Аминҷони Абдуфаёз, варзишгари ҷавони тоҷик, дар мусобиқаи қаҳрамонии ҷаҳон оид ба ҷудо миёни наврасони то 18-сола (кадетҳо), ки рӯзҳои 24-27-уми август дар пойтахти Босния ва Ҳерзеговина - шаҳри Сараево баргузор мешавад, ширкат меварзад.
Чунонки вебсайти Федератсияи байналмилалии ҷудо (IJF) хабар додааст, дар мусобиқаи қаҳрамонии ҷаҳон миёни наврасон дар Сараево ширкати 484 варзишгар (271 писару 213 духтар) аз 60 кишвар дар назар аст.
Мусобиқа байни писарон дар ҳашт вазн (-50,-55,-60,-66,-73,-81,-90,+90 кг) ва миёни духтарон низ дар ҳашт вазн (-40,-44,-48,-52,-57,-63,-70, +70 кг) сурат мегирад.
Аминҷони Абдуфаёз ягона варзишгарест, ки Тоҷикистонро дар мусобиқаи қаҳрамонии ҷудои ҷаҳон дар Сараево намояндагӣ мекунад. Ӯ дар рақобатҳо дар вазни то 73 кило, ки 38 нафар иштирок хоҳанд кард, бар асоси қуръакашӣ ба сабқат аз даври дувум мепардозад ва рақибаш ғолиби ҷуфти Тарас Ниелзиев (Украина)/ Ноҳид Тургулиев (Озарбойҷон) мешавад.
Бояд тазаккур дод, мусобиқоти қаҳрамонии ҷудои ҷаҳон миёни наврасони то 18-сола (кадетҳо) дар ҳар ду сол баргузор мешавад.
Мусобиқаи ҳафтуми қаҳрамонии ҷудои ҷаҳон миёни наврасон, ки дар Сараево то рӯзи шанбеи 27-уми август идома хоҳад кард, дар се рӯзи аввал аз рақобатҳои инфиродӣ иборат аст. Рӯзи охирин сабқати дастаӣ барпо мегардад.
