Пайвандҳои дастрасӣ

Хабари нав

Хабарҳо

Сӯхтор аз Сибир ба Чин интиқол ёфт

Тайи як шабонарӯз миқёси сӯхтор дар бешазори минтақаи Сибири Русия якуним баробар афзоиш ёфт. Вазорати ҳолатҳои изтирории Русия рӯзи 14 апрел хабар дод, ки дар минтақаи Забайкалие 24 ҳазор гектар ҷангалзор оташ гирифтааст. Дар ин минтақа бар асари ин ҳодиса 3 нафар ба ҳалокат расидаанд. Дар 12 ноҳияи Бурятистон оташсӯзӣ дар 400 гектар бешазор давом дорад.

Дар Хакасия, ки тайи се рӯзи ахир бар асари сӯхтор 23 нафар ҷон бохтаанд, 14 апрел рӯзи мотам эълон шуд. Бар пояи иттилои ахир, дар натиҷаи сӯхтор дар ин минтақа беш аз ҳазор манзили зист ба коми оташ рафтааст.

Дар вилоятҳои Приморие ва Амур бино ба гарм шудани ҳаво режими зиддисӯхтор эълон шуд.

Оташсӯзӣ дар Сибир ба қаламрави Чин ҳам интиқол ёфт. Ба иттилои хабаргузории Синхуа, сӯхтор аз вилояти Забайкалие ба қаламрави вилояти Муғулистони дохилии Чин гузаштааст.

Ҳамаи хабарҳои имрӯзро дар инҷо бихонед

Интихоботи президентии Беларусро баргузоршуда эълон карданд

Кумисюни марказии интихоботи Беларус гуфт, беш аз 50 дар сади афроди қобили рой ба пойи сандуқҳои овоздиҳӣ рафтаанд ва интихоботи президентии рӯзи 9-уми август баргузоршуда аст. Дар Беларус тақрибан 7 миллион нафар ҳаққи ройдиҳӣ доранд.

Мақомҳои Беларус пеш аз интихоботи раёсати ҷумҳурӣ фишори худро ба мухолифону нозирони мустақили интихобот афзоиш доданд.

Нигарониҳо вуҷуд доранд, ки раиси ҷумҳури кунунӣ Александр Лукашенко, ҳукуматдории 26-солаи худро бо истифода аз тақаллубу саркӯб дар баробари мухолифон дароз кунад. Ӯ 65-сола аст ва аз соли 1994 ҷилави қудратро дар Беларус ба даст дорад.

Марказҳои ройдиҳӣ соати ҳашти субҳ ба вақти маҳаллӣ кушода шуданд ва қарор аст ройдиҳӣ то соати ҳашти шаб идома ёбад. Қарор аст, натиҷаҳои муқаддамотӣ фардо эълон шавад.

Маҷлиси Олӣ баъди 3 моҳ барканории Насим Олимзодаро тасдиқ кард

Ҷамолиддин Абдуллозода ва Насим Олимзода

Аъзои Маҷлиси Олии Тоҷикистон бо гузашти се моҳ фармони раиси ҷумҳурро дар бораи барканории вазири пешини тандурустӣ Насим Олимзода тасдиқ карданд.

Ҷаласаи якҷояи аъзои Маҷлиси Миллӣ ва вакилони Маҷлиси Намояндагон рӯзи 6-уми август дар Душанбе баргузор шуд.

Насим Олимзода 5-уми май, баъд аз эътирофи расмии мавҷудияти коронавирус дар Тоҷикистон аз мансаб ронда шуд. Он замон намояндагони ҷомеаи шаҳрвандӣ Вазорати тандурустӣ ва мақомоти дигарро бештар барои он танқид мекарданд, ки чандин мавридҳои шубҳаовари марги сокинонро ба илтиҳоби шуш рабт дода, мавҷудияти коронавирусро рад карданд.

Дар фармони раиси ҷумҳур гуфта мешуд, Олимзода ба кори дигар гузаштааст, вале ҳанӯз мақоми навашро эълон накардаанд.

Аъзои Маҷлиси Олӣ ба мақоми вазири нави тандурустӣ таъин шудани Ҷамолиддин Абдуллозода низ ризоят додаанд. Аммо вақте аз аъзои маҷлис пурсидаанд, ки ба вазири нави тандурустӣ ва ҳифзи иҷтимоии аҳолӣ суоле доранд, касе чизе напурсидааст.

Ҷамолиддин Абдуллозодаи 54-сола зодаи ноҳияи Данғара аст ва то замони таъин шудан ба мансаби вазири тандурустӣ мудири бемористони "Истиқлол"-и шаҳри Душанбе буд.

Ба иттилои расмӣ, аз охири моҳи апрел то кунун коронавируси нав дар Тоҷикистон ба 7745 нафар сироят карда, 62 касро куштааст. Мақомот мегӯянд, беш аз шашуним ҳазор кас шифо ёфтаанд. Иттилои ғайрирасмии беморону ҷонбохтагон аз коронавирусро дар Тоҷикистон бештар аз ин медонанд.

Ҳалокати як зан дар Язғулом. Мақомот мегӯянд, ӯ ғарқ шуд

Акс аз бойгонӣ

Як зани бистсола дар ноҳияи Ванҷи Вилояти Мухтори Кӯҳистони Бадахшон дар об ғарқ шуда, ҷони худро аз даст додааст. Мақомоти Кумитаи ҳолатҳои фавқулодаи Тоҷикистон гуфтанд, ҳодиса рӯзи 7-уми август дар ҷамоати Язғулом руй дод.

Ба иттилои расмӣ, ин зан мехостааст дар дарёи Ванҷ оббозӣ кунад ва ногаҳон ғарқ шудааст. Ҷасади ӯро "баъд аз ҷустуҷӯйҳои зиёд" дар поинтар аз Дашти Язғулом ёфта, ба пайвандонаш додаанд.

Ба иттилои расмӣ, дар ним соли гузашта 34 нафар дар дарёву кӯлҳои кишвар ғарқ шудаанд, ки бештари онҳо аз 17 то 35 сол доштанд.

Покистон дубора ба парвозҳои байнулмилалӣ иҷозат дод

Мақомоти Покистон гуфтанд, ки аз 9-уми август ба ҳама парвозҳои байнулмилалӣ дубора иҷозат додаанд. Ин кор баъди беш аз чаҳор моҳ "танаффуси иҷборӣ" сурат мегирад.

Покистон дар охири моҳи марти имсол ба хотири пешгирӣ аз коронавируси нав парвозҳои дохилӣ ва байнулмилалиро манъ кард.

Идораи ҳавонавардии Покистон азсаргирии парвозҳоро як рӯз пас аз он эълон кард, ки ҳукумати ин кишвар аз бозкушоии ҳама бахшҳои иқтисодиву иҷтимоӣ хабар дод.

То кунун бар асари коронавируси нав дар Покистон беш аз 6 ҳазор кас ҷони худро аз даст додаанд. Беморӣ ба зиёда аз 283 ҳазор нафар сироят кардааст.

400 ҷангӯйи дигари Толибонро озод мекунанд

Лоя Ҷирга се рӯз баргузор шуд

Лоя Ҷиргаи Афғонистон бо судури қатънома раҳоии 400 зиндонии Толибонро тасдиқ кард. Ашраф Ғанӣ, раиси ҷумҳури Афғонистон, рӯзи 9-уми август гуфт, қарори Лоя Ҷиргаро "ҳамчун бахши охири табодули зиндониён ва ҳамвор кардани роҳ барои музокироти байнулафғонӣ" мепазирад. Аксари ин афрод ба ҳамлаҳои маргбор ба афғонҳо ва хориҷиён гунаҳкор ҳастанд.

Бар асоси созише, ки Амрикову Толибон моҳи феврал имзо карданд, ҳукумати Афғонистон муваззаф шуд, 5 ҳазор зиндонии Толибонро озод кунад.

Абдуллоҳ Абдуллоҳ, раиси Лоя Ҷирга гуфт, қатъномаи 9-уми август монеаи боқимондаро барои шурӯи музокироти байни ҳукумати Афғонистон ва Толибон бардоштааст.

Ҳомид Карзай, раиси ҷумҳури пешини Афғонистон, мегӯяд, интизор дорад баъд аз ду ё се рӯзи озодии зиндониён, як ҳайат музокиротро бо Толибон оғоз кунад. Қарор аст, Маъсум Станакзай, раиси собиқи идораи амнияти миллӣ, раҳбари ҳайати Афғонистон шавад.

Ин ҳайат шомили сиёсатмадорони афғон, мақомоти пешин ва намояндагони ҷомеаи маданӣ хоҳад буд. Кобул пештар гуфта буд, панҷ узви ҳайат занон ҳастанд.

Эспер гуфт, Амрико нирӯҳояшро дар Афғонистон камтар мекунад

Марк Эспер

Вазири дифои Амрико гуфт, Иёлоти Муттаҳида қасд дорад, ки то охири моҳи ноябр шумораи нирӯҳои худро дар Афғонистон "ба камтар аз 5000 ҳазор нафар" расонад. Марк Эспер рӯзи 8-уми август дар ин бора дар суҳбат бо телевизиони Fox News ибрози назар кард. Дар ҳоли ҳозир Амрико дар Афғонистон 8600 сарбоз дорад. Президент Доналд Трамп 3-юми август гуфта буд, ки Иёлоти Муттаҳида мехоҳад, ин шумораро то 4 ҳазор нафар коҳиш диҳад.

Ба кормандони давлат дар Туркманистон дастур додаанд, пули озмоишро бипардозанд

Мақомоти Туркманистон мегӯянд, вируси нав ба ин кишвар сироят накардааст.

Кормандони давлат дар Туркманистон дастур гирифтаанд, ки ҳаққи гарони озмоиш аз коронавирусро худашон бипардозанд, ҳарчанд ҳукумат мегӯяд, дар кишвар ҳеҷ COVID-19 нагирифтааст. Сабабҳои судури чунин дастур дар рӯзи 6-уми август рӯшан нест.

Пофишории мақомоти Туркманистон ба орӣ будани кишвар аз вирус шубҳаи зиёдеро ба бор овардааст. Айни замон бино ба гузоришҳо, шифохонаҳо пур аз беморон бо аломатҳои илтиҳоби шуш шудаанд. Дар Узбекистон мақомот гуфтанд, ки имтиҳонҳои қабул ба донишгоҳҳо дар майдонҳои варзишӣ ва бо риояти фосилагирии ҷисмонӣ сурат мегирад.

Дар Тоҷикистон теъдоди беморони COVID-19 аз 7700 нафар гузашт. Мақомот мегӯянд, ки то кунун 62 нафар бар асари сирояти коронавирус ҷон додаанд, ҳарчанд як таҳқиқи Радиои Озодӣ нишон дод, ки талафот аз беморӣ ба садҳо нафар мерасад.

Дар Қирғизистон ба гуфтаи мақомот, то рӯзи 7-уми август шумораи беморон ба бештар аз 39 ҳазор нафар расид ва талафот 1451 нафарро ташкил медиҳад. Дар Қазоқистон тақрибан 97 ҳазор нафар бемор шудаанд ва бештар аз 1000 нафар фавтидаанд.

Итолиё чораҳои эҳтиётӣ аз коронавирусро тамдид кард

Рум дар баҳор баъди эълони карантин. Ин маҳал ҳеҷ гоҳ чунин холӣ набудааст.

Ҳукумати Итолиё, яке аз кишварҳои сахт осебдида аз бемории COVID-19 баъзе аз маҳдудиятҳо барои пешгирӣ аз сирояти коронавируси навро то моҳи сентябр тамдид кард. Бар асоси қарори нахуствазир Ҷузеппе Конте, пӯшидани ниқоб дар маконҳои умумии баст, риояти фосилагирӣ аз ҳамдигар то 7-уми сентябр ҳатмӣ хоҳад буд ва баргузории чорабинҳои бузурги оммавӣ манъ аст. Қарори мазкур рӯзи 7-уми август қабул шуд.

Ҷузеппе Конте аз мардуми кишвараш, ки то кунун 35 ҳазор нафарро аз бемории COVID-19 талаф додаанд, хост, ки эҳтиёткор бошанд. Дар Мексика, ки умедвор буданд, суръати сироят бисёр суст мешавад, баръакс бо афзудани теъдоди беморон ноумедӣ боло гирифтааст. Ҳуго Лопез-Гателл, муовини вазири тандурустии Мексика рӯзи 7-уми август гуфт, ки “ин як пандемияи дарозмуддате мешавад”.

Дар Мексика коронавирус ба 470 ҳазор нафар сироят карда ва ҷони бештар аз 51 ҳазор касро гирифтааст. Дар умум дар саросари аз бемории COVID-19 719 ҳазор нафар фавтидаанд. Дар Тоҷикистон беморӣ ба бештар аз 7700 нафар сироят кардааст ва 62 нафар фавтидаанд.

Трамп гуфт, Чину Эрону Русия муштоқи дидани шикасти ӯ дар интихобот ҳастанд

Доналд Трамп, раиси ҷумҳури Амрико гуфт, ки ҳукуматаш ҳушдори раҳбари як идораи иттилоотӣ дар бораи мудохилаи эҳтимолии Русияву Чин ва Эрон дар интихоботи раёсати ҷумҳурӣ дар моҳи ноябрро мӯшикофона меомӯзад.

Айни замон ба бовари Доналд Трамп, ҳеҷ яке аз ин кишварҳо намехоҳанд, ӯ дар интихобот пирӯз шавад. Доналд Трамп ҳангоми нишасти хабарие дар рӯзи 7-уми август дар Вашингтон гуфт, ки Амрико “нигоҳ мекунад, ки он се кишвар чӣ кор мекунанд”. Ӯ ба суоле дар бораи ҳушдори Билл Эванин, раҳбари Маркази Амнияти Иттилоотии Амрико посух дод, ки гуфт, Русияву Чин ва Эрон қасд доранд, ба ҷараёни интихоботи Амрико таъсир гузоранд.

Ӯ афзуд, ки Чин мехоҳад, Доналд Трамп дар интихобот шикаст хӯрад, Русия саъй дорад, рақиби Трамп, Ҷо Байденро заиф кунад ва Эрон талош мекунад, то пояҳои институтҳои демократӣ дар Амрико суст шаванд. Доналд Трамп гуфт, Русия ҳеҷ гоҳ намехоҳад, ки ӯ раиси ҷумҳур шавад, “чун ҳеҷ касе ва ҳеҷ гоҳ ба ғайр аз Доналд Трамп бо Русия сахтгирӣ накардааст.”

Раиси ҷумҳури Амрико гуфт, Эрон ҳам муштоқи бохтани ӯст, вале афзуд Доналд Трамп, “агар мо бибарем, бо Эрон зуд созиш мекунем”. Доналд Трамп афзуд, Чин мехоҳад, ки Ҷо Байден дар интихобот пирӯз шавад ва агар чунин коре шавад, ба гуфтаи Трамп “Чин Амрикоро аз худ мекунад”.

Лоя Ҷирга баҳс сари зиндониёни Толибро идома медиҳад

Раҳбарони қавму қабилаҳо, намояндагони ҷомеаи маданӣ ва сиёсатмадорони шинохта аз аъзои Лоя Ҷирга ҳастанд.

Дар шаҳри Кобул нишасти Лоя Ҷирга, шурои сарони қавму қабила ва сиёсатмадорони шинохта идома дорад, ки дар он масъалаи озодии 400 зиндонии Толибро баррасӣ мекунанд, ки дар ҳамлаву бомбгузориҳои хунине даст доранд. Раҳоии зиндониён яке аз монеаҳои аслӣ дар роҳи музокироти мустақим байни ҳукумат ва Толибон аст, ки бо Амрико барои хотима додан ба ҷанг созиш бастанд.

Нишасти Лоя Ҷирга, ки рӯзи 7-уми август оғоз ёфт, фардо низ идома меёбад. Бар асоси созише, ки Амрикову Толибон моҳи феврал имзо карданд, ҳукумати Афғонистон бояд 5 ҳазор зиндонии Толибро озод кунад. То кунун 4600 зиндониро раҳо карданд, вале ҳукумати раиси ҷумҳур Ашраф Ғанӣ гуфт, азбаски 400 нафари боқимонда барои ҷиноятҳои сахт паси панҷара рафтаанд, ҳаққи раҳоии онҳо дар ихтиёри Лоя Ҷирга аст.

Ашраф Ғанӣ рӯзи 7-уми август гуфт, ки ҳар гуна қарори аъзои шӯро дар ин заминаро мепазирад. Дар сурати ризоият барои раҳоии Толибон мумкин аст, гуфтугуҳои ин гуруҳ бо ҳукумат ҳафтаи оянда оғоз шавад. Дар як санаде, ки байни аъзои Лоя Ҷирга тақсим кардаанд, чунин навишта шудааст, ки раҳоии Толибон ба маънии оғози музокирот ва озод накардани онҳо ба маънии идомаи ҷанг дар Афғонистон аст.

Бонки Ҷаҳонӣ: Осиёи Марказӣ баъди вабо гирифтори буҳрони амиқ мешавад

Пандемияи коронавирус ба таҳсил, сифати сармояи инсонӣ ва рушди иҷтимоиву иқтисодии кишварҳои Осиёи Марказӣ таъсири дарозмуддат хоҳад расонд. Дар ин бора дар гузориши Бонки Ҷаҳонӣ таъкид шудааст.

Дар гузориш омадааст, ки дар кишварҳои минтақа ҷавонон ва донишҷӯён қариб нисфе аз аҳолиро ташкил медиҳанд. Буҳрон даромадҳои эҳтимолии насли наврасро зери хатар қарор медиҳад. Бино ба таҳлилҳо, сатҳи бесаводӣ миёни наврасон меафзояд ва ин маънои онро дорад, ки шумори хонандагоне, ки аз мутолиа кардан, навиштан ва ҳисобу китоб оҷиз хоҳанд буд, афзоиш меёбад.

Ба иттилои Бонки Ҷаҳонӣ, донишҷӯёни минтақа аз ҳамсолони аврупоии худ 1,5 сол қафо мондаанд.

"Дарз ё шикофи рӯзафзун ва ё нобаробарӣ дар таҳсилот байни хонандагони хонаводаҳои дорои даромадҳои гуногун боис ба нигаронии хос аст", -- омадааст дар гузориш.

Зарбаи харобиовари вабои вируси корона ба низоми таҳсилот чунон қавӣ хоҳад буд, ки пайомадҳои он (аз ҷумла зиёни иқтисодиаш, ки танҳо дар кишварҳои Осиёи Марказӣ 44 миллиард доллар пешгӯӣ карда мешавад), даҳсолаҳо баъд эҳсос хоҳад шуд.

Ба бовари Оиша Вауда, коршиноси Бонки Ҷаҳонӣ дар умури таҳсилот дар кишварҳои Осиёи Марказӣ, воқеият метавонад, аз ин пешгӯӣ ҳам бадтар бошад.

Тарафдорони Тихановская дар Минск гирди ҳам омаданд

BELARUS - Supporters of Sviatlana Tsikhanouskaya, candidate for the presidential elections, attend a rally in Minsk, Belarus, Thursday, Aug. 6, 2020. The presidential election in Belarus is scheduled for Aug. 9, 2020.

Ҳазорон нафар аз тарафдорони Светлана Тихановская, номзад ба мақоми раёсати ҷумҳурӣ дар Белорус рӯзи 6-уми август дар як боғи Минск ҷамъ омада ва ҳимояташонро аз ӯ иброз доштанд. Светлана Тихановская маҷбур шуд, ки маъракаи тарғиботиашро дар Минск лағв кунад, чун мақомот гуфтанд, ки дар маҳалли ҳамоиш чорабиниҳои давлатӣ баргузор мешавад.

Баъди лағв шудани ҳамоишҳои интихоботиашон дар Боғи дӯстии халқҳо ва Боғи Киев, Светала Тихановская ҳамроҳ бо шариконаш Мария Калесникая, Вероника Сапкала гуфтанд, ки ҳамчун як “шаҳрванди оддӣ” дар маъракаҳои шитобкорона эълонкардаи ҳукумат дар Боғи Киев ширкат мекунанд.

Тихановскаяро дар ин чорабинӣ надидааанд, вале Калесникаяро маъмурони пулис ба боғ роҳ надоданд. Калесниская баъдан гуфт, ки дертар бо Тихановская ва Сапкала ба инҷо омаданд, вале ба гуфтаи у маъмурони пулис онҳоро ба боғ роҳ надодаанд.

Теъдоди донишҷӯёни буҷавиро дар факултаҳои тиббии Қирғизистон бештар карданд

Донишҷӯёни Академияи тиббии Қирғизистон.

Ба далели афзоиши талабот ба мутахассисони соҳаи тиб, бо фармони Вазорати тандурустии Қирғизистон теъдоди донишҷӯёни буҷавӣ дар факултаҳои тиббии донишгоҳҳои давлатии он кишвар бештар шуд.

Дар ин бора аз мақомоти вазорати тандурустии Қирғизистон хабар доданд.

"Дар соли хониши 2020-2021 теъдоди донишҷӯёни буҷавӣ дар факултаҳои тиббии донишгоҳҳои давлатӣ афзоиш дода шуд",-гуфт Ойгул Бообекова, як мақомдори Вазорати тандурустии Қирғизистон. Ба гуфтаи вай, 250 донишҷӯёни дигар дар соли нави таҳсил дар факултаҳои тиббӣ аз ҳисоби буҷаи кишвар таҳсил хоҳанд кард.

Бо афзоиши паҳншавии вируси корона дар Қирғизистон соҳаи тандурустии он кишвар бо камбуди мутахассисон рӯ ба рӯ шуд. Ҳукумати Қирғизистон аз ҳамаи шаҳрвандоне, ки маълумоти тиббӣ доранд, дархост кард, дар асоси шартнома бо муассисаҳои тиббӣ ҳамкорӣ кунанд.

Дар Амрико талафот аз коронавирус зиёд шудааст

Дар Амрико рӯзи 6-уми август марги 2 ҳазор нафар бар асари коронавирусро сабт кардаанд, ки дар се моҳи гузашта мушоҳида нашуда буд. Дар ин кишвар, ки сирояти беморӣ дигарбора суръат гирифтааст, 2060 нафар фавтидаанд ва 58 ҳазор каси дигар ба бемории СОVID-19 гирифтор шудаанд.

Дар Амрико бори охир моҳи май марги бештар аз 2 ҳазор нафар дар як рӯз сабт шуд. Дар кишварҳои Амрикои Лотинӣ ҳам беморӣ ва талафот зиёд мешавад. Дар Бразилия рӯзи 6-уми август 53 ҳазор мавриди нави беморӣ ва 1200 фавт аз онро сабт кардааанд.

Дар умум дар ин кишвар тақрибан 100 ҳазор кас бар асари сирояти коронавируси нав ҷон доданд. Бино ба омори Донишгоҳи Ҷон Ҳопкинси Амрико коронавируси нав то кунун ба тақрибан 19 миллион нафар сироят карда ва 712 ҳазор касро куштааст.

Тазоҳургаронро аз Бейрути ваҳшатзада пароканда карданд

Тазоҳургаронро бо истифода аз гази ашковар пароканда карданд.

Нерӯҳои амниятӣ дар Бейрут даҳҳо тазоҳургарро, ки баъди таркиши мудҳишу маргбор ба хиёбонҳо баромаданд, пароканда кардаанд. Тазоҳургарон ҳукуматро ба бемасъулиятӣ ва роҳ додан ба таркише муттаҳам мекунанд, ки 149 нафарро кушт, ҳазорон нафарро маҷрӯҳ кард. Тақрибан 300 ҳазор нафари дигар ҳоло имкони бозгашт ба хона надоранд.

Ба гуфтаи матбуоти давлатӣ, маъмурони амниятӣ шоми 6-уми август бо истифода аз гази ашковар даҳҳо эътирозгарро дар Бейрут пароканда карданд, ки ба самти онҳо санг меандохтанд. Ба навиштаи Хабаргузории Миллии Лубнон чанде аз эътирозгарон маҷруҳ шудаанд. Тазоҳурот бо сафари Эммануэл Макрон, раиси ҷумҳури Фаронса ба Лубнон оғоз ёфт ва тазоҳургарон ҳукуматро ба истеъфо ва мардумро ба инқилоб даъват мекарданд.

Мақомоти Лубнон гуфтанд, ки 16 нафарро дар робита ба таркиш дар бандар дастгир кардааанд. Ҳасан Корайтем, мудири бандар низ боздошт шудааст. Бино ба тафтишоти пешакӣ, таркиши рӯзи 4-уми август дар анборе ба вуқуъ пайвастааст, ки дар онҷо 2700 тонна нурии минералии нитрати аммонийро дар шароити номуносибе нигаҳ медоштаанд. Нурии мазкур дар соҳаи кишоварзӣ васеъ истифода мешавад, вале моддаи хатарноки тарканда низ ҳаст.

Лоя Ҷирга сарнавишти зиндониёни Толибро баррасӣ мекунад

Нишаст рӯзи 7-уми август оғоз ёфт.

Дар шаҳри Кобул ҷаласаи Лоя Ҷирга, шӯрои қабиласолорону шахсиятҳои шинохта дар Афғонистон оғоз ёфт, ки дар он сарнавишти садҳо зиндонии Толибро баррасӣ мешавад. Раҳбарони Толибон мехоҳанд, ин зиндониён пеш аз оғози музокироти мустақими сулҳ бо ҳукумат озод карда шаванд.

Раиси ҷумҳур Ашраф Ғанӣ ҳафтаи гузашта амр дод, ки 500 зиндонии Толибон ба нишонаи ҳусни ният озод карда шаванд. Толибон қабл аз Иди Қурбон барои се рӯз оташбас эълон карданд ва ҳукумат ба он розӣ шуд. Оташбас рӯзи 31-уми июл ба иҷро даромад ва 2-уми август хотима ёфт.

Ашраф Ғанӣ рӯзи 31-уми июл зимни суханроние дар телевизион гуфт, ки ҳукумат 4600 зиндониёни Толибро раҳо кардааст. Бар асоси созиши Амрикову Толибон, ки моҳи феврал имзо шуд, ҳукумат бояд 5 000 Толибро аз зиндонҳо озод кунанд.

Ашраф Ғанӣ гуфт, ки бар асоси Қонуни Асосӣ ҳукумат ҳақ надорад, 400 Толиби боқимондаро озод кунад, чун онҳо барои ҷиноятҳои ҷиддие паси панҷара рафтаанд. Ӯ гуфт, ки барои таъйини сарнавишти ин гуруҳи зиндониён ҷаласаи Луя Ҷиргаро даъват мекунад. Толибон мегӯянд, бар асоси аҳди додаашон ба Амрико ҳамаи 1000 корманди ҳукуматиро, ки дар асорат доштанд, озод кардаанд.

Майк Помпео, вазири умури хориҷии Амрико аз аъзои Лоя Ҷирга хост, ки зиндониёнро озод кунанд, чун бо ин кор ба кам шудани хушунату хунрезӣ ва оғози музокироти мустақиму дастёбӣ ба созиши сулҳ мусоидат мекунанд. Толибон мегӯянд, бар асоси аҳди додаашон ба Амрико ҳамаи 1000 корманди ҳукуматиро, ки дар асорат доштанд, озод кардаанд.

Бозпурсии соҳиби киштие, ки маводи дохили он боиси таркиш дар Бейрут шуд

Шаҳри Бейрут пас аз таркиш.

Пулиси Қибрис (Кипр) рӯзи панҷшанбе соҳиби эҳтимолии киштиеро бозпурсӣ кард, ки маводи дохили он рӯзи 4 август боиси таркиш дар Бейрути Лубнон шуд. Пулис шахсияти бозпурсишударо ошкор намекунад, аммо расонаҳо навиштанд, соҳиби киштӣ тоҷири рус Игор Гречушкин аст, ки айни замон дар Қибрис истиқомат дорад.

Мақомоти Лубнон шаш сол пеш аз ин киштӣ 2750 тона селитраи аммиакро мусодира карда буданд. Ин селитраҳо рӯзи 4 август дар анборе дар бандари Бейрут таркиданд. Мақомоти тафтишотии Лубнон гуфтанд, хунукназарӣ боиси таркиш шудааст. Эҳтимол дорад, корҳои кафшергарӣ боиси таркиш шуда бошад.

Бино ба иттилои охир, ин таркиш 149 қурбонӣ ва наздики 5 ҳазор маҷруҳ дар пай гузоштааст. Таркиши азим қисме аз бандар ва атрофи онро маҳв кард. На камтар аз 250 ҳазор сокини пойтахти Лубнон бесарпаноҳ мондааст.

Мақомот гуфтанд, 16 касро боздошт ва бозпурсӣ кардаанд. Бештари онҳо коргарони бандар ҳастанд.

ФИФА ба футболи Қирғизистон кӯмаки молӣ мерасонад

Федератсияи байналхалқии футбол (FIFA) ба Иттифоқи футболи Қирғизистон барои бартарафсозии пайомадҳои иқтисодии вабои коронавирус ва пуштибонӣ аз федератсияи миллӣ 1,5 миллион доллар ҷудо мекунад.

ФИФА ба ҳар кадом федератсияе, ки узви созмони мазкур ҳастанд 1,5 миллион долларӣ ҷудо мекунад.

Федератсияи футболи Қирғизистон хабар дод, қисме аз кӯмаки ФИФА ба азсаргирии мусобиқаҳои ватанӣ равона мешавад.

Федератсияи футболи Қирғизистон гуфт, тасмим дорад, аз 7 август бозиҳои қаҳрамони кишварро шуруъ кунад.

Дар Қирғизистон ба далале ҷорӣ шудани карантин аз 21 март ба ин тараф ҳамаи чорабиниҳои варзишӣ мамнуъ эълом шуд.

Дар Узбекистон фаъолияти боғчаҳо аз сар гирифта мешавад

Дар боғчаҳои Узбекистон барои шуруи фаъолият омодагӣ мебинанд. Дар он кишвар дари боғчаҳо дар робита ба паҳншавии вируси корона баста шуд.

"Азсаргирии фаъолияти боғчаҳо бо ҳадафи баргардонии кӯдакон ба ҳаёти муътадил, ба бозиву таҳсил рӯи даст гирифта шудааст. Аммо шарт ин аст, ки боғчаҳо муҳити амнро барои кӯдакон ва коргарон муҳайё кунанд", - омадааст дар хабари маркази матбуотии вазорати таҳсилоти томактабии Узбекистон.

Ин вазорат хабар медиҳад, ки барои пешгирӣ аз мубталошавӣ ба вируси корона чораҳои иловагӣ андешида шудааст.

Дар Узбекистон аз 16 март дари боғчаҳо баста шуданд.

Мақомоти Узбекистон ҳанӯз 15 июн хабар доданд, ки фаъолияти боғчаҳо аз моҳи август аз сар гирифта мешавад.

Дар Уралски Қазоқистон нахостанд, барои гирифторони COVID-19 беморхона бунёд шавад

Cуҳбати мақомот бо сокинони Уралский.

Даҳҳо тан аз сокинони шаҳраки "Жулдиз" дар Уралски Қазоқистон аз мақомот талаб карданд, ки сохтмони беморхона барои гирифторони COVID-19-ро қатъ кунанд.

Ин сокинон шикоят доранд, ки сохтмони беморхона дар наздикии макони зисти онҳо хатари гирифторшавӣ ба коронавирусро бештар мекунад.

Ҳокими Уралск Абат Шинибеков гуфт, ки сохтмони беморхона ба сиҳатии сокинон ҳеч хатаре нахоҳад дошт.

"Ҳамаи беморхонаҳои калон дар маркази шаҳрҳо бунёд шудааст, атрофашон биноҳои баландошёна ҳаст. Барои шумо ҳеч хатаре ба бор намеорад", - Болатбек Каюпов, роҳбари бахши тандурустии Уралск дар суҳбат бо сокинони маҳаллӣ.

Сокинон гуфтанд, ки аз посухи мақомоти маҳаллӣ қонеъ нашудаанд ва талош мекунанд, ки дар сатҳҳои болотар ба сохтмони беморхона нуқта гузоранд.

Ин бори аввал нест, ки дар Қазоқистон сокинон зидди сохтани беморхона шикоят мекунанд. Пештар аз ин дар ноҳияи Зайсани вилояти Қазоқистони Шарқӣ, дар деҳаи Береки вилояти Алмато ва дар шаҳри Чимкент сокинон зидди сохтани беморхона таҷаммуъ карда буданд.

Бердимуҳаммадов китоби наве бо номи "Ҷаҳони маънавии туркман" навишт

Қурбонгулӣ Бердимуҳаммадов, президенти Туркманистон китоби наве бо номи "Ҷаҳони маънавии туркман" навишт, ки он ба анъанаҳои халқи туркман ва маросимҳои миллӣ бахшида шудааст. Дар ин бора расонаҳои Туркманистон хабар медиҳанд.

Дар китоб зебогии ҳаёт, саодати дунёӣ, ҷовидонагии ҳаёт, эътибори илму маърифат дар рушди ҷомеа, усулҳои ҳаёти солим, меҳнатдӯстӣ ва меҳмоннавозӣ ва ҳамчунин анъанаҳои ахлоқӣ ва ваҳдат тасвир шудааст.

"Китоби нав барои нашр ирсол шуда, "туҳфаи эҷодӣ"-и президент дар Рӯзи истиқлол хоҳад буд",-менависанд расонаҳои Туркманистон.

Бердимуҳаммадов то ин замон бештар аз 40 китоб дар бораи растаниҳо, аспҳо, чой ва ҳаёти хушбахтона навиштааст. Ин китобҳоро тариқи шабакаҳои телевизионӣ дар Туркманистон қироат мекунанд.

Мақомоти Бодканд аз тирпаронии дувум дар марз бо Тоҷикистон хабар доданд

Мақомоти вилояти Бодканди Қирғизистон хабар доданд, ки шоми 6-уми август дар марз бо Тоҷикистон тирпаронӣ сурат гирифта, як нафар маҷруҳ шудааст.

Ҷониби Тоҷикистон ҳанӯз дар ин бора чизе нагуфтааст.

Мақомоти Бодканд ба бахши қирғизии Радиои Озодӣ гуфтаанд, ҳодиса дар наздикии деҳаи Кок-Тош руй дода, шахси маҷруҳ дар бемористон аст ва вазъи саломатиаш миёнаи вазнин арзёбӣ мешавад. Ба қавли онҳо, ин сокини Кок-Тош аз ҷониби номаълум ҳадаф қарор гирифтааст.

Хадамоти давлатии марзбонии Қирғизистон гуфтааст, ин хабарро таҳқиқ мекунад ва айни замон афзудааст, ки вазъ дар сарҳад зери назорат аст.

Дар рӯзи 6-уми август ин дувумин ҳодиса дар марзи Тоҷикистону Қирғизистон аст. Дафтари матбуоти нерӯҳои марзбонии Кумитаи давлатии амнияти миллии Тоҷикистон субҳи панҷшанбе хабар дод, ки дар 1-километрии марз бо вилояти Бодканд, як сокини деҳаи Сомониёни ҷамоати Чоркӯҳ аз тири ҷониби Қирғизистон ба ҳалокат расидааст. Ба иттилои манбаъ, Воҳид Ваҳҳобови 65-сола боғбони бригадаи рақами чаҳори ҳамин ҷамоат будааст.

Нерӯҳои марзбонии Тоҷикистон ҳамзамон хабар дод, ки дар минтақаи ҳамҷавори маҳаллаи Лангари Моҳиёни ҷамоати Чоркӯҳи шаҳри Исфара сардори дидбонгоҳи "Кӯктош"-и Қирғизистон Шер Кабиров аз сӯи як шахси номаълум ҳадафи тир қарор гирифтааст. Тибқи изҳороти Раёсати марзбонии Тоҷикистон, дар ин ҳамла аз силоҳи шикорӣ истифода шудааст.

Тоҷикистону Қирғизистон 970 километр марз доранд ва аз ин 519 километраш мушаххасу аломатгузорӣ шудааст. Ду кишвар барои таъйини марзи боқимонда солҳо боз забон намеёбанд ва номуайянии сарҳад ҳар дафъа боис ба задухӯрду тирпаронӣ дар минтақаҳои баҳсӣ мешавад.

Марги як нафари дигар аз коронавирус дар Тоҷикистон тасдиқ шуд

Акс аз бойгонӣ

Вазорати тандурустии Тоҷикистон 6-уми август хабар дод, ки дар шабонарӯзи ахир марги як нафарро аз коронавируси нав сабт кардаанд ва бо ин шумораи умумии қурбониёни бемории ҳамагир ба 62 нафар расид.

Дар феҳрасти ғайрирасмии қурбониёни эҳтимолии COVID-19 ва илтиҳоби шуш номи беш аз 440 нафарро дарҷ кардаанд. Мақомот ин рӯйхатро қабул надоранд.

Тоҷикистон дар охири моҳи апрел мавҷудияти коронавируси навро эътироф кард. Аз он замон то кунун, ба иттилои расмӣ, 7665 кас бемор шуда, 6443 нафар ё 84 дарсад шифо ёфтаанд.

Мақомот мегӯянд, ҳоло вазъи вобаста ба коронавирус дар кишвар муътадил аст ва дар 85 бемористон зиёда аз 7500 пизишк ва 25 ҳазор корманди миёнаи тиб барои муқобила бо вируси нав омодаанд.

Аммо дар оғози ин ҳафта дафтари матбуоти ҳукумати Хуҷанд аз қавли Маъруф Ҳоҷибоев, муовини сардори Раёсати тандурустии вилояти Суғд, навишт, "таҳлили даҳрӯзаи охир нишон медиҳад, ки теъдоди беморони илтиҳоби шуш ва короновирус рӯ ба афзоиш ниҳодааст".

"Мутаассифона, ин беморӣ бидуни нишона зуҳур намудааст, ки ташвишовар гардидааст", -- гуфтааст ӯ.

Матолиби бештар дар бораи буҳрони коронавирус дар инҷост:

ТОҶИКИСТОН

ҶАҲОН

Дар Алмато дар натиҷаи садамаи мошин як кас бистарӣ шуд

Қазоқистон. Акс аз бойгонӣ.

Дар вилояти Алматои Қазоқистон дар натиҷаи бархӯрди мошини сабукрав ба нуқтаи фурӯши сӯзишворӣ ронанда дар бемористон бистарӣ шуд.

Дар ин бора аз идораи ҳолатҳои фавқулодаи вилоят рӯзи панҷшанбе хабар доданд.

Ба иттилои наҷотдиҳандагон, ин ҳодиса субҳи 6 август рух дод. Мошини навъи Land Cruiser Prado ба нуқтаи фурӯши сӯзишворӣ бархӯрда, дар натиҷа таркиш рух додааст. Ду мошин дар натиҷа таркида ва оташ гирифтааст. Ронандаи мошини Land Cruiser Prado бо 98 дарсади сухтагии бадан дар бемористон бистарӣ шудааст.

Оташи нуқтаи фурӯши сӯзишворӣ давоми ним соат хомуш карда шудааст.

Шумораи қурбониёни таркиши Бейрут ба беш аз 135 тан расид

Дар пойтати Лубнон, шаҳри Бейрут баъди таркиши азим дар бандар корҳои ҷустуҷӯӣ ва наҷотдиҳӣ идома доранд.

Бино ба иттилои ахир, на камтар аз 135 кас кушта ва наздики 5 ҳазори дигар маҷруҳ шудаанд. 250 ҳазор сокин бе сарпаноҳ мондаанд. Ба гуфтаи мақомот, эҳтимол дорад, шумори қурбониён афзоиш ёбад. Баъди таркиш даҳҳо тан бе ному нишон шудааст. Наҷотдиҳандагон онҳоро дар зери оворҳо ҷустуҷӯ доранд.

Таркиш дар бандари Бейрут 4 август сурат гирифт. Зиёни ин таркиш миллиардҳо доллар баровард мешавад.

Мақомоти он кишвар гуфтанд, таҳқиқоти таркиш дар Бейрут шаффоф ва 5 рӯз давом мекунад. Ба гуфтаи мақомот, гунаҳкорон ҳатман ба ҷавобгарӣ ҷалб мешаванд.

Муфаттишон ба тафтиши ҷои ҳодиса шуруъ кардаанд. Расонаҳо навиштанд, ки кӯмакҳои башарӣ вориди Лубнон мешаванд.

Дар натиҷаи таркиш анбори ғалладона зиён дидааст. 85 дарсади ғаллаи шаҳр дар анборҳои наздики таркиш нигаҳдорӣ мешуд.

Гуфта мешавад, тақрибан 2700 тонна доруи минералӣ дар пойтахти Лубнон таркидааст. Ҳасан Диёб, нахуствазири Лубнон гуфт, баъди мусодираи нитрати аммоний дар соли 2014 онро дар як анборе нигаҳ доштаанд ва меъёрҳои амниятиро риоят накардаанд.

Бино ба гузоришҳо, миқдори зиёди нитрати аммонийро, ки рӯзи 4-уми август дар Бейрут таркид, солҳо пеш аз киштии Игор Гречушкин, як тоҷири рус мусодира карда буданд.

Ёфтҳои бештар

XS
SM
MD
LG