Зебо Аминзода 3 октябри соли 1948 дар оилаи шоир ва мусиқинавоз Муҳиддин Аминзода ва ҳунарманди мардумии Тоҷикистон Ойдин Усмонова таваллуд шудааст. Дар 9-солагӣ ба омӯзишгоҳи хореографии ш. Маскав дар назди Театри калон (Большой театр) дохил шуда чор сол таҳсил кард ва соли 1962 ба мактаби олии рақси милливу хореографияи шаҳри Тошканд дохил шуда то соли 1965 таҳсил кард. Баъди бозгашт ба Тоҷикистон донишгоҳи омӯзгории шаҳри Хуҷандро хатм кард. Дар театри мусиқиву драмавии ба номи Пушкини Хуҷанд (1965-1978) кор кардааст. Соли 1978 дар шаҳри Душанбе раҳбари ансамбли рақсии “Зебо” таъин шуд ва дар ин мақом то соли 1993 кор кард.
Муаллиф ва басаҳнагузорандаи рақсҳои маъруфи "Эй, санам", "Чак-чаки борон", "Боди сабо" ва дигарҳо мебошад.
Солҳои 1993-1996 раиси шӯрои ҳамоҳангсози ширкати байнидавлатии садову симои «Мир», 1996-2003 – мушовири раиси ин шабака ва дар мақомҳои дигар дар Маскав кор кардааст. Соли 2012 ба Тоҷикистон баргашт ва аз соли 2014 дар сари эҳёи ансамбл ва мактаби рақсии «Зебо» кор мекунад. Оиладор, соҳибе се фарзанд аст.