Пайвандҳои дастрасӣ

Хабарҳо

Бонки миллии Қирғизистон 4,8 млн соми Абдигуловро бахшид

Бонки миллии Қирғизистон тасдиқ кард, ки ба раиси ин бонк Толкунбек Абдигулов барои харидани манзил қарз дода шуда буд.

Тибқи муқаррароти бонк, ин ниҳод иҷозат дорад, ки ба кормандонаш бо ҳадафи кумаки иҷтимоӣ қарз диҳад.

Дар сурати марг ё маъюб шудан ва ё барои саҳми чашмрас гузоштан дар рушди низоми бонкиву иқтисодии кишвар, Бонки миллӣ ҳақ дорад, ки қарзро бахшад.

Абдигулов дар соли 2015 барои харидани манзил 5,5 миллион сом аз бонки мазкур қарз гирифта буд. Баъдтар вай ба кори дигар гузашт. Ҳоло Бонки миллӣ боқимондаи 4 миллиону 824 ҳазор сом (муодили 7 ҳазор доллар)-и қарзи ӯро бахшидааст.

Парлумони Арманистон нахуствазири кишварро интихоб накард

Парлумони Арманистон бори дуюм нахуствазири кишварро интихоб накард, гуфт рӯзи 1 ноябр бахши армании Радиои Озодӣ. Бар асоси конститутсияи Арманистон, парлумон пароканда мешавадва дар моҳи декабр интихоботи пеш аз мӯҳлат даъват хоҳад шуд. Ин як тақозои нахуствазири собиқ Никол Пашинян будааст. Овоздиҳии дубора барои интихоби нахуствазири кишвар 1 ноябр баргузор шуд ва танҳо номзад дар ин овоздиҳӣ Пашинян буд, ки ҳеҷ як депутат аз номзадии ӯ ҷонибдорӣ накард. Ҳеҷ нафаре ҳам мухолиф набаромад ва танҳо 13 нафар аз овоздиҳӣ худдорӣ карданд. Ҳизби аксарияти ҷумҳурихоҳ гуфт, ки ба ҷонибдонии Пашинян овоз намедиҳад. 16 октябр Пашинян ба истеъфо рафт ва гуфт, ки чунин иқдом ба хотири даъват интихоботи зудрас анҷом мешавад. Дар ҳоле, ки дар парлумон аксариятро мухолифони ӯ аз ҳизби ҷумзурихоҳи Серж Саргсян ташкил медиҳанд.

Эътирозгарон роҳҳоро дар шаҳрҳои калони Покистон бастанд

Эътирозгарон дар Покистон барои рӯзи дувум аст, ки роҳҳоро дар шаҳрҳои калон бастаанд. Ин эътирозҳо аз сӯи аҳзоби динӣ ва бахши дигари бузург аз ҷомеаи Покистон дар мухолифат бо тасмими Додгоҳии олии он кишвар барои озодии як зани масеҳӣ роҳандозӣ шудааст. Осия Бибӣ, модари панҷ фарзанд дар соли 2015 ба иттиҳоми тавҳин ба муқаддасоти исломӣ аз сӯи додгоҳ ба қатл маҳкум шуда буд. Ин ҳукми додгоҳи Покистон он замон ба интиқодҳо аз сӯи кишварҳои ғарбӣ рӯбарӯ шуда буд.

Додгоҳи олии Покистон рӯзи сешанбеи 30-юми октябр ҳукми эъдоми Осия Бибиро лағв кард ва дастур дод, то ӯ аз зиндон раҳо шавад. Вакили дифои ин хонуми масеҳӣ гуфтааст, ки ӯ ба зудӣ Покистонро тарк хоҳад кард ва дар Фаронса ё Испания дархости паноҳандагӣ хоҳад дод.

Имронхон, нахуствазири Покистон аз эътирозгарон хостааст, то шоҳроҳҳоро набанданд ва ҳукуматро зери фишор қарор надиҳанд. Гурӯҳи исломии "Таҳрики Лаббайк Покистон", ки эътирозҳоро раҳбарӣ мекунад, раиси Додгоҳи олии Покистонро мавриди интиқоди шадид қарор дода ва гуфтааст, ки бояд дар бадали ин ҳукмаш, ба қатл бирасад.

Боздошти марде дар Қирғизистон бо иттиҳоми маблағгузории ДИИШ

Мақомоти Қирғизистон мегӯянд, як мардеро дастгир кардаанд, ки ба гуруҳҳои террористӣ дар Сурия 100 ҳазор доллар кумаки молӣ фиристодааст. Кумитаи амнияти миллии Қирғизистон рузи 31-уми октябр бо нашри як баёния гуфт, як марди 28-сола бо истифода аз номи каси дигаре пулро ба номи аъзои гуруҳҳои ифротиву террористӣ мефиристодааст. Номи худи муттаҳам ба ҷиноятро ошкор накардаанд. Ба гуфтаи Кумитаи амнияти миллӣ, боздошт рӯзи 14-уми октябр сурат гирифт ва он мардро ба ҳимояти молии терроризм, барангехтани адовати диниву мазҳабӣ ва сохтакории санадҳо муттаҳам мекунанд. Мақомоти Қирғизистон мегӯянд, аз замони пайдо шудани гуруҳи ба ном “Давлати исломӣ” дар Ироқу Сурия 500 шаҳрванди кишвар ба ин ду кишвари Ховари Миёна рафта ва ба сафи ин созмони террористӣ пайвастаанд.

Собиқ бандиҳои Гуантанамо узви дафтари Толибон дар Қатар шуданд

Муҳаммад Наим, сухангӯи дафтари Толибони Афғонистон дар Қатар. Нишасти матбуотӣ, Доҳа, соли 2013

Гуруҳи Толибон мегӯяд, панҷ узви худро, ки як даҳсолаи умрашонро дар зиндони Гуантанамо сипарӣ кардаанд, дар дафтари сиёсии ин гурӯҳ дар Қатар намоянда таъин кардаанд. Ин панҷ нафар акнун ҳақ доранд, дар ҳама музокироти сулҳ бо ҳукумати Афғонистон ширкат кунанд. Муҳаммад Фазл, Муҳаммад Набӣ, Хайрулло Хайрхоҳ, Абдулҳақ Васиқ ва Нурулло Нурӣ - панҷ фармондеҳи собиқи Толибон ҳастанд, ки соли 2014 аз зиндони Амрико дар ҷазираи Гуантанамо озод шуданд ва дар Қатар зиндагӣ мекарданд. Вале онҳо то кунун дар ҳеҷ гуна муомилаву фаъолиятҳои сиёсӣ мустақим ҷалб нашудаанд. Дар ин бора Забеҳулло Муҷоҳид, сухангуи Толибон рузи 31-уми октябр бо нашри як баёния хабар додааст. Амрико ҳамаи ин панҷ нафарро дар ивази Бов Бергдал, сарбози асири амрикоӣ озод кард. Эълони Толибон дар ин бора дар ҳолест, ки гуфтугуҳо дар бораи ба роҳ андохтани музокироти сулҳ байни ҳукумати Афғонистон ва Толибон ва хотима додан ба ҷанги 17-солаи онҳо дигарбора зиёд шудааст. Аввали ҳамин моҳ намояндагони Толибон бо Залмай Халилзод, фиристодаи хоси Амрико барои Афғонистон дар шаҳри Доҳаи Қатар дар бораи эҳтимоли музокироти сулҳ бо ҳукумат гуфтугӯ доштанд.

Мансабдорони Узбекистонро бо кулӯхҳо акс гирифтанд

Аз 27-уми октябри имсол аксе дар шабакаҳои иҷтимоӣ мечархад, ки дар он шаш мард дар ҳолати бардоштани кулӯх болои сарашон сабт шудаанд.

Ин мардҳо онҳое ҳастанд, ки дар ноҳияи Оққурғони Узбекистон дохили ҷӯйбори оби сард аккосӣ шуда буданд.

"Мирзоев (Зойир Мирзоев, ноиб-сарвазири ҳамакнун пешини Узбекистон, идора) ҳамин ки заминро хушк дид, мансабдорони маҳаллиро таҳқир кард. Баъдан ӯ муовини роҳбари раёсати кишоварзӣ Қосим Бозорбоев, роҳбари шуъбаи заминсозӣ Абдулло Умаров ва дигаронро маҷбур кард, ки кулӯхҳои заминро болои сарашон бардоранд", - нақл кард як шоҳиди ҳодиса.

Ба гуфтаи ин шоҳид, Мирзоев ҳамчунин дастур дод, ки мансабдоронро дар он ҳолат аксбардорӣ кунанд ва акси онҳоро ба мансабдорони дигари ноҳия фиристанд.

Трамп гуфт, ба марзи Мексика то 15 000 низомӣ мефиристад

Президенти Амрико Доналд Трамп ният дорад, ба марзи кишвараш бо Мексика то 15 ҳазор низомӣ фиристад. Айни ҳол ҳамин теъдод низомии амрикоӣ дар Афғонистон ҳузур дорад.

Гуруҳҳои низомӣ ба кормандони Хадамоти гумруку муҳоҷират ёрӣ мерасонанд.

Дар ҳоли ҳозир дар марзҳои ҷанубии Амрико беш аз 5 ҳазор низомӣ ва зиёда аз 2 ҳазор корманди гвардияи миллӣ ҳузур дорад. Ин шумор низомӣ дар маҷмуъ баробар ба низомиҳои амрикоӣ дар Ироқу Сурия аст.

Қонун иҷозат намедиҳад, ки низомиҳо мустақим уҳдадориҳои мақомоти ҳифзи ҳуқуқро иҷро кунанд, аммо артиш метавонад ба мақомот ёрӣ расонад. Аз ҷумла, ҳангоми бетартибиҳо ва бартараф кардани оқибатҳои офати табиӣ.

Интихоботи ҳафтаи ояндаи Конгрессро ҳамчун раъйпурсии сиёсатҳои Трамп унвон мекунанд. Роҳбари Кохи Сафед дақиқан мехоҳад, собит кунад, ки муносибати ӯ нисбат ба муҳоҷирон - дар ин интихобот мавзуи калидӣ аст.

Русия даҳҳо шаҳрванд ва ширкатҳои украиниро таҳрим кард

Русия дар нисбати 322 шаҳрванди Украина ва 68 ширкати украинӣ таҳрим ҷорӣ кард. Қарор дар ин замина рӯзи 1 ноябр аз ҷониби нахуствазир Дмитрий Медведев имзо шуд. Дар феҳристи афроди таҳримшуда – вазирон, аз ҷумла вазири умури дохилии Украина Арсен Аваков, депутатҳои парлумон ва намояндагони бахши соҳибкорӣ мебошанд. Ҳамчунин нахуствазирони собиқ – Юлия Тимошенко ва Арсений Ятсенюк, писари президенти Украина Петро Порошенко – Алексей ва сафири Украина дар ИМА Валерий Чалий таҳрим шуданд. 22-юми октябр президенти Русия Владимир Путин қароре дар заминаи “Татбиқи чораҳои вижаи иқтисодӣ дар робита бо рафтори хасмонаи Украина дар нисбати афроди ҳуқуқии Федератсияи Русия”-ро имзо кард. Русия қаблан гуфта буд, ки шаҳрвандони оддии Украина аз ин таҳримҳо осеб намебинанд.

Дабири СММ фиристодаи махсусро дар умури Сурия интихоб кард

Антонио Гутерреш

Антониу Гутерреш, дабири кулли СММ Шӯрои Амниятро дар бораи ба мақоми намояндаи махсуси ин созмон дар умури Сурия таъйин кардани дипломати норвежӣ Гейр Педерсен огоҳ кард.

Ба бовари дабири кулли СММ, Педерсен метавонад, дар хатми ҷанги ҳафтсолаи Сурия саҳм гузорад ва талошҳои СММ барои ҳалли ин ҷанг роҳбарӣ кунад. Гуттереш аз ҷомеаи ҷаҳонӣ ва мақомоти Сурия даъват кард, ки ба Педерсон кумак расонанд.

Феълан Гейр Педерсен сафири Норвеж дар Чин аст. Вай то ин замон кишварашро дар СММ намояндагӣ мекард. Педерсен дар мақоми фиристодаи махсуси СММ дар умури Сурия Стаффан де Мистураро иваз мекунад. Мистура пештар гуфта буд, ки дар поёни моҳи ноябр тарки мақом хоҳад кард.

Вакилони Қирғизистон дар додгоҳи ҳамкори пешинашон дар Қазоқистон ширкат мекунанд

Дамирбек Асилбек уулу

Намояндагони ҷиноҳи порлумонии "Қирғизистон" тасмим доранд, дар ҷараёни баррасии парвандаи вакили пешини Қирғизистон Дамирбек Асилбек уулу дар Қазоқистон ширкат ва рафти додгоҳро назорат кунанд. Дар ин бора вакили порлумони Қирғизистон Нурбек Аслимбеков хабар дод.

Ба гуфтаи вай, ҷаласаи навбатии додгоҳӣ 2 ноябр баргузор мешавад.

"Мақомоти Қазоқистон мегӯянд, вай шаҳрванди он кишвар аст, ба ин далел ба мо иттилои зиёд намедиҳанд. Дар додгоҳ намояндагони мо ширкат мекунанд. Баъди додгоҳ иттилоъ пайдо хоҳем кард", - гуфт Алимбеков.

Дар шаҳри Алматои Қазоқистон аз 19 октябр баррасии парвандаи вакили пешини порлумони Қирғизистон шуруъ шуд. Ӯро моҳи феврали соли ҷорӣ дар ҷараёни як рейд дар ҷануби Қазоқистон боздошт карданд. Вай дар "ташкил ва роҳбарии гуруҳи ҷиноии байналмилалӣ" айбдор мешавад. Ҳамроҳ бо вакили пешини қирғиз даҳ тани дигар дар курсии айбдорӣ менишинанд.

Комисияи марказии интихоботии Қирғизистон 16 апрел мандати вакилии Дамирбек Асилбек уулуро бекор кард.

Дар Туркманистон бемории сартосарии уштурон мушоҳида мешавад

Дар вилояти Балкани Туркманистон бемории сартосарии уштурон мушоҳида мешавад. Дар робита ба ин мақомот ба таври шифоҳӣ истеъмол ва фурӯши гӯшти уштурро манъ карданд. Бахши Туркмании Радиои Озодӣ рӯзи 31 октябр аз қавли як сокини маҳаллӣ Амонмурод Бугаев навишт:

"Бемории уштурон дар ноҳияи Этреки наздики марзи Туркманистон бо Эрон мушоҳида шуд. Сокинон мегӯянд, уштурон ба замин хобида дигар намехезанд. Табибони ҳайвонот гуфтанд, уштурон ба беморӣ гирифтор шудаанд".

Ба гуфтаи Бугаев, уштурони бемор дар алоҳидагӣ нигаҳдорӣ мешаванд. Бемории уштурон сокинони маҳаллиро нигарон кардааст. Аммо барои наҷоти ҳайвонҳо то кунун аз сӯи мақомот чораандешӣ нашудааст.

Дар Тошканд чаҳор одам аз заҳролудшавӣ фавтиданд

Дар ноҳияи Чилонзори шаҳри Тошканди Узбекистон чаҳор тани аз 6-сола то 22-сола дар натиҷаи заҳролудшавӣ фавтиданд. Дар ин бора рӯзи 1 ноябр бахши Узбекии Радиои Озодӣ хабар дод.

Мақомоти Тошканд мегӯянд, айни ҳол корҳои тафтишотӣ идома доранд.

Расонаҳои маҳаллӣ менависанд, ки як хонаводаи иборат аз 5 тан дар яке аз ошхонаҳои маҳаллӣ як шаб пеш аз ҳодиса кабоб хӯрдаанд.

"Баъди ба хона баргаштан, модар худро бад ҳис кард ва фарзандон якбора хоб рафтанд. Субҳ чаҳор кӯдаки вай фавтида буданд. Занро дар бемористон бистарӣ карданд", - менависанд расонаҳо.

Аммо расонаҳо бо такя ба вазорати тандурустии Узбекистон хабар доданд, ки ин хонавода на аз кабоб, балки аз гази дохили хона заҳролуд шудааст.

Мақомоти Тошканд гуфтанд, баъдтар ҳодисаро шарҳ медиҳанд.

Амрико барои мубориза бо таблиғоти хориҷӣ 40 млн доллар ҷудо кард

Амрико барои мубориза бо таблиғоти хориҷӣ 40 миллион доллар ҷудо кард. Дар ин бора рӯзи 31 октябр Роберт Палладино, сухангӯи департаменти давлатии ИМА хабар дод.

Ин маблағро Маркази ҳамкориҳои ҷаҳонӣ дарёфт кард. Маркази мазкур масъул аст, ки зидди таъсири иттилоотии кишварҳое амсоли Русия, Эрон ва Чин муқобила кунад.

Марказ иттилои бардурӯғро шиносоӣ ва таҳлили аудиторияи хориҷиро ба роҳ монда, инчунин рушди робита бо расонаҳои маҳалливу созмонҳои ғайридавлатиро ташкил мекунад.

Маркази ҳамкории байналхалқӣ дар замони роҳбарии Барак Обама ташкил шуда буд. Дар ибтидо маркази мазкур бо таблиғоти созмони террористии "Давлати исломӣ" мубориза мебурд. Ибтидои соли 2017 масъулияти марказ густардатар шуд.

Амрико дар моҳи сентябр бештар аз Русия нафт истеҳсол кард

Моҳи сентябр Амрико нисбат ба Русия нафти бештар истеҳсол кард. Дар моҳи сентябр дар Амрико ҳамарӯза 11,346 миллион бушка нафт истеҳсол шудааст, иттилоъ медиҳад хабаргузории Bloomberg. Русия ба ҳисоби миёна 11,21 миллион бушка истеҳсол кардааст.

Дар як соли охир истихроҷи нафт дар ИМА 2,1 бушка дар рӯз афзудааст.

Пешсафии Амрико дар истеҳсоли нафт наметавонад тӯлонӣ бошад. Зеро Русияву Арабистони Саудӣ талош доранд, нафти бештар истеҳсол кунанд. Талошҳои Русияву Арабистони Саудӣ барои пешгирӣ аз содироти нафти Эрон аст. Сарфи назар аз ин, тибқи пешгӯиҳо, то соли 2030 дар Амрико истеҳсоли 16,5 миллион бушка нафт дар рӯз ба роҳ монда хоҳад шуд.

ИМА чанд соли охир бузургтарин истеҳсолкунандаи энержии ҷаҳон ба ҳисоб меравад. Ин кишвар дар соли 2009 дар истеҳсоли гази табиӣ аз Русия пеш гузашт.

Омурқуловро аз сафи Ҳизби сотсиал - демократ хориҷ карданд

Исо Омурқулов

Шӯрои сиёсии Ҳизби сотсиал-демократи Қирғизистон Исо Омурқуловро аз сафи ин ҳизб хориҷ кард. Қарори берун кардани Омурқулов дар ҷаласаи рӯзи 31-уми октябр қабул шуд.

Узвияти Омурқулов дар Ҳизби сотсиал-демократ ба хотири "рафтори хилофи ҳадафҳо, вазифаҳо ва оинномаи ҳизб" қатъ гардидааст.

Ҳамзамон ба вакилони порлумони Қирғизистон тавсия шуд, ки Омурқуловро аз раисии ҷиноҳи порлумонӣ бекор кунанд.

Шӯрои сиёсии Ҳизби сотсиал-демократ қарор кард, ки анҷумани 18-уми ҳизб рӯзи 6-уми апрели соли 2019 баргузор шавад. Шӯро Алмосбек Отамбоевро роҳбари кумитаи баргузории анҷуман таъйин кард.

Охири моҳи октябр дар чаҳор вилояти Қирғизистон конфронсҳои "Ҳизби сотсиал-демократ бидуни Отамбоев" баргузор шуд. Дар ин конфронсҳо иштирокдорон аз роҳбари ҷиноҳи порлумонии ҳизби сотсиал-демократ Исо Омурқулов пуштибонӣ кардаанд.

Садамаи як худрави сафорати Русия дар Душанбе

Бинои сафорати Русия дар Тоҷикистон.

Як автомашинаи Сафорати Русия дар Тоҷикистон дар Душанбе ба садама дучор шудааст. Мақомот мегӯяд, ронандаи мошин ҷароҳат бардошта, баъзе қисматҳои роҳ хароб шуданд. Мақомоти умури дохилӣ мегӯянд, ҳодисаи ба садама дучор шудани автомашинаи Сафорати Русия дар Душанбе нимашаби 31-уми октябр соати 00:30 дақиқа рух дод.

Ба қавли манбаъ, дар ин соат ронандаи автомашинаи тамғаи "Хундай-Туксон" бо рақами дипломатии 002Д016 ҳангоми ҳаракат тавассути хиёбони Исмоили Сомонии пойтахт, дар сероҳаи кӯчаҳои Шероз-Сомонӣ, дар рӯ ба рӯи маркази савдои "Баракат" аз ӯҳдаи идора кардани воситаи нақлиёт набаромада, ба панҷараи оҳанин бармехӯрад.

Дар ВКД мегӯянд, дар ин ҳодиса ронанда осеб дидааст. Аммо номи ронанда ифшо нашудааст. "Ҳамчунин панҷараи оҳанини иҳотакунандаи бари ҳудуди сероҳаи мазкур, санги хорои рӯйпуши девори қисми болоии гузаргоҳи зеризаминӣ ва дигар қисматҳои гузаргоҳ корношоям гардидааст",-афзуд манбаъ.

Мақомот мегӯянд, ҳодисаи мазкур мавриди таҳқиқ қарор дорад. Масъулини Сафорати Русия дар Тоҷикистон то ҳол дар ин маврид ибрози назар накардаанд.

Кумитаи тафтишот таркиши Архангелскро "ҳодисаи эҳтимолии террористӣ" номид

Кумитаи тафтишоти Русия ба таҳқиқи ҳодисаи таркише дар идораи Хадамоти амнияти федеролии воқеъ дар дар шимоли Русия шурӯъ кард ва гуфт, ки эҳтимолан ин як амали террористӣ аст. Дар натиҷаи ин таркиш як нафар кушта шудааст. Дар изҳороти ин кумита гуфта мешавад, ки шахси гумонбар ба бомбгузории идораи ФСБ дар шимолу шарқи шаҳри Архангелск як ҷавони маҳаллӣ буд, ки дар натиҷаи таркиш худ ҳалок шуд.

“Бинобар маълумоти пешакӣ, сокини 17 солаи маҳаллӣ, ки маводи мунфаҷираи дастсохтро ба кор даровард, дар натиҷаи инфиҷор кушта шуд”, гуфта мешавад дар изҳорот. Дар натиҷаи ин таркиш ҳамчунон се корманди ФСБ ҷароҳат бардоштанд.

Игор Орлов, раиси вилояти Архангелск гуфт, баъд аз ин ҳамла мақомот чораҳои амниятиро дар ҳамаи идораҳои давлатӣ ташдид карданд.

Кумитаи миллии зиддитеррористӣ қаблан гуфт, баъд аз таркиш одамон аз ин идора берун оварда шуданд.

Муаттара Ҷӯраева гуфт, баъди як сол ба озодӣ мебарояд

Муаттара Ҷӯраева, собиқ барандаи телевизиони давлатити Тоҷикистон, ки соли 2015 бо иттиҳоми қаллобӣ ба нӯҳ соли зиндон маҳкум шуд, интизор дорад, ки баъди як сол ба озодӣ барояд. Дар ин бора худи Ҷӯраева дар як сӯҳбати рӯбарӯ бо хабарнигори нашрияи “Вечерка” аз дохили зиндон хабар додааст.

Ҳайати журналистони тоҷик, ки ахиран аз зиндони занонаи воқеъ дар шаҳри Норак дидан карданд, аз ҷумла бо Муаттара Ҷӯраева ҳам сӯҳбате анҷом додаанд. М.Ҷӯраева гуфтааст, ки “дар солҳои авҷи шӯҳрату маҳбубият, вақте ҳар сокини кишвар ӯро мешинохт, тавони худро дуруст арзёбӣ карда натавонист”. Ӯ гуфтааст, ки тиҷорати худро дар оғоз хубу муваффақ шурӯъ кард, вале баъд дучори мушкил шуду дар “қарз ғӯтид”.

Муаттара Ҷӯраева дар додгоҳ. 17 марти соли 2015
Муаттара Ҷӯраева дар додгоҳ. 17 марти соли 2015

“Дар зиндон маънои озодиро хуб дарк кардам”, гуфтааст М.Ҷӯраева дар сӯҳбат бо нашрия. Ӯ гуфтааст, ки дар зиндон дар амбори либоси зимистона кор мекунад ва дар давоми ин солҳо ҳунари дӯзандагиву пазандагиро ёд гирифтааст. Дар муддати се соли охир, ҳукми Ҷӯраева бар асоси қонуни афв ихтисор шуда, қарор аст, соли 2019 ба озодӣ барояд.

Муаттара Ҷӯраева, ки бо кори наттоқиаш дар телевизиони давлатӣ шинохта шуду, соли 2005 талош кард депутати Маҷлиси намояндагон ҳам шавад. Вале баъдан ба тиҷорату соҳибкорӣ рӯ овард, аз ҷумла дар Душанбе як ресторан ҳам боз кард, вале билохира ба зиндон афтод. Дар аризаи даъвоии зидди ӯ чандин нафар Ҷӯраеваро дар барнагардондани даҳҳо ҳазор доллар қарз гунаҳгор карданд.

Додгоҳи ноҳияи Исмоили Сомонӣ бо назардошти мӯҳлати дар боздошт нигаҳдорӣ шудани Ҷӯраева дар мӯҳлати марҳилаи пеш аз додгоҳӣ гуфт, ки ӯ бояд 5,7 соли дигар дар зиндон бимонад. Ду фарзанди Муаттара Ҷӯраева дар замони ҳабси ӯ аз ҷониби модараш тарбия мешаванд. Афроди огоҳ мегӯянд, ки зиндагии модару фарзандони Ҷӯраева хеле сангин мегузарад ва даст ба кӯмаки мардум ҳастанд. Дар зиндони занонаи воқеъ дар 50-километрии шаҳри Душанбе, ки дар ҳудуди шаҳри Норак ҷойгир аст, феълан 339 зан ба сар мебаранд, ки нисфи онҳо барои қаллобӣ маҳкум шудаанд.

“Соҳибкорбонк” хадамоти бонкдории исломиро ба роҳ монд

“Соҳибкорбонк” - як бонки хусусӣ дар Тоҷикистон ба ироаи хадамоти бонкдории исломӣ шурӯъ кард. Дафтари матбуоти “Соҳибкорбонк” иттилоъ дод, ки рӯзи 28-уми октябр миёни ин бонк ва ширкати кувайтии ITS - International Turnkey Systems оид ба татбиқи аввалин системаи автоматикунонидашудаи бонкии исломӣ шартнома ба имзо расид.
Низоми идораи бонки исломӣ бо вижагиҳои худ аз бонки анъанавӣ фарқ карда, дар баробари ҳама амалиёти бонкдории анъанавӣ, усулҳои бонкдории исломӣ, назири “Мудараба”, “Мушарака”, “Истисна”, “Салам”, “Иҷара”, “Мурабаҳа”-ро ба роҳ мондааст.

Ширкати ITS яке аз аввалин ширкатҳои тавлидкунандаи САБ-и исломӣ буда, соли 1981 ташкил шудааст.

Ба гуфтаи як манбаъ дар “Соҳибкорбонк”, роҳандозии чунин низом яке аз ҷузъҳои асосии раванди табдилдиҳии ҶСК “Соҳибкорбонк” аз бонки анъанавӣ ба бонкии исломӣ мебошад.

Мақомоти “Соҳибкорбонк” дар аввали соли ҷорӣ дар як посухи катбӣ ба Радиои Озодӣ гуфта буданд, барои табдил шудан ба бонки исломӣ бо Корпоратсияи исломии рушди бахши хусусӣ (ICD) шартнома имзо карданд. Масъулини “Соҳибкорбонк” мегӯянд, харҷи амалӣ шудани лоиҳаро пурра худи бонк пардохт хоҳад кард. Гуфта мешуд, ки “Соҳибкорбонк” баъд аз анҷоми умури ташкилӣ омода мешавад дар соли 2019 ба сокинони кишвар қарзҳои бефоиз пешниҳод кунад.

Дар соли ҷорӣ муассисаи қарзии “Алиф Сармоя” ҳам ба сокинони Тоҷикистон барои харидории ашёи рӯзғор қарзҳои бефоиз пешниҳод мекунад ва мизоҷон дар тӯли ним сол ин маблағро бозпас медиҳанд.

Ин хабарҳо дар ҳолест, ки дар паи бӯҳрони бонкӣ дар Тоҷикистон, дар давоми чанд соли охир ду бонк варшикаста шуда, ду бонки дигари ба истилоҳ низомсоз ва замоне хеле муваффақ дучори мушкил шудаанд.

Дар ҳукумат тарҳи буҷаи давлатӣ барои соли 2019 баррасӣ шуд

акс аз бойгонӣ

Мақомоти тоҷик мегӯянд, будҷаи давлатӣ барои соли 2019 бо назардошти ҳадафҳои стратегӣ, аз ҷумла таъмини истиқлолияти энергетикӣ, раҳоии кишвар аз бунбасти коммуникатсионӣ, бехатарии озуқаворӣ, таъмини ҳифзи иҷтимоии аҳолӣ ва суръат бахшидан ба рушди иқтисодиёт таҳия шудааст. Ин нукта дар ҷаласаи ҳукумати Тоҷикистон, ки шоми 30-уми октябр баргузор шуд, зикр шудааст.

Ҳамасола дар остонаи фарорасии фасли зимистон ҳукумати Тоҷикистон буҷаи соли ояндаро баррасӣ ва сипас барои тасдиқ ба порлумон мефиристад. Вале, тибқи қоидаҳо, то замони тасвиби буҷа дар порлумон, мушаххасоти он ба ҷомеа эълон намешавад. Тибқи иттилои дастрас, маблағи буҷаи соли 2017 ҳудуди 20 миллиард сомонӣ буд ва касри он низ то ним фоиз пешбинӣ мешуд.

Додгоҳи Покистон ҳукми қатл алайҳи Осия Бибиро лағв кард

Додгоҳи олии Покистон рӯзи 30-юми октяб ҳукми эъдоми як зани масеҳиро, ки таваҷуҳи ҷомаеи байналмилалиро ба худ ҷалб карда буд, лағв кард.

Ҳайати додрасҳо иборат аз раиси Додгоҳи олии Покистон Соқиб Нисор, дорас Осиф Саид Хуса ва додрас Мазҳар Олам ҳукми додгоҳи Лоҳурро, ки Осия Бибӣ, модари чаҳор фарзандро барои таҳқири паёмбари ислом Муҳаммад (сс) ба қатл маҳкум карда буд, бекор намуд ва ҳукми озодии ӯро содир кард.

Бинобар мулоҳизоти амниятӣ, макони будубоши Осия Бибӣ ошкор намешавад. Замоне ҳукми эъдоми ӯ ҷомеаи масеҳиро дар ҷаҳон ба хашм овард. Ҳоло озод кардани Осия Бибӣ хашм бахши бузурге аз ҷомеаи Покистонро ба миён овардааст.

Рӯзи 31-уми октябр тарафдорони аҳзоби исломӣ ба хиёбонҳо рехтанд ва алайҳи ин ҳукми Додгоҳи олии Покистон эътироз намуданд. Онҳо қаблан таҳдид карда буданд, дар сурати озодии ин зан тазоҳуроти оммавиро шурӯъ мекунанд.

Дар соли 2011 раиси иёлати Панҷон Салмон Таъсир ва вазири ақалиятҳои қавмии Покистон ба хотири ҷонибдорӣ аз ин зан кушта шуданд.

Тавҳин ва таҳқири муқаддасоти ислом дар Покистон ҷазои ҳукми қатлро дар пай дорад ва паҳн шудани овоза ҳам дар мавриди куфргӯи метавонад боиси муҷозоти худсарона аз сӯи издиҳом гардад.

Осия Бибӣ нахуст соли 2010 аз сӯи додгоҳи вилоятии иёлати Панҷоб барои гӯё куфргӯи дар назди занони мусулмон ҳангоми кор дар хоҷагӣ маҳкум ба қатл шуда буд.

Додгоҳ бозбинии парвандаи Мирсаидовро рад кард

Раёсати додгоҳи вилояти Суғд бозбинии парвандаи Хайрулло Мирсаидов, журналист ва раҳбари КВН-и Тоҷикистонро дар зинаи назоратӣ рад кард. Бахтиёр Насруллоев, вакили дифои Мирсаидов рӯзи 31-уми октябр гуфт, ки додгоҳи вилоятӣ бозбинии парвандаи Мирсаидовро ба далели "набудани асос", рад намуд. Ӯ дар сӯҳбат бо Радиои Озодӣ афзуд, ки раёсати додгоҳи вилояти Суғд ҳанӯз 17-уми октябр чунин тасмим гирифта, вале имрӯз қарорашро дастрас кардаанд.

Хайрулло Мирсаидов, хабарнигори шинохта ва раҳбари КВН-и Тоҷикистон ба иттифоқи вакили мудофеаш Бахтиёр Насруллоев рӯзи 13-уми сентябр аз додгоҳи Суғд расман хоста буданд, ки парвандаро аз нав баррасӣ ва Мирсаидовро "пурра сафед намояд."

Бахтиёр Насруллоев гуфт, аз ин тасмими раёсати додгоҳи вилояти Суғд бо зерҳимояаш ба Додгоҳи Олии Тоҷикистон шикоят мебаранд. "Мо чунин ҳисоб мекунем, ки дар ҳаракатҳои Мирсаидов ягон ҷиноят дида намешавад. Бинобар ин, ҳукми додгоҳи Хуҷанд ва таъиноти додгоҳи вилоятӣ бекор карда шуда, Мирсаидов сафед карда шавад. Зеро додгоҳи Хуҷанд дар нисбати Мирсаидов ғайриқонунӣ ҳукм кард. Додгоҳи вилоятӣ низ дар зинаи кассатсионӣ ин ҳукмро дар доираи қонун дуруст баррасӣ накард ва боз ҳам Мирсаидовро гунаҳкор донист",-афзуд ӯ.

Худи Мирсаидов баъди озод шудан аз боздошти 8-моҳа дар мусоҳибаи ихтисосӣ бо Радиои Озодӣ гуфта буд, ки барои исботи бегуноҳиаш то охир ва ҳатто то додгоҳи Гаага хоҳад рафт. Ӯ моҳи декабри соли гузашта боздошт ва моҳи июли имсол бо ҷурми "азонихудкунӣ ва исрофкории маблағҳои давлатӣ", "сохтакории ҳуҷҷатҳо" ва "пахши маълумоти бардурӯғ" ба 12 соли зиндон маҳкум шуд. Боздошти ӯ баъди он сурат гирифт, ки хабарнигори тоҷик дар шабакаҳои иҷтимоӣ раиси собиқи идораи ҷавонони вилояти Суғдро ба талаби "пора" муттаҳам кард.

Дар пайи талаби ҷомеаи шаҳрвандӣ ва созмону кишварҳои байналмилалӣ, Додгоҳи вилояти Суғд рӯзи 22-юми август Мирсаидовро аз зиндон озод кард, аммо доғи судиро аз номи ӯ набардошт. Додгоҳ Хайрулло Мирсаидовро ба пардохти 80 ҳазор сомонӣ ҷарима ва корҳои ислоҳӣ муваззаф намуд.

Тамдиди муҳлати пардохти ҷаримаи Мирсаидов

Моҳи октябр, дар ҳоле ки ӯ дар манзили падару модар машғули муолиҷаи худ буд, иҷрогарони додгоҳ ҳозир шуда, талаб карданд пули ҷаримаро пардозад. Дар акси ҳол, дубора ба маҳбас фиристода хоҳад шуд.

Мирсаидов бо ироаи дархостномаи расмӣ аз додгоҳ хост мӯҳлати пардохтро тамдид намояд. Зеро 8 моҳ дар маҳбас буд ва ҳоло ҷои кор, ҳамчунин маблағ ё дороие, ки онро фурӯхта, пули ҷаримаро пардозад, надорад. 15-уми октябр додгоҳи шаҳри Хуҷанд ин мӯҳлатро то 15 декабри соли ҷорӣ тамдид кард.

Жириновский ба Душанбе омад

Владимир Жириновский, муовини раиси Думаи давлатии Русия ва раҳбари Ҳизби либерал-демократии ин кишвар рӯзи 31-уми октябр бо сафари дурӯза вориди Тоҷикистон шуд. Ба иттилои Муҳаммадато Султонов, сухангӯи Маҷлиси намояндагони Тоҷикистон, нимаи дувуми имрӯз Владимир Жириновский ва ҳайати ҳамроҳи ӯ аз Қалъаи Ҳисор, ангурзорҳои ноҳияи Шаҳринав ва Турсунзода дидан мекунад. Фардо, 1-уми ноябр мулоқоти муовини раиси Думаи давлатии Русия бо Шукурҷон Зуҳуров, раиси Маҷлиси намояндагон ва мақомоти Вазорати корҳои хориҷии Тоҷикистон дар назар аст. Баъд аз зуҳри 1-уми ноябр Владимир Жириновский ва ҳайати ҳамроҳаш Тоҷикистонро тарк мекунад.

Дар 9 моҳ 11 қочоқчӣ дар марз бо Афғонистон кушта шуданд

Мақомоти марзбонии Тоҷикистон мегӯянд, дар нӯҳ моҳи соли равон дар марз 20 задухӯрди мусаллаҳона сурат гирифта, 11 қочоқӣ кушта шудааст. Ба иттилои нерӯҳои марзбонӣ, дар пайи задухӯрдҳо аз қочоқчиён беш аз 1300 килограм маводи мухаддир мусодира шудааст.

Марзи Тоҷикистон дар соли равон шоҳиди муноқишаҳои зиёде буд. Муҳимтарини онҳо ҳамла ба як мошини ҷангалбонони тоҷик буд, ки моҳи август дар минтақаи наздимарзии ноҳияи Фархор рух дод. Дар ин ҳодиса Ҳамрохон Саидов ва Давлат Сангинов кушта шуданд.

Мақомоти афғон гуфтанд, дар пайи ин ҳамла чархболҳои тоҷик дар фазои ҷангали "Кӯҳнахона" амалиёт гузаронданд. Иттилое, ки мақомоти тоҷик онро тасдиқ накарданд, аммо бо ин вуҷуд ин хабарро расонаҳои маъруфи ҷаҳонӣ инъикос карданд.

Мақомоти тоҷик гуфтанд, масъалаи ҳамла ба ҷангалбонони тоҷик дар ҷаласаи ҷамъбастии Қушунҳои сарҳадӣ баррасӣ шуд. Ба иттилои мақомот, дар бораи сабабҳои рух додани ин ҳодиса санҷиши хидматӣ анҷом доданд. Аммо ҷузъиёти ин санҷиш ошкор карда намешавад.

Зимнан мақомоти марзбонӣ мегӯянд, дар нуҳ моҳи соли равон дар марз 328 нафарро бо иттиҳоми убури ғайриқонунии марз боздошт шуданд.

Дар Қирғизистон мехоҳанд шоҳроҳҳоро пулакӣ кунанд

Вазорати нақлиёт ва роҳҳои Қирғизистон тасмим дорад, ҳаҷми пардохтро аз шоҳроҳҳои ин кишвар муайян ва чунин лоиҳаро ба порлумон ирсол кунад. Вазорати мазкур бо такя ба қарори ҳукумати Қирғизистон дар бораи рушди роҳҳо барои солҳои 2016-2025 мехоҳад, убур аз шоҳроҳҳоро пулакӣ кунад.

Нурлан Кайинбоев, роҳбари гуруҳи мушовара гуфт, дар ҳоли ҳозир баҳс сари он аст, ки кадоме аз роҳҳо бояд пулакӣ шаванд. Айни ҳол таҳияи лоиҳаи мазкур идома дорад. Дар рӯзҳои наздик ҳуҷҷатро дар баррасии умум хоҳанд гузошт.

Ба гуфтаи Нурлан Кайинбоев, талош мешавад, ки пардохти маблағи убур аз роҳ тариқи дастгоҳҳо сурат гирад. "Омили инсонӣ ба ҳадди ниҳоӣ расонида хоҳад шуд. Касе ки маблағ мепардозад, бояд донад, ки маблағи вай чи гуна сарф мешавад. Ба ҷуз ин, мо ба сифати роҳҳо таваҷҷуҳ мекунем",-гуфт вай.

Ёфтҳои бештар

Гузоришҳои видеоӣ

Сайфулло Сафаров дар бораи бознишастагиву интихобот гуфт
лутфан мунтазир бошед

### Феълан кор намекунад ###

0:00 0:03:00 0:00
XS
SM
MD
LG