Пайвандҳои дастрасӣ

Хабарҳо

Туркия барои текноложии мушакҳои S-400 бо Русия музокирот мекунад

Мушакҳои зидди ҳавоии S-400 -и Русия

Вазири умури хориҷии Туркия Мавлуд Човушоғлу гафт, ки Анкара барои интиқоли текноложӣ -як бахши созиши зиддунақизи харидории сохтори мушакҳои зиддиҳавоии S-400, музокиротро бо Маскав идома медиҳад.

Човушоғлу гуфт, ки харидории сохтори мушакӣ зарур буд ва Туркия ба он "оҷилан ниёз дошт". Анкара созиши харидории сохтори мушакҳои зидди ҳавоии Русияро рӯзи 27 декабр расман эълон кард ва бо ин нигаронии шадиди шариконаш дар паймони НАТО-ро ба бор овард.

"Мо талош кардем сохтори мушакиро аз шарикони худ дар НАТО харидорӣ кунем, аммо ин имконпазир нашуд",- гуфт Човушоғлу рӯзи 1 январ ба хабаргузории dpa. "Русия ба мо беҳтарин пешниҳодро дод ва барои ҳамин мо ин мушакҳоро аз Русия ворид мекунем",- афзӯд вазири Туркия.

Муомилот бар сари созиши 2,5 миллиард долларӣ идома дорад ва ба гуфтаи Човушоғлу аввалин бахшҳои интиқоли сохтори S-400 соли 2020 оғоз мешавад.

Ҳамаи хабарҳои имрӯзро дар инҷо бихонед

Миннеаполис шаби дуюми беназмиҳоро пуштисар кард

Дар шаҳри Миннеаполиси ИМА бо сабаби куштори як ҷавони амрикоии африқоитабор шаби дуюми эътирозу беназмиҳо пуштисар шуд. Тим Геннон, раиси полиси шаҳри Бруклин Сентер рӯзи 12-уми апрел гуфт, ходими полис ба ҷои электрошокер тасодуфан силоҳро ба даст гирифта ба Даунте Райти 20-сола тир холӣ кард.

Полис наворҳои видеоии ҳодисаи 11-уми апрелро нашр кард ва дар он дида мешавад, ки баъди барои вайрон кардани қоидаи ҳаракат дар роҳ нигоҳ дошта шудани мошини Райт занозанӣ бархост ва вақте ходими полис, ки зан будааст, талош кард ба дасти ӯ завлона занад, Райт ба қафо гашта, талош кардааст ба мошин дохил шавад. Ходими полис бо нидои “ман электрошокер мегирам”, ки як амали оддии полис мебошад, ба даст силоҳ гирифта онро ба кор меандозад. Тим Геннон гуфт, ходими полис ба ҷои истифодаи электрошокер силоҳро ба кор бурд ва ин амал, ба гуфтаи ӯ, як тасодуф буд, ки боиси “марги фоҷеабори ҷаноби Райт шуд”.

Марги ин ҷавони сиёҳпӯст боиси эътирозу беназмиҳо шуд. Полис барои хатми беназмиҳо аз гази ашковар истифода кард.

Ҳинд ба таври изтирорӣ ба истифодаи Sputnik-V иҷоза дод

Ҳинд иҷоза дод, ки воксинаи русии Sputnik-V ба таври изтирорӣ барои эмкунӣ аз олудашавӣ ба COVID-19 иҷоза дода шавад. Дар ин кишвари иборат аз 1,3 миллиард ҷамъият камбуди воксина эҳсос мешавад, аз ин рӯ воксинаи русӣ сеюм дар навбати тасдиқ будааст. Ширкати дорусозии Dr Reddy's Laboratories рӯзи 13-уми апрел гуфт, ки иҷозаи иидораи назорати дорувории Ҳиндро ба даст овард ва акнун ба воридоти воксинаҳои русӣ мепардозад. Бунёди сармояҳои мустақими Русия, ки масъули таблиғи воксинаҳои русӣ дар ҷаҳон аст, гуфт, Ҳинд кишвари серҷамъияттарине мебошад, ки барои гирифтани воксинаи Sputnik-V омодагӣ нишон додааст ва дар маҷмӯъ, ба гуфтаи ин ниҳод, 60 кишвар ё 3 миллиард аҳолии ҷаҳон, ки 40 дарсади сайёраро ташкил медиҳанд, барои дарёфти воксинаи Sputnik-V майл доранд. То ҳол дар Ҳинд беш аз 100 миллион воя (доза)-и воксинаҳои маҳаллии Covaxin and Covishield ва ҳам воксинаҳои AstraZeneca-и истеҳсолшуда дар ин кишварро ба аҳолӣ тақсим кардааст. Ба иттилои Бунёди сармояҳои мустақими Русия, бар асоси қарордод бо панҷ ширкати дорусозии Ҳинд соле 850 воя воксинаи Sputnik-V истеҳсол мешавад. Ҳинд яке аз кишварҳои шадидан осебдида бар асари коронавирус мебошад ва ҳалокати инсонҳо ҳам бар асари ин вирус назар ба Бразилия бештар аст.

5 ҳазор довталаби тоҷики таҳсил дар мактабҳои Русия

Донишҷӯёни тоҷик

Дар Тоҷикистон давраи навбатии интихоби довталабони таҳсил дар донишгоҳҳои Русия ба поён расид. Тибқи иттилои Маркази илм ва фарҳанги Русия дар Хуҷанд, имсол беш аз 5000 хатмкунандагони мактабҳои миёна, литсей ва гимназияҳои панҷ шаҳри Тоҷикистон - Хуҷанд, Душанбе, Кӯлоб, Бохтар ва Хоруғ дар озмун иштирок кардаанд. Ба гуфтаи мақомоти рус, Тоҷикистон аз рӯи талабгорони таҳсил дар макотиби олии Русия дар миёни дигар кишварҳо ҷойи аввалро ишғол мекунад ва соли ҷорӣ шумораи довталабон аз 15 то 20 фоийз афзудааст. Ҳамасола Русия барои қабули ҷавонони тоҷик ба донишгоҳҳояш 630 ҷой ҷудо мекунад.

Даъват аз ҳукумат: сарбозшикор ва ё облава  хотима дода шавад!

Сарбози нав бо модараш хайрухуш мекунад. Дар Тоҷикистон шикоятҳо аз ҷалби маҷбурӣ ва ҳатто сарбозшикор дар кӯчаҳо зиёд мешавад

Гуруҳе аз шаҳрвандони Тоҷикистон бо ташаббуси рӯзноманигор Раҷаби Мирзо аз ҳукумати кишвар хостанд, ки ба сарбозшикор ва ё облава хотима дода шавад. Дар зери ин номаи саркушода дар шабакаи Фейсбук садҳҳо нафар имзо гузоштаву мубтакирон гуфтанд, онро ба сомонаи президент Эмомалӣ Раҳмон ирсол мекунанд. Дар ин мактуб, ки ба раисҷумҳури Тоҷикистон ва шаҳрдори Душанбе нигаронида шудааст, омадааст, “бо ин шевае, ки ҳоло ҷавононро “ҷалб” мекунанд, на танҳо қонунмандӣ зери суол мераваду ҳуқуқу озодиҳои шаҳрвандонро поймол мекунанд, балки давлат беобрӯ мегардад, ноумедӣ авҷ мегирад, психологияи мардум вайрон мешавад, имиҷи давлату артиши он коҳиш меёбад”. Муаллифон мегӯянд, “махсусан имсол, ки аз маъракаи даъвати ҷавонон ҳамагӣ чанд рӯз мегузарад, шабакаҳои иҷтимоӣ аз навору аксҳое пур шудаанд, ки бо усули ваҳшатнок ҷавононро боздошт ва ба хизмат мебаранд”. Дар мактуб пешниҳод шудааст, ки аз ҳисоби мақомоти ҳукумат, масъулини Вазорати мудофиа, прокуратура, вакилони Маҷлиси намояндагон ва ҷомеаи шаҳрвандии Тоҷикистон комиссияи хос таъсис дода шавад ва роҳҳои бартараф намудани мушкили мазкур пайдо гардад.

"Барқи тоҷик" ваъда дод, ки маҳдудияти барқ дар Рамазон камтар мешавад

Маҳдудияти барқ дар мавсими сармо дар Тоҷикистон бештар минтақаҳои дурдасти кишварро фаро гирифт

Ширкати "Барқи тоҷик" мегӯяд, бо дарназардошти фарорасии моҳи Рамазон шиддати маҳдудияти истифода аз нерӯи барқ дар манотиқи рустоии Тоҷикистонро камтар мекунад. Нозирҷон Ёдгорӣ, сухангӯи ширкати "Барқи тоҷик" мегӯяд, ба ин хотир тасмим шудааст вақти ифтор ва рӯзабандӣ ба манзили сокинон нерӯи барқ интиқол дода мешавад. Тақвими Рамазон соати ифрот ва рӯзабандиро дар Тоҷикистон аз тахминан соатҳои ҳафти шом то чори субҳ муқаррар кардааст.

Ёдгорӣ афзуд, ҳамзамон мутахассисони "Барқи тоҷик" мавзӯи лағви пурраи маҳдудиятҳои истифода аз нерӯи барқ дар кишварро баррасӣ мекунанд. Ҳарчанд, ба гуфтаи Ёдгорӣ, "маҷрои рӯдхонаҳои бузурги кишвар дар муқоиса бо як соли қабл сӣ дарсад камтар аст. Ба ин хотир, фаъолияти Маркази барқиву гармидиҳии Душанбе-2-ро бо фарорасии ҳавои гарм идома медиҳанд, то сокинони бо нерӯи барқ дастрасӣ дошта бошанд".

Маҳдудияти барқ дар мавсими сармо яке аз мушкилоти калидии сокинони манотиқи берун аз шаҳри Душанбе боқӣ мемонад.

"Ҳамарӯза нафарони нав зидди Иззат Амон даъво пеш меоранд" - пайвандон

Тарафдорони Иззат Амон боздошти ӯро дорои ангезаҳои сиёсӣ меноманд ва мегӯянд, интиқодҳои ӯ аз ҳукумати Тоҷикистон сабаби аслии боздошташ шудааст

Пайвандони Иззат Амон, ҳомии ҳуқуқи муҳоҷирон мегӯянд, ӯ ҳамчунон дар боздоштгоҳи муваққатӣ нигаҳдорӣ мешаванд ва рӯшан нест, ки қазияи ӯ бо чӣ меанҷомад. Ба қавли онҳо, ҳамарӯза чандин нафари наве бо даъвоҳои худ дар нисбати Иззат Амон аз худ дарак медиҳанд. Мақомот то ҳол дар бораи вазъи саломатии Иззат Амон, ки рӯзи 25-уми март дар Маскав нопадид шуд ва чанд рӯз баъд аз боздошти ӯ дар Душанбе хабар доданд, маълумоти расмие нашр накардаанд. Наздиконаш гуфтанд, рӯзи 12-уми апрел бо ӯ дар боздоштгоҳ мулоқот кардаанд . "Ӯ рӯҳафтода аст", гуфтанд пайвандон. Ҷузъиёти бештар дар идомаи рӯз нашр мешавад.

То ҳол мақомот дар Тоҷикистон гуфтаанд, ки Иззат Амон бо гумони қаллобӣ ба ҷавобгарӣ кашида шудааст ва ҳама гуна иддаоҳои тарафдорони ӯро рад мекунанд, ки гуфтаанд, дар асл интиқодҳои ӯ аз ҳукумати Тоҷикистон сабаби аслии боздошти ӯ шудааст.

АП: Мирзиёев ба Тоҷикистон сафар мекунад

Нахустин сафари президенти Узбекистон Шавкат Мирзиёев ба Душанбе 9 марти соли 2018 сурат гирифт ва оғози давраи нави ҳамкориҳои миёни Узбекистон ва Тоҷикистон дониста шуд

Президенти Узбекистон бо сафари расмӣ ба Тоҷикистон меояд. Хабаргузории «Азия-Плюс» аз қавли манбааш дар ҳукумати кишвар менависад, ки сафари Шавкат Мирзиёев бо даъвати Эмомаль Раҳмон, аз 10 то 12 -уми июн дар назар гирифта шудааст. Ба ҳамин тартиб дар давраи раёсатҷумҳурияш ин бори чаҳорум мешавад, ки президенти Узбекистон аз Тоҷикистон дидан мекунад. Интизор меравад, раҳбарони ду кишвар дурнамои ҳамкориҳои тарафайнро дар ҳама бахшҳо баррасӣ намоянд. Ҳамчунин қарор аст, миёни Душанбе ва Тошканд созишномаҳои нав марбут ба соҳаи нақлиёту энергетика, кишворазӣ ва илму фарҳанг ба имзо бирасад.

Пешниҳоди Омбудсмен: Ба хориҷиҳои дармонда дар Русия ҳақи иқомат дода шавад

Омбудсмени Русия пешниҳод кардааст, барои муҳоҷироне, ки ба таври қонунӣ ба ин кишвар ворид шудаву бинобар пандемия беш аз як сол ин ҷо мондаанд, ҳаққи иқомати муввақатӣ ва ё “Вид на жительство“ дода шавад. Хабаргузории ТАСС менависад, Татяна Москалкова ин пешниҳоди худро зимни пуштибонӣ аз таҳияи лоиҳаи қонуне, ки ба муҳоҷирон имкон медиҳад, сарфи назар аз қонуншиканиҳои мавҷуда, иқомати худро дар Русия қонунӣ кунанд, ироа доштааст. Тарҳи қонун бо ташаббуси вазири корҳои дохилии Русия Владимир Колоколтсев таҳия мегардад. Он асосан ба вазъи хориҷиёне таъсир мерасонад, ки ҳангоми пандемияи коронавирус натавонистанд ҳуҷҷатҳоро барои қонунӣ намудани буду бошашон ҷамъ оварданд.

Соли дуюми моҳи Рамазон дар давраи пандемия

Хариди рамазонӣ дар як бозори Сурия

Сарфи назар аз идомаёбии пандемия ва нигарониҳо аз афзоиши мизони гирифторӣ бо бемории COVID-19, сар аз 13-уми апрел мусулмонони саросари олам фарорасии моҳи шарифи Рамазонро ҷашн мегиранд. Соли дуюм аст, ки Рамазон ба даврони пандемия рост меояд ва мусумлонони рӯзадор бояд дар баробари худдорӣ аз тановули ғизо, нӯшидани об ва дигар аъмоли дунявӣ маҳдудиятҳои марбут бо ҷилавгирӣ аз сирояти саросарии коронавирусро иҷро кунанд.

Дар моҳи Рамазон мусулмонон барои кушодани рӯза ва намозгузорӣ дар ҷойҳои ҷамъиятӣ, ба мисли ошхонаву масҷидҳо, бештар ҷамъ мешаванд, ки, ба қавли табибон, эҳтимоли сирояти коронавирусро афзоиш медиҳад. Дар бисёре аз мамолики исломӣ пешвоёни рӯҳонӣ мардумро ба гирифтани ваксинаи зидди коронавирус ташвиқ намуда, худашон ҳам дар мазҳари ом ваксина гирифтанд.

Ба гуфти онҳо, гирифтани ваксина рӯзаро намешиканад. Дар Тоҷикистон низ аз шоми дирӯз дар тамоми масҷидҳои ҷомеъ бидуни маҳдудият намози таровеҳ баргузор шуд. Мақомот мегӯянд, танҳо талаб ин аст, ки фосилаи ҷисмонӣ риоя шавад ва ниқоби тиббӣ бипӯшанд.

Дар рӯзи сафари раиси САҲА ба Қазоқистон гуруҳе аз фаъолон гирдиҳамоӣ карданд

Қазоқистон.

Пушти дари Созмони амнияту ҳамкорӣ дар Аврупо (САҲА) дар шаҳри Нурсултони Қазоқистон гуруҳе аз фаъолони маданӣ гирдиҳамоӣ ташкил ва аз ҳукумати Қазоқистон талаб карданд, ки таъқиби шаҳрвандонро барои дидгоҳҳои сиёсиашон қатъ кунад.

Ҷамъшудаҳо дар даст аксҳои Айнур Мирзалиева, Алӣ Жакупова ва Аскар Каирбекро доштанд, ки ин афрод дар "даст доштан дар фаъолияти созмони тундгаро" айбдор мешаванд. Гирдиҳамомадагон ҳамчунин шиорҳои "Озодӣ ба зиндониёни сиёсӣ" дар даст доштанд.

Марат Мусобоев, яке аз эътирозгарон гуфт, ҷамъшавии онҳо пушти дари САҲА ба ташрифи вазири корҳои хориҷии Шветсия Анн Линде рабт дорад, ки Линде ҳамзамон раиси САҲА аст. Мусобоев гуфт, бо ҷамъ шудани пушти САҲА мехоҳанд ба ин созмон ёдрас шаванд, ки Қазоқистон қатъномаи Порлумони Аврупоро дар мавриди ҳуқуқи инсон нодида мегирад.

Раиси САҲА Анн Линде дар доираи сафари расмӣ ба кишварҳои Осиёи Марказӣ, вориди Қазоқистон шудааст.

Навалнийро дар зиндон таҳдиди иҷборан ғизо додан карданд

Алексей Навалний.

Мухолифи ҳукумати Русия Алексей Навалнийро, ки дар маҳбасе дар вилояти Владимири он кишвар гуруснашинӣ эълом кардааст, роҳбарияти маҳбас таҳдид ба иҷборан ғизо додан кард. Дар ин бора аз қавли Навалний дар шабакаҳои иҷтимоӣ хабар доданд.

Навалнийро аз беморхонаи маҳбас дубора ба маҳбаси умумӣ бурданд. Ҷонибдорони Навалний мегӯянд, то кунун иҷозат нашудааст, ки пизишки мавриди эътимодаш ӯро муоина кунад. Навалний аз дарди камар ва пойҳо шикоят дорад. Аз ибтидои гуруснашинӣ мухолифи рус 8 кило ва аз оғози ҳабс 15 кило лоғар шудааст.

Алексей Навалний бо қарори додгоҳи ноҳияи Симонови шаҳри Москва аз 2-юми феврали соли ҷорӣ, дар доираи парвандаи "Ив Роше" 2,5 сол зиндонӣ шуд.

Навалний аз сиҳатиаш шикоят дорад. Рӯзи 31-уми март вай бо талаби иҷозат додани пизиш ба наздаш гуруснашинӣ эълом кард. Пизишкони маҳбас гуфтанд, Навалний дар камараш ду "грижа" дорад. Пизишкон ҳамчунин гуфтанд, ки Навалний таби баланд ва сулфа дорад.

Украина гуфт, Русия даъватҳо ба муколамаро нодида мегирад

8-уми апрел, минтақаи Луҳанск. Президенти Украина Владимир Зеленский барои ошноӣ бо хати ҷанг ба шарқи Украина рафтааст

Украина гуфт, аз Русия дархост кард, ки мавзӯи афзоиши танишҳо дар шарқи Украинаро муҳокима кунанд, вале то ҳол посухе дарёфт накардааст, дар ҳоле, ки Маскав ин иддаоро рад мекунад. Киев ва Ғарб дар хушунатҳои ахире, ки дар минтақаҳои шарқи Укрина - Донетск ва Луҳанск рух доданд, ҷудоиталабони рӯ ба Маскавро гунаҳгор карданд, вале Маскав баръакс гуноҳро ба сари Киев бор мекунад.

Дар наворҳои видеоиву аксҳое, ки ахиран нашр шуд, дида мешавад, ки нирӯҳои Русия дар марзи шарқии Украина ва ҳам нимҷазираи Қрим таҷаммӯъ мекунанд ва ин ҳолат нигарониҳо аз эҳтимоли ирсоли нирӯҳои русӣ ба Украинаро бештар кардааст. Дар изҳороте, ки 12-уми апрел вазорати хориҷаи Украина нашр кард, гуфта мешавад, ки бар асоси созиш бо Маскав ва шарикони байналмилалӣ, аз Русия расман суол шудааст, ки “ҳузури азим”-и нирӯҳояш дар чанд рӯзи ахир дар марз бо Украина ва қаламравҳои ишғолшудааш шарҳ дода шавад. Дар изҳорот омадааст: “Мутаассифона, ҷониби Русия аз шарҳи ин қазия худдорӣ мекунад ва мегӯяд, ки чунин чиз вуҷуд надорад”. Дар изҳорот омадааст, ки Киев аз Русия хост, “нирӯҳояшро аз марзи Украина дур кунад ва пахши суханрониҳои ҷангталабона ва хабарҳои дурӯғинро хотима диҳад”.

Юлия Мендел, сухангӯи президент Владимир Зеленский рӯзи 12 апрел гуфт, ки дафтари президент “барои муколамаи мустақим бо президент Владимир Путин дархост дод”, вале “мо то ҳол ҳеҷ посухе дарёфт накардем ва мо умедвор ҳастем, ки ин ба маънои рад шудани муколама нест”. Хабаргузориҳои русӣ аз қавли Дмитрий Песков, сухангӯи Кремлин гуфтанд, ки “аз чунин дархостҳо ҳеҷ хабаре надорад”.

Дар Беларус нашри барномаҳои Euronews  қатъ шуд

Александр Лукашенко соли 2014 ба Euronews мусоҳиба додааст

Дар Беларус шурӯъ аз 12-уми апрел пахши барномаи ТВ Euronews қатъ шуд. Дар вазорати иттилооти Беларус ба РИА "Новости" гуфтанд, ки тасмими мазкур бо сабаби вайрон шудани қонунгузорӣ дар бораи реклама гирифта шудааст. Дар сайти худи ин сохтор омадааст, ки мӯҳлати иҷозатномаи пахши барномаҳои Euronews дар Беларус ба охир расид. Ҳамзамон дар хабар омадааст, ки дар қаламрави Беларус барномаҳои телевизиони русии “Победа” намоиш дода мешаванд, ки дар бораи Ҷанги дуюми ҷаҳон барномаву филмҳои сохтаи шӯравӣ қисса мекунад.

Euronews – як шабакаи телевизионии 24-соата аст, ки ба 13 забон хабарҳо пахш мекунад. Анҷумани журналистони Беларус қарори мақомотро дорои ангезаҳои сиёсӣ меноманд. Борис Горетский, муовини раиси Анҷумани журналистони Беларус гуфт, “ба эҳтимоли ғолиб, ин қарор бо ҳадафи дар инзивои бештари иттилоотӣ қарор додани мардуми Беларус содир шудааст. Мақомот аз тобистони гузашта ба ин сӯ дар атрофи ҷомеаи Беларус, ба истилоҳ, “девори чинӣ” сохта, журналистонро саркӯб ва маводи нашршударо масдуд мекарданд”. Коршиноси матбуотӣ Павлюк Биковский гуфт, дар Беларус аксарият ба чунин шабакаҳои нашаротии мисли CNN, Fox News ва дигар расонаҳо дастрасӣ надоранд, дар ҳоле, ки онҳо метавонанд чун алтернативаи шабакаҳои телевизионии давлатии Беларус ва Русия хидмат кунанд.

Аз августи порсол, вақте мухолифон ва бисёр сокинони Беларус ба натиҷаҳои интихоботи президентии ин кишвар бовар накарда даст ба эътироз заданд, мақомот аз саркӯб ва фишор кор гирифтанд. Баробар бо эътирозагони оддиву мухолифон, журналистон ҳам таъқиб ва ҳабс шуданд. Дар ин ҳама таҳаввулот Маскав аз Минск пуштибонӣ кард.

Amnesty аз Эрон хост, ҳукми қатли марди 30-сола иҷро нашавад

Пойафзоли як зиндонии эронӣ, ки баъди иҷрои ҳукми қатли ӯ дар кӯча мондааст

Созмони байналмилалии Amnesty International аз мақомоти Эрон хост, ки ҳукми қатли марди муттаҳам дар таҷовуз ба номуси кӯдакро иҷро накунад. Ин созмони воқеъ дар Лондон мегӯяд, ки ҳукми қатли Фарҳод Солеҳии Ҷобеҳдори 30-сола бояд 13-уми апрел дар вилояти шимолии Албурз иҷро шавад. Ҳуки қатли ӯ бо вуҷуди он ба нақшаи иҷро гирифта шудааст, ки дар як ариза аз додгоҳи олии Эрон хостанд, ки парвандааш бозбинӣ шавад. Дар як изҳороташ рӯзи 11 апрел Amnesty International гуфт, “ба иловаи ин ки қонунҳои байналмилалӣ татбиқи ҳукми қатлро дар сурати ҷинояти таҷовуз ба номус манъ мекунад, худ ба худ ин ҳукм ваҳшатнок ва ғайриинсонӣ буда, ҳеҷ гоҳ посухи муносиби ҷиноят буда наметавонад”. Ҷобеҳдор июни соли 2018 дар робита бо иртиботи ҷинсӣ бо тифли 10-солае дар соли 2017 боздошт шуд.

AI: Истирдодшуда аз Фаронса ба Чеченистон бо шиканҷаву марг рӯбарӯст

Магомед Гадаев

Созмони байналмилалии Amnesty International дар изҳороте рӯзи 11-уми апрел гуфт, як паноҳандаи сиёсии чечентабор, ки ахиран аз ҷониби Фаронса ба дасти оҷонсии амнияти Чеченистон таслим карда буд, бо шиканҷа ва ҳатто куштор рӯбарӯ аст. Бахши ин созмон воқеъ дар Фаронса гуфт, ки аз сарнавишти Магомед Гадаев шадидан нигарон ҳастанд. Ин мард 9-уми апрел аз Фаронса ба Маскав истирдод шуд. Нашрияи “Новая газета” гуфт, ки Гадаеви 37-соларо баробари расидан ба Маскав ба дасти амниятиҳои Чеченистон супурданд. Дар изҳороти Amnesty International омадааст, ки “ин мард дар гузашта дар қазияҳое дар бораи даст ба шиканҷа задани мақомоти чечен ба ҳайси шоҳид баёнот додааст ва ҳоло худи ӯ бо хатари шиканҷа ва ҳатто куштор рӯбарӯ мебошад”. Изҳороти мазкур ба номи президенти Фаронса Эммануэл Макрон ирсол шудааст. Гадаев то замони боздошту истирдодаш раиси ҷамъияти чеченҳои Париж ва ҳам як узви анҷумани чеченҳои Аврупо буд. Ӯ баъди фирор аз Чеченистон, ки он ҷо бо иттиҳоми ҷудоиталабӣ дар зиндон буду ҳадафи шиканҷа қарор гирифт, даҳ сол дар Фаронса зиндагӣ кард. Дар Фаронса ӯ нақл кардааст, ки чӣ гуна худи ӯ шоҳиди шиканҷаҳое будааст, ки нирӯҳои амниятии Чеченистон содир кардаанд.

Ҳушдори ИМА ба Русия дар заминаи таҷаммӯи нирӯ дар марз бо Украина

Дар шарқи Украина аз соли 2014 ба ин сӯ низоъҳои мусаллаҳонаи миёни артиши Украина ва ҷудоиталабони украинӣ ҷараён дорад, ки аз Русия пуштибонӣ мебинанд. То ҳол марги беш аз 13 ҳазор нафар тасдиқ шудааст.

ИМА бо нигаронӣ аз таҷаммӯи нирӯҳои Русия дар марз бо Украина ҳушдор дод, ки агар Русия дар нисбати Украина «бепарвоёна ва пархошгарона амал кунад», бо паёмадҳо рӯбарӯ хоҳад шуд. Энтони Блинкен, котиби давлатии ИМА рӯзи 11 апрел дар сӯҳбаташ дар барномаи «Мулоқот бо матбуот»-и NBC гуфт, «мавқеи президент Байден дар ин замина бисёр рӯшан аст». Ӯ гуфт, «агар Русия бепарвоёна ва пархошгарона амал кунад, ин кор нарх ва паёмад хоҳад дошт».

Чанд ҳафтаи ахир дар шарқи Украина низоъҳо миёни нирӯҳои ҳукуматии Украина ва ҷудоиталабони рӯ ба Русия авҷ гирифтаанд, чун шаҳодати он вуҷуд дорад, ки низомиёни Русия наздиктар ба марзҳои Украина дар шарҳи он кишвар ва ҳам дар дохили нимҷазираи ғасбшудаи Қрим ҳаракат мекунанд.

Кремлин талабҳои ақибкашии нирӯҳоро рад карда гуфтааст, ки дар ин сарҳадҳо хатар эҳсос мекунад ва ҳам ин кори дохилии он аст. Сухангӯ Дмитрий Песков рӯзи 11-уми апрел гуфт, «ҳеҷ кас дар андешаи ҷанг нест», вале афзуд, ки Маскав нисбати сарнавишти русзабонҳои сокини шарқи Украина «бепарво нахоҳад буд». Аз ин пеш 11-уми апрел вазири хориҷаи Бритониё Доминик Рааб гуфт, ки Лондон ва Вашингтон «қотеона мухолифи амалиёти бесобуткунандаи вазъ дар Украина» мебошанд ва аз Русия талаб кард, ки ба низоъ тавсеа набахшад.

Эътирозҳо дар Миннеаполис баъди куштори як ҷавони сиёҳпӯст

Эътирозҳо дар Миннеаполис

Куштори ҷавонмарди 20-солаи сиёҳпӯст аз ҷониби ходими полисе дар шаҳри амрикоии Миннеаполис шаби 11-уми апрел боиси эътирозҳо шуд. Замоне, ки издиҳоми мардум дар назди идораи полиси шаҳри Бруклин Сентер ҷамъ омад, полис ба сӯи онҳо бо гази ашковар посух дод. Ин ҳодиса дар ҳолест, ки дар Миннеаполис як сол пеш ходими сафедпӯсти полиси маҳаллӣ барои куштори марди сиёҳпӯст Ҷорҷ Флойд боздошт шуд ва ҳоло мурофиаи додгоҳии ӯ идома дорад. Эътирозгарон ду мошини полисро сангборон карданд. Раёсати полиси шаҳри Бруклин Сентер гуфт, ки ду ходими полис як ҷавонмардро барои вайрон кардани қоидаи ҳаракат дар роҳ нигоҳ доштанд ва баъди ин маълум шуд, ки ин шахс чандин бор ҳушдорҳои полисро нодида гирифтааст. Раёсати полис гуфт, вақте ходимони полис хостанд, ки ин мардро боздошт кунанд, ӯ ба мошинаш нишасту фирор кард, дар ҳамин ҳолат яке аз афсарон аз силоҳаш тир кушод. Мошини марди гумонбар чанд кӯчаро гузашта ба як мошини дигар бархӯрд. Вақте полис расид, хабар дод, ки мард ба ҳалокат расидааст. Модари ӯ талаб кард, ки иттилои бештар фароҳам кунанд. Таҳқиқи ин қазия шурӯъ шудааст.

Эрон барои ҳодисае дар Натанз Исроилро гунаҳгор кард

Натанз дар Исфаҳони Эрон ҷойгир аст

Эрон таҳдид кард, ки барои «харобкорӣ» дар муассисаи ҳастаии Натанз аз Исроил интиқом мегирад, чун ин кишварро дар сар задани ҳодисаи ахир гунаҳгор медонад. Алӣ Акбар Солеҳӣ, раиси Оҷонсии нирӯи ҳастии Эрон гуфт, ки дар як ҳодисаи «терроризми ҳастаӣ» рӯзи 11 апрел нирӯи барқ қатъ шуд ва ин ҳодиса як рӯз баъди он рух дод, ки дар ин корхона дастгоҳи нави ғанисозии ураниум ба кор дароварда шуд. Дар Натанз барномаи калидии ғанисозии ураниуми Эрон иҷро мешавад. Ин барнома зери назари Оҷонсии нирӯи ҳастаии СММ аст, ки гуфтааст, аз ҳодисаи ахир хабар дорад, вале онро шарҳ намедиҳад. Рӯзи 12 апрел телевизиони давлатӣ гуфт, ки вазири хориҷаи Эрон Ҷавод Зариф масъулияти рух додани ҳодисаро ба дӯши Исроил вогузор кард ва гуфт, “ин кишвар пешрафтҳои моро дар гуфтугӯҳо бо ҳадафи бекор кардани таҳримҳо намехоҳад, аз ин рӯ дар фикри интиқом аст”. Вале вазири эронӣ далели қавитари даст доштани Исроил дар ин ҳодисаро фароҳам накард.

Вале чандин матбуоти исроилӣ бо такя ба манобеи номаълуми истихборотӣ навиштанд, ки аз кор мондани Натанз кори дасти хадамоти иктишофии Моссад буд, то ки корҳои ғанисозии ураниум дар ин кишвар моҳҳо ба ақиб андохта шавад. Дар ҳоле, ки нахуствазир Бенямин Нетаняҳу Эронро азимтарин таҳдид ба Исроил меномад, дар заминаи эҳтимоли даст доштани ҳукуматаш дар ин ҳодиса ҳеҷ шарҳ ё раддияе надодааст.

Вале нашрияи амрикоии The New York Times бо такя ба манобеи амниятӣ дар ИМА ва Исроил навишт, ки Исроил дар “таркиши азиме” дар Натанз даст дорад. Ба навиштаи нашрия, таркиш боиси аз байн бурдани низоми барқдиҳии дохилӣ шуд, ки ғанисозии ураниум дар сентрифугаҳоро таъмин мекард. Ба навиштаи манбаъ, зарба ба низоми барқ то он андоза қавӣ буд, ки барои ҳадди аққал 9 моҳ корҳои ғанисозӣ дар Натанзро ғайриимкон мегардонад.

Омӯзгореро дар Узбекистон барои баҳои "ду" кӯфтаанд

Шоҳрух Оққӯзиев, муаллими яке аз мактабҳои Чиракчини Узбекистон.

Шоҳнур Оққузиев, омӯзгори забони англисии мактаби 134 ноҳияи Чиракчини Узбекистонро бародарони як хонанда барои баҳои "ду" латту кӯб карданд.

Омӯзгори латукӯбшуда дар бемористон бистарӣ шудааст. Ин ҳодиса рӯзи 6 апрел рух дод. Оққузиев гуфт, ки ба вай се бародари як хонандааш ҳамла кардаанд.

"Рӯзи 6 апрел ба хонандагони синфи 6 дарс медодам. Ба 7 хонанда, ки ба дарс омода набуданд, баҳои "ду" гузоштам. Яке аз хонандагон бо нишони норизоӣ аз синф берун шуд. Баъди дарс аз синф берун шудам, ки ҳамон хонанда маро мунтазир аст. Гуфт, бародарам шуморо интизор аст. Ман рафтам, се нафар буданд ва ногаҳон ба ман ҳамла карданд. Ман аз ҳуш рафтам", - гуфт Шоҳнур Оққузиев.

Мақомоти маорифи ноҳияи Чирак аз рӯи ин ҳодиса тафтишро шуруъ кардаанд.

Либоси милисаи тоҷик аз атласу адрас. Назарҳо яксон нест. АКС

Намунаҳои либоси идонаи милитсияи тоҷик, ки дар сайти vkd.tj нашр шудааст

Вазорати корҳои дохилии Тоҷикистон либоси нави занонаи кормандони милисаро рӯнамоӣ кардааст, ки аз ҷониби як тарроҳи суғдӣ таҳия шудааст. Вебсайти расмии ин ниҳод рӯзи 12-уми апрел бо нашри чанд акс намунаи либоси идонаи низомӣ ва саҳроии ходимони милитсияи Тоҷикистонро пешниҳод кардаанд, ки аз матои миллии адрас дӯхта шудаанд.

Ду намуна аз либоси занонаи бонувони милисаи тоҷик. Акс аз vkd.tj
Ду намуна аз либоси занонаи бонувони милисаи тоҷик. Акс аз vkd.tj

Маълум нест, ки оё ин либос тасдиқи сарфармондеҳи қувваҳои мусаллаҳи Тоҷикистон - президент Эмомалӣ Раҳмонро дарёфт хоҳад кард ё на.

Вале дар шабакаҳои иҷтимоӣ бархе аллакай ин аксҳоро муҳокима мекунанд.

Бархе аз ин либос ситоиш кардаанд, вале аз назари чанде дигар, либоси низомӣ наметавонад аз матои нарми мисли адрасу атлас таҳия шавад. Бархе мегӯянд, мақомот солҳои охир истифодаи матову нақшу нигори миллиро дар сару либоси расмиву ҷашнӣ аз ҳад зиёд кардаанд.

Дар Тоҷикистон солҳои охир сарулибоси кормандони идораҳои давлатӣ ва муҳассилони мактабу донишгоҳҳо сахт назорат мешавад ва бо тақозои мақомот, тарроҳон ҳам ба намунаҳои либосҳои корӣ унсурҳои миллӣ илова мекунанд.

"Ба доми билетфурӯшони фиребгар наафтед" - ҳушдори мақомоти тоҷик

Бо сабаби пандемия аз моҳи марти соли 2020 то апрели имсол роҳи парвоз ба самти Русия барои шаҳрвандони Тоҷикистон баста буд

Дар пасманзари тадриҷан боз шудани парвозҳои доимӣ ба Русия, вазорати меҳнат ва муҳоҷирати Тоҷикистон аз сокинон хостааст, ки ҳушёр бошанд ва ба сафар бо ҳуҷҷатҳои қалбакӣ нараванд. Мақомот инчунин сокинонро ҳушдор додаанд, ки ба ҳангоми харидани билети сафар ба самти Маскав аз ҳушёрӣ кор гиранд ва "ба доми фиребгарон наафтанд".

Маълум нест, ки оё манзури мақомот аз "наафтодан ба доми фиребгарон" чӣ аст, чун билети сафар ба Русия тавассути нуқтаҳои махсус таъиншуда танзим гардидаанд. Илова ба ин, бо сабаби маҳдуд будани шумори парвозҳои мунтазам ба Русия, феълан имкони харидани билет ба самти Маскав кори хеле сахту сангин аст ва арзиши он ҳам аз нархе, ки мақомот мегӯянд, дар асл ду-се баробар зиёд мебошад.

Шаҳрвандони Тоҷикистон феълан ҳақ доранд бо парвозҳои доимии ширкатҳои "Сомон Эйр" ва Ютейр ба пойтахти Русия бираванд. Ин ниҳод хотирнишон кардааст, парвозҳои ширкати "Уралские авиалинии" танҳо барои шаҳрвандони Русия ва онҳоест, ки барои сафар ба он кишвар асос доранд. Вуруди бидуни асос ба Русия тариқи парвозҳои чартерӣ боиси ихроҷ шудани шаҳрванди Тоҷикистон хоҳад шуд.

Вазорати меҳнат инчунин аз тоҷикони хоҳишмандони кор дар Русия даъват кардааст, ки ба Агентии шуғли хориҷӣ ва Хадамоти муҳоҷирати Вазорати меҳнату муҳоҷират муроҷиат кунанд.

Русия макони анъанавии кору даромади аксар шаҳрвандони Тоҷикистон аст, ки бо сабаби бекорӣ дар ватан маҷбуранд ба ин кишвар рӯ оваранд.

Матбуот: Дар Русия бо ширкати тоҷикҳову чечентаборҳо муноқиша бархост

Дарёи Нева аз маркази шаҳри Санкт-Петербург мегузарад

Як нашрияи русӣ мегӯяд, дар пайи занозании гурӯҳӣ ва тирпаронӣ дар шаҳри Санкт-Петербург даҳ нафар аз зодагони Тоҷикистон ва Чеченистон боздошт шудаанд. “Комсомольская правда” менависад, ки задухӯрд шоми 9-уми апрел дар маркази тиҷоратии "Пик" рух дод ва шоҳидони ҳодиса пулисро даъват кардаанд. Нашрия менависад, ки кормандони ҳифзи ҳуқуқ дар ҷойи ҳодиса тирҳои резиниро пайдо намуданд.

Лаҳзаи занозанӣ дар камераҳои назоратии маркази тиҷоратӣ сабт шудааст. Дар бораи он ки чанд тан аз боздоштшудаҳо тоҷиконанд, дақиқ гуфта намешавад. Як тан аз ширкатдорони муноқиша бо корд маҷрӯҳ ва бистарӣ гардидааст. Аз рӯи ин ҳодиса бо моддаи "авбошӣ" парвандаи ҷиноятӣ боз шудааст. Нашрия мегӯяд, ки чор тан аз дастгиршудаҳоро барои муайян кардани чораи пешгирикунанда ба додгоҳ интиқол дода, боқимондаро раҳ намуданд.

Ҷузъиёти бештари ин ҳодиса тавассути манобеи дигар феълан дастрас нест.

Дар Русия, ки макони кору даромади садҳо ҳазор шаҳрвандони Тоҷикистон мебошад, гоҳо дар бораи задухӯрдҳои гурӯҳии қавмӣ хабарҳо нашр мешавад. Ба қавли нозирон, аксар вақт сабаби муноқишаву бархӯрдҳо тақсими бозор ё даромадҳои тиҷоратӣ мебошад, чун дар бисёр ҳолатҳо нуқтаву маконҳои тиҷоратӣ зери назари ғайрирасмии гурӯҳҳои муайян қарор доранд.

Дар Инглистон фурӯшгоҳу сартарошхонаҳо боз мешаванд

29-уми март, як боғе дар Лондон

Дар Инглистон барои кам кардани маҳдудиятҳои коронавирус омодагӣ мебинанд, чун дар ин кишвар аксар қишри калонсол аз ду воя ё дозаи воксинаи зидди COVID-19 якеашро қабул кардаанд. Шурӯъ аз 12-уми апрел имкон дорад, ки ҳама фурӯшгоҳу хадамоти мисли сартарошхонаҳо боз шаванд ва имкони истироҳати беруна ба аъзои як оила ва бо шарти ин ки ғизоро худашон таҳия кунанд, фароҳам мешавад. Аксар машғулиятҳои варзишие иҷоза мешаванд, ки дар ҳавои тоза барпо шудани онҳо имкон дорад.

Ба тарабхонаву барҳо иҷоза доданд, ки фурӯши ғизову нӯшокиро дар берун аз бино ба роҳ монанд ва қарор аст нахуствазири Бритониё Борис Ҷонсон ин ҳодисаро дар як тарабхонае дар боғи боз бо нӯшидани оби ҷав таҷлил кунад. Ҷонсон таҳаввулоти ахирро “як иқдоми азим ба самти иҷрои нақшаи озод шудан” номид, вале айни замон таъкид кард, ки бояд аз эҳтиёт кор гирифту бо масъулияти тамом амал кард.

Дар Инглистон, ба қавли мақомот, беш аз 60 дарсади калонсолон ҳадди аққал як вояро гирифтаанд, вале мақомоти беҳдоштӣ ҳушдор медиҳанд, ки хатари омадани мавҷи нави олудашавӣ ҳамоно вуҷуд дорад, чун дар қисматҳои дигари Аврупо мушоҳида мешавад.

Вобаста ба вазъият, баъди 17-уми май қарор аст бархе маҳдудиятҳои иловагии дигар ҳам дар Инглистон бекор шаванд.

Як додраси Додгоҳи олии Қазоқистон барои гирифтани пора дастгир шуд

Додгоҳи олии Қазоқистон.

Додгоҳи шаҳри Нурсултони Қазоқистон 9-уми апрел як додраси Додгоҳи олии ин кишварро ба ду моҳи ҳабси пешакӣ маҳкум кард. Додрас Мейрам Жангуттинови 63-сола 11-уми феврали соли равон ҳангоми гирифтани ришва дастгир шуда буд.

Ба гуфтаи муфаттишон, Жангуттинов аз як додраси ноҳиявӣ дар вилояти Туркистони Қазоқистон барои гузаронидан ба ҷои кори дигар пул гирифтааст. Ин додрас ҳам дастгир шудааст.

Мейрам Жангуттинов соли 2011 додраси парвандаи фасодкории вазири тандурустии Қазоқистон Жаксилик Доскалиев буд. Доскалиев бо ҷурми фасодкорӣ 7 сол зиндонӣ шуд, вале президенти вақти Қазоқистон Нурсултон Назарбоев баъди 7 моҳ ӯро афв кард.

Дар раъйпурсии Қирғизистон наздики 80% аз Конститутсияи нав ҷонибдорӣ карданд

Раъпурсӣ дар Қирғизистон. 12-уми апрели 2021.

Рӯзи 11-уми апрел дар Қирғизистон раъйпурсӣ барои ислоҳи Қонуни асосии он кишвар баргузор шуд. Аз тарҳи нави Конститутсия, ки қудрати президентро бештар ва салоҳиятҳои порлумонро камтар мекунад, 79,2%-и раъйдиҳандагон ҷонибдорӣ кардаанд.

Танҳо 13,6%-и иштирокдорон зидди Конститутсияи нав овоз дода, наздики 7%-и варақаҳои раъйдиҳӣ беэътибор дониста шудааст.

Ба иттилои Комиссияи марказии интихобот ва раъйпурсии Қирғизистон, дар раъйпурсии 11-уми апрел 35,3%-и шаҳрвандони қобили раъйи ин кишвар иштирок кардаанд. Натиҷаи ниҳоӣ чанд рӯз баъд эълом мешавад.

Президенти Қирғизистон Содир Ҷабборов, ки ташаббускори тарҳи Конститутсияи нав аст, ҳангоми раъйдиҳӣ гуфт, "то ин дам Қирғизистон бо Конститутсияе зиндагӣ мекард, ки аз дигар кишварҳо нусхабардорӣ шуда буд".

Раъйпурсӣ баъди бештар аз се моҳи интихоби Содир Ҷабборов ба мансаби президенти Қирғизистон сурат мегирад. Ҷаборров, ки то моҳи октябри соли 2020 дар зиндон буд, дар пайи эътирозҳо аз натиҷаҳои интихоботи порлумонӣ тавассути ҷонибдоронаш озод карда шуд.

Ӯ аввал нахуствазир ва баъди зери фишор аз қудрат рафтани раиси ҷумҳури пешин, Сооронбой Ҷеенбеков, иҷрокунандаи вазифаи президент шуд. Дар интихоботи президентии моҳи январи имсол иштирок кард ва, ба иттилои расмӣ, пирӯз гардид.

Гуруҳе аз сокинони Қирғизистон Содир Ҷабборовро барои ислоҳи Қонуни асосӣ танқид карда, гуфтаанд, ӯ барои эҷоди як ҳукумати худкома шитоб дорад. Ба бовари онҳо, тағйирот ба Конститутсия ба президент салоҳияту қудрати бештар медиҳад.

Созмони Дидбони Ҳуқуқи Башар ё Human Rights Watch пештар гуфта буд, ки "тарҳи Конститутсия ба меъёрҳои ҳуқуқи башар, ки Қирғизистон ба риояи он тааҳҳуд кардааст, посухгӯ нест".

Содир Ҷабборов моҳи март дар як мусоҳиба бо Радиои Озодӣ аз тағйирот ба Қонуни асосӣ ҳимоят кард. Ӯ рӯзи 11-уми апрел ба хабарнигорон гуфт, "Кумисюни марказии интихобот натиҷаҳои раъйпурсиро бояд дар зарфи 10 рӯз эълон кунад. Пас аз он, бояд лоиҳаҳои навро ба порлумон пешниҳод кунем. Бояд ҳамаи тарҳҳоро тибқи Конститутсияи нав қабул кунем. Дар ҳоли ҳозир теъдоди зиёде аз қонунҳо бо ҳам мухолифат доранд, бахусус Кодекси ҷиноӣ ва Кодекси мурофиавии ҷиноӣ."

Қирғизистон 6,5 миллион аҳолӣ дорад ва аз соли 2005 се дафъа шоҳиди инқилоб ва ё бо зӯр сарнагун шудани ҳукумат будааст.

Ёфтҳои бештар

XS
SM
MD
LG