КМВА (Клуби марказии варзишии артиш)-и Душанбе бо роҳбарии сармураббӣ Аҳлиддин Турдиев, ки дар бозии ниҳоӣ «Регар-ТадАЗ»-и Турсунзодаро бо ҳисоби 2:1 шикаст дод, бори нахуст Ҷоми ФФТ (Федератсияи футболи Тоҷикистон)-ро ба даст овард.
Бозии ниҳоии Ҷоми ФФТ-2023 миёни дастаҳои лигаи олӣ - КМВА ва «Регар-ТадАЗ» - рӯзи шанбеи 25-уми феврал дар Варзишгоҳи марказии шаҳри Ҳисор баргузор шуд. Голҳои Хуршед Абдуллоев ва Суҳроб Каримов ба бошгоҳи Вазорати мудофиаи Тоҷикистон пирӯзӣ овард.
Пеш аз бозии ниҳоӣ дар Варзишгоҳи марказии Ҳисор дастаҳои «Панҷшер»-и Ҷалолиддини Балхӣ ва «Равшан»-и Кӯлоб барои ҷойи сеюм мубориза бурданд. Замони асосии дидор бидуни гол хотима ёфт. Дар задани силсилаи пеналти кори футболбозони «Равшан» омад кард ва онҳо бо ҳисоби 5:4 ғолиб шуданд.
Маблағи ҷоизаҳои Ҷоми ФФТ-2023 ҳамагӣ 100 ҳазор сомониро ташкил медод. Ғолиби мусобиқа – КМВА бо Ҷому медалҳои тило ва 50 000 сомонӣ, барандаи медали нуқра – «Регар-ТадАЗ» бо 30 ҳазор сомонӣ ва соҳиби медалҳои биринҷӣ – «Равшан» бо 20 ҳазор сомонӣ мукофотонида шуданд.
Хуршед Темур-Ҷӯраев, нимҳимоятгари КМВА, беҳтарин бозигари финали Ҷоми ФФТ-2023 эътироф шуда, бо ҷоизаи молӣ сарфароз гардид.
Ҷоми ФФТ (Федератсияи футболи Тоҷикистон)-2023
Финал
КМВА – «Регар-ТадАЗ» – 2:1
Голҳо: Фирӯз Бобиев, 15 – аз пеналти (0:1). Хуршед Абдуллоев, 24 (1:1). Суҳроб Каримов, 83 (2:1).
Беҳтарин бозигари дидор: Хуршед Темур-Ҷӯраев (КМВА).
25-уми феврал. Ҳисор. Варзишгоҳи марказӣ. 2000 тамошогар.
Бозӣ барои ҷойи сеюм
«Панҷшер» – «Равшан» – 0:0. Аз рӯи пеналти – 4:5
Аз майдон хориҷ шуд: Бахтовари Хуршед («Равшан»), 100 – корти 2-юми зард.
Беҳтарин бозигари дидор: Евгений Гритсенко («Равшан»).
25-уми феврал. Ҳисор. Варзишгоҳи марказӣ. 500 тамошогар.
