Пайвандҳои дастрасӣ

Хабари нав

Блогистон

Як рӯз аз чопи матлаби Радиои Озодӣ нагузашта, мақомоти ноҳияи Рӯдакӣ ба он вокуниш карданд. Матлаб бар пояи шикваи сокинони ноҳия ва нусхаҳои дастури раиси он дар бораи гузарондани музди якрӯзаашон ба хазинаҳои махсус бахшида шудааст. Посухи мақомотро бе ягон таҳрир ин ҷо ба нашр мерасонем.

Вокуниш ба маводи танқидии "Маоши якрӯзаи кормандони буҷавӣ дар Рӯдакӣ - барои иншооти ҷашнӣ", ки аз ҷониби хабарнигори Радиои Озодӣ Муъмин Аҳмадӣ, 3 сентябри соли 2019, тариқи шабакаи интернетӣ пахш гардидааст.

Мувофиқи талаботи Қонуни Ҷумҳурии Тоҷикистон "Дар бораи матбуот ва дигар васоити ахбори омма" ношир уҳдадор аст, ки раддияро дар ҳамон ҳаҷм ва вақте, ки мавод чоп гардидааст, ҷой диҳад.

Бо дастгирӣ аз муқаррароти қонунгузорӣ вокунишро ба маводи чопнамудаи Радиои Озодӣ, барои чоп ирсол менамоем.

Мақомоти иҷроияи ҳокимияти давлатии ноҳияи Рӯдакӣ маводи танқидии "Маоши якрӯзаи кормандони буҷавӣ дар Рӯдакӣ - барои иншоотҳои ҷашнӣ"-ро, ки аз ҷониби хабарнигори Радиои Озодӣ Муъмин Аҳмадӣ 3 сентябри соли 2019, тариқи шабакаи интернетӣ пахш гардидааст, мавриди муҳокима қарор дод.

Вобаста ба ин, иттилоъ медиҳем, ки дар ҷаласаи кумитаи тадорукотии омодасозии ноҳия ба ҷашни 28-солагии Истиқлолияти давлатии Ҷумҳурии Тоҷикистон, ки 27 августи соли ҷорӣ, бо иштироки масъулини соҳаҳо, раисони ҷамоатҳои шаҳраку деҳот, роҳбарони ташкилоту муассисаҳо ва аъзои гуруҳҳои кории омодасозии минтақа ва иншоотҳои ҷашнӣ, баргузор гардид, Раиси ноҳия аз ҷумла ҷараёни дар арафаи ҷашни 28- солагии Истиқлолияти давлатии Ҷумҳурии Тоҷикистон ифтитоҳ гардидан ва ба истифода дода шудани иншоотҳои ҷашниро таҳлил намуда, вобаста ба он вазифагузориҳо намуд.

Сардори раёсати маорифи ноҳия дар ҷараёни баромадаш аз ободкорӣ ва бунёдкориҳо дар ноҳия, хусусан дар мавриди он, ки аз 414 иншооти ба ифтихори 30-солагии Истиқлолияти давлатии Ҷумҳурии Тоҷикистон дар ноҳия ба нақша гирифта шуда, шумораи зиёд ё, ин ки 76 адади он ба самти маориф равона гардидааст, қаноатмандӣ намуда. Изҳор дошт, ки маорифчиёни ноҳия ҷавобан ба ин ғамхориҳо нисбати соҳа, яъне сохта шудани шумораи муайяни бино ва синфхонаҳои таълимӣ, омодаанд, ки ба ин раванд, дар мисоли ба ҳисоби бунёдкориҳо гузаронидани мӯзди маоши якрӯзаашон, саҳмгузор гарданд.

Як қатор роҳбарони ташкилоту муассисаҳо, аз ҷумла сардухтури беморхонаи марказии ноҳия ва мудири бахши фарҳанг низ таклифи сардори раёсати маорифро ҷонибдорӣ намуданд.

Бо назардошти ин таклифу пешниҳодот ва изҳорӣ саҳмгузорӣ Раиси ноҳия ба дигар иштирокчиён ва аъзои кумитаи тадорукотии ҷашнгирии 28-солагии Истиқлолияти давлатии Ҷумҳурии Тоҷикистон дар ноҳияи Рӯдакӣ муроҷиат намуда, дар натиҷа иштирокчиёни ҷамъомад муроҷиати Раиси ноҳияро бо як овоз дастгирӣ намуданд.

Иловатан қайд менамоем, ки саҳмгузорӣ дар мисоли ба суратҳисоби махсуси ободонии ноҳия гузаронидани музди меҳнати якрӯза, сирф ихтиёрӣ буда, танҳо хоҳишмандон метавонанд, онро амалӣ созанд. Пардохти музди маоши якрӯзаи кормандон, хусусан кормандони муассисаҳои таълимӣ, бо розигӣ ва тибқи протоколҳои ташкилотҳои иттифоқи касабаашон, амалӣ гардонида шудааст.

Боиси қайд аст, ки соли ҷорӣ дар баробари вазифагузориҳое, ки аз Паёми Президенти кишвар ба Маҷлиси Олии Ҷумҳурии Тоҷикистон бармеоянд, иҷроиши нақшаи бунёдкориҳо ба ифтихори ҷашни 30-солагӣ ва мутаносибан ҷашни 28-солаги Истиқлолияти давлатии Ҷумҳурии Тоҷикистон яке аз тадбирҳои аввалиндараҷа, дониста шуда, тибқи Нақшаи чорабиниҳои бунёдкорию ободонӣ, сохтмони иншооти иҷтимоию хизматрасонӣ ва корхонаҳои нав дар ноҳияи Рӯдакӣ ба ифтихори ҷашни 30- солагии Истиқлолияти давлатии Ҷумҳурии Тоҷикистон то соли 2021 дар ноҳияи Рӯдакӣ бунёди 414 иншооти ҷашнӣ ба нақша гирифта шуда, аз он 142 иншоот ба истифода дода шудааст.

Аз ҷумла, аз аввали соли 2019 то 1 сентябри соли ҷорӣ, аз 160 иншооти ба нақша гирифташуда 88 иншоот ба истифода дода шудааст.

Айни замон корҳои сохтмонии 5 иншооти калонҳаҷм, аз ҷумла бинои муассисаи таълимӣ барои 640 ҷойи нишаст, дар як баст, дар деҳаи Ҷӯйбодоми деҳоти Чортеппа, бинои нави муассисаи таълимии №85-и деҳаи Оли Сомони деҳоти Зайнабобод, барои 640 ҷойи нишаст дар ду баст, корхонаи Ҷамъияти дорои масъулияташ маҳдуди "Оҳангудозии Тоҷикистон" ва гармхонаи Хоҷагии деҳқонии "Исматулло" дар деҳаи Кӯктоши деҳоти Чоргултеппа, ҳамчунин Маҷмааи гулгашти Нишон ва Парчами давлатии Ҷумҳурии Тоҷикистон дар шаҳраки Сомониён, ки дар маводи хабарнигори Радиои Озодӣ Муъмин Аҳмадӣ 3 сентябри соли 2019, тариқи шабакаи интернетӣ пахш гардидааст, пурра анҷом ёфта, корҳои ободонии атроф ва ороишӣ дар онҳо дар муҳлатҳои кӯтоҳтарин ба итмом расонида мешавад.

Қайд менамоем, ки бунёди иншоотҳои номбаршуда, аз ҷониби Дирексияи сохтмонҳои Дастгоҳи иҷроияи Президенти Ҷумҳурии Тоҷикистон, буҷети ноҳия, соҳибкорони алоҳида ва шарикони хориҷӣ сармоягузорӣ гардида, ниёз ба саҳмгузориҳои иловагии молӣ надоранд.

Маблағҳо аз ҳисоби ихтиёран пардохт намудаи маоши якрӯза, ба дастомада, барои корҳои ободонии атроф, кабудизоркунӣ, шинонидани гул ва алафҳои ороишӣ (газон), мумфаршкунии роҳҳои мавҷуда ва рангу бори деворҳои иншоотҳои наздик равона карда мешавад.

Бо эҳтиром,

муовини Раиси ноҳияи Рӯдакӣ Ашурзода Р.Р.

Радиои Озодӣ: Сипосгузорем, ки ҳукумати ноҳияи Рӯдакӣ ба матлаби мо зуд вокуниш нишон дод. Андешаи меҳварии посухи расмӣ "ихтиёрӣ" будани пардохтҳоест, ки чандин сокини ноҳия аз маҷбурӣ будани онҳо шикоят карданд. Дар нусхаи номаҳои расмие, ки мо нашр намудем, ихтиёрӣ будани ин амал зикр нашудааст. Дар нома аз 27 августи соли равон бо имзои раиси ноҳия Рустам Акрамзода ин амал "супориш" унвон гирифта, дар номаи дигар аз моҳи май "боварии комил"-и раис аз саховатпешагии "кулли мардум" ва "ташкилоту муассисаҳо (новобаста аз шакли моликият ва тобеияти идоравияшон) оҳанги дастурро дорад. Ба хотири пурра рӯшан шудани қазия бисёр хуб мешуд, агар мақомоти давлатии ноҳия ба хабарнигорони Радиои Озодӣ иҷоза медоданд, бо асноди ҷамъоварии маблағҳо аз наздик ошно шаванд ва иддаои шикояткунандагонро, ки мегӯянд, акнун музди якрӯзаашон барои чунин маъракаҳо бевосита аз маошашон боздошта мешавад, тасдиқ ё радди худро пайдо кунад. Мо омодаем. Нуктаи дигар забони нома аст, ки ба таҳрир ниёз дошт, вале мо сабку баёнро нигоҳ доштем ва як ҳарферо дар он тағйир надодем. Барои ин аз хонандагони муҳтарам узр мехоҳем.

Зеварбону Рауфӣ

Рӯзноманигори ҷавон Зеварбону Рауфӣ бо чанд блоги худ яке аз чеҳраҳои шинохтаи "Блогистон" шуд. Дар навиштаи тозааш ӯ аз мактабу муаллимони худ ёд мекунад ва ба мактабиён салому паём мефиристад.

Дуруд ба ҳар якатон - кудакону навҷавонони Меҳанам!

Имрӯз ид аст. Идатон муборак!

Онҳое, ки имсол аввалин соли таҳсилашонро оғоз мекунанд, ҳатман ҳолу ҳавои дигаре доранд.

Иддае ҳам ҳастанд, ки имсол мактабро ба поён мерасонанд. Бе шак ниҳонхонаи дили онҳо ҳам саршори як ҳисси хос аст.

Хелеҳо ҳам ҳоло-ҳолоҳо меҳмонҳои пушти нимкатҳо ҳастанд.

Хуш ба ҳоли ҳамаатон!

Ҳоло, ки бароятон менависам, хотираҳои солҳои мактабхониям яке пас аз дигарӣ пеши чашмам намудор мешаванд. Ҳамдарсҳоям, омӯзгоронам ва ҳатто дару девору роҳравҳои мактабам.

Вақте бузург шудед, метавонед борҳо барои зинда кардани хотирот ба мактабатон сар бизанед, аммо бешак он замон ҳисси ошнои гузаштаро нахоҳед дошт. Ҳатто агар ҳеч чиз дар онҷо тағйир наёфта бошад. Мактаб дигар шуморо мисли узве аз пайкараш намепазирад. Он вақт шумо танҳо як раҳгузар хоҳед буд. Каме ғамангез аст, на?

Имрӯз аз хушиҳо бояд гуфт. Ҳатман ҳам муаллимон ва ҳам волидонатон дар оғози соли таҳсил бароятон маслиҳат ва насиҳатҳои зиёде хоҳанд кард. Пас, ба худам чунин иҷозаро намедиҳам, зеро дар он ҷойгоҳе нестам ва бешак, беҳтар аз онҳо бароятон чизе гуфта наметавонам. Ба ҷояш бароятон орзу мекунам. Аз он чӣ дилам бароятон мехоҳад, мегӯям.

Ман дилам мехоҳад, ҳар яки шумо битавонед бе ҳарос ва дақиқ фикратонро баён кунед. Зеро, дареғ, аксарияти насли ман, насли ҷавонони “безабон” аст. Насли бетарафҳо ва бетафовутҳо...

Ман орзу дорам, ки так-таки шумо битавонед бо алифбои ниёконатон бинвиседу бихонед. Аксари намояндаҳои насли мо дар ҳар ҷумлааш дасти кам се-чаҳор калимаи русӣ илова мекунад, чун забони модарияшро хуб намедонад. Бадтар аз ин, иддае ҳастанд, ки аслан русӣ ҳарф заданро ба тоҷикӣ тарҷеҳ медиҳанд. Бо забони модарияшон ҳарф заданро ор медонанду ин гуноҳашонро зери баҳонаи “забони модариямро хуб балад нестам, бо русӣ беҳтар фикрамро баён мекунам” пинҳон мекунанд. Ҳамин аст узри бадтар аз гуноҳ! Миллати забонгумкарда миллати ҳувиятбохта мешавад!

Кош шумо битавонед бо забони бузургоне чун Рудакию Фирдавсӣ, Хайёму Бедил, Синову Розӣ ва садҳо тани дигар шахсиятҳои ҷаҳонӣ бузург шавед. То ифтихорҳои миллати ман ҳамеша бо “замони гузашта” баён нашавад. Дигар зеби калом на “доштем-доштем”, балки “дорем-дорем” бошад.

Ман умед дорам, ки шумо насли тилоии миллатам мешавед. Насли тилоӣ аммо на мисли ин нодидагоне, ки аз пулҳои падарҳои тоза ба даврон расидаашон бо мағзҳои холӣ ва назарҳои паст бо молу мулки аз роҳи ғорати мардум ба дастовардаашон бешармона ҳар сӯ фахрфурӯшӣ мекунанд. Мехоҳам насли инсонҳои озоду огоҳе бошед бо мақсадҳои бузург!

Вақте мактабхон будам, рӯзе омӯзгорам вазифа доданд, ки иншое дар бораи “кӣ шудан мехоҳам?” бинвисему онро дар синф барои ҳамдарсҳоямон бихонем. Мо беш аз сӣ нафар будем. Танҳо 10-11 нафар дархости муаллимамонро иҷро карданд. Омӯзгорамон ранҷида пурсиданд, чаро донишомӯзон вазифаро иҷро накарданд?

Яке аз ҳамсинфонам, Лутфулло, аз нимкати охирон посух дод:

-- Малима ай ин навис-навис мора чӣ фоида? “Па лубому” мактаб бут шава, мерем Расияҷон!

Посухи ӯро шунида Манижа ном дигар ҳамсинфам шердил шуда, гуфт:

-- Э муаллимаҷон, ман ҳами нуҳиро тамом кунам, басай, шу мекнм мерам!

Шояд ҳамон рӯз буд, ки фаҳмидам умқи фоҷеа чӣ қадар аст. Насли ман қурбонии низому фазоест, ки бояд тағйир ёбад. Кош шумо мисли мо набошед!

Оморҳои гуногун пешниҳод мешаванд, ки солона сафи муҳоҷирони кориро аз як то ду миллион ва ҳатто беш аз он нишон медиҳад. Гоҳо ба ин натиҷа мерасам, ки зоҳиран насли мову аз мо бузургтарҳо насли “зӯри бозӯ”-янд. Бо қудрати бозуяшон барои ғарибаҳо хидматгорӣ карданду мекунанд. Кош дар мактаб хуб хонда буданд. Кош аз ҳар ҳазор нафар як нафарашон зӯри зеҳнашро метавонист ба намоиш гузорад. Агар чунин мешуд, ҳоло ҳадди ақал 1000 ва ҳатто 2000 донишманди тоҷик доштем, ки дар кишвари “шарики истротежӣ” ва муҳоҷирони кории мо ҷойгоҳи тоҷикро дигаргуна нишон медоданд. Дар амал собит мекарданд, ки мо меросбари Хоразмиву Беруниву Синову дигар бузургонем. Ва дилам мехоҳад, шумо талош кунеду асбоби хушномии тоҷикро дар саросари дунё фароҳам оваред.

Як иштибоҳи бузурги дигари бисёре аз ҳамнаслҳоямро бароятон мегӯям. Шояд шумо бикӯшед, ки аз он бипарҳезед. Мо мактабро ба бозӣ гирифтем. Муаллимонро масхара кардему қадри заҳматҳояшонро надонистем. Кош, шумо таҳсили мактабиятонро, ки зербинои аслии сохтмони вуҷудатонро ташкил медиҳад ва дар оянда тамоми таҷриба ва андухтаҳо ва ҳатто хислату хосияти шумо болои ҳамин зербино сохта мешавад, ҷиддӣ бигиреду онро то ҳадди имкон мустаҳкам бисозед. Наслҳои моро ба ҷурми “камсаводӣ” ва “бесаводӣ” забонбурида карданд. Шумо тавре биомӯзед, ки касе натавонад чунин “лақаб”-е рӯятон бигзораду иҷозаи фикр кардан, назар додан ва ҳарф заданро аз шумо бигирад.

Дилам мехоҳад, барои омӯзондани забони русӣ ба шумо аз ким - кадом қишлоқи Русия муаллим наоваранд. Дар ҳоле, ки муаллими тоҷикро маошаш аз ин моҳ то моҳи дигар намерасад. Мо пас аз ҷанги шаҳрвандие, ки наздики сӣ соли пеш буда, ба худ наомадаем. Аммо Жопон пас аз исобати бомби атомӣ чунон худашро сохта, ки ҳеч кас ба худаш иҷоза намедиҳад фанновариҳои илмию техникии онҳоро нодида бигирад. Магар онҳо чӣ карданд? Ба ғайр аз он, ки соҳаи маорифро истеҳкоми вижа бахшиданд. Муаллимонашонро муътабар ва аз заҳамоти онҳо қадрдонӣ намуданд. Пас, ба ман бигӯед, чаро дар Меҳани мо бояд вазире, кабире, ҳатто ҷонишинаке аз он муаллими иззатманд, ки ӯро дарс додааст, моҳонаи баландтаре дошта бошад?

Насли моро ба баҳонаҳои гуногун дар қолабе иҷборан гузоштанд. Иҷозаи фаротар рафтан, гуфтан ё амалеро иҷро кардан, берун аз марзҳои ин чаҳорчубаро ба мо надоданд. Гуфтанд: ҳаминест, ки ҳаст. Бояд шукрона кунеду ҳатто фикру орзуи бештар аз инро надошта бошед.

Хоҳиши раисҷумҳур, раиси шаҳр, сарвазир ё вазир шудан барои насли шумо бояд ҳамон андоза табиӣ бошад, ки орзуи пизишк ё муаллим шудан ҳаст. Ҳеч чиз ғайри имкон нест, танҳо бояд хост!

Дар ин рӯз аз ШУМО волидони азизу устодони муҳтарам як дархости кучак дорам. Бигзоред, кудакони Меҳанамон озода бошанд. Базри ғуломию тарсеро, ки дар ниҳоди наслҳои бузургтар ҷо кардаанд, дар вуҷуди кучаку беолоиши онҳо накоред!

Ҷашни 28 солагии “Истиқлолият” дар роҳ аст. Иҷоза диҳед ҳадди ақал пас аз 28 сол миллати ман ба ИСТИҚЛОЛ-и ҳақиқӣ ва маънавию ботинӣ бирасад ва онро на дар шиору лавҳа, балки дар рагҳои ҷону дилаш бубинад.

Андешаҳоятонро баён кунед, аммо онҳоро ба иҷбор бори наслҳои баъдӣ накунед! Бовар кунед, ҳам кудакон ҳам навҷавонону ҷавонони Ватанам қудрати фикр кардан доранд. Бигзоред, онҳо дар ҳамон синне, ки ҳастанд, назарашонро (ҳатто агар хато ҳам бошад, ҳатто агар мухолифи гуфтаву андешаи шумо бошад) баён кунанд. Аз СУКУТ бояд ТАРСИД! Зеро намешавад МАҚСАДи онро фаҳмид! САДО, ҳамеша ГӮЁСТ!

Зеварбону Рауфӣ

Аз Идора. Матолибе, ки дар гушаи "Блогистон" ба нашр мерасанд, назари муаллифон буда, баёнгари мавқеи Радиои Озодӣ шумурда намешаванд.

Ёфтҳои бештар

Гузоришҳои видеоӣ

Дар Тоҷикистон ҳафтаи таҳсили байналмилалӣ оғоз ёфт
лутфан мунтазир бошед

Феълан кор намекунад

0:00 0:02:03 0:00
XS
SM
MD
LG