Пайвандҳои дастрасӣ

Хабари нав

Хабарҳо

Ҳомиди Карзай ба Покистон меравад

Вазорати умури хориҷаи Покистон эълом кард, ки раиси ҷумҳури Афғонистон Ҳомиди Карзай ҳафтаи оянда ба Покистон сафари расмӣ анҷом хоҳад дод. Сухангӯи вазорати мазкур Муҳаммад Содиқ рӯзи чаҳоршанбе гуфт, ҳангоми сафари Ҳомиди Карзай дар рӯзҳои 26 ва 27-уми декабр вай бо раиси ҷумҳурии Покистон Парвиз Мушарраф ва дигар мақомоти олирутбаи ин кишвар дидору гуфтӯгу хоҳад кард. Равобити Афғонистон ва Покистон дар чанд соли гузашта ба сардӣ гароид, чун мақомоти Кобул мегӯянд, ки Покистон барои маҳви ҷангҷӯёни Толиб дар манотиқи марзиаш талоши кофӣ ба харҷ намедиҳад.

Ҳамаи хабарҳои имрӯзро дар инҷо бихонед

Рӯҳонӣ гуфт, касе ниқоби тиббӣ намепӯшад, аз хадамоти давлатӣ маҳрум хоҳад шуд

Ҳасани Рӯҳонӣ

Ҳасани Рӯҳонӣ, раиси ҷумҳурии Эрон, гуфт, касе, ки ниқоби тиббӣ напӯшад, аз хадамоти давлатӣ маҳрум хоҳад шуд.

Вай афзуд, ҷойҳои корие, ки қоидаҳои беҳдоштиро риоя намекунанд, барои як ҳафта баста мемонанд.

Рӯҳонӣ ин суханонро рӯзи 4-уми июл ҳангоми эъломи қадамҳои баъдӣ барои муқобила бо коронавируси нав дар кишвараш баён кард.

Қарор аст, аз рӯзи якшанбе истифода аз ниқоби тиббӣ дар маконҳои умумӣ дар Эрон ҳатмӣ шавад.

Вазорати тандурустии Эрон мегӯяд, шумори ҷонбохтагон аз коронавирус дар он кишвар ба беш аз 11 ҳазору 400 тан расида, омори гирифторон ба тақрибан 238 ҳазор кас баробар шудааст.

Гумон меравад, ки омори воқеӣ ба маротиб бештар бошад.

COVID-19 дар Тоҷикистон. Чанд нафар бемор шуданд, фавтиданд ва шифо ёфтанд?

Дар як шабонарӯзи гузашта дар Тоҷикистон гирифтории 51 нафар ба коронавируси нав тасдиқ шудааст ва бо ин шумори умумии беморон рӯзи 4-уми июл ба 6159 нафар баробар шуд.

Вазорати тандурустии Тоҷикистон мегӯяд, то ин дам 4809 кас ё беш аз 78 дар сади беморон шифо ёфта, 52 нафар ҷон бохтаанд.

Омори фавтидагон аз коронавируси нав дар Тоҷикистон аз 20-уми июн ба ин тараф бетағйир аст. Феҳрасти ғайрирасмии қурбониёни эҳтимоли коронавирус ва "илтиҳоби шуш" низ аз 14-уми июн иваз нашудааст. То он вақт номи беш аз 430 нафарро сабт карда буданд.

Мақомоти Тоҷикистон мегӯянд, тайи тақрибан се ҳафтаи ахир сирояти коронавирус ба сокинон кам шудааст.

Ҳоло дар кишвар маҳдудияти хосе вуҷуд надорад, аммо 4-уми июл бо ризояти президенти Тоҷикистон барои надоштани ниқоби тиббӣ, паҳн кардани бемориҳои хавфноки сироятӣ ва нашри "ахбори носаҳеҳ" дар бораи коронавируси нав ҷазову ҷарима таъин шуд.

Матолиби бештарро дар бораи коронавируси нав дар Тоҷикистон дар ин ҷо бихонед

Туркия 20 мақоми Саудиро барои қатли Хошуқҷӣ муҳокима мекунад

Ҷамол Хошуқҷӣ

Додгоҳе дар Туркия рӯзи 3-юми июл муҳокимаи 20 мақоми Арабистони Саудиро, ки гуфта мешавад дар қатли рӯзноманигор Ҷамол Хошуқҷӣ даст доштанд, оғоз кард.

Хошуқҷӣ аз мунтақидони Муҳаммад бин Салмон, валиаҳди Арабистони Саудӣ буд ва дар моҳи октябри соли 2018 дар консулгарии Саудӣ дар Истанбул кушта шуд.

Мақомҳои Арабистони Саудӣ иддао мекунанд, ки қатли Хошуқҷӣ кори дасти “як гурӯҳи худсар” буда, давлат онро иҷоза надодааст.

Дар айбномаи додситони Истанбул раиси собиқи идораи истихбороти Арабистони Саудӣ Аҳмад Ал-Асирӣ ва собиқ мушовири аршади шоҳзодаи Саудӣ – Сауд Ал-Қаҳтонӣ ба иқдоми “қатли тарҳрезишуда бо нияти шайтонӣ” муттаҳам шудаанд.

Ба гуфтаи додситонӣ, 18 муттаҳами дигар дар бӯғӣ кардани Хошуқҷӣ даст доштанд. Муттаҳамонро ғоибона муҳокима мекунанд.

Ҷамол Хошуқҷӣ бори охир замоне дида шуд, ки барои такмили санади издивоҷи худ ба консулгарии Арабистони Саудӣ дар Истанбул дохил шуд. Ҳеч осоре аз ҷасади ӯ наёфтанд.

Мақомоти Эрон гуфтанд, сабабҳои “ҳодиса”-и Натанзро фаҳмиданд

Шӯрои олии амнияти миллии Эрон хабар дод, ки сабабҳои “ҳодисае” дар муассисаи ҳастаии Натанз мушаххас шудааст.

Кайвон Хусравӣ, сухангӯи шӯро, 3-юми июл гуфт, ба далоили амниятӣ сабаби “ҳодиса” ва ҷузъиёти он ҳоло эълом намешавад. Аммо, ба қавли ӯ, “дар як замони муносиб дар ин бора маълумот дода хоҳад шуд”.

Беҳрӯзи Камолвандӣ, сухангӯи идораи энержии ҳастаии Эрон, гуфтааст, “ҳодиса” дар фазои кушод рух додааст. Ба гуфтаи вай, ҳарчанд ин рӯйдод олудагӣ эҷод накарда ва талафоти ҷонӣ надошт, хисороти моливу моддӣ ба бор овардааст.

Бузургтарин муассисаи ҳастаии Эрон дар шаҳри Натанз аст, ки аз Теҳрон 250 километр фосила дорад. Ин муассиса ба хотири ҳифозат аз ҳамлаҳои ҳавоӣ дар зери замин сохта шудааст.

Фаронса як узви ДОИШ-ро ба 30 соли зиндон маҳкум кард

Акс аз бойгонӣ

Додгоҳе дар Париж, маркази Фаронса, як узви гуруҳи тундрави "Давлати исломӣ" ё ДОИШ-ро ба 30 соли зиндон маҳкум кард. Тайлер Вилюсро ба иртикоби ҷиноят дар байни солҳои 2013-2015 дар Сурия гунаҳкор донистанд.

Ба қавли муфаттишон, Вилюси сисола ба дини ислом гаравида буд ва узвияти шохаи "Ал-Муҳоҷирин"-ро дошт. Ин гуруҳ бештар аз ҷангҷӯёни Қафқози Шимолӣ ва Осиёи Марказӣ таркиб ёфта, дар Сурия одамонро шиканҷа карда ва куштааст.

"Ал-Муҳоҷирин" соли 2015 аз баданаи гурӯҳи тундрави "Давлати исломӣ" ҷудо шуда, ба гуруҳи "Ан-Нусра" пайвастааст.

Дар яке аз видеоҳои нашршуда дар шабакаҳои таблиғотии ДОИШ дар соли 2015 Тайлер Вилюс ду метр дуртар аз маҳалли қатли асирон тасвир ёфтааст.

Ӯро соли 2015 дар Туркия дар роҳ ба сӯи Прага дастгир карданд. Ба қавли муфаттишон, вай ният доштааст ба Фаронса баргашта, амалиёти террористӣ анҷом диҳад.

Трамп дар суханронии бахшида ба рӯзи истиқлол аз тазоҳуроти ахир гуфт

Президент Доналд Трамп ҳангоми суханронӣ дар Кӯҳи Рушмор, 3-юми июли 2020

Доналд Трамп, раиси ҷумҳури Амрико, дар суханронии худ ба муносибати рӯзи истиқлоли ин кишвар аз он чи "маъракаи бераҳмона барои аз байн бурдани таърихи Амрико ва бадном кардани қаҳрамононаш" хонд, ба шиддат интиқод кард. 4-уми июл рӯзи истиқлоли Амрикост.

Трамп дар ишора ба тазоҳуроти ахир дар Иёлоти Муттаҳида гуфт, ҳадафи он нобудии арзишҳову таърихи Амрико аст, аммо ин суханон мавҷе аз интиқодҳоро ба ҳамроҳ доштааст.

Пас аз марги Ҷорҷ Флойд, марди амрикоии африқоитабор, шаҳрҳои мухталифи Амрико шоҳиди тазоҳуротти густарда буданд. Флойд 25-уми майи имсол ҳангоми боздошт шуданаш аз сӯйи пулис ҷон дод.

Дар ҷараёни тазоҳуроти алайҳи нажодпарастӣ, эътирозгарон ба чандин муҷассама ва ҷойҳои таърихӣ осеб расонданд. Бисёре аз ин муҷассамаҳо марбут ба даврони ғуломдорӣ дар Амрико буданд.

Дар Амрико рӯзи 4-уми июли соли 1776 Эъломияи мустақил шудан аз Бритониё имзо карда шуд.

Омори гирифторони коронавируси нав дар Амрико афзудааст

Амрико. Акс аз моҳи апрели имсол

Дар Иёлоти Муттаҳида дар се рӯзи гузашта беш аз 50 ҳазор кас ба коронавируси нав гирифтор шудаанд.

Афзоиши шумори беморон дар ҳолест, ки 4-уми июл рӯзи истиқлоли ин кишвар аст. Шаҳрвандони Амрико маъмулан бо сайру сафар ва баргузории маҳфилҳо аз ин рӯз таҷлил мекунанд.

Мақомҳои беҳдоштӣ аз мардум хостаанд, ки дар хона бимонанд. Дар чанд аёлат ҷараёни азсаргирии фаъолиятҳои иқтисодӣ ба таъхир гузошта шудааст.

Дар маҷмуъ, коронавирус ба тақрибан 2 миллиону 800 ҳазор кас дар Иёлоти Муттаҳидаи Амрико сироят карда, зиёда аз 129 ҳазор нафарро куштааст.

Заминларзаи 5-дараҷаӣ Тоҷикистонро такон дод

Рӯзи 4-уми июл (соати 14:53) заминларзаи сахт Тоҷикистонро такон дод. Ба иттилои идораҳои зилзилашиносии ҷаҳон, маркази заминларза дар 200-километрии шарқи Душанбе ва 50 километр дуртар аз минтақаи Рашт будааст. Маркази зилзиласанҷии Академияи миллии илмҳои Тоҷикистон хабар дод, ки нирӯи заминларза дар маркази он 5 ва дар шаҳри Душанбе 3 дараҷаи Рихтерро ташкил дод. Тоҷикистон дар яке аз минтақаҳои зилзилахези қораи Осиё ҷойгир аст. Дар гузашта бар асари зилзила дар гӯшаҳои кишвар чандин хона вайрон шудааст.

Кай ва аз куҷо? Ҷадвали 13 парвози дигар аз Русия ба Тоҷикистон

Акс аз бойгонӣ

Мақомоти Тоҷикистон барои баргардондани муҳоҷирон аз Русия 13 парвози дигари чартерӣ ё ғайринақшавии ҳавопаймоҳоро тартиб додаанд, вале мегӯянд, парвозҳо баъди ба даст омадани ризояти Маскав анҷом хоҳад шуд.

Ин дар ҳолест, ки бино ба ҷадвали парвозҳои иловагӣ ҳавопаймои "Тоҷик Эйр" бояд 4-уми июл муҳоҷиронро аз Маскав ба Душанбе биорад.

Пештар барои овардани муҳоҷирони тоҷик аз Русия ҳашт парвози ғайринақшавӣ ташкил карда буданд.

Вазорати корҳои хориҷии Тоҷикистон рӯзи шанбе гуфт, шумори талабгорони бозгашт ба ватан "ниҳоят зиёд аст" ва ба ин далел парвозҳои иловагиро ба нақша гирифтанд. Ба иттилои манбаъ, бартарӣ ба қишрҳои осебпазир, "пеш аз ҳама беморон, занону кӯдакони хурдсол, пиронсолон, донишҷӯён, инчунин шахсоне, ки ба сафари хидматӣ ба Русия рафта буданд, дода мешавад".

Вазорат мегӯяд, муваққатан номнавис кардани шаҳрвандон дар бинои сафорат ва консулгариҳои генералии Тоҷикистон дар Русия қатъ шудааст. "Қабули аризаҳо ба воситаи почтаи электронии charter-russia@mfa.tj идома дорад", - гуфтанд дар вазорат.

Бархе аз муҳоҷирон раванди бозгашт аз Русия ба Тоҷикистонро "беназм" гуфтанд. Онҳо шикоят доранд, ки ба парвозҳои чартерӣ на афроди дармондаву пиру бемор, балки ба иддаои онҳо бештар ҷавонону шахсони солим роҳ меёбанд. Иддаое, ки мақомот бо он розӣ нестанд.

Ҷадвали пешниҳодии Тоҷикистон барои парвозҳои иловагӣ аз Русия:

  • 3 июли 2020 (баргашт субҳи 4 июл) бо хатсайри Душанбе – Маскав – Душанбе, ширкати “Тоҷик Эйр”;
  • 4 июли 2020 бо хатсайри Душанбе – Маскав – Хуҷанд, ширкати “Сомон Эйр”;
  • 7 июли 2020 бо хатсайри Душанбе – Маскав – Душанбе, ширкати “Сомон Эйр”;
  • 9 июли 2020 бо хатсайри Душанбе – Маскав – Душанбе, ширкати “Тоҷик Эйр”;
  • 11 июли 2020 бо хатсайри Душанбе – Маскав – Душанбе, ширкати “Сомон Эйр”;
  • 16 июли 2020 бо хатсайри Душанбе – Екатеринбург – Душанбе, ширкати “Тоҷик Эйр”;
  • 18 июли 2020 бо хатсайри Душанбе – Новосибирск – Душанбе, ширкати “Сомон Эйр”;
  • 20 июли 2020 бо хатсайри Душанбе – Маскав – Душанбе, ширкати “Тоҷик Эйр”;
  • 22 июли 2020 бо хатсайри Душанбе – Санкт-Петербург – Душанбе, ширкати “Сомон Эйр”;
  • 24 июли 2020 бо хатсайри Душанбе – Маскав – Душанбе, ширкати “Сомон Эйр”;
  • 26 июли 2020 бо хатсайри Душанбе – Краснодар – Душанбе, ширкати “Тоҷик Эйр”;
  • 28 июли 2020 бо хатсайри Душанбе – Маскав – Душанбе, ширкати “Тоҷик Эйр”;
  • 30 июли 2020 бо хатсайри Душанбе – Маскав – Душанбе, ширкати “Сомон Эйр”.

Вакилон ба истироҳат рафтанд. Танаффус дар кори порлумони Тоҷикистон

Ҷаласаи порлумон. 10-уми июни 2020

Вакилони Маҷлиси Намояндагон, палатаи поёнии порлумони Тоҷикистон, ба рухсатии меҳнатӣ рафтаанд. Мақомот мегӯянд, истироҳати намояндагони мардум аз 1-уми июл то 15-уми август идома хоҳад дошт.

Дар ин давра порлумон кор намекунад ва баррасиву қабули қонунҳо низ дар назар нест, вале дар сурати зарурат президенти Тоҷикистон ҳақ дорад, ҷаласаи ғайринавбатиро даъват кунад.

63 узви Маҷлиси Намояндагон дар панҷ сол як бор интихоб мешаванд. Интихоботи ахири порлумонӣ моҳи марти имсол баргузор шуд. Ба он аксаран намояндагони ҳизби ҳокими халқии демократӣ ва намояндагони ҳизбҳои ҷонибдори ҳукумат роҳ ёфтанд.

Ҳизби мухолифи сотсиал-демократи Тоҷикистон дар ин корзори сиёсӣ иштирок кард, вале ба қавли мақомот, ройи лозимро ба даст наовард. Раҳбарияти ҳизб мегӯянд, ройи ҷонибдоронашон “дуздида” шудааст.

Созмонҳову кишварҳои ғарбӣ интихоботи моҳи мартро олуда ба тақаллуб ва ношаффоф хонданд. Нозирони кишварҳои собиқи Шӯравӣ ва Созмони Ҳамкориҳои Шонгҳой, созмони зери назари Чин, онро одилона тавсиф карданд.

Мақомот ва вакилони порлумон ҳамвора аз кори худ қаноатманданд ва ҳар сол аз баррасиву қабул шудани даҳҳо тарҳи қонун ва ислоҳҳо ба қонун хабар медиҳанд, вале баъзе аз сокинон шикоят мекунанд, ки вакилон мушкили аҳолиро дар маҷлис намебардоранд.

Сӯхтор дар таваллудхонаи шаҳри Кӯлоб. ВИДЕО

Субҳи 4-уми июл болопӯши таваллудхонаи шаҳри Кӯлоб оташ гирифт. Занон ва навзодонро аз бино ба берун баровардаанд. Бино ба наворҳое, ки дастраси Радиои Озодӣ шуд, оташнишонҳо дар ҷойи ҳодиса ҳастанд ва талош доранд, сӯхторро хомӯш кунанд. Сабаби сӯхтор ҳанӯз дақиқ нест.

Дар Тоҷикистон дар як рӯз 50 кас аз коронавирус бемор шудаанд

Акс аз бойгонӣ

Вазорати тандурустии Тоҷикистон гуфт, дар шабонарӯзи гузашта 50 кас ба коронавируси нав гирифтор шудаанд. Шумори умумии беморон то 3-юми июл ба 6108 нафар расид.

Мақомот мегӯянд, 4762 нафар ё тақрибан 78 дар сади беморон шифо ёфтаанд. Ба иттилои расмӣ, аз охири моҳи апрел, замони эътирофи мавҷудияти коронавируси нав дар Тоҷикистон, то ин дам 52 кас ҷон бохтаанд. Дар тақрибан ду ҳафтаи ахир фавти беморони COVID-19 сабт нашудааст.

Дар феҳрасти ғайрирасмӣ то нимаи дувуми моҳ июн номи беш аз 430 қурбонии эҳтимолии коронавируси нав ва илтиҳоби шушро тартиб додаанд, вале дар бештар аз ду ҳафтаи ахир дар ин рӯйхат низ иттилое ворид нашудааст.

Дар ҳоле ки Тоҷикистон аз кам шудани омори беморон хабар медиҳад ва маҳдудиятҳоро бардоштааст, Узбекистону Қазоқистон маҳдудиятҳоро барои пешгирӣ аз густариши беморӣ дубора сахттар мекунанд.

Жан Кастекс нахуствазири нави Фаронса шуд

Жан Кастекс - нахуствазири Фаронса

Жан Кастекс – собиқ муовини раиси маъмурияти президенти Фаронса ба мақоми нахуствазирӣ таъин шуд. Дар ин бора рӯзи 3 июл қасри президенти Фаронса хабар дод. Вазифаи асосии Кастекс мусоидат ба кишвар дар берун шудан аз паёмадҳои коронавирус мешавад. Рӯзи ҷумъа президент Эммануэл Макрон истеъфои ҳукумат ба раҳбарии нахуствазир Эдуард Филиппро қабул кард, ки аз соли 2017 дар ин вазифа кор кардааст. Тағйироти мазкур пешгӯишаванда буд. Худи Макрон, ки то анҷоми мӯҳлати президентиаш ду соли дигар мондааст, қаблан дар мусоҳиба бо «Радиои байналмилалии Фаронса» гуфт, ки «тими нав ташкил мешавад». Як сабабаш паёмадҳои пандемияи коронавирус мебошад. Бархе пешбиниҳо ин аст, ки президент дар талоши тақвияти сиёсати иҷтимоӣ буда, ба пуштибонии соҳаи бизнес нигаронида шудаааст.

Конститутсияи навшдудаи Русия 4 июл ба ҳукми иҷро медарояд

Элла Памфилова, раиси Комиссиюни марказии интихоботҳои Русия гуфт, ки қонуншиканиҳо дар овоздиҳӣ "хеле кам буд"

Конститутсияи навшудаи Русия, ки дар қатори дигар тағйирот ҳеҷ шудани мӯҳлати президентии Владимир Путин ва роҳи ӯ ба ду интихоботи дигарро боз мекунад, рӯзи 4 июл ба иҷро медарояд. Дар ин замина рӯзи 3 июл қарори нави Путин имзо шуд. Қабл аз ин Комиссиюни марказии интихоботҳои Русия натиҷаҳои ниҳоии референдумро бар асоси протоколи ниҳоӣ тасдиқ кард. Зери протокол ҳама аъзои комиссиюни интихоботӣ якдилона имзо гузоштанд. Бар асоси ин санад, ҳузури раъйдиҳандагон дар овоздиҳии 25 июн то 1 июл 68 дарсадро ташкил додааст.

Дар протоколи расмӣ омадааст, ки аз ин ҳисоб наздики 78 дарсад гуфтаанд, ки тарафдори тағйироти конститутсионӣ ва беш аз 21 дарсад мухолиф мебошанд. Бархе аъзои комиссиюн дар ҷаласа гуфтанд, ки дар овоздиҳӣ “амалҳои таҳрикомез” ва талошҳои беобрӯ кардани ин маърака дида шуд, вале ин талошҳо “бенатиҷа анҷомид”. Аъзои комиссиюни интихоботӣ таъкид мекунанд, ки овоздиҳӣ одилона баргузор шуд ва раиси он Элла Памфилова гуфт, ки қонуншиканиҳо “хеле кам буд”.

Вале нозирони бетараф ва созмонҳои мухолифон назари дигар доранд ва мегӯянд, ки овоздиҳӣ бо қонуншиканиҳову тақаллуб ба ҳамроҳ гузашт.

Падари Ҳабиб Нурмагомедов даргузашт

Ҳабиб Нурмагомедов дар канори падараш Абдулманап Нурмагомедов

Падари қаҳрамони бозиҳои якҳарбаи омехта Ҳабиб Нурмагомедов - Абдулманап Нурмагомедов даргузашт. Дар ин бора дар саҳифаи худ дар Телеграм раҳбари Чеченистон Рамазон Қодиров хабар дод. Вебсайти хабарии Лента.ру менависад, ки Қодиров ба оилаи варзишгари маъруф изҳори ҳамдардӣ кардааст. 15 апрели имсол расонаҳо хабар доданд, ки падари Нурмагомедов ба як беморхонаи Махачқалъа, пойтахти Доғистон бистарӣ шуд ва дертар бемории ӯро илтиҳоби шуш гуфтанд. "Известия" менависад, ки рӯзи 13 май маълум шуд, ки ӯ бо ҳолати сангин дар як беморхонаи Маскав аз коронавирус табобат мегирад ва як муддат дар ҳолати кома ё беҳушӣ ҳам қарор дошт.

Рӯзи 18 июн як ҳамкори Нурмагомедов гуфт, ки Абдулманап Нурмагомедов аз коронавирус шифо ёфтааст. Вале зоҳиран паёмадҳои коронавирус вазъи сиҳҳатии ӯро сангин кардааст.

Абдулманап Нурмагомедови 58-сола мураббии варзиш буд ва ба ҷуз писараш чандин қаҳрамони дигарро низ дар бозиҳои якҳарбаи омехта тарбия кардааст.

Дар шаҳри Нурсултон муҷассамаи Нурсултон Назарбоев гузошта шуд

Муҷассамаи баланди Нурсултон Назарбоев рӯзи 3 июл дар даромадгоҳи Донишгоҳи миллии мудофеаи Қазоқистон ифтитоҳ шуд

Дар шаҳри Нурсултон дар остонаи 80-умин зодрӯзи собиқ президент Нурсултон Назарбоев муҷассамаи ӯро ифтитоҳ карданд. Ҳайкали Назарбоев дар назди Донишгоҳи миллии мудофеаи Қазоқистон ба номи Нурсултон Назарбоев қомат афрохтааст. Дар фарҳанги башарӣ маъмулан муҷассамаҳову ҳайкалҳои сангиро баъди даргузашти инсон мегузоранд, вале дар Осиёи Марказӣ дар давраи раҳбарии президенти собиқ Сафармурод Ниёзов, ки дар Туркманистон низоми диктотурӣ ва кеши шахсият сохта буд, дар давраи зиндагиш муҷассамаи ӯ дар маркази Ишқобод гузошта шуд.

Рӯзи 6 июл Назарбоев зодрӯз дорад ва маросими ифтитоҳи муҷассамаро ба таври онлайнӣ президент Қосимҷомарт Тоқаев, ки соли гузашта баъди ногаҳон ба истеъфо рафтани Назарбоев ба ин мақом омад, мушоҳида намуд. Маълум нест, ки оё Назарбоев, ки гуфтанд аз коронавирус раҳо шудааст, ин маросимро мушоҳида кард ё на.

Сухангӯи Назарбоев Айдос Укибай дар Твиттер навишт, ки рӯзи 2 июл тести озмоишии Назарбоев ба коронавирус манфӣ баромад. Хабари ба беморӣ гирифтор шудани ӯ рӯзи 18 июн расонаӣ шуд. Назарбоев давоми 30 сол дар Қазоқистони ғанӣ аз нафт раҳбарӣ карда ҳоло ҳам як раҳбари бонуфуз дар минтақа боқӣ мемонад. Ӯ мақомҳои раиси ҳизби ҳокими «Нуротан» ва раиси Шӯрои амниятро ҳифз кардааст.

Айбдоркунанда талаб дорад рӯзноманигор Прокопева ба 6 соли зиндон маҳкум шавад

Светлана Прокопева, журналисти гумонбар дар сафед кардани терроризм

Ҷониби айбдоркунанда дар як додгоҳи Русия оид ба сафед кардани терроризм талаб кард, ки журналист Светлана Прокопева ба шаш соли зиндон маҳкум шавад. Инчунин додситонӣ хостааст, ки Прокопева давоми чор сол аз ҳақи кор ба ҳайси рӯзноманигор маҳрум шавад. Мурофиа дар додгоҳи низомии шаҳри Псков ҷараён дорад. Парвандаи ҷиноӣ алайҳи ин рӯзноманигор феврали соли 2019 боз шуд. Прокопеваро барои шарҳаш дар радиои "Эхо Москвы в Пскове" муҳокима мекунанд. Ӯ дар ин сӯҳбаташ дар бораи худкушии як мард дар даромадгоҳи дафтари ФСБ-и Архангелск сӯҳбат карда ин ҳолатро ҳамчун эътироз алайҳи қонуншиканиҳои ходимони ҳифзи қонун арзёбӣ кард. Назарҳояшро ӯ баъдан дар як блогаш ҳам чоп кард. Прокопева дар додгоҳ гуфт, ки ин суханҳоро ба он хотир гуфт, ки амалҳои террористӣ дар оянда такрор нашаванд. Ба саволи додрас дар бораи он ки "оё ӯ терроризмро сафед мекунад?", – Прокопева гуфт, навиштаҳои ӯ барои ҳимоят аз мардум равона шуда буд.

Ба ҳимояи Прокопева журналистон, созмонҳои ҳомии озодии баён, сиёсатмадорону ходимони ҷамъиятии Русияву кишварҳои дигар садо баланд карданд. Иттиҳоди журналистони Петербург талаб дорад, ки парвандаи ӯ қатъ шавад.

RT аз Навалний, Собол ва Znak.com 500 ҳазор рубл талаб кард

Любов Собол, ҳуқуқшиноси Бунёди мубориза бо фасоди Алейсей Навлний

Шабакаи телевизионии RT ба додгоҳ муроҷиат карда хостааст, ки Алексей Навалний, Любов Собол ва вебсайти Znak.com барои нашри гузориш ва видео дар бораи дурӯғин будани омори маҳбубияти барномаҳои ин телевизион дар шабакаи YouTube дар ҳаҷми 500 ҳазор рубл ҷуброн пардохт кунанд. Дар ин бора Znak.com бо такя ба аризаи RT хабар додааст. Шабакаи RT аз ин се ҷониб талаб кардааст, ки қарори додгоҳ дар бораи ғйривоқеӣ будани иттилоъро чоп карда, нашри видео дар саросари Русия манъ шавад.

Аз ҷумла, даъвогар хостааст, ки ҳуқуқшиноси Бунёди мубориза бо фасод Любов Собол иддаояш дар бораи ин ки сардабири RT Маргарита Симонян “ҳама, аз ҷумла раҳбараш Владимир Путинро фиреб мекунад”, “ин шабакаро касе тамошо намекунад”, RT аз роҳҳои фаннии тақаллубӣ омори бинандаҳоро боло мебаранд ва “буҷаи ҳангуфт ба киса мераванд”-ро рад карда матнашро нашр кунад.

Дар маҷмӯъ шабакаи RT талаб дорад, ки 12 изҳороти Собол, 13 изҳороти сиёсатмадори мухолифи ҳукумат ва муассиси Бунёди мубориза бо коррупсия Алейсей Навалний ва се гузориши Znak.com дар бораи суханрониҳои Собол, аз ҷумла номи матлаб рад карда шавад. Мояи норизоияти шабакаи телевизионӣ таҳқиқоти видеоии Навальный LIVE аз моҳи апрел будааст. Рӯзи 7 июн шабакаи RT ба додгоҳ шикоят кард ва қарор аст 15 сентябр дар додгоҳи ҳакамии Маскав ҷаласаи аввал баргузор шавад.

Ҳукумати Фаронса ба раҳбарии Эдуард Филипп ба истеъфо рафт

Эдуард Филипп давоми се соли охир нахуствазири Фаронса буд

Нахуствазири Фаронса Эдуард Филипп ба унвонии президент Эммануэл Макрон номаи истеъфои худ ва аъзои ҳукуматро ирсол намуд ва раиси ҷумҳурӣ ин аризаро қабул кард. То замони таъини аъзои нави ҳукумат ҳамин ҳайат корро идома медиҳад.

Тағйироти мазкур пешгӯишаванда буд. Худи Макрон, ки то анҷоми мӯҳлати президентиаш ду соли дигар мондааст, қаблан дар мусоҳиба бо «Радиои байналмилалии Фаронса» гуфт, ки «тими нав ташкил мешавад». Як сабабаш паёмадҳои пандемияи коронавирус мебошад. Бархе пешбиниҳо ин аст, ки президент дар талоши тақвияти сиёсати иҷтимоӣ буда, ба пуштибонии соҳаи бизнес нигаронида шудаааст. Маълум нест, ки то куҷо Филипп мақоми нахуствазириро ҳифз хоҳад кард. Кохи Елисей эълон кард, ки дар соатҳои наздик номи нахуствазири нав эълон мешавад. Филипп аз 15 маи соли 2017 нахуствазири Фаронса буда, қаблан дар мақоми раиси шаҳри Гавр кор кардааст. Соли ҷорӣ дар интихоботи шаҳрдори нави Гавр Филипп дубора пирӯз шуд.

Ҳинд гуфт, ки ба созиши хариди ҳавопаймоҳои ҷангии Русия омода шуд

Ҳукумати Ҳинд ба хариди 21 адад ҳавопаймои навъи MiG-29 омодагӣ нишон додаанд

Дар ҳоле, ки таниши марзии Ҳинду Чин идома дорад, Деҳлӣ ба хариди 33 ҳавопаймои ҷангӣ ва навсозии 59 ҳавопаймои дигар бо арзиши 2,4 миллиард доллар изҳори омодагӣ кард. Вазорати дифои Ҳинд рӯзи 2 июл хабар дод, ки аз Русия 21 адад ҳавопаймои навъи MiG-29 харида 59 ҳавопаймои MiG-29-ро навсозӣ мекунад. Ҳукумат инчунин қарори бо лисензияи Русия сохта шудани 12 ҳавопаймои навъи Su-30 MKI-ро дар корхонаи Hindustan Aeronautics Limited тасвиб кард. Вазорати дифои Ҳинд бо нашри изҳороте гуфт, ки барномаи истеҳсоли системаҳои мушакӣ таҳти рамзи "Made in India" барои “тақвияти нирӯҳои мусаллаҳ ба хотири ҳимояти марзҳои мо” равона шудааст.

Дар паи ин хабар нахуствазири Ҳинд Нарендра Модӣ ва президенти Русия Владимир Путин як гуфтугӯи телефонӣ анҷом доданд. Бо шумули масоили дигар, Моди Путинро бо “анҷоми муваффақиятомези” раъйпурсии тағйироти конститутсионӣ, ки ҳадафи аслиаш то соли 2036 тамдид кардани қудрати Путин аст, табрик кард. Ду раҳбар инчунин баргузории як ҳамоиши дуҷонибаро дар соли ҷорӣ дар Ҳинд баррасӣ карданд. Замони Ҷанги Сард ин ду кишвар шарику ҳамкор буданд ва бахши аслии муҳимоти артиши Ҳиндро маҳсулоти сохтаи Русия ташкил медиҳад. Хабарҳо аз такмил шудани захираҳои низомии Ҳинд дар ҳолест, ки ҳафтаҳои ахир равобити Ҳинду Чин бад шудааст. Дар паи як задухӯрди марзии Чину Ҳинд дар як нуқтаи баҳсӣ рӯзи 15 июн Ҳинд 20 сарбозашро аз даст дод.

Мақомоти иктишофӣ дар назди қонунгузорони амрикоӣ дар бораи Толибон ва Русия гузориш доданд

Раиси маҷлиси намояндагон Ненси Пелоси ба хабарнигорон гуфт, ки таҳримҳои ИМА нисбати Русия бояд  бахшҳои иттилоот ва дифоъро фаро бигирад

Мақомоти иктишофии ИМА рӯзи 2 июл дар як ҷаласаи пӯшида барои қонунгузорони ҳарду ҳизби сиёсии маҷлис дар бораи иттилоъ дар заминаи эҳтимоли пул додани Русия ба Толибон барои куштани низоиёни амрикоӣ дар Афғонистон гузориш доданд. Қонунгузорон талаб карданд, ки дар бораи ин хабар иттилои бештар дарёфт кунанд ва бисёре гуфтанд, ки агар ин хабар дуруст буд, ИМА бояд Русияро таҳрим кунад. Дар миёни онҳое, ки дар ҷаласаи пинҳонии Конгресс иштирок карданд, раҳбари Оҷонсии марказии истихборон Ҷина Ҳаспел ва раиси иктишофи миллӣ Ҷон Ратклифф мебошанд. Раиси маҷлиси намояндагон Ненси Пелоси (демократ аз Калифорния), ки ҳамчунин дар ин нишаст иштирок кард, ба хабарнигорон гуфт, ки таҳримҳои ИМА нисбати Русия бояд бахшҳои иттилоот ва дифоъро фаро бигирад. Чак Шумер, узви Сенат аз демократҳо гуфт, ки “ҷудо аз ин ҷаласа, фикр накунам, ки президент барои ҷорӣ кардани чораҳои шадид нисбати Владимир Путин наздик шуда бошад”. Рӯзи 1 июл президент Доналд Трамп дар сӯҳбат бо Fox Business Network такрор кард, ки ба ӯ дар бораи маблағгузорӣ шудани Толибон барои куштори низомиёни амрикоӣ дар Афғонистон хабар надоданд, чунки, ба гуфтааш, худи мақомоти иттилоотӣ дар бораи дурустии ин хабар шубҳа доштанд.

Мизони олудагии рӯзона ба вирус дар ИМА рекордӣ шуд

Кӯҳи Рашмор дар Дакотаи Ҷанубӣ аст. Дар ин кӯҳпора ҳайкали чор президенти ИМА ҳаккокӣ шудааст, ки дар таърихи кишвар нақши муҳим доштаанд. Рӯзи 4 июл президент Доналд Трамп дар пойгоҳи ин кӯҳпора барои тамошои оташакбозӣ ҳозир мешавад

Омори олудагии рӯзона дар ИМА аз 55 ҳазор нафар гузашт ва ин рақам ду баробар бештар назар ба ду ҳафта пеш будааст. Дар қиёс бо ИМА, дар Аврупо аз 3 июл ҷорӣ маҳдудиятҳо нарм шудан мегиранд. Вазъи коронавирус дар ИМА морпеч ё мисли спирал пеш меравад ва дар остонаи таҷлил аз рӯзи истиқлолият, ки 4 июл аст, нигарониҳо аз эҳтимоли афзоиши бештари вируси нав вуҷуд дорад. Амрикоиҳо маъмулан ҷашни истиқлолиятро бо ташкили пикникҳои оилавӣ ваё таҷаммӯъҳои дӯстона пешвоз мегиранд. Ҳоло афзоиши олудагиҳо ба вируси нав дар 40 то 50 аёлати ИМА мушоҳида мешавад. Дар чаҳор аёлат – Аризона, Калифорния, Флорида ва Техас 25 ҳазор ҳодисаи гирифтории нав ба қайд гирифта шудааст. Баъди якбора боз кардани иқтисод дар моҳи май, рӯзи 2 июл волии Техас Грег Аббот амр дод, ки дар тамоми аёлат муқаррароти доштани ниқоб дар ҷойҳои ҷамъиятӣ аз нав риоя шавад. Президент Доналд Трамп Рӯзи истиқлолиятро дар назди кӯҳи Рашмор бо тамошои оташбозӣ пешвоз мегирад. Дар ин маҳалли таърихӣ қарор аст 7500 нафар ширкат бикунанд ва мақомоти Дакотаи Ҷанубӣ гуфтанд, ки фосилагирии иҷтимоӣ ва пӯшидани ниқоб ҳатмӣ неву ихтиёрӣ мешавад. Дар Аврупо ҳодисаҳои олудагии нав ва марг кам шудааст. Бритониё эълон кард, ки аз рӯзи 10 июл дигар аз мусофироне, ки аз Олмон, Фаронса, Испания ва Италия меоянд, талаб намешавад, ки маҳдудияти иҷтимоиро риоя кунанд.

АП: Дар Ҳисор марди гумонбар дар таҷовуз ба номуси духтари 12-сола боздошт шуд

Акс аз бойгонӣ: духтари қирғизе, ки қурбонии бадарфториҳои шаҳвонӣ шудааст

Оҷонсии “Азия-Плюс” хабар дод, ки додситонии шаҳри Ҳисор марди 42-соларо бо иттиҳоми дастдарозӣ ба номуси ноболиғи 12-сола боздошт кард. Бо ин ки ҳодиса соли гузашта рух додааст, боздошти гумонбар дар дастдарозӣ ба номуси духтари хурдсол танҳо соли ҷорӣ ва зоҳиран баъди расонаӣ шудани он аз ҷониби Ҳизби сотсиал-демократӣ хабар дода шуд.

“Азия-Плюс” бо такя ба муовини раиси ҲСДТ Маҳмурод Одинаев рӯзи 2 июл навишт: “Мард боздошт шуда, айни замон дар ҳабс қарор дорад. Нисбат ба ӯ парвандаи ҷиноятӣ боз шуда, ба ӯ то 25 соли маҳрумият аз озодӣ таҳидид мекунад”. Манбаъ мегӯяд, ки маълум нест парванда бар асоси кадом модда боз шудааст.

Одинаев гуфтааст, ки волидони духтарча аъзои ҲСДТ буда давоми як сол талош доштанд гумонбари ҷиноят нисбати фарзандашонро ба ҷавобгарӣ кашанд. “Ҷараёни тафтишот зери назорати раҳбарият ҳизб буда, дар сурати зарурат раиси ҳизб Раҳматилло Зойиров аз манфиатҳои духтари ноболиғ ҳимоя хоҳад кард”, - қайд кард Одинаев.

Зоиров рӯзи 17 июн дар саҳифаи фейсбукиаш хабар дод. Ӯ, аз ҷумла, гуфт: “Шаҳрванди 42-сола Ҳ.А. соли гузашта дар говхона ба номуси духтари 12-сола таҷовуз кард. Ӯ бо таҳдид ва истифода аз ҳолати нотавонии духтар ин корро чандин маротиба такрор кардааст. Ду моҳ пештар духтар кӯдак таваллуд карда, ҳозир дар Ҳисор болои духтар ва волидони ӯ фишор оварда мешавад, то ки қазия бо роҳи осоишта ва бидуни оқибат ҳал шавад".

Дар ВКД Тоҷикистон дар посух ба изҳороти Раҳматилло Зойиров гуфтаанд, ки “кормандони милитсия далели таҷовуз ба номусро ба қайд гирифта, айни замон прокуратураи шаҳри Ҳисор ба тафтиши ин далел машғул аст”. Ба гуфтаи волидони духтарча, онҳо қариб як сол пеш ба прокуратура ва шуъбаи корҳои дохилӣ ҷиҳати шикоят аз болои ҳамсояашон муроҷиат карда, лекин аризаашонро қабул накардаанд.

Барномаи рушди СММ ба Тоҷикистон 8 тонна маҳлули зиддиуфунӣ кумак кард

Акс аз бойгонӣ.

Барномаи рушди СММ (БРСММ) ба Вазорати тандурустӣ ва ҳифзи иҷтимоии аҳолии Тоҷикистон ба маблағи 48 ҳазор доллари амрикоӣ хлор ва маҳлули зиддиуфунӣ (8 тонна) кумак кард.

"Кумаки мазкур бо ҳадафи пешгирӣ аз сирояти коронавирус дар миёни кормандони муассисаҳои тиббӣ, беморон, коҳиши хатари паҳншавии он ба берун аз муассисаҳои тиббӣ ва ба хотири тақвияти омодагиҳо ба хатарҳои марбут ба ҳамагиршавии коронавирус расонида шуд", - омадааст дар иттилоияи намояндагии БРСММ дар Тоҷикистон.

Маҳлулҳои зиддиуфунӣ ба бемористонҳои шаҳри Душанбе ва минтақаҳои Тоҷикистон тақсим карда мешавад.

Ин маҳлулҳои зиддиуфунӣ як қисми кумаки 2,7-миллиондолларӣ аст, ки Тоҷикистон дар доираи муборизаҳо бар зидди коронавируси ҳамагир дарёфт хоҳад кард.

Додгоҳи Туркия қарори табдили Аёсуфия ба масҷидро ба таъхир гузошт

Додгоҳи олии Туркия 2 июл баррасии масъалаи табдили Аёсуфия аз музей ба масҷидро ба поён расонд. Давоми 15 рӯзи оянда эълом карда хоҳад шуд, ки Аёсуфия масҷид мешавад, ё музей мемонад.

Масъалаи табдили ин музей ба ибодатгоҳ дар ҳафтаҳои ахир мавриди таваҷҷуҳ қарор гирифтааст. Туркия мегӯяд, ки ин масъала ба "ҳокимияти миллии он кишвар" рабт мегирад ва касе ҳаққи дахолат кардан ба онро надорад. Раҳбарони калисои ортодоксӣ мегӯянд, ки ин иморат осори муштараки масеҳиёну мусалмонон аст ва бояд музей бимонад.

Айсуфия дар даврони Императории Византия дар соли 537 мелодӣ ҳамчун калисои усқуфи ортодокси юнонӣ сохта шуд. Усмониҳо дар соли 1453 Истанбулро фатҳ ва калисои Аёсуфияро ба масҷид табдил карданд. Дар ниҳоят пас аз эъломи Ҷумҳурии Туркия аз сӯи Мустафо Камол Отатурк, ҳукумат дар соли 1934 ин бинои таърихиро аз масҷид ба осорхона табдил дод.

Аёсуфия аз сӯи созмони ЮНЕСКО ҳамчун мероси ҷаҳонӣ сабт шуда ва мавриди эҳтироми масеҳиёни ва мусалмонон аст. Раҷаб Таййиб Эрдуғон, раиси ҷумҳури Туркия дар чанд соли ахир дар пайи табдил кардани ин музейи таърихӣ ба масҷид аст.

Нуъмон Куртулмус, муовини Раҷаб Таййиб Эрдуғон дар Ҳизби адолат ва тараққӣ гуфтааст, масъалаи тағйири истифодабарии Аёсуфия, вобаста ба ҳокимияти миллии Туркия аст. Вай таъкид кардааст, танҳо касе, ки ҳаққи тасмимгирӣ дар хусуси вазъияти Аёсуфияро дорад, Туркия мебошад. "Мо ба тавсия ва раҳнамоии касе дар умури дохилӣ ниёз надорем",-гуфтааст вай.

Юнон ба тағйири ин музей ба масҷид ва иқдомоти Раҷаб Таййиб Эрдуғон вокуниш нишон додааст. Ин кишвар пас аз хонда шудани оятҳои қуръонӣ дар Аёсуфия дар охирҳои моҳи май, ин иқдомро "хатшадор кардани эҳсосоти динии масеҳиёни ҷаҳон" хонда буд.

Вазири умури хориҷии Юнон ба Туркия ҳушдор дода буд, ки ба ӯҳдадориҳои байналмилалии худ пойбанд бимонад ва "манфиатҳои дохилӣ ва миллӣ"-и худро бар муҳофизат аз биноҳои муҳиме монанди Аёсуфия, ки мероси ҷаҳонӣ аст, бартарӣ надиҳад.

Раҳбари масеҳиёни ортодокси ҷаҳон низ дар паёме ба Раҷаб Таййиб Эрдугон аз вай хоста буд, аз тасмимаш барои тағйири истифодаи масҷиди Аёсуфия худдорӣ кунад ва гуфта буд, ин иморат "мавриди эҳтимроми мусалмонон ва масеҳиён аст".

Майк Помпео, вазири умури хориҷии Амрико ҳам рӯзи чаҳоршанбе аз Туркия хост, то аз тағйири истифодаи Аёсуфия аз музей ба масҷид худдорӣ кунад. Вай дар ҳисоби корбарии худ дар "Твиттер" навишт, "мо аз ҳукумати Туркия мехоҳем, ки ҳамчунон вазъияти Аёсуфияро ҳамчун музей ҳифз кунад то намунае аз эҳтиром ба оинҳо ва таърихи мазҳабҳо дар Туркия бошад".

Ёфтҳои бештар

XS
SM
MD
LG