Пайвандҳои дастрасӣ

Хабари нав

Иттиҳодияи Аврупо Зарифро барои гуфтугӯ дар бораи эътирозҳо даъват мекунад


Вазорати умури хориҷии Олмон мегӯяд, ки Иттиҳодияи Аврупо қасд дорад вазири умури хориҷии Эронро барои гуфтугӯ дар мавриди эътирозҳои густурдаи ахир дар Эрон, даъват кунад. Зигмар Габриэл, мегӯяд, ин тасмим пас аз баҳсу баррасӣ бо масъули сиёсати хориҷии Иттиҳодияи Аврупо гирифта шудааст.

Мақомҳои баландпояи Эрон, аз ҷумла раҳбари ин кишвар, бархе кишварҳои хориҷӣ, аз ҷумла Амрикоро ба даст доштан дар эътирозҳои ахир муттаҳам кардаанд.

Оқои Габриэл рӯзи якшанбеи 7-уми январ ба шабакаи телевизионии Олмон гуфтааст, якҷо бо масъули баландпояи сиёсати хориҷии Иттиҳодияи Аврупо Федерико Магеринӣ тасмим гирифта шуд, ки вазири умури хориҷии Эрон даъват шуда, дар мавриди эътирозҳои ахир дар он кишвар гуфтугӯе сурат бигирад.

Вазири умури хориҷии Олмон гуфтааст, ки эҳтимол дорад "ҳафтаи оянда" ин музокирот анҷом шавад. Аммо вай дар бораи ҷузъиёти ин музокирот ишорае накардааст. Вазири умури хориҷии гуфтааст, ки аз ҳамон оғози эътирозҳо ба ин масъала таъкид доштанд, ки бояд озодии баён эҳтиром шавад ва ҳукумати Эрон аз ҳаққи мардум ҳимоят кунад.

Зигмар Габриэл, вазири умури хориҷии Олмон бо ҳамтои эрониаш Муҳаммадҷвод Зариф. Акс аз бойгонӣ.
Зигмар Габриэл, вазири умури хориҷии Олмон бо ҳамтои эрониаш Муҳаммадҷвод Зариф. Акс аз бойгонӣ.

Хабаргузории "Франс-пресс" мегӯяд, Зигмар Габриэл аммо дар идома гуфтааст, ки Берлин қасди пайравӣ аз суханони матраҳшуда аз сӯи президенти Амрикоро надорад. Доналд Трамп, раиси ҷумҳури Амрико рӯзҳои гузашта борҳо аз эътирозгарон дар Эрон ҳимоят карданд. Оқои Трамп чанд рӯз пеш дар "Твиттер" гуфта буд, "эҳтироми фаровон барои мардуми Эрон, ки дар талош барои бозпас гирифтани (кишвар аз даст) ҳукумати фосидҳо ҳастанд. Шоҳиди ҳимояти бузурги Амрико дар замони муносиб хоҳед буд!"

Габриел мегӯяд, ки Олмон ва Фаронса "дар мавриди иқдомот барои истифодаи абзорӣ аз кашмакашҳои дохилии Эрон, ҳушдор додаанд."

Рӯзи ҷумъаи 5-уми январ нишасти Шӯрои Амнияти СММ бо дархости Амрико дар робита бо ҳодисаҳои Эрон баргузор шуд ва намояндаи доимии Амрико дар СММ хонум Никки Ҳейли аз эътирозгарон дар Эрон ҳимоят кард ва гуфт, ки онҳо ба кӯмаки ҷаҳон ниёз доранд. Вай гуфта буд, ки нооромиҳо дар Эрон на фақат ба ҳуқуқи башар, балки ба сулҳ ва амнияти ҷаҳонӣ ҳам таъсир мегузорад.

Намояндаи доимии Амрико дар СММ хонум Никки Ҳейли.
Намояндаи доимии Амрико дар СММ хонум Никки Ҳейли.

Аз сӯи дигар, Фаронса, аз муттаҳидони Амрико ва кишвари дигаре, ки соҳиби ҳаққи вето дар Шӯрои Амният аст, эълом кард ҳодисаҳои Эронро намешавад "хатаре барои сулҳ ва амнияти ҷаҳонӣ" донист. Сафири Фаронса дар СММ гуфтааст, "ҳар қадар ҳодисаҳои ахири Эрон нигаронкунанда бошад, дар ҳадде нест, ки онро хатаре барои амният ва сулҳи ҷаҳонӣ биномем."

Нишасти Шӯрои Амният бо эътирози Эрон рӯбарӯ шудааст. Мақомҳои баландпояи Эрон, аз ҷумла раҳбари ин кишвар, бархе кишварҳои хориҷӣ, аз ҷумла Амрикоро ба даст доштан дар эътирозҳои ахир муттаҳам кардаанд. Мақомҳои амрикоӣ, аз ҷумла сафири Амрико дар СММ, раиси созмони истихбороти Амрико - CIA ва мақомҳои баландпояи дигари ҳукумати он кишвар ин иттиҳомотро радд кардаанд ва мегӯянд, эътирозҳо бинобар норизоятии шаҳрвандон аз вазъи иқтисодӣ ва сиёсии Эрон сар задааст.

Эътирозҳои Эрон ҳудуди даҳ рӯзи қабл оғоз шуд ва дар муддати кӯтоҳ ба шаҳрҳои гуногуни Эрон густариш ёфт. Дар оғоз эътирозгарон беҳбуди ваъи иқтисодиро аз ҳукумат талаб мекарданд ва сипас ин раҳпаймоиҳо ҷанбаи сиёсӣ гирифт ва эътирозгарон алайҳи раҳбар ва ниҳодҳои Ҷумҳурии исломӣ шиор сар медоданд. Бинобар гузоришҳо, дар эътирозҳои ахири Эрон 21 нафар кушта ва садҳо нафар боздошт шудаанд.

XS
SM
MD
LG