ИМА шаҳрвандони Русия в Қазоқистонро ба тақаллуб дар интернет муттаҳам кард

Акси тасвирӣ

Мақомоти Амрико шаш шаҳрванди Русия ва ду шаҳрванди Қазоқистонро ба тақаллуб дар бахши таблиғоти диҷитолӣ ё рақамӣ муттаҳам кард. Ин гурӯҳ ба даст ёфтан ба маълумоти хусусӣ, шикастани қуфли компютерҳо ва шустушӯи пулҳои ғайриқонунӣ айбдор шудааст. Дар хабари додситонии ҳавзаи шарқии Ню Йорк, ки рӯзи 27 ноябр пахш шуд, хисороти фаъолияти ғайриқонуни ин гурӯҳ даҳҳо миллион доллар ҳисоб шудааст.

Шаҳрвандони Қазоқистон Сергей Овсянников, Евгений Тимченко ва табааи Русия Александр Жуков дар Малазия, Эстония ва Латвия боздошт шуданд. Гумонбарҳои боқимонда, ки шаҳрвандони Русия мебошанд, дар озодӣ қарор доранд.

Бинобар маълумоти тафтишот, гумонбарҳо бо истифодаи дастикам 31 домени интернетӣ ва 89 сервери интернетӣ барои таъсиси шабакаи компютерҳои оулуда (ботнет) ба таблиғоти тақаллубии интернетӣ машғул буданд.

Ёфтҳои бештар

Гузоришҳои видеоӣ

Марги шубҳабарангеҳи сарбози 20-сола дар Роғун
лутфан мунтазир бошед
### Эмбед ###

### Феълан кор намекунад ###

0:00 0:00:16 0:00
XS
SM
MD
LG