Пулиси вилояти Таласи Қирғизистон таҳқиқи хабари заҳролудшавии 18 нафар дар кони тилои Ҷеруйро оғоз кардааст.
Чанде пеш корбаре бо номи Султонбек Аманбеков дар шабакаи иҷтимоии "Фейсбук" навишт, ки дар кони Ҷеруй 18 кас аз маводи ғизоӣ заҳролуд шудаанд, вале кормандон метарсанд ин хабарро расонаӣ кунанд.
Ҷеруй баъди Қумтор дувумин кони бузурги тилои Қирғизистон аст. Бино ба маълумоти пешакӣ, ҳаҷми захираи он 84 тонна тило ва ҳудуди 10 тонна нуқраро ташкил медиҳад.
Иҷозатномаи коркарди кон соли 2015 дар як музояда бар ивази 100 миллион доллар ба ширкати русии "Восток-геолдобича", ки ба ширкати "Русская платина" марбут аст, фурӯхта шуд.
