Ҳарбиёни Иёлоти Муттаҳида мегӯянд, ду ҳавопаймои онҳо дар шимоли Ироқ суқут карда, чаҳор сарбози амрикоӣ ба ҳалокат расидаанд. Сухангӯи низомиёни Амрико дар Ироқ, майор Хосе Лопез гуфт, сабаби ҳодисаҳо маълум нест ва таҳқиқ идома дорад. Дар як изҳороти дигари ҳарбиёни Иёлоти Муттаҳида гуфта мешавад, ки суқут ҳавопаймоҳо бар асари зарбаи душман ба вуқӯъ напайвастааст. Аммо гурӯҳи ошӯбгарон бо номи "Нақшбандия" масъулияти ин ҳодисаҳоро бар дӯш гирифтааст.
