Ба иттилои як масъули ҳукумати Афғонистон, дар паи ҳамлаи мушакии дрон ё ҳавопаймои бесарнишин дар наздикии марзи Покистон дар вилояти шарқии Кунар, 7 ҷангӣ кушта шуд. Раиси полиси вилоят Абдулҳабиб Саидхейлӣ гуфт, ки ҳамлаи рӯзи 7 май анҷомшуда гурӯҳи ҷангиёнеро ҳадаф қарор дод, ки тӯли як соли охир дар ин маҳалла фаъолият мебаранд. Ба иттилои ӯ, дар миёни кушташудаҳо раиси гурӯҳ ва писари ӯ ҳам будааст. Ин гурӯҳи ҳафтнафара савори мошин ҳаракат мекард, ки мавриди ҳамла қарор гирифт. Дар вилояти Кунари ҳаммарз бо Покистон ҳузури ҷангиёни мухталифи наздик ба Толибон хеле зиёд аст.