Пайвандҳои дастрасӣ

Хабари нав

Хабарҳо

ИМА ширкати нафтии Беларусро таҳрим кард

ИМА дирӯз болои як ширкати бузурги нафту маводи кимиёии Беларус, ки гуфта мешавад аз ҷониби раиси ҷумҳурӣ Александр Лукашенка назорат мешавад, таҳримҳои молӣ ҷорӣ кард. Ин иқдоми вазорати молияи Амрико зидди ширкати давлатии Нафту кимиёи Беларус, ки намояндагиҳои худро дар Олмону Латвия, Украинаву Русияву Чин дорад ва инчунин зидди корхонаи фаръии он "Белнефтехим-Амрико" гирифта шудааст. Ҳама дороиҳои ин ширкат, ки дар қаламрави Амрико ошкор мешавад, бояд масдуд шавад, мегӯяд вазорати молияи ин кишвар. Инчунин, ба шаҳрвандони Амрико ҳамкориҳо бо ин ширкат ва намояндагиҳои он манъ мешавад.

Ҳамаи хабарҳои имрӯзро дар инҷо бихонед

Дар эътирозҳои Русия бештар аз 3,5 ҳазор кас боздошт шудааст

Пулиси Русия дар ҷараёни эътирози тарафдорони Алексей Навалний, мунаққиди сиёсатҳои Кремл, зиёда аз 3,5 ҳазор касро боздошт кард. Намоишҳои рӯзи шанбеи 23-уми январ дар чандин шаҳри Русия, аз бузургтарин эътирози солҳои охир дониста шуд.

Дар Маскав, пойтахти Русия, норозиён дар майдони Пушкин бо пулис даргир шуданд. Пулис бархе аз онҳоро калтаккорӣ ва бо истифода аз нерӯ ба автобусҳо савор кард. Дар ниҳоят пулис гирдиҳамомадагонро аз ин майдон берун намуд, вале онҳо дар яккилометрии майдон ҷамъ омаданд ва ба тарафи кормандони пулис барф андохтанд.

Мақомоти шаҳр шумораи тазоҳуркунандагонро 4000 нафар номид, вале хабаргузории Reuters теъдоди онҳоро 40 ҳазор нафар гуфт.

Нашрияи OVD-Info, ки аз боздоштҳои сиёсӣ гузориш медиҳад, мегӯяд, дар Маскав на камтар аз 795 нафар боздошт шудаанд. Ин нашрия ҳамчунин аз ширкати зиёда аз 300 нафар дар Петербург хабар дода, гуфтааст, ба сурати умум дар 90 шаҳри Русия бештар аз 3500 нафар боздошт шудаанд.

Мақомоти Қирғизистон гумонбарони таҷовуз ба номуси наврасро ҷустуҷӯ доранд

Дар Қирғизистон пулис таҳқиқи таҷовузи наврасеро дар ҳамоми умумӣ шуруъ кард.

"Ҷустуҷӯи гумонбароне идома дорад, ки нисбати наврас таҷовузро раво диданд. Мақомоти қудратӣ дар пайи ҷамъоварии иттилоъ ҳастанд. Вазорати корҳои дохилӣ ваъда медиҳад, ки дар фурсатҳои наздик айбдорон пайдо хоҳанд шуд", - хабар доданд аз маркази матбуотии ВКД Қирғизистон.

Нашри як навор дар шабакаҳои иҷтимоӣ ва паёмакрасонҳои корбарони Қирғизистон дар рӯзҳои ахир баҳсу гуфтумонҳои зиёдеро ба бор овардааст. Дар навор дида мешавад, ки марде ноболиғеро таҷовуз мекунад. Дақиқ нест, ки ин навор кай ва дар куҷо сабт шудааст.

Сабти зилзилаи дувум дар як ҳафтаи охир дар Тоҷикистон

Акс аз бойгонӣ

Дар лаҳзаҳои аввали рӯзи 25-уми январ (00:01) заминларзаи сахте Тоҷикистонро такон дод. Дар як ҳафтаи охир бори дувум аст, ки ин ҳолат рух медиҳад. Чанде аз сокинон дар шабакаҳои иҷтимоӣ навиштанд, заминларзаро дар Душанбе ва минтақаҳои дигар эҳсос карданд. То ҳанӯз Маркази зилзиланигории Тоҷикистон дар ин бора иттилоъ надодааст. Маълум нест, ин ҳодиса хисороте ҳам доштааст ё не. Марказҳои зилзилашиносии ҷаҳон гуфтанд, заминларза дар 41-километрии ҷануби шаҳри Хоруғи вилояти Бадахшон ва дар умқи 107 километр рух додааст. Ба иттилои онҳо, шиддати заминларза дар марказаш ба 5.2 дараҷаи Рихтер баробар буд. Тоҷикистон дар яке аз минтақаҳои зилзилахези қораи Осиё ҷойгир аст. Дар гузашта бар асари зилзила дар гӯшаҳои кишвар чандин хона вайрон шудааст. Аз ҷумла, моҳи июли соли 2020 наздик ба 60 хонаи сокинони чаҳор деҳа дар ҷамоати Ширинчашмаи ноҳияи Тоҷикобод дар заминларза осеб дид.

Конгресс хоҳони таҳримҳои нав ба зидди Русия шуд, агар Маскав алайҳи Радиои Озодӣ иқдом кунад

Дафтари Радиои Озодӣ дар Маскав

Конгресси Амрико хостааст, агар Кремлин ба зидди фаъолияти Радиои Аврупои Озод/Радиои Озодӣ дар Русия (ҷарима ва ё маҳдудиятҳо) иқдом кунад, Вашингтон бо таҳримҳои нав ба Маскав ҷавоб диҳад.

Вакилони Ҳизби демократ ва Ҳизби ҷумҳурихоҳ дар номаи рӯзи 22-юми январ ба раиси ҷумҳур Ҷо Байден ҳамчунин хостаанд, барои тақвияти фаъолияти Радиои Озодӣ дар Белорус иқдом кунад.

Ин кишвар аз моҳи августи соли гузашта, пас аз эълони натиҷаҳои интихоботи президентӣ, ба ин тараф шоҳиди тазоҳуроти зиддиҳукуматӣ аст. Мақомоти Белорус гуфтанд, дар он интихобот Александр Лукашенко пирӯз шуд, вале мухолифон мегӯянд, дар интихобот тақаллуб сурат гирифт. Чандин кишвари аврупоӣ пирӯзии Лукашенкоро ба расмият нашинохтанд.

"Роскомнадзор", идораи танзими фаъолияти расонаҳо дар Русия, ин моҳ эълон кард, ки Радиои Озодиро садҳо ҳазор доллар ҷарима мебандад. Маскав радиоро барои нақзи муқаррарот муттаҳам кард.

Бино бар қонун дар Русия расонаҳоеро, ки аз хориҷ сармоягузорӣ мешаванд, “агенти хориҷӣ” мешиносанд. Ин қонун хабарнигорони Радиои Озодиро дар маърази муҳокимаи ҷиноӣ низ қарор медиҳад.

Радиои Аврупои Озод/Радиои Озодӣ, ки аз сӯи Конгресси Амрико маблағгузорӣ мешавад, ба муқаррароти Маскав тан надодааст, вале афзоиши ҷаримаҳои пулӣ шояд ин муассисаро маҷбур созад, ки фаъолияти хабарии худро дар Русия боздорад.

Ҳукми ду ҷавон барои навиштани шиори зидди Лукашенко дар Минск

Додгоҳи София Малашевич ва Тихана Клюкач

Дар шаҳри Минск ду ҷавони 18-соларо барои навиштани шиори зидди Александр Лукашенко, раҳбари худкомаи Белорус, бар рӯйи сипари маъмурони ОМОН ба зиндон маҳкум кардаанд.

Лукашенко аз соли 1994 дар сари қудрат аст. Ӯ иддао кард, ки дар интихоботи моҳи августи соли гузашта низ баранда шуд, вале мухолифон натиҷаи онро напазируфтанд.

Додгоҳи ноҳияи Октябр дар пойтахти Белорус София Малашевичро ба ду сол ва Тихана Клюкачро ба 18 моҳи зиндон маҳкум кард. Ҳардуи онҳо донишҷӯёни Омӯзишгоҳи шаҳри Брест, ғарби Белорус, ҳастанд. Ҳукм рӯзи 22-юми январ содир шудааст.

Додгоҳ Малашевичро ба авбошӣ ва таҳқири президент ва Клюкачро ба вайрон кардани тартиботи ҷамъиятӣ айбдор донистааст.

Ба қавли мақомот, ҳарду ҷавон дар эътирозҳо ба зидди Лукашенко дар Минск иштирок карда, яке дар рӯйи сипари маъмурони пулис навиштае гузоштааст ва дигар онро ба навор гирфтааст. Малашевич ва Клюкач ин гуфтаҳоро тасдиқ карда, вале аз додгоҳ хостаанд, онҳоро аз озодӣ маҳрум накунад.

Наздиконаш гуфтанд, ҷасади Карима Балочро аз Канада ба Покистон бурданд

Карима Балоч

Ҷасади Карима Балоч, фаъоли ҳуқуқи башарро аз Канада ба Покистон бурдаанд.

Бародараш Самир Балоч рӯзи 24-уми январ ба бахши покистонии Радиои Озодӣ гуфт, мақомоти маҳаллӣ маҳдудияти гаштугузор ҷорӣ карда, ба касе иҷоза намедиҳанд, то дар тазоҳурот иштирок кунанд.

Карима Балоч рӯзи 20-уми декабри соли 2020 дар шаҳри Торонтои Канада нопадид шуд ва як рӯз баъд ҷасадашро дар наздикии дарёча ёфтанд.

Пулиси Канада гуфт, марги ӯ ҷанбаи ҷиноӣ надорад, аммо хонаводааш мегӯянд, Карима Балоч аз Покистон таҳдид мешуд. Наздиконаш гуфтаанд, ба хотири ин таҳдидҳо дар Канада паноҳанда шуда буд ва мавзуъ бояд таҳқиқ шавад.

Созмони Афви Байнулмилал ва Кумисюни ҳуқуқи башари Покистон хоҳони пайгирии қазия шудаанд.

Ларри Кинг дар 88-солагӣ дар бемористон даргузашт

Ларри Кинг, акс аз соли 2007

Ларри Кинг, хабарнигори машҳури радио ва телевизиони Амрико, дар 88-солагӣ даргузашт.

Иллати марги ӯ то кунун расман эълом нашудааст, аммо сухангӯйи як шифохона гуфтааст, Ларри Кинг ба коронавирус мубтало шуда буд.

Ӯ дар тӯли фаъолияташ бо раҳбарони кишварҳои гуногун, ситораҳои синамо ва варзишкорону мардуми одӣ садҳо мусоҳиба анҷом додааст.

Аз ҷумла, Ларри Кинг бо Михаил Горбачев, раҳбари собиқ Иттиҳоди Шӯравӣ; Владимир Путин, раиси ҷумҳури Русия; президентҳои Амрико, аз Ричард Никсон гирифта то Барак Обама ва шахсиятҳое ба монанди Далай Ламаву Билл Гейтс суҳбат кардааст.

Кинг дар солҳои охир ба хотири ҳамкорӣ бо телевизиони Russia Today мавриди интиқод қарор гирифт.

Боздошти тақрибан 3400 эътирозгар дар Маскав ва шаҳрҳои дигари Русия

Қазон, 23-юми январи 2021

Дар ҷараёни эътирозҳо дар сартосари Русия, ки бо талаби озодии пешвои мухолифон Алексей Навалний ташкил шуд ва яке аз тазоҳуроти бузурги зиддиҳукуматӣ буд, ҳазорҳо нафарро дастгир кардаанд.

Ин тазоҳурот бо вуҷуди ҳавои сард ва латукӯби нирӯҳои вижаи пулис рӯзи 23-юми январ баргузор шуд.

Ҳоло маълум нест, эътирозҳо ба ҳукумати президент Владимир Путин чӣ таъсир хоҳанд дошт. Касе, ки солҳо боз зимоми қудратро дар даст дорад ва атрофиёнаш аксаран ӯро берақиб мепиндоранд. Ӯ метавонад то соли 2036 дар қудрат бимонад.

Аммо ҳузури даҳҳо ҳазор кас дар посух ба дархости Алексей Навалний ҷолиб будани “ҷанги” пешвои мухолифонро ба зидди фасод нишон медиҳад.

Навалний баъд аз эълони ҳукмаш рӯзи 18-уми январ аз мардум хост, ки ба кӯчаҳо бароянд. Раҳбари мухолифони Русияро рӯзи 17-уми январ, ҳангоми бозгашт аз Олмон, дар фурудгоҳи Шереметево дастгир карданд.

Ба иттилои гуруҳи ОВД-Инфо, рӯзи 24-уми январ дар сартосари Русия тақрибан 3400 кас боздошт шудаанд. Ниме аз боздоштҳо дар Маскав сурат гирифтааст. Аз ҷумла, Юлия Навалная, ҳамсари Алексей Навалний ва яке аз ҷонибдорони ӯ Любов Собол ҳам боздошт шудаанд.

Тасвирҳое, ки дар он нирӯҳои вижа эътирозгаронро дар Маскав ва шаҳрҳои дигар мезананд, бо вокунишҳои Вашингтону Брюссел рӯ ба рӯ шуд.

Амрикову Аврупо боздошти ҳазорон эътирозгарро дар Русия маҳкум карданд. АКС

Боздошти яке аз эътирозгарон дар Русия

Амрикову Иттиҳоди Аврупо боздошти эътирозгаронро дар Русия маҳкум карда, хоҳони раҳоии тазоҳургарон ва хабарнигорон шуданд.

Ҳангоми тазоҳуроти рӯзи 23-юми январ, ки бо талаби раҳоии Алексей Навалний, мухолифи сарсахти Кремлин, дар сартосари Русия баргузор шуд, ҳазорон нафар дастгир шуданд. Вашингтон ончиро, ки рафтори хашини пулис бо эътирозгарон номид, маҳкум кард.

Бино ба гузоришҳо, беш аз 3 ҳазор кас дастгир шудаанд.

Сухангӯйи Вазорати корҳои хориҷии Амрико гуфт, шахсоне, ки боздошт шуданд, аз ҳуқуқи асосии худ барои тазоҳурот истифода мекарданд. Вай ҳамзамон хостори раҳоии беқайду шарти Навалний шуд.

Иттиҳоди Аврупо низ боздошти тазоҳургаронро дар Русия маҳкум кард. Ҷозеп Борел, раиси идораи сиёсати хориҷии Иттиҳоди Аврупо дар Твиттер бо ибрози нигаронӣ гуфт, ба хотири боздошти эътирозгарон ва истифодаи нобаробари зӯр мутаассуф аст.

Дар Чин 172 мавриди нави гирифторӣ ба коронавирус сабт шудааст

Акс аз бойгонӣ

Дар Чин 172 мавриди гирифтории сокинон ба коронавирус ошкор шудааст. Мақомоти тандурустии Чин рӯзи 24-уми январ гуфтанд, дар ҳоле ки талошҳо барои ҷилавгирӣ аз паҳншавии вирус дар шимоли ин кишвар идома дорад, мавридҳои навро низ сабт карданд. Ҳафтаи гузашта мансабдорони Чин аз мардум хостанд, барои ҷилавгирӣ аз гирифторӣ ба вирус аз сафарҳои ғайризарурӣ дар оғози соли 2021 худдорӣ кунанд. Дар рухсатиҳои соли нав, миллионҳо шаҳрванди Чин бо оилаҳояшон ба минтақаҳои гуногун сафар мекунанд.

Тед Липйен аз мақоми президенти РАО/РО озод шуд

Тед Липийен

Шоми 22-юми январ президенти Радиои Аврупои Озод/Радиои Озодӣ ва ду нафар аз роҳбарони бунгоҳи нашаротии байналмилалӣ, ки ҳукумати Амрико сармоягузорӣ мекунад, бо фармони иҷрокунандаи роҳбари Оҷонси расонаҳои ҷаҳонии Амрико ва ё USAGM аз вазифа барканор шуданд.

Мақомҳои расмие, ки бо ин тағйирот ошноянд, гуфтанд, Келу Чао, иҷрокунандаи роҳбари USAGM, Тед Липйен президенти Радиои Аврупои Озод/Радиои Озодиро ҳамроҳ бо роҳбари “Радиои Осиёи Озод” ва “Шабакаи Хабаррасонии Ховари Миёна” баъд аз як моҳи таъин шудани онҳо ба ин мақом аз вазифа сабукдӯш кард.

Ин тағйироти кадрӣ пас аз он сурат мегирад, ки Чао роҳбари “Садои Амрико” ва муовини ӯро аз вазифа барканор кард. Роҳбари “Дафтари суханпароканӣ дар Куба” низ истеъфо дод.

“Садои Амрико” ва “Дафтари суханпароканӣ дар Куба”ба ҳукумати Амрико тааллуқ доранд. Радиои Аврупои Озод/Радиои Озодӣ, “Радиои Осиёи Озод” ва “Шабакаи Хабаррасонии Ховари Миёна” ширкатҳои хусусии ғайритиҷоратӣ ҳастанд, ки тавассути Конгресси ИМА маблағгузорӣ мешаванд.

Ин тағйироти кадрӣ пас аз истеъфои Майкл Пак, роҳбари USAGM сурат мегиранд. Пак аз сӯи демократҳо ва ҳам ҷумҳурихоҳон барои сиёсати кадрие, ки пас аз таъйин шуданаш дар моҳи июни соли гузашта дар Конгресс рӯи даст гирифт, танқид мешуд.

Ҳамсари Алексей Навалний дар тазоҳурот дар Маскав боздошт шуд

Алексей Навалний ва Юлия Навалная ҳангоми бозгашт ба Русия дар ҳавопаймо

Юлия Навалная, ҳамсари мунтақиди Кремл - Алексей Навалнийро боздошт кардаанд.

Хонум Навалная дар саҳифаҳояш дар шабакаҳои иҷтимоӣ навишт, ки ӯро рӯзи 23-юми январ дар тазоҳурот дастгир карданд. Дар ин тазоҳурот ҳазорон нафар бо талаби раҳоии шавҳари ӯ аз зиндон ҷамъ омаданд.

Алексей Навалний ҳафтаи гузашта, пас аз як давраи муолиҷа дар Олмон ба Маскав баргашт. Ӯро моҳи августи соли гузашта пас аз заҳролуд шудан аз заҳри “Новичок” барои табобат ба Берлин бурда буданд.

Пулис тазоҳурот дар Маскав ва даҳҳо шаҳри дигари Русияро ғайриқонунӣ эълон карда, садҳо нафарро боздошт кард.

Сомонаи раҳбари Эрон акси монанд ба Трампро зери мили силоҳ нашр кард

Оятуллоҳ Алии Хоманаӣ роҳбари олии Эрон

Дар сомонаи Оятуллоҳ Алии Хоманаӣ, раҳбари олии Эрон, акси як нафар бозигари голф нашр шуд, ки ба собиқ раисҷумҳури Амрико Доналд Трамп монанд аст. Бозигар дар акс мавриди ҳадафи дрон тасвир шудааст.

Ин тасвир нахуст бо забони форсӣ дар шабакаи иҷтимоии Twitter нашр шуд, ки дар он барчаспе ба сомонаи расмии Хоманаӣ ҳам буд.

Twitter ин тасвирро рӯзи 22-юми январ пок кард ва гуфт, он тақаллубӣ аст. Зери ин акс гуфтаҳои ахири роҳбари олии Эрон дар солрӯзи қатли Қосим Сулаймонӣ, фармондеҳи нерӯҳои “Қудс”-и Сипоҳи посдорони инқилоб низ гузошта шуда буд.

Сулаймонӣ яке аз нафарони пурнуфузи Эрон ва аз тарроҳони сиёсати хориҷии Теҳрон дар минтақа буд. Фармони қатли ӯро 3-юми январи 2020 Трамп содир карда буд.

“Қотилон ва ҳам фармоишгарон бояд донанд, ки интиқом ҳар лаҳза метавонад фаро расад”. Ин ҷумларо сомонаи Хоманаӣ аз суханронии ӯ дар робита ба солгарди қатли Сулаймонӣ дар як суратлавҳа иқтибос кардааст.

Дар ин тасвир ҳамчунон сояи дрон дар пасманзари марди танҳое, ки голф бозӣ мекунад, дида мешавад. Трамп маъмулан голф бозӣ мекунад, вале дар инҷо аз ӯ ном бурда намешавад.

Таниш миёни Иёлоти Муттаҳидаи Амрико ва Эрон соли 2018, пас аз он ки Трамп аз созиши ҳастаии миёни Теҳрон ва шаш қудрати ҷаҳонӣ даст кашида дубора таҳрим ҷорӣ кард, якбора ташдид ёфт.

Теҳрон бо партоби чандин мушак ба пойгоҳҳои ҳарбии Амрико дар Ироқ интиқом гирифт. Аммо баъдан ҳар ду ҷониб аз идомаи таниш даст кашиданд.

Дар Русия садҳо эътирозгар ба ҳимоят аз Алексей Навалний ба кӯчаҳо баромаданд

Пулис яке аз эътирозгаронро боздошт мекунад. Хабаровск, Русия. 23-юми январи 2021

Рӯзи 23-юми январ, новобаста ба сардии шадиди ҳаво ва фишори пулис, дар Русия гуруҳи бузурги эътирозгарон ба хиёбонҳо баромада, барои озодии Алексей Навалний, мунтақиди Кремл, садо баланд карданд. Навалний рӯзи 17-уми январ, пас аз муолиҷа аз заҳри Новичок, аз Олмон ба Маскав баргашт ва ба сӣ рӯз ҳабс маҳкум шуд.

Роҳпаймоиҳо нахуст дар Сибир ва Шарқи Дур бо ширкати садҳо эътирозгар шуруъ шуд. Бо вуҷуди он ки дар Хабаровску Владивосток ва чанд шаҳри дигар ҳаво сард ва назорати мақомоти қудратӣ дар кӯчаҳо шадид буд.

Гуруҳи "ОВД- Инфо", ки фаъолияти пулисро назорат мекунад, аз боздошти даҳҳо эътирозгар хабар дода, гуфт, мақомот чанде аз боздоштшудаҳоро латукӯб карданд.

Дар навори эътирозҳо дар Владивосток дида мешавад, ки чӣ гуна кормандони зиреҳпӯши пулис барои пароканда кардани эътирозгарон онҳоро калтаккӯб мекунанд. Дар шаҳри Якутск бо вуҷуди 50 дараҷа сард будани ҳаво ва шамоли сахт эътирозгарон ба кӯчаҳо рехтанд.

Дар шаҳри Маскав, ки маъмулан ҳамоишҳои эътирозии бузург доир мешаванд, тазоҳургарон ният доштанд дар майдони Пушкин ҷамъ оянд. Дар остонаи ташкили эътирозҳо ҳадди ақал дар 65 шаҳри Русия мақомот ҷонибдорони Навалнийро боздошт карда, аз маъмурияти шабакаҳои иҷтимоӣ талаб карданд, даъватҳоро барои ширкат дар тазоҳурот пок кунанд.

Ин эътирозҳо як навъ санҷиши мизони ҳимоят аз Навалний аст, ки дар миёнаи зимистони Русия, дар пасманзари пандемия ва рукуди иқтисодӣ ва интихоботи порлумонӣ, ки қарор аст моҳи сентябр доир шавад, баргузор мешаванд.

Даъвати се созмон ва ҳомиёни ҳуқуқ аз Тоҷикистон ба "озодии фаврӣ"-и Дониёр Набиев

Ба қавли наздиконаш Дониёр Набиев 87-сола аст

Намояндагони се созмони ҳомии ҳуқуқи башар ва чанде аз фаъолон аз ҳукумати Тоҷикистон тақозо кардаанд, Дониёр Набиев (Бобои Дона)-и 80-соларо, ки аз ҷониби мақомот бо гуноҳи ифротгароӣ 7 сол зиндонӣ шудааст, "билофосила ва бе қайду шарт" озод кунад.

Изҳороти Анҷумани муҳоҷирони Осиёи Марказӣ, Маркази ҳуқуқи башари Тоҷикистон, Бунёди "Бузургмеҳр Ёров" ва коршиносони дигар рӯзи 22-юми январ нашр шуд. Дар он ҳукми зиндони Набиевро дорои "ангезаҳои сиёсӣ" донистаанд.

Дониёр Набиевро моҳи августи соли 2020 дастгир ва рӯзи 28-уми декабри соли гузашта дар як муҳокимаи пӯшида ба ҳафт сол зиндон маҳкум карданд. Вазорати корҳои дохилии Тоҷикистон рӯзи 8-уми январи имсол гуфт, узви собиқи Ҳизби дар кишвар мамнӯи наҳзати исломӣ бо гуноҳи ифротгароӣ ва кумаки молӣ ба ҷангҷӯёни тоҷик ба зиндон маҳкум шудааст.

Масъулони вазорат гуфтанд, сокини деҳаи Гулбуттаи ноҳияи Рӯдакӣ "пули хадамоти махсуси баъзе аз кишварҳоро гирифта, онҳоро барои паҳн кардани ғояҳои ифротӣ, харидорӣ, нашр ва густариши адабиёти экстремистӣ, ҷалб ва сафарбар намудани ҷавонон ба сафи гурӯҳҳои ҷиҳодӣ сарф мекард", аммо аз ҳеч кишваре ном набурда ва далелу санадеро ҳам нишон надодааст.

Ҳизби дар кишвар мамнӯи наҳзати исломӣ дар баёнияе гуфт, ҳама иттиҳомот "сиёсӣ ва маҳз барои бадном кардани як пирамарди бегуноҳ аст." Қаблан созмони Дидбони Ҳуқуқи Башар ё Human Rights Watch низ ҳабси Набиевро маҳкум кард ва озодии ӯро тақозо намуд. Ба ин талабҳо то ҳол мақомоти Тоҷикистон вокунише накардаанд.

Дар изҳороти ахири се созмон ва ҳомиёни ҳуқуқ "боздошту зиндонӣ кардани Дониёр Набиев дар давраи пандемияи COVID-19 барои фаъолияти сулҳомез ва хайрияаш" ҳамчун "ба хатари ҷиддӣ гузоштани зиндагии ӯ ва нақзи уҳдадориҳои Тоҷикистон дар заминаи ҳуқуқи башар" интиқод шудааст.

Стив Свердлов, ҳомии ҳуқуқи башар ва профессори донишгоҳи Калифорнияи Ҷанубӣ рӯзи 22-юми январ гуфт, "Тоҷикистон дар як бӯҳрони давомдори ҳуқуқи башар қарор дорад ва аллакай чандин ҳуқуқшинос, журналист ва фаъоли маданиро қурбонӣ кардааст." Свердлов мегӯяд, "Набиев бояд билофосила озод шавад".

Соле пеш Гуруҳи кории Созмони Милал оид ба боздошти худсарона гуфт, баъзе аз аъзои ҲНИТ бо қонуншиканӣ ва бе риояти ҳуқуқашон зиндонӣ шудаанд ва ҳукумат бояд онҳоро раҳо кунад. Мақомот гуфтанд, аъзои ҳизб барои чанд ҷиноят, аз ҷумла, ба қавли онҳо, даст доштан дар ошӯби нофарҷом ба раҳбарии Абдуҳалим Назарзода, муовини собиқи вазири дифоъ маҳкум шудаанд. Раҳбарияти дар хориҷа иддаои даст доштан дар ошӯбро бепоя хондаанд.

Раҳбари нави USAGM мудирони “Садои Амрико”-ро барканор кард

"Садои Амрико" як бахше аз Созмони расонаҳои ҷаҳонии Амрико ё USAGM аст

Иҷрокунандаи мақоми Раиси Созмони расонаҳои ҷаҳонии Амрико ё USAGM Келу Чао дар рӯзи аввали кораш раиси “Садои Амрико”-ро барканор кард. Бо ин қарори худ Чао таъиноти шадидан интиқодшудаи раҳбарияти пешини USAGM-ро бекор кард. Собиқ раҳбари ин созмон Майкл Пэк, ки бо кӯмаки президенти собиқ Доналд Трамп ба ин мақом расида буд, рӯзи 20-уми январ аз мақомаш истеъфо доод. Моҳи декабр Пэк Роберт Рейлиро раҳбари “Садои Амрико” таъин кард ва бар асоси қарори Чао, Рейли ҳамроҳ бо муовинаш Элизабет Роббинс аз мақомаш сабукдӯш шуд.

Иҷрокунандаи вазифаи раиси “Садои Амрико” собиқ раиси бахши хабарҳои ин ширкат Иоланда Лопес таъин шудааст. Рейли ӯро ҳафтаи гузашта ба вазифаи дигар таъин карда буд.

Дар бораи аз мақомаш рафтани Пэк дар рӯзи савгандёдкунии Ҷо Байден, президенти нави ИМА маълум шуд. Дар соатҳои баъди шурӯи кор, Байден чанд амру фармоне имзо ва ҳам тағйироти кадрие баргузор кард. Илова ба ин, маъмурият аз Майкл Пэк тақозо кард, ки аз мақомаш канор биравад. То он замон Байден ва аъзои тимаш гуфтанд, ки кори раҳбари USAGM, ки барои амалкарди нодуруст дар нисбати сохторҳои зертобеаш гунаҳгор мешуд, баҳогузорӣ мешавад. Майкл Пэк ба вазифаи раиси Созмони расонаҳои ҷаҳонии Амрико дар моҳи июни соли 2020 таъин шуд. Бархе сенаторҳои демократ дар ҷараёни баррасии номзадии ӯ гуфтанд, ки ҳарос доранд Пэк дар кораш ба манфиати Трамп амал хоҳад кард. Худи Пэк инро рад карда гуфтааст, ки кори журналистон бояд бидуни дахолати сиёсӣ пеш равад.

Вале баъди ин, дар давоми ду ҳафтаи аввал дар мақоми раиси USAGM Пэк чанд раҳбари созмонҳои матбуотии зертобеашро барканор кард ва дар миёни онҳо Ҷейми Флай, президенти Радиои Аврупои Озод/Радиои Озодӣ ҳам буд.

Ронандагони мусофирбарҳои Бишкек боло бурдани нархи роҳкироро талаб доранд

Бишкек, Қирғизистон. Акс аз бойгонӣ.

Шаҳрдории Бишкек мегӯяд, ронандаҳои мусофирбар дар пойтахти Қирғизистон талаб доранд, ки нархи роҳкиро то ба 20 сом боло бурда шавад.

Дар шаҳрдории пойтахти Қирғизистон 22 январ бо иштироки раҳбарони ширкатҳои хусусии мусофирбарӣ ҷаласае баргузор ва тадриҷан боло бурдани нархи роҳкиро баррасӣ шудааст.

Ба иттилои шаҳрдорӣ, ронандагони мусофирбарҳо хостаанд, нархи роҳкиро барои як нафар то ба 19-20 сом гарон карда шавад.

Иҷрокунандаи вазифаи шарҳдори Бишкек Балбак Тулобоев дар навбати худ пешниҳод кардааст, ки нархи роҳкиро барои таксиҳо 15 сом, барои автобусу троллейбусҳо 10 сом муайян карда шавад. Нафақахӯрон ва ноболиғон 8-сомӣ пардохт хоҳанд кард.

Ёдрас мешавем, 18 январ як қисми ронандагони мусофирбарҳои Бишкек бо талаби боло бурдани нархи роҳкиро корпартоӣ карда буданд. Дар ҳоли ҳозир нархи роҳкиро дар нақлиёти ҷамъиятии Бишкек 10 сом аст.

Русия аз тамдиди New Start аз ҷониби Вашингтон истиқбол кард

Дмитрий Песков, сухангӯи Кремлин

Русия пешниҳоди президенти ИМА Ҷо Байденро дар бораи тамдиди мӯҳлати созишномаи назорати силоҳҳои ҳастаӣ бо номи “New START”-ро хуш пазируфт, вале гуфт, ки бояд пешниҳодҳои мушаххаси ҷониби Амрикоро бубинад. Кохи Сафед рӯзи 21-уми январ гуфт, Байден мехоҳад пеш аз хатми мӯҳлати созишнома дар моҳи феврал созиши назорати силоҳҳои ҳастаиро ба панҷ соли дигар тамдид кунад. Ин як иқдоми калони маъмурияти нави Кохи Сафед дар бахши сиёсати хориҷӣ мебошад.

Дар вокуниш ба изҳороти Вашингтон, сухангӯи Кремлин Дмитрий Песков рӯзи 22-юми январ гуфт, ки бояд ҷузъиёти пешниҳодро дид. Маъмурияти президенти собиқ Доналд Трамп гуфта буд, ки мехоҳад бархе шарту шароитро нав кунад, вале Маскав инро рад карда буд. Песков дар сӯҳбат бо хабарнигорон дар Маскав гуфт: “Русия мехоҳад созиши “New START” ва тамдиди онро нигоҳ дорад” ва афзуд, “мо иродаи сиёсӣ дар заминаи тамдиди санадро хуш мепазирем, вале ҳама чиз ба ҷузъиёте вобаста аст, ки дар пешниҳод зикр мешавад”. “New START” – созиши охирини миёни Маскаву Вашингтон аст, ки шумори силоҳҳои ҳастаиро дар миқдори муайян танзим мекунад.

Дар Қазоқистон ба фирориёни Шинҷони Чин ҳамла карданд

Кайша Акан, яки фирории қазоқтабори Чин.

Ба Кайша Акан ва Мурагер Олимулӣ, ду фирорӣ аз Шинҷони Чин, ки ба инъикоси масоили поймолсозии ҳуқуқи ақалиятҳо дар Чин машғул буданд, дар Қазоқистон ҳамла сурат гирифт.

Ба Кайша Акан, ки соли гузашта дар Қазоқистон паноҳандагӣ дарёфт кард, шоми 21 январ дар шаҳри Алмато ҳамла шуд.

"Афроди номаълум ба вай ҳамла кардаанд. Ба сараш задаанд, бӯғӣ карда, ба рӯи замин кашидаанд", - гуфт Бекзод Мақсудхонулӣ, роҳбари созмони сабтнашудаи "Нағиз Атажурт". Ин созмон ба пажуҳиши масъалаи таъқиби қазоқтаборон дар Шинҷон машғул аст.

Мурагер Олимулӣ, фирории дигар аз Шинҷони Чин, ки низ соли гузашта дар Қазоқистон паноҳандагӣ дарёфт кард, дар шаҳир Нурсултон мавриди ҳамла қарор гирифт.

Олимулӣ гуфт, соати 22 шаб вай аз кӯча мегузашт, ки ду нафари ношинос ба ӯ наздик шуда, бидуни ҳеч ҳарф ба латту кӯб шуруъ карданд. "Бо корд ба ман ҳамла карданд. Ҷароҳати сабук бардоштам. Дар сарам ва миёнам заданд", - гуфт Олимулӣ.

Пулиси Қазоқистон гуфт, ҳамла ба ин ду нафарро таҳқиқ мекунад.

Марде дар маркази Минск худсӯзӣ кард

Ходимони полиси Беларус дар назди марде, ки худсӯзӣ кардааст. 22-юми январ, майдони Истиқлолияти Минск

Марде, ки дар муқобили бинои ҳукумат дар майдони Истиқлолияти Минск худро оташ зад, дар ҳолати сангин ба беморхона интиқол дода шуд. Ин майдон аз моҳи август ба ин сӯ макони баргузории намоишҳои эътирозии серҷамъият бо талаби аз қудрат канор рафтани Александр Лукашенко гардидааст. Дар як навори видеоӣ 22-юми январ дида мешавад, ки марде оғуштаи оташ ба замин хоб аст ва дар паҳлӯяш як зарфе бо газ дида мешавад. Дар видео дида мешавад, ки ходимони полис барои хомӯш кардани оташ ба рӯи ӯ як кампале мепартоянд. Дар атрофи майдони Истиқлолияти Минск бинои ҳукумат, парлумон, шаҳрдории Минск ва Шӯрои шаҳр ҷойгир мебошанд.
Сухангӯи маъмурияти шаҳри Минск Наталия Ҳанусевич гуфт, ки ин ҳодиса таҳқиқ мешавад. ВКД-и Беларус гуфт, ки феълан дар бораи ин ҳодиса ҳеҷ ҷузъиёте дода наметавонанд. Ба иттилои вазорати беҳдошти Беларус, 50 дарсади бадани ин марде, ки ҳанӯз ҳуввияташ маълум нест, сӯхтааст.

Беларус аз 9-уми август ба ин сӯ дар умқи як бӯҳрони сиёсӣ қарор дорад. Дар он рӯз мақомот гуфтанд, ки Александр Лукашенко, ки аз соли 1994 дар сари қудрат аст, бори навбатӣ дар интихобот ғалаба кард. Вале мухолифон гуфтанд, ки натиҷаҳо тақаллуб шуд ва баъди ин ҳазорҳо сокинони Беларус бо талаби истеъфои ӯ ба раҳпаймоиҳои эътирозӣ мебароянд. Пирӯзии Лукашенкоро ғарбу Аврупо эътироф накарданд ва барои саркӯбу шиканҷаи мухолифону эътирозгарон ин кишварро таҳрим намуданд.

Венгрия аввалин давлати ИА аст, ки воксинаҳои русии Sputnik V-ро мехарад  

Вазири хориҷаи Венгрия Петер Сийярто

Венгрия аввалин кишвар дар Иттиҳоди Аврупо шуд, ки бо Русия созишнома дар бораи харидории воксинаҳои Sputnik V-ро имзо кард. Дар ин бора 22-юми январ дар ҷараёни нишасти матбуотии муштараки вазири беҳдошти Русия Михаил Мурашко ва вазири хориҷаи Венгрия Петер Сийярто хабар дода шуд. Мақомот гуфтанд, ки дар фурсати наздик миқдори калони воксинаҳои зидди коронавирус дар се навбат аз Русия ба Венгрия фиристода мешавад. Ҷузъиёти аз ин беш гуфта нашуд. Мақомоти тиббии Венгрия аз қабл ба истифодаи ду навъи воксинаи AstraZeneca-и Бритониё ва Sputnik V-и Русия иҷоза доданд. Иҷозаи Sputnik V шаш моҳро дар бар мегирад ва имкони тамдид шудан ҳам дорад. Оҷонсии дорувори Аврупо (EMA), ки ниҳоди танзимкунандаи аслии маводи дорувори 27 кишвари узв мебошад, бояд барои истифодаи ин воксинаҳои зидди коронавирус иҷоза бидиҳад. Қарор дар бораи истифодаи воксинаҳои сохтаи AstraZeneca ва ҳам донишгоҳи Оксфорди Бритониё 29-уми январ қабул мешавад. То ҳол EMA ду воксинаро барои истифода дар кишварҳои узви ИА иҷоза додааст: инҳо воксинаҳои сохтаи Pfizer-BioNTech ва Moderna мебошанд. Виктор Орбан, нахуствазири Венгрия дар муроҷиати радиоиш гуфт, ки беҳтарин роҳи эмкунии сартосарии сокинон ин мешавад, ки дар як вақт чандин воксина иҷоза дода шавад, чунки ширкатҳо дар ҳоли рақобат шумори зиёди воксинаро истеҳсол ва таъмин мекунанд.

Додгоҳи Қазоқистон ба озодии билофосилаи ҳомии ҳуқуқ амр кард

Санавар Зокирова

Додгоҳе дар шаҳри Тараз – ҷануби Қазоқистон амр кард, ки ҳомии маъруфи ҳуқуқи башар Санавар Зокирова билофосила аз зиндон озод шуда, ҳукмаш бо ҷарима табдил карда шавад. Худи Зокирова ҳукми додгоҳро дорои ангезаҳои сиёсӣ номида буд.

Додраси додгоҳи вилояти Ҷамбул Нурмаҳаммад Обидов дар ҳукмаш 22-юми январ гуфт, ки Зокирва бояд аз зиндон озод ва бар ивази як соли ҳабс маблағи 56 ҳазор танга (муодили 135 доллар)-ро ҳамчун ҷарима пардохт кунад.

Зокирова моҳи июли соли гузашта бо қарори додгоҳи ноҳияи Медеуи шаҳри Алмаато барои озори духтари зане, ки ӯро дар як раҳпаймоии моҳи март таҳқир карда буд, ба як соли зиндон маҳкум шуда буд. Зокирова гуфт, ки ҳукми зидди ӯ беасос аст ва дорои ангезаҳои сиёсӣ мебошад.

Зокирова як ширкатдор ва ташкилкунандаи фаъоли намоишҳои эътирозӣ бар зидди ҳукмҳои ноодилонаи додгоҳҳои Қазоқистон мебошад, ки дар шаҳрҳои Алмаато ва Нурсултон доир шудааст.

Моҳи марти соли 2019 мақомоти Алмаато ба ӯ иҷоза надоданд, ки анҷумани ҳизби наваш “Ҳуқуқи мо”-ро баргузор кунад. Поёни он сол ӯву ду фаъоли дигарро додгоҳе дар Алмаато барои паҳн кардани иттилои дурӯғин дар бораи ҳизби ҳокими “Нуротан” дар Интернет гунаҳкор кард. Онҳо ба пардохти 15 ҳазор доллар ҷарима ба манфиати ҳизби ҳоким вазифадор шуданд. Он замон ҳам Зокироваю тарафдоронаш ин ҳукмро сиёсӣ номиданд.

Қатъномаи Парлумони Аврупо бо талаби бозбинии равобити ИА ва Русия

Парлумони Аврупо. Акс аз ҷаласаҳои пешин

Парлумони Аврупо қатъномаеро қабул кард, ки аз Иттиҳоди Аврупо хатми “билофосила”-и сохтмони лӯлаи гази “Северный поток-2”-ро тақозо мекунад. Ин лӯла барои интиқоли гази табиии Русия ба Олмон сохта мешавад, вале тасмими ахири мақомоти аврупоӣ дар посух ба ҳабси мунаққиди Кремлин Алексей Навалний рабт мегирад. Қонунгузорони аврупоӣ рӯзи 21-уми январ дар як овоздиҳӣ бо тарафдории 581 вакил ва 50 мухолифу 40 нафари ғоиб аз Иттиҳоди Аврупо тақозо карданд, ки “ҳамкориҳо бо Русияро дар бисёр самтҳо, аз ҷумла дар тарҳи сохтмони “Северный поток-2” ҷиддан бозбинӣ кунад”. Навалний, ки моҳи августи соли 2020 бар асари заҳролудшавӣ бо заҳри навъи низомии “Новичок” ба беморхонаи Берлин интиқол ёфт, баъди хатми давраи табобат 17-уми январ ба Маскав баргашт. Ӯро дар фурудгоҳи “Шерметево” ҳамон замон боздошт карда, рӯзи баъдаш ба 30 рӯзи ҳабс маҳкум карданд. Мақомот гуфтанд, ки ҳабси Навалний ба нақзи шароити ҳабси шартии ӯ аз рӯи парвандаи соли 2014-и иттиҳоми фасод рабт мегирад, вале Навалний гуфтааст, ки қонунро вайрон накарда буд. Ба Навалний 3,5 соли зиндон таҳдид мекунад. Ҳабси ӯ маҳкумияти ҷомеаи ҷаҳониро ба бор овард.

Чанд тасмими Байден барои муқобила бо коронавирус

Президент Ҷо Байден ва муовини президент Камола Ҳаррис стратегияи нави муқобила бо коронавирусро намоиш медиҳанд

Ҷо Байден 21-уми январ дар рӯзи аввали пурраи кориаш дар мақоми президенти нави ИМА чанд фармонеро имзо кард, ки бар асоси стратегияи нави кишвар алайҳи пандемия таҳия шудаанд. Фармонҳои ӯ ба суръат бахшидани барномаи эмкунии зидди COVID-19, афзоиши тестҳо ва пӯшидани ниқобҳо, ҷамъоварии бештари иттилоъ ва таҳлилу такмили сиёсати мубориза бо вирус бахшида шудааст. Ба ҳангоми сафар ба ИМА аз ҳар мусофир тести манфии COVID-19 ва ҳам дар карантин нишастан талаб мешавад. Байден инчунин аз сохторҳои давлатӣ тақозо кард, ки бар асоси Қонуни маҳсулоти дифоӣ, ки як санади марбут ба давраи ҷанг мебошад, ба истеҳсоли маводи зарурӣ дар ҳолати изтирорӣ машғул шаванд. Байден гуфт, “ин тадбирҳои марбут ба давраи ҷанг аст”. Ӯ гуфт, нақшаи онҳо аз роҳандозии як барномаи муассир ва амни эмкунӣ аст, то ки дар 100 рӯзи аввали кораш 100 миллион нафар тавонанд воксинаи зидди коронавирусро дарёфт кунанд. Дар қиёс бо президенти пешин Доналд Трамп, Байден гуфт, ки муқобила бо коронавирус дар авлавияти кори ӯ қарор мегирад.

Байден гуфт, созишномаи "New START”-ро бо Русия имзо мекунад

Соли 2018. Русия системаи "Авангард"-ро озмоиш мекунад

Президент Ҷо Байден ният дорад пеш аз хатми мӯҳлати иҷрои созишномаи ҷории назорати силоҳҳои ҳастаӣ бо Русия қарордоди навро имзо кунад.

Созиши нав "New START” ном дорад ва қарордоди ҷорӣ 5-уми феврал ба поён мерасад. Ҷен Псаки, сухангӯи Кохи Сафед рӯзи 21 январ дар нишасти хабарие гуфт, “президент аз муддатҳо пеш гуфтааст, ки имзои созишномаи "New START” ҷавобгӯи манфиатҳои миллии ИМА аст.

Тамдиди он дар шароите, ки равобит бо Русия ҳарчи бештар хусусияти рақобатӣ касб мекунад, аҳамияти зиёд дорад”.

Созишномаи "New START” як аҳдномаи миёни Вашингтон ва Маскав дар бораи назорат аз силоҳҳои ҳастаӣ мебошад ва аз ҳарду тараф тақозо мекунад, ки истиқрори кулоҳакҳои ҳастӣ дар ҳудуди на бештар аз 1550 адад ва истиқрори системаҳои стратегии интиқоли онҳо то 700 адад риоя шавад.

Маъмурияти президенти пешин Доналд Трамп хост, ки дар талоши музокироти ниҳоӣ навъи дигари силоҳҳои ҳастаиро ҳам маҳдуд карда Чинро барои имзои ин созишнома водор кунад. Русия ҳафтаи ҷорӣ гуфт, ки барои тамдиди мӯҳлати ин созиш то панҷ соли дигар розӣ аст.

Ин мӯҳлат ба Вашингтон ва Маскав имкон медиҳад, ки созиши назорати силоҳҳоро бо шарту шурути дигар такмил бикунанд.

Хуруҷи Трамп аз ду аҳдномаи назорати силоҳ мавриди нигаронии муттафиқони аврупоии ИМА шуд. Дабири кулли НАТО Йенс Столтенберг рӯзи 21-уми январ аз Вашингтон ва Маскав тақозо кард, ки дигар тамдиди мӯҳлати ин санадро ба таъхир нагузошта имзо кунанд.

Ёфтҳои бештар

XS
SM
MD
LG