Пайвандҳои дастрасӣ

Хабари нав

Хабарҳо

Зилзилаи такрорӣ дар Сичуани Чин

Мақомоти Чин саъй доранд, сокинони вилояти офатзадаи Сичуанро ором намоянд. Баъди ҳушдори ҳукумат дар мавриди эҳтимоли такрори заминларзаи нерӯманд даҳҳо ҳазор нафар паноҳгоҳҳояшонро тарк карданд. Дар паи нашри эълон дар шабакаи телевизиони Чин сокинони шаҳри Ченгду: маркази вилояти Сичуан, ба майдонҳои кушод раҳсипор шуданд. Баъди муддате ин минтақаро зилзилаи мусовӣ бо 5 дараҷа такон дод. Мақомоти Чин мегӯянд, заминларзаи 12-уми май ба 7,9 дараҷа баробар буд. Бар асари ин офат то 70 ҳазор нафар кушта ва ё бе ному нишон шудаанд. Сар аз 19-уми май дар Чин мотами серӯза эълон шудааст.

Ҳамаи хабарҳои имрӯзро дар инҷо бихонед

Павел Грудинин, номзади Ҳизби коммунист, аз иштирок дар интихоботи Русия маҳрум шуд

Павел Грудинин дар интихоботи соли 2018 яке аз рақибони Владимир Путин буд

Мақомоти интихоботии Русия як номзади бонуфузи Ҳизби коммунистро аз ширкат дар интихоботи порлумонии моҳи сентябр маҳрум карданд.

Кумисюни марказии интихобот рӯзи 24-уми июл гуфт, номи Павел Грудинин аз рӯйхати ҳизбӣ берун карда шуд, чун Додситонӣ дороиҳои ӯро дар хориҷа ёфтааст.

Грудинин дар интихоботи президентии соли 2018 дар Русия яке аз рақибони Владимир Путин буд ва бо дарёфти дувоздаҳ дарсад ройи мардум дар ҷойгоҳи дувум қарор дошт.

Ӯ пас аз интихобот зери тозиёнаи расонаҳои тарафдори Кремл афтид; тиҷораташ ба мушкилоти ҳуқуқӣ рӯ ба рӯ шуд ва аз мандати вакилӣ дар шӯрои шаҳри Видное, дар наздикии Маскав, маҳрум гардид.

Грудинин дороиҳояшро дар хориҷа рад кард.

Раҳбари Ҳизби коммунисти Русия, Геннадий Зюганов, қавл дод, ки аз рӯйи ин қарор шикоят мекунанд ва афзуд, "Грудинин дар рӯйхати номзадҳои ҳизб дар ҷойи сеюм хоҳад монд".

Чанде аз чеҳраҳои дигари оппозиситюн, ки аксарашон бо созмони мунтақиди зиндонии Кремл Алексей Навалний иртибот доштанд, аз иштирок дар интихоботи моҳи сентябр манъ карда шуданд.

Ҳалокати ду низомии Туркия дар шимоли Сурия

Акс аз бойгонӣ

Туркия мегӯяд, ду низомияш дар шимоли Сурия кушта ва ду тани дигар захмӣ шудаанд. Вазорати мудофиаи Туркия рӯзи 24-уми июл гуфт, ҳарбиёнаш замоне куштаву маҷруҳ шудаанд, ки корвони онҳо ҳадафи як инфиҷор (таркиш) қарор гирифт. Ба гуфтаи масъулони вазорат, пас аз ин ҳодиса нерӯҳои амниятии Туркия амалиёти низомиро ба роҳ монданд ва то ҳанӯз идома дорад. Касе ё гуруҳе масъулияти ин ҳодисаро расман ба уҳда нагирифтааст.

Гумонбари дувум дар ҳодисаи Рашт дастгир шуд, вале баҳси ҷонибҳо поён наёфт

Акс аз бойгонии Радиои Озодӣ

Додситонии ноҳияи Рашт Раҷабалӣ Ҳомидов, гумонбари дувум дар қатли Алиризо Худоёрови 21-соларо дастгир кардааст. Худоёров дар аввали моҳи июл дар як занозанӣ бо зарби корд кушта шуд. Наздиконаш ҳодисаро «аз пеш тарҳрезишуда» ва «кори дасти камаш панҷ нафар» медонанд. Муфаттишон мегӯянд, ҳанӯз барои қазоват кардан барвақт аст.

Як муфаттиши Додситонии ноҳияи Рашт 25-уми июл гуфт, боздошти Раҷабалӣ Ҳомидов се рӯз пеш сурат гирифт. «То замоне ки соҳиби асосии корд рӯшан карда нашавад, суолҳои зиёде барои тафтишот мемонад ва гумонбарон дастгиру бозпурсӣ мешаванд», -- афзуд ӯ.

Аз ин пеш мақомот сокини ноҳияи Рашт Зафари Насриддинро бо гумони даст доштан дар қатли Алиризо Худоёров дастгир карда буданд. Мадина Худоёрова, аммаи Алиризо Худоёров, мегӯяд, дар рӯзи ҳодиса Раҷабалӣ Ҳомидов ва Зафари Насриддинро якҷоя дида буд ва онро ба муфаттишон ҳам нақл кард.

Вале пайвандони Зафари Насриддин ӯро "мубталои бемории рӯҳӣ" ва ҳодисаро "тасодуфӣ" меноманд.

Алиризо Худоёров
Алиризо Худоёров

Ҷониби даъвогар мариз будани гумонбарро инкор намекунанд, аммо кушторро "аз пеш тарҳрезишуда" ва кори дасти камаш панҷ нафар медонанд, ки "дар паси Зафари Насриддин пинҳон шудаанд". Ҷунайдулло Худоёров, амаки Алиризо, рӯзи 20-уми июл гуфта буд, "онҳо мехоҳанд, Зафари Насриддин гуноҳро ба гардан гирад, баъд барои бемориаш афв шавад."

Ин дар ҳолест, ки Рухшона Исмонова, хоҳарбузурги Зафари Насриддин, рӯзи 19-уми июл дар суҳбати телефонӣ бо Радиои Озодӣ иддао кард, "Худоёровҳо мегӯянд, дар куштани Алиризо панҷ нафар, ба ӯ ҳамла кардаанд, ин нодуруст аст."

Пештар хонаводаи Худоёровҳо номи шахсонеро, ки ба бовари онҳо дар қатли Алиризо даст доранд, дар шабакаҳои иҷтимоӣ эълон карда буданд. Онҳо иддао доранд, ки бо ин афрод ва наздиконашон бар сари қитъаи замин баҳс доштанд ва эҳтимол муноқишаи охир ҳосили ҳамон ҷанҷол аст.

Шуъбаи корҳои дохилии Рашт дар аввал бо гумони куштори Алиризо Худоёров чаҳор ҳамдеҳаи ӯро дастгир карда буд, аммо дертар бо шарти берун нарафтан аз маҳалли зист се касро ҷавоб дод.

Ҷасади Алиризо Худоёров, донишҷӯйи Донишгоҳи Раштро субҳи 13-уми июл дафн карданд. Ӯ бародарзодаи Фарҳод Худоёров, раиси Ҳизби сотсиал-демократ дар ноҳияи Рашт ва Ҷунайдулло Худоёров, фаъоли шабакаҳои иҷтимоӣ аст.

Фарҳод Худоёров ва Ҷунайдулло Худоёров борҳо аз кори мақомот дар ноҳияи Рашт интиқод карда, ба гуфтаи худашон, зери фишор ҳастанд. Саъдулло Худоёров, бародари онҳо, моҳи гузашта дучори ҳамла шуда буд. Раёсати минтақавии Вазорати корҳои дохилӣ дар аввал нисбат ба ҳамлагарон бо иттиҳоми “авбошӣ” парванда кушода, ӯро ҷабрдида эътироф кард, аммо чанде нагузашта нисбат ба худи ӯ парванда боз кард.

Норозигии ҳазорҳо нафар дар Аврупо ба зидди қоидаҳои пешгирӣ аз вирус

Даҳҳо ҳазор кас дар кӯчаҳои чанд шаҳри Аврупо алайҳи қоидаҳои эмкунӣ ва роҳҳои пешгирӣ аз коронавирус эътироз карданд.

Тазоҳуроти калонтарин дар Фаронса баргузор шуд. Дар онҷо тақрибан 160 ҳазор кас иштирок карданд. Онҳо ба зидди лоиҳаи қонуне раҳпаймоӣ карданд, ки барои ворид шудан ба тарабхона ва ҷойҳои дигари ҷамъиятӣ «гузарнома» мепурсад. Мардум ҳамзамон аз эмкунии ҳатмии ҳамаи кормандони тиб норозиянд.

Эътирозҳо асосан осоишта буданд, аммо дар Порис (Париж) касе аз издиҳом бо шиори "Озодӣ!" ба сӯи як корманди полис курсӣ партофт. Полис дар ҷавоб аз обпошҳо истифода кард.

Тарҳе, ки дар Фаронса алайҳи он эътироз карданд, барои боздид аз осорхонаву кинотеатрҳо ва маконҳои сайёҳӣ, аз ҷумла тарабхонаҳо «гузарнома» талаб мекунад. Яъне, одамон бояд ё эм карда шаванд, ё озмоиши манфӣ нишон дошта бошанд ва ё исбот кунанд, ки аз COVID-19 сиҳат ёфтаанд.

Ҳазорон эътирозгар инчунин дар Рум ва шаҳрҳои дигари Итолиё ҷамъ омада, алайҳи қарори ҳукумат дар бораи талаб кардани "гузарнома" барои дастрасӣ ба варзишгоҳҳо, кинотеатрҳо ва ҷойҳои дигари ҷамъиятӣ эътироз намуданд.

Сирояти коронавирус бабрҳои Калифорнияро "гӯшанишин" кард

Акс аз бойгонӣ

Масъулони Боғи ҷонварони Сан-Диего дар Калифорния гурӯҳи бабрҳоро, пас аз он ки санҷиши коронавируси яке аз онҳо мусбат баромад, ба "карантин" гирифтаанд. Онҳо гуфтанд, бабри барфии 9-сола, Рамил, сулфа мекунад ва оби бинияш меравад. Онро дар аввали ҳафта санҷиш карданд. Кормандони Боғи ҳайвонот тахмин мезананд, ки се паланги дигар ба бемории ҳамагир гирифтор шудаанд. Дар изҳороти Боғи ҳайвонот аз 23-юми июл омадааст, бабрҳо зери назорати байторон ҳастанд ва намоиши онҳо муваққатан боздошта шудааст. Маълум нест, беморӣ чӣ гуна сироят кардааст.

Ҷасади як қурбонии селро дар Панҷакент пас аз се рӯз ёфтаанд

Ҳабиб Ёқубов. Акс аз сомонаи Кумитаи ҳолатҳои фавқулодаи Тоҷикистон

Ҷасади Ҳабиб Ёқубови 19-сола, қурбонии селро дар Панҷакент, пас аз се рӯзи ҷустуҷӯ ёфтаанд. Намояндагони Кумитаи ҳолатҳои фавқулода гуфтанд, ӯ 23-юми июл дафн карда шуд. Аммо, ба гуфтаи онҳо, то ба ҳол ҷустуҷӯйи ҷасади Нозима Исмоилова, қурбонии дигари сел дар Панҷакент, "натиҷа надодааст".

Рӯзи 19-уми июл бар асари омадани сел дар Панҷакент дувоздаҳ нафар ҷон бохтанд. Аз ин шумора ҳафт кас аъзои як оила буда, ба иттилои мақомот, "ҳангоми борони шадид дохили хаймаҳои хеш паноҳ бурданд, вале сели шадид онҳоро ҳамроҳ бо хаймаҳояшон бурд."

Дар он рӯз сел ба ба роҳу хонаҳои мардум ва хатти обу барқ дар ноҳияҳои Деваштичу Айнӣ ва Кӯҳистони Мастчоҳ низ зарар расонд. Масъулони Идораи ҳолатҳои фавқулодаи Суғд гуфтанд, дар ноҳияи Айнӣ як нафар ба ҳалокат расидааст.

Тоҷикистон яке аз кишварҳои осебпазир дар баробари фалокатҳои табиист. Аз аз соли 1992 то соли 2020, обхезиву селу заминларза ва лағжиши хок ба 7 миллион нафар осеб ва ба иқтисоди кишвар тақрибан 2 миллиард доллар зарар расондааст.

Занҳо, пирон, фаъолон... 33 қурбонии "ҳамлаҳои ҳадафмандона" дар Қандаҳор

Вилояти Қандаҳор

Як созмони ҳомии ҳуқуқи башар мегӯяд, тайи ҳафтаҳои охир дар "ҳамлаҳои ҳадафмандона" дар вилояти Қандаҳори Афғонистон 33 ғайринизомӣ кушта шуданд.

Кумисюни мустақили ҳуқуқи башари Афғонистон гуфт, ҳамлаҳо дар ноҳияҳои зери назорати Толибон ва ҳам дар минтақаҳои таҳти итоати ҳукумат сурат гирифтанд.

"Тибқи гузоришҳое, ки мо ҷамъ овардем, дар умум 33 нафар, аз ҷумла ду зан, дар куштори ҳадафмандона дар саросари Қандаҳор (аз 24-уми июн то 6-уми июл) ҷони худро аз даст доданд", -- гуфт сухангӯи Кумисюн Забеҳуллоҳ Фарҳанг рӯзи 25-уми июл ба Радиои Озодӣ.

Фарҳанг гуфт, ки кормандони ҳукумати маҳаллӣ, рӯзноманигорон, фаъолон, пирони қабила ва шахсиятҳои мазҳабӣ дар “ҳамлаҳои ҳадафмандона” кушта мешаванд.

Гурӯҳи ҳуқуқи башар аз "ҳамлаҳои даҳшатбор ба шахсоне, ки дар ҷанг иштирок надоранд", изҳори нигаронӣ карда, аз ҳукумату гурӯҳи мусаллаҳ даъват кард, ки "мардуми осоиштаро муҳофизат кунанд".

Вай афзуд, ҳеч гурӯҳе масъулияти кушторро ба дӯш нагирифтааст. Дар давоми ҳамлаҳои ҳадафмандона дар саросари Афғонистон дар соли гузашта даҳҳо фаъоли ҷомеаи шаҳрвандӣ, ҳуқуқшиносон, рӯзноманигорон ва дигарон кушта шуданд.

Ҳукумат дар ин ҳамлаҳо Толибонро гунаҳкор карда, аммо натиҷаҳои тафтишоти худро дар бораи кушторҳо ошкор накардаанд.

Хонандагони тоҷик дар озмуни байналмилалӣ аз риёзӣ ҷоиза гирифтаанд. ВИДЕО

Аз бойгонӣ

Як гурӯҳи шашнафарии хонандагон аз Тоҷикистон дар олимпиадаи байналмилалии риёзидонҳо иштирок карда, се медал гирифтаанд. Озмун аз 19 то 24-уми июл фосилавӣ баргузор шуд.

Панҷ нафар аз ин хонандагон муҳассилони бахши гимназияи "Ҳотам ва ПВ" дар шаҳри Ҳисор ва як нафар аз Литсейи рақами яки шаҳри Душанбе буданд. Юсуф Ҳотамов, мудири намояндагии гимназияи "Ҳотам ва ПВ" дар Ҳисор, рӯзи 25-уми июл гуфт, "дар натиҷа 3 шогирди мо – Вазирҷон Пиров, Ҷамшед Рустамов ва Усмоналӣ Паҳлавонов – медалҳои биринҷии олимпиадаро соҳиб шуданд."

Ба иттилои ӯ, шогирди дигари гимназия, Темур Усмонов, бо Ифтихорномаи махсус қадрдонӣ шуда, "Рауфҷон Дадабоев бо сабаби беморӣ дар ҷараёни озмун натавонист натиҷаҳои мусбат ба даст биёрад." Дар ин озмун намояндагони 112 кишвари ҷаҳон иштирок доштанд. Хонандагони тоҷик мақом ё ҷойгоҳи 59-умро ҳифз кардаанд.

Тоҷикистон дар раддабандии сифати таълими математика ва илмҳои дақиқ дар миёни 137 кишвари дунё дар ҷойи 74-ум аст, ҷойгоҳе дар канори Ямайка ва Мадагаскар. Ин раддабандиро Форуми Ҷаҳонии Иқтисодӣ таҳия кардааст, ки таълими босифати риёзиёт ё математикаро ҷузъе аз тавоноии иқтисодии кишварҳои ҷаҳон мешуморад.

Донишмандон дар Тоҷикистон мегӯянд, то ба сатҳи як кишвари африқоӣ поин рафтани сатҳи таълими риёзиёт нигаронкунанда аст ва ба ояндаи иқтисоди кишвар зарба хоҳад зад.

Навор аз бойгонӣ. Гапи Озод: Математика ё шеър?

Гапи Озод: "Математика ва ё шеър?"
лутфан мунтазир бошед
Embed

Феълан кор намекунад

0:00 0:23:45 0:00

Вазорат гуфт, "дар як рӯз дар Тоҷикистон 78 кас бемор шуданд"

Акс аз бойгонӣ

Вазорати тандурустии Тоҷикистон гуфт, рӯзи 24-уми июл 78 мавриди сирояти коронавирусро сабт кард, аммо дар бораи фавтидагон чизе нагуфт. Ин дар ҳолест, ки рӯзи шанбе чандин нафар дар шабакаҳои иҷтимоӣ, аз марги наздикони худ бар асари бемории ҳамагир гузориш доданд.

Ба иттилои расмӣ, аз замони эътирофи мавҷудияти COVID-19 дар Тоҷикистон беш аз 14 ҳазору 500 кас бемор шуда, 116 нафар ҷон бохтаанд. Масъулони Вазорати тандурустӣ иддао доранд, ки то кунун тақрибан 97 дарсади беморон шифо ёфтанд.

Баъзе аз сокинону мутахассисон ба дурустии омор шубҳа доранд, ҳарчанд мақомот онро дақиқу санҷидашуда медонанд.

Дар Тоҷикистон охири моҳи апрели соли гузашта ва дар пайи фишори дохиливу берунӣ вуҷуди коронавирусро эътироф карданд.

Мақомоти Тоҷикистон аз моҳи январ то охири моҳи июни имсол пойфишорӣ доштанд, ки дар кишвар сирояти коронавирус сабт нашудааст. Ситоди муқобила бо коронавирус танҳо 21-уми июн тасдиқ кард, ки сокинон дубора ба бемории ҳамагир мубтало шудаанд.

Хоманаӣ аз норозиён «эҳтиёткорӣ»-ро хост, созмонҳо аз саркӯб мегӯянд

Эътирозҳо дар Хузистон

Оятуллоҳ Алии Хоманаӣ, раҳбари олии Эрон, дар суханронии рӯзи ҷумъааш ба эътирозгарон дар вилояти Хузистон гуфтааст, ки «баҳонае ба дасти душман» нашаванд.

Хузистони саршор аз нафт дар ҷануби ғарби Эрон ҷойгир аст, вале сокинонаш аз моҳи марти имсол ба ин сӯ ба хотири хушксолӣ зиёни сахт дидаанд.

Хоманаӣ таъкид кардааст, ки камбуди об яке аз масъалаҳои ҷиддӣ ба ҳисоб меравад ва ҳамзаон афзуд, «мардуми Хузистон ба хотири ибрози нохушнудияшон аз камбуди об маломат нестанд», аммо аз онҳо хост, «эҳтиёткор бошанд».

Дар ҳамин ҳол, созмони Афви Байналмилалӣ ва Дидбони Ҳуқуқи Башар нерӯҳои амниятии Эронро ба саркӯби норозиён муттаҳам карданд. Афви Байналмилалӣ гуфтааст, дар ин хушунатҳо 8 кас, аз ҷумла як ҷавон кушта шудаанд.

Комиссари олии ҳуқуқи башари Созмони Милали Муттаҳид вазъи имрӯзаи Хузистонро «фоҷеаомез» хонд ва онро натиҷаи солҳо саҳлангорӣ ва бетаваҷҷӯҳии ҳукумати Эрон номид.

Пирӯзии муштзани тоҷик, Баҳодур Усмонов, дар рақобати нахустинаш дар Олимпиадаи Токио

Баҳодур Усмонов аз тарафи рост, акс аз бойгонӣ

Рӯзи 25-уми июл дар Олимпиадаи Токио ду муштзани тоҷик дар даври муқаддамотӣ рақобат карданд. Нахуст Баҳодур Усмонов дар вазни то 63 кило бо Леонел Сантоз Нунез аз Доминикан вориди сабқат шуд. Ин қувваозмоӣ бо пирӯзии Баҳодур бо ҳисоби 4:1 хотима ёфт. Муштзани тоҷик ба даври баъдӣ роҳ ёфт.

Сипас Шаббос Неъматуллоев дар вазни то 81 кило бо Даксианг Чен аз Чин вориди рақобат шуд. Дар ин сабқат намояндаи Чин бо ҳисоби 4:0 ғолиб омад. Шаббос аз ҳаққи ширкат дар даври баъдӣ маҳрум гашт.

Муштзани дигари тоҷик Сиёвуш Зуҳуров, писари Бег Сабур, раиси Хадамоти алоқаи Тоҷикистон, 29-уми июл дар вазни беш аз 91 кило қувваозмоиро аз даври 1/8-ниҳоӣ шуруъ мекунад. Рақибаш Мурод Алиев аз Фаронса аст.

Аз байни паҳлавонони тоҷик нахустин шуда Сомон Маҳмадбеков рӯзи 26-уми июл ба сабқат сар хоҳад кард. Баъдан Акмал Муродов 27-уми июл ба рақобат мепардозад. Комроншоҳи Устопириён 28-уми июл ва Темур Раҳимов 30-юми июл вориди рақобат мешаванд.

Сомон Маҳмадбеков дар вазни то 73 кило дар даври аввал бо Аҳмад Аликай аз тими паноҳандагон рақобат мекунад. Дар радабандии ҷаҳонӣ Сомон дар зинаи 16-ум ва Аҳмад дар зинаи 251-ум қарор доранд. Дар ин вазн ҳамагӣ 36 нафар номнавис шудаанд.

Рақиби Акмал Муродов дар вазни то 81 кило дар даври аввал Ҷоштер Эндрю аз Гуам мебошад. Дар радабандии ҷаҳонӣ Акмал дар зинаи 53-юм ва Ҷоштер дар зинаи 145-ум қарор доранд. Теъдоди варзишгарон дар ин вазн 35 нафарро ташкил медиҳад.

Комроншоҳи Устопириён дар вазни то 90 кило ба рақобат аз даври дувум мепардозад. Рақибаш Аксел Клергет аз Фаронса аст, ки дар феҳристи ҷаҳонӣ нисбат ба Комроншоҳ панҷ зина болост (ҷойи 17-ум). Дар ин вазн 33 гуштигир барои ҷоизаҳо талош мекунанд.

Темур Раҳимов дар вазни беш аз 100 кило дар даври аввал бо Энди Гранда аз Куба қувваозмоӣ хоҳад кард. Энди дар феҳристи ҷаҳонӣ нисбат ба Темур се зина поён аст (20-ум). Дар ин вазн 22 нафар сабти ном шудаанд.

Дар намуди дигар - шиноварӣ ба масофаи 50 метр бо тарзи озод Анастасия Тюрина ва Олимҷон Ишонов 30-юми июл ба рақобат мепардозанд. Илдар Аҳмадиев оид ба варзиши сабук дар давидан ба масофаи 100 метр миёни мардон рӯзи 31-уми июл рақобат хоҳад кард.

Дар ҳамин ҳол дар Олимпиадаи Токио варзишгарони 33 кишвар медал ба даст овардаанд. Аз рӯи ҳисоби медалҳо бо дарназардошти сифати онҳо (аввал тилло, баъдан нуқра ва биринҷӣ) мунтахаби Ҷопон дар мақоми аввал аст. Намояндагони ин кишвар 4 медал (3 тилло ва 1 нуқра) гирифтаанд.

Мақоми дувумро мунтахаби Чин бо касби 5 медал (3 тилло ва 2 нуқра) азони худ кардааст. Мунтахаби Иёлоти Муттаҳидаи Амрико (ИМА) бо касби 7 медал (1 тилло, 2 нуқра ва 4 биринҷӣ) дар мақоми севум қарор дорад.

Ба даҳгонаи аввал, инчунин дастаҳои мунтахаби Австралия (1 медали тилло, 1 нуқра ва 1 биринҷӣ), Русия (1 медали тилло, 1 нуқра ва 1 биринҷӣ), Италия (1 медали тилло, 1 нуқра), Тунис (1 медали тилло, 1 нуқра), Кореяи Ҷанубӣ (1 медали тилло ва 2 биринҷӣ), Эквадор, Маҷористон, Эрон, Косово ва Тайланд (яктоӣ медали тилло) дохиланд.

Аз кишварҳои Шӯравии собиқ ба ҷуз аз Русия, Эстония, Қазоқистон ва Украина яктоӣ медали биринҷӣ гирифтаанд.

Дар Бозиҳои ХХХII тобистонаи олимпӣ Тоҷикистонро даҳ варзишгар намояндагӣ мекунад. Се нафари онҳо – паҳлавон Комроншоҳи Устопириён, шиноварон Анастасия Тюрина ва Олимҷон Ишонов бори дуюм аст, ки ба ҳаққи ширкат дар Бозиҳои олимпӣ мушарраф шудаанд. Ҳарсе дар Олимпиадаи Рио-2016 иштирок карда буданд. Ҳафт нафари дигар бори аввал дар Бозиҳои олимпӣ ширкат меварзанд.

Ёдовар мешавем, дар асоси низомномаи Ҷоизаи президенти Тоҷикистон ба ғолибон ва ҷоизадорони мусобиқаҳои байналмилалии варзишӣ ба варзишгароне, ки дар Бозиҳои олимпӣ ҷойҳои аввал, дувум ва севумро сазовор мешаванд, мутаносибан 300 000 сомонӣ, 250 000 сомонӣ ва 200 000 сомонӣ супурда мешавад.

Инчунин шаҳрдори Душанбе ба варзишгароне, ки дар Олимпиадаи Токио медал ба даст меоранд, дар пойтахти кишвар хона туҳфа мекунад. Аз ҷумла, барои медали тилло хонаи чорҳуҷрагӣ, барои медали нуқра хонаи сеҳуҷрагӣ ва барои медали биринҷӣ хонаи дуҳуҷрагӣ тақдим мегардад.

Бозиҳои тобистонаи олимпӣ дар Токио, ки 23-юми июл шуруъ шуд, то 8-уми август идома хоҳад кард. Олимпиада мебоист соли гузашта баргузор мешуд, аммо ба иллати пандемияи коронавирус барои як сол мавқуф гузошта шуд.

Пас аз марги ҳамсару писар. Саидалӣ Маъмур, шоири тоҷик даргузашт

Саидалӣ Маъмур. Акс аз шабакаҳои иҷтимоӣ

Саидалӣ Маъмур, шоири шинохтаи тоҷик, рӯзи 24-уми июл дар 77-солагӣ дар Душанбе даргузашт. Шоир ду ҳафтаи охир аз бемории COVID-19 ранҷ мебурд. Дар як моҳи охир писар ва ҳамсари шоир ҳам аз ин беморӣ фавтиданд.

Алиакбар Абдуллоев, мушовири раиси Иттиҳоди нависандагони Тоҷикистон, рӯзи 24-уми июл ба Радиои Озодӣ гуфт, маросими видоъе ва дафни шоир субҳи якшанбе дар назди хонааш дар шаҳри Душанбе баргузор хоҳад шуд.

Аз ин пеш, рӯзи 2-юми июл, ягона писари шоир Фарзон Маъмури 43-сола ва 26-уми июн завҷааш Роҳат дар 72-солагӣ даргузаштанд. Гуфта мешавад, ҳар ду ҳам ба бемории COVID-19 гирифтор буданд.

Саидалӣ Маъмур соли 1944 дар деҳаи Яккабоғи Истаравшан ба дунё омадааст. Хатмкардаи факултаи таъриху филологияи Донишгоҳи давлатии Тоҷикистон аст. Шоир дар "Радиои тоҷик", рӯзномаи "Комсомоли Тоҷикистон" кор карда, Солҳои охир мудири Шӯрои назми Иттиҳоди адибони Тоҷикистон буд.

"Заврақи умед" , "Савганд" , "Солгиреҳ", "Гарди Офтоб" ва "Овои мурғи шабовез" аз маҷмӯаи ашъори ӯянд. Саидалӣ Маъмур ҳамчунон барои бачагон шеър мегуфт ва маҷмӯи офаридаҳояш барои кӯдакон бо номи "Сӯзанак", "Навоҳои Гулдара" , "Карчи харбуза" , "Анӯшаҷони ҷони мо" , "Алвончак" ба дасти хонандагон расидааст.

Асарҳои шоир ҳамчунон ба забони русӣ тарҷума ва нашр шудаанд. Соли 2009 «Гулчини ашъор»-аш ба ҳуруфи форсӣ чоп шуда, шеърҳои алоҳидааш дар маҷмӯаҳои дастҷамъӣ ва матбуоти Эрону Афғонистон бознашр шудааст. Ӯ Шоири халқии Тоҷикистон буд.

Таркиш дар кони ангишти Шӯроб. Як нафар ҷон бохта, чанд каси дигар захмӣ шуданд

Кони ангишти Шӯроб, Исфара

Бар асари таркиш дар кони ангишти Шӯроб як нафар ҷон бохта, чанд каси дигар захмӣ шудаанд. Масъулони корхона гуфтанд, бинобар фарзияи пешакӣ, таркиш аз газе, ки аз дохили нақбҳои зеризаминии кон хориҷ мешавад, ба амал омадааст. Гурӯҳи наҷот ҳоло бо бартарафкунии оқибатҳои ҳодиса машғуланд.

Ҳусейн Бобозода, сармуҳандиси кони Шӯроб, рӯзи 24-уми июл ба Радиои Озодӣ гуфт, "ҳодиса тахминан соати 16:30 рух дод. Абдуманнон Тошбоев, сардори бригадаи коргарон, дар ҷойи ҳодиса ба ҳалокат расид. Ӯро ба ташхисгоҳ бурдем ва ҳоло корро муваққатан то бартарафшавии садама қатъ кардем."

Як манбаи боварбахши Радиои Озодӣ мегӯяд, 7 каси дигар дар ин ҳодиса захмӣ шуда, ба беморхона бурда шудаанд.

Тӯйчиқул Муродқулов, сардори минтақавии ҳолатҳои изтирории зеризаминӣ низ афзуд: "Ҳоло кормандон ба ҷойи ҳодиса рафта, кумаки аввалияро расонида истодаанд. Дар сурати маълум шудани хисороти молию ҷонии бештар маълумот пешниҳод хоҳад шуд."

Кони Шӯроб аз калонтарин конҳои истеҳсоли ангишт дар Тоҷикистон аст. Ҳусейн Бобозода, сармуҳандиси кон мегӯяд, ингуна садамаҳо кам рух медиҳанд ва дар даҳсолаи охир нафаре ҳангоми кор дар кон ба ҳалокат нарасидааст.

Мақомҳои Покистон пас кушта шудани чиноиҳо дар таркиши автобус ба Пекин рафтанд

Вазири корҳои хориҷӣ ва раиси Хадамоти иктишофии Покистон бо як сафари дурӯза вориди Чин шуданд. Ин сафар дар пасманзари таркиш дар як автобус, ки дар натиҷаи он чанд коргари чинӣ дар ин кишвари Осиёи Ҷанубӣ кушта шуданд ва як бархурди бесобиқаи дипломатӣ миёни ин ду кишвари ҳампаймон сурат гирифт.

Шоҳ Маҳмуд Қурайшӣ, вазири корҳои хориҷии Покисон, генерал-лейтенант Файз Ҳамид, раҳбари идораи иктишофи низомӣ рӯзи 23-уми июн ба Пекин рафтанд.

Вазорати умури хориҷии Покистон гуфт, ки ду тараф ҳамкориҳои дифоъӣ ва амниятӣ, мубориза бо терроризм ва масоили минтақаро баррасӣ хоҳанд кард. Ин боздид пас аз он сурат мегирад, ки рӯзи 14-уми июл дар як таркиши автобус 12 нафар, аз ҷумла 9 коргари чини дар шимолу ғарби Покистон кушта шуд. Пекин гуфт, ки коргарони чинӣ дар натиҷаи "таркиши бомба" кушта шуданд. Дар ҳоле ки, мақомоти Покистон гуфтанд, ки таркиш зоҳиран дар натиҷаи ихроҷи газ ба амал омадааст. Автобус ҳудуди 40 корманди чиниро ба майдони сохтмони сарбанди нерӯгоҳи барқи обии вилояти Хайбар Пахтунхвои Покистон, дар наздикии марз бо Чин мебурд.

Чин наздиктарин шарики минтақавии Исломобод аст, аммо амнияти коргарони чинӣ дар Покистон кайҳо боз нигарониҳоро дар Пекин ба бор овардааст.

Ин сафар ҳамчунин дар пасманзари афзоиши нигарониҳо дар минтақа аз афзоиши хушунатҳо дар Афғонистон сурат мегирад. Толибон қаламравҳои зиёдеро пеш аз хуруҷи ҳамаи сарбозони хориҷӣ, ки 31-уми август анҷом меёбад забт кардаанд.

Нахустин медали тилои Олимпиадаи Токио-2020 насиби варзигари Чин шуд

Варзишгари Чин Тсян Ян, рӯзи 24-уми июл пас аз пирӯзӣ бар Анастасия Галашина аз Русия дар финали сабқати тирандозӣ аз туфангча ба масофаи 10-метра миёни занон аввалин медали тиллои Олимпиадаи Токио-2020-ро ба даст овард.

Галашина мавқеи хубе барои ба даст овардани медали тилло дошт, аммо зери фишор шикаст хурд. "Ман аз ҳад зиёд асабонӣ шудам, ҳарчанд хеле худро нигоҳ доштам. Ҳушу ёдам дар ҷояш набуд", - гуфт Галашина.

Дар ҳамин ҳол, Ҷавод Форуғӣ варзишгари Эронӣ дар сабқати тирандоз аз таппончаи пневматикӣ миёни мардон дар масофаи 10 метр, ки аввалин медали тиллоро аз миёни варзишагрони Эрон дар ин ришта ба даст овард.

Форуғии 41-сола куҳансолтарин варзишгаре аст, ки медали олимпӣ ба даст овард. Қабл аз ӯ куҳансолтарин варзишагре, ки медали олимпт гирифт ҳамватани ӯ, вазнабардор Маҳмуд Номҷӯ буд, ки дар бозиҳои олимпии Мелбурн соли 1956 дар синни 38-солагӣ гузаштааст медали биринҷӣ ба даст оварда буд.

Дар ин сабқат Дамир Микек аз Сербия дувум шуд ва аз қаҳрамони Олимпиадаи Пекин дар соли 2008 Панг Вей аз Чин пеш гузашт.

Рӯзи 24-уми июл 11 сабқати олимпӣ, аз ҷумла дар намудҳои камонварӣ, шамшербозӣ, дзюдо, таэквондо ва вазнбардорӣ доир мешаванд.

Дар Бозиҳои ХХХII тобистонаи олимпӣ Тоҷикистонро даҳ варзишгар намояндагӣ мекунад. Се нафари онҳо – паҳлавон Комроншоҳи Устопириён, шиноварон Анастасия Тюрина ва Олимҷон Ишонов бори дуюм аст, ки ба ҳаққи ширкат дар Бозиҳои олимпӣ мушарраф шудаанд. Ҳарсе дар Олимпиадаи Рио-2016 иштирок карда буданд. Ҳафт нафари дигар бори аввал дар Бозиҳои олимпӣ иштирок мекунанд.

Ҷо Байден ба Ашраф Ғанӣ итминон дод, ки кӯмакҳои низомиву башарии ИМА идома меёбанд

Ҷо Байден раисҷумҳури ИМА бо Ашраф Ғанӣ президенти Афғонистон телефонӣ суҳбат карда, таъкид кард, ки Иёлоти Муттаҳида ёриҳои башардӯстона ва ҳимоят аз рушди Афғонистонро идома медиҳад.

Дар як изҳороте рӯзи 23-уми июл Кохи Сафед гуфт, президент Байден инчунин ӯҳдадории Амрикоро барои идомаи пуштибонии нерӯҳои амниятии Афғонистон барои дифоъ аз худ, тасдиқ кард.

Дар ин изҳорот гуфта мешавад, ки Байден ва Ғанӣ ҳамлаҳои Толибонро, ки даъво доранд муноқишаро аз роҳи музокирот ҳал карданиянд, мухолифи гуфтаҳояшон хонданд.

Тайи чанд ҳафтаи охир ҷангиёни Толибон зимни хуруҷи нерӯҳои байналмилалии таҳти раҳбарии ИМА қаламравҳои зиёди Афғонистонро таҳти назорати худ оварда, нигарониҳо аз суқути ҳукумати Афғонистонро бештар карданд.

Суҳайл Шоҳин, сухангӯи Толибон рӯзи 23-юми июл дар суҳбат бо оҷонсии Associated Press гуфт, ки ҷангиён силоҳҳои худро замоне ба замин хоҳанд гузошт, ки ҳукумати Ашраф Ғанӣ аз байн равад ва дар Кобул ҳукумате, ки ҳама ҷонибҳоро қонеъ месозад, сари кор ояд.

Қаблан Ҷейн Псаки сухангӯи Кохи Сафед гуфт, ки Байден ва маъмурияти ӯ аз раҳбарияти мардуми Афғонистон, аз ҷумла Ашраф Ғанӣ пуштибонӣ мекунанд. Дар ин суҳбат Байден ва Ғанӣ рӯи аҳамияти ваҳдати афғонҳо таъкид карданд, ки барои ҳимоят аз сулҳ, амният ва манофеи умумимиллӣ зарур аст.

Дар маросими ифтитоҳи олимпиадаи Токио-2020 варзишгарони тоҷик ва қирғиз ниқоб надоштанд

Дар маросими ифтитоҳи Бозиҳои XXXII тобистонаи олимпӣ, ки 23-юми июл дар Варзишгоҳи миллии Токио баргузор шуд, ҳайатҳои олимпии Қирғизистон ва Тоҷикистон бидуни ниқоб ба майдон омаданд.

Олимпичиёни Қирғизистон чанд муддат пеш аз ҳайати олимпии Тоҷикистон дар парад бе ниқоб иштирок доштанд. Танҳо як варзишгари қирғиз рӯяшро пӯшонид, аъзои дигари ҳайати тақрибан 15-нафарӣ, аз ҷумла ду парчамбардори он - тирандоз Каникей Кубаничбекова ва шиновар Денис Петрашов - ҳангоми ба варзишгоҳ баромадан бе ниқоб табассум мекарданд.

Чанде пас аз он, аксарияти аъзои ҳайати 12-нафарии Тоҷикистон низ ба ҳамин монанд бидуни ниқоб раҳпаймоӣ карданд, аз он ҷумла парчамбардор ҷудокор Темур Раҳимов.

Ҳамчунин ду парчамбардори Покистон низ ба фарқ аз аксарияти кулли ширкаткунандагони дигари маросим рӯйпӯш накардани худро ихтиёр намуданд. Ин иқдоми ғайримуқаррарии ду кишвари ҳамсояи Осиёи Марказӣ – Қирғизистону Тоҷикистон дар маросими муаррифии як намоиши ҷаҳонии варзишӣ сурат гирифт, ки дар ҷойгоҳҳои бидуни тамошобин ва вазъияти фавқулодаи COVID-19 дар шаҳри мизбони Токио пас аз як соли ба таъхир гузоштани Олимпиада рух дод.

Ташкилкунандагони Токио-2020 ба дархости Ройтерз дар бораи шарҳи ҳайатҳои бидуни ниқоб фавран посух надоданд, аммо онҳо дар шабакаҳои иҷтимоӣ ба вокуниши гуногун, аз хашм то танз, мувоҷеҳ шуданд.

"Фарзандони ман ишора карданд, ки ин кишварҳо ниқобҳои худро фаромӯш кардаанд",- хандид як корбари ҷопонӣ бо номи Панда Панда, дар ҳоле ки нафари дигар суол кард, ки оё кишварҳои Осиёи Марказӣ ёддошт дар бораи пӯшидани ниқобро фаромӯш кардаанд?

Савумӣ, Адма Штейнер, шӯхӣ кард, ки Туркманистон, як ҷумҳурии саввуми Осиёи Марказӣ ва Шӯравии собиқ, "ба майдон ниқоб пӯшида омад ва ба пушти Қирғизистону Тоҷикистон зарба зад".

Тирандозӣ дар мавзеи Қуммазори Исфара дар марз бо Қирғизистон

Сокинони мавзеи Қуммазори ҷамоати Чоркуҳи Исфара аз тирандозии марзбонони қирғиз ва оташкушоии ҷавобии сарҳадбонони тоҷик хабар доданд. Мақомоти Қирғизистон ҳанӯз ин ҳодисаро шарҳ надодаанд.

Ҳодиса рӯзи 24-уми июл замоне рух додааст, ки сокинон барои поккории мавзеҳои истироҳатӣ рафтаанд. Дар ҳукумати ноҳияи Исфара ба Радиои Озодӣ рух додани ин ҳодисаро тасдиқ карда гуфтанд, айни замон раиси шаҳр ва ҳамроҳонаш барои муайян кардани сабабҳои сар задани ин муноқиша ба ҷойи ҳодиса рафтанд.

Як сокини Исфара, ки нахост номаш бурда шавад, дар суҳбат бо Радиои Озодӣ гуфт, ки тирпароние, ки дар мавзеъи Қуммазор рух дод, ҳоло қатъ шудааст.

Ин сокин дар шарҳи ин ҳодиса гуфт, "вақте сокинони Чоркуҳ ба мавзеи Қуммазор барои тозаву ба тартиб овардани ҷойҳои истироҳатӣ рафтанд, қирғизҳо монеъ шуданд. Ба сӯйи сокинон низомиёни қирғиз тир холӣ карданд ва марзбонони тоҷик ҳам ҷавоб доданд. Тирандозӣ беш аз 10дақиқа давом кард."

Ҷониби Қирғизистон ҳанӯз ин ҳодисаро расман шарҳ надодааст.

Марзи Тоҷикистону Қирғизистон тайи моҳҳои охир шоҳиди даргириҳои хунин шуд. Дар муноқишаи охири моҳи апрели имсол ҳарду кишвар якдигарро ба оғози ҷанг гунаҳкор мекунанд. Мақомоти Тоҷикистон мегӯянд, дар ин рӯйдодҳо 19 нафар кушта, 87 захмӣ шудаанд. Ҷониби Қирғизистон кушташудаҳои худро 36 ва захмиёнашро 189 нафар эълом доштааст. Додситониҳои ҳарду кишвар барои пажӯҳиши ҳодиса парвандаҳои ҷиноӣ кушодаанд.

Дарозии марзи Қирғизистон бо Тоҷикистон 970-980 километрро ташкил медиҳад, ки аз он то имрӯз танҳо 519 километри он муайян ва нишонагузорӣ шудааст.

Хадамоти кашф сабаби ба бемории мармуз гирифтор шудани дипломатҳои Амрикоро меҷӯяд

Вилям Бернс, раиси Хадамоти иктишофии Амрико (СIA)

Вилям Бернс, раиси Хадамоти иктишофии Амрико (СIA) гуфт, ки ин ниҳод талошҳои худро, ҷиҳати муайян кардани сабаби ба бемории мармуз гирифтор шудани дипломатҳои ИМА-ро ба беморие, ки "Синдроми Гавана" гуфта мешавад, афзоиш додааст.

Ин беморӣ, ки боиси ранҷуриҳои гуногун, аз ҷумла чарх задани сар, дилбеҳузурӣ, дарди сар ва аз даст рафтани ҳофиза мешавад "Синдроми Гавана" ном дорад, зеро он бори аввал соли 2016 дар сафорати ИМА дар Гавана пайдо шуда, даҳҳо дипломатҳоро мубтало кард. Аз он замон инҷониб, даҳҳо ҳолати гирифтории дипломатҳои ИМА ба ин бемории мармуз дар Чин, Русия, Аврупо ва кишварҳои Осиёи Марказӣ мушоҳида шудааст. Ҳафтаи гузашта маъмурияти президент Ҷо Байден эълон кард, ки гузоришҳои афсарони иктишофӣ, дипломатҳо ва дигар шахсони расмиро дар Вена таҳқиқ мекуна, ки аз нишонаҳои Синдроми Гавана шикоят кардаанд.

Рӯзи 22-юми июл, Бернс дар суханрониаш гуфт, ки " ба эҳтимоли хеле қавӣ" сабаби бемории пайдошуда барқасдона аст ва афзуд шумораи маҳдуди "гумонбарон" қобилияти амалӣ кардани чунин амалиётро дар саросари ҷаҳон доранд. Бернс инчунин гуфт, як афсари баландпояро, ки амалиёти раҳбари «Ал-Қоида» Усома бин Лодинро сарварӣ мекунад, сарварии як гурӯҳи фаврии муфаттишони ин синдром таъин кард. Ҳайати мутахассисони тиб, ки дар ин амалиёт иштирок мекунанд се баробар афзоиш дода шуд.

Тоҷикистону Русия тарҳи созишномаи нафақаи муҳоҷиронро ниҳоӣ кардаанд

Тоҷикистону Русия дар мавриди пардохти нафақа ба муҳоҷирони корӣ ба мувофиқа расидаанд.

Дилмурод Давлатзода, раиси Оҷонсии суғуртаи иҷтимоӣ ва нафақаи Тоҷикистон ҳафтаи равон зимни суҳбат бо хабарнигорон гуфт, лоиҳаи созишномае, ки ҳаҷми нафақаро танзим мекунад, барои баррасӣ ба ҳукумат пешниҳод шудааст. Интизор меравад баъд аз имзо шудани ин созишнома миёни Тоҷикистон ва Русия ҳар муҳоҷири корие, ки дар Русия андози иҷтимоӣ месупорад, бо расидан ба сини бознишастагӣ, метавонад ба нафақа умед бандад.

Тарҳи созишномаи миёни Тоҷикистону Русия дар бораи танзими нафақаи муҳоҷирони корӣ ҳанӯз ҳафт сол пеш ниҳоӣ шуда буд. Аммо ҷонибҳо то охир ба мувофиқа нарсиданд, Тоҷикистон мехоҳад Русия пули нафақаро ба оҷонсии нафақа гузаронад ва кишвар худ ба муҳоҷирони бознишаста нафақа диҳад. Русия ба ин шарт розӣ нашуда буд ва мехост худ нафақаи муҳоҷиронро пардозад.

Дар сурати имзои ин созишнома муҳоҷирони тоҷик дар Русия ҳаққи дарёфти нафақаро пайдо хоҳанд кард. Муҳоҷирати кории шаҳрвандони Тоҷикистон ба Русия бештар аз ду даҳсола пеш оғоз ёфта буд ва ҳоло онҳое, ки ба синни нафақа расидаанд, танҳо нафақаи иҷтимоӣ мегиранд. Ҳоло ҳаҷми нафақаи иҷтимоӣ 187 сомониро ташкил медиҳад.

Мақомоти қазоқ гӯш кардани телефони роҳбарони он кишварро шарҳ доданд

Даврон Абаев, муовини аввали раиси дастгоҳи президенти Қазоқистон.

Даврон Абаев, муовини аввали раиси дастгоҳи президенти Қазоқистон хабари гӯш кардани телефони роҳбарон, фаъолон ва чанде аз рӯзноманигорони кишварашро шарҳ дод. "Душвор аст, ҳарфе гуфтан, вақте чизе рушан нест. Ба мо хабари пурсарусадое доданд, вале далеле пешниҳод накарданд ва акнун пешниҳод доранд, ки ба он бовар кунем", - гуфт Даврон Абаев.

Пештар аз ин ҳукумати Қазоқистон хабари истифодаи барномаи ҷосусии Pegasus-ро барои гӯш кардан ва хондани муколамаҳои чанде аз қазоқистониҳо "пуч" унвон карда буд.

Маркази пажуҳиши фасод ва ҷиноятҳои созмонёфта (OCCRP) рӯзи 20 июл чанд тани дигарро аз Қазоқистон ба рӯйати барномаи ҷосусии "Pegasus" (Пегас) шомил кард. Дар ин рӯйхат ҳамакнун президенти Қазоқистон Қосимҷомарт Тоқаев, сарвазири он кишвар Асакар Мамин ва ҳокими шаҳри Алмато Бакитҷон Сагинтаев шомил ҳастанд. Дар ин рӯйхат дар ибтидо аз Қазоқистон панҷ кас шомил буданд - ду рӯзноманигор ва се фаъоли иҷтимоӣ.

Pegasus Project 17 созмони ғайридавлатӣ ва даҳҳо рӯзноманигорро муттаҳид мекунад, ки иттилои аз ширкати исроилии NSO Group беруномадаро омӯхтаанд. Ин иттилоъ аз рақами телефонҳое иборат аст, ки ба эҳтимоли зиёд тавассути барномаи ҷосусии Pegasus рахна шудаанд. Рахнасозии телефонҳоро ҳукуматҳои кишварҳои гуногуни дунё фармоиш додаанд. Тарҳи Pegasus Project ба иттилои ҷамъовардааш 18 июл шуруъ кард. Дар ҳоли ҳозир маълумот дар бораи рахна шудани телефонҳо 18 роҳбари кишварҳои дунё аз Аврупо, Африқо, Осиё ва Шарқи Наздик, аз ҷумла президентҳои Фаронса Эммануэл Макрон, шоҳи Марокаш Муҳаммади Шашум ва президенти Мексика нашр шудааст.

OCCRP менависад, ки рахна кардани телефони президент ва сарвазири Қазоқистонро эҳтимолан мақомоти худи Қазоқистон супориш додаанд.

Ба ҷуз аз Қазоқистон, ба иттилои пажуҳишгарон, барномаи Pegasus-и ширкати NSO Group-ро мақомоти Озарбойҷон, Маҷористон, Мексика, Баҳрайн, Ҳинд, Индонезия, Марокаш, Руанда, Ҷумҳурии Конго, Арабистони Саудӣ - дар маҷмуъ наздики 50 давлат истифода кардаанд.

Барномаи Pegasus имкон дорад, тавассути паёмакҳои одӣ вориди телефон шуда, маълумотро рабояд ва муколамаҳоро хонад.

Дар Узбекистон маъракаҳои интихоботи президентӣ оғоз шуданд

Интихобот дар Узбекистон. Акс аз бойгонӣ.

Комиссияи марказии интихобот ва раъйпурсии Узбекистон 23 июл қарор кард, ки маъракаҳои интихоботи президентии он кишвар оғоз карда шаванд. Дар ин бора расонаҳо бо истинод ба раиси комиссия Зайниддин Низомхоҷаев иттилоъ доданд.

"Бар асоси банди 90 ва 117-и Конститутсияи Узбекистон тасмим гирифта шуд, маъракаҳои интихоботи президентии кишвар, ки қарор аст, 24 октябр баргузор гардад, аз 23 июл оғоз карда шаванд", - изҳор доштааст Низомхоҷаев дар як нишасти хабарӣ дар Тошканд.

Тибқи Кодекси интихоботии Узбекистон, ҳаққи пешбарии номзад ба мақоми президентиро ҳизбҳои сиёсие доранд, ки на дертар аз шаш моҳ пеш аз интихобот дар Вазорати адлияи он кишвар сабтином шудаанд.

Пешбарии номзадҳо ба мақоми президентии Узбекистон дар интихоботи моҳи октябри имсол аз 20 август то 9 сентябр идома меёбад.

Ду ҳизб -- "Эрк" ба раҳбарии сиёсатмадори мухолиф Муҳаммад Солеҳ ва Ҳизби нави "Ҳақиқат ва Тараққиёт", ки онро Хидирназар Аллақулов раҳбарӣ мекунад, талош карданд, барои иштирок дар интихоботи президентии Узбекистон худро сабти ном кунанд, вале аз Вазорати адлияи он кишвар борҳо ҷавоби рад гирифтанд.

Тоҷикистон барои назорати сарбанди кӯли Сарез дастгоҳҳои нав насб мекунад

Кӯли Серез, акс аз кайҳон. NASA

Тоҷикистон дар кӯли Сарез низоми нави огоҳсозӣ аз хатарро насб карданист, ки ба иттилои мақомот, арзиши он беш аз як миллион доллар аст.

Эмомалӣ Иброҳимзода, муовини раиси Кумитаи ҳолатҳои фавқулоддаи Тоҷикистон рӯзи 23-юми июл гуфт, ки "дастгоҳҳои низоми нави маниторинг ва огоҳсозӣ моҳи август дар кӯли Сарез насб хоҳанд шуд."

Ба қавли ӯ, дастгоҳҳои низоми нав бо маблағгузории Бонки Осиёии Рушд аз сӯи як ширкти итолиёвӣ дастрас шудааст. Насби дастгоҳҳо дар доираи тарҳи миллӣ оид ба мудирияти хатари фалокатҳои ногаҳонӣ, ки Бонки Осиёии Рушд онро маблағгузорӣ мекунад, сурат мегирад.

"Қаблан ҳам дастгоҳҳо буданд, вале ин дастгоҳҳо сад маротиба аз онҳо беҳтар аст, дар як муддати кутоҳ, мардумро аз фалокат, огоҳ мезозад",-афзуд, Эмомалӣ Иброҳимзода.

Кӯли Сарез соли 1911 бар асари кӯчиши кӯҳ миёни навоҳии Рӯшону Мурғоби имрӯз ба вуҷуд омада, ҳудуди 17 миллиард метри мукааб об дорад. Мутахассисон мегӯянд, ки дар сурати рахнашавии оби Сарез, на танҳо сокинони рустоҳои Бадахшони Тоҷикистон, балки сокинони дигар кишварҳои поёноби минтақаи Осиёи Марказӣ низ бо хатар рӯ ба рӯ мешаванд.

Озарбойҷон ба Тоҷикистон 40 ҳазор воя ваксинаи AstraZeneca туҳфа кард

Озарбойҷон ба Тоҷикистон 40 ҳазор воя ваксинаи AstraZeneca -ро ҳамчун кӯмаки башардӯстона фиристод.

Вазорати тандурустии Тоҷикистон мегӯяд, бастаҳои ваксинаҳо тариқи ҳавопаймо аз Боку ба Душанбе интиқол ёфта, дар анбори махсуси вазорат нигаҳдорӣ ва тибқи нақша байни аҳолии кишвар тақсим мегардад.

Тоҷикистон моҳи марти соли ҷорӣ дар доираи барномаи COVAX зери назари Созмони Ҷаҳонии Тандурустӣ 192 ҳазор воя ваксинаи AstraZeneca дарёфт карда буд. Ҳамчунин дар охири моҳи июн Чин ба Душанбе 300 ҳазор воя ваксинаи Коронавакро ройгон тақдим намуд. Тибқи омори расмӣ, то ҳафтаи гузашта дар Тоҷикистон беш аз 421 ҳазор нафар зидди бемории коронавирус эм карда шуданд.

Мавлавӣ Абдуллобеки Язғуломиро аз боздоштгоҳи Душанбе ба Хоруғ бурданд

Мақомоти тафтишотӣ рӯҳонии шинохта Абдуллобек Қувватбеков, маъруф ба Мавлавӣ Абдуллои Язғуломиро барои таҳқиқи парвандааш, яъне гумони “Даъвати ифротгароӣ тариқи Интернет” (моддаи 307, қисми 1) аз Душанбе ба Хоруғ овардаанд.

Бо тасдиқи ин хабар як манбаъ дар Додситонии Хоруғ рӯзи 23-уми июл ба Радиои Озодӣ гуфт, азбаски иттиҳомоти мавриди тафтиш дар Язгулом ва Ванҷ рӯй додаанд, айбдоршаванда Қувватбеков як ҳафта пеш ба ин ҷо интиқол дода шуд ва то анҷоми тафтиш дар боздоштгоҳи муваққатӣ нигоҳ дошта мешавад.

Наздикони рӯҳонӣ мегӯянд, аз интиқол ёфтани Қувватбеков онҳоро огоҳ накардаанд ва айни ҳол дар борааш иттилое надоранд.

Қувватбек Қувватбеков бародари Абдуллобек рузи 23-уми июл ба Радиои Озодӣ гуфт, кӯчондани рӯҳонӣ ба Хоруғ аз оғоз низ эҳтимол дошт, чунки мақомот ҳанӯз ҳангоми боздошташ гуфта буданд, ки парвандаро мақомоти интизомии Вилояти Мухтори Куҳистони Бадахшон боз кардааст.

Ин манбаъ ҳамзамон меафзояд, Абдуллобек Қувватбеков аз замони боздошташ дар моҳи гузашта то ҳоло вакили мудофеъ надорад.

Қувватбек Қувватбеков мегӯяд, “фақат як маротиба ҳамроҳ бо писари Абдуллобек дар боздоштгоҳ бо вай мулоқот кардем, вале ҳеҷ натавонистем суҳбати озод кунем ва фаҳмем, ки чӣ масъала аст. Дар вақти суҳбати мо се намояндаи тафтишот ҳузур дошт, фақат аҳволпурсӣ кардем тамом."

Абдуллобек Қувватбеков, рӯзи 18-уми июн ҳамроҳи бародараш Иззатулло Қувватбеков дар шаҳри Душанбе боздошт шуда буданд ва баъди як ҳафта Иззатулло раҳо карда шуд.

Пас аз раҳоии яке аз бародарон, мақомот муҳлати ҳабси Абдуллои Язғуломиро барои ду моҳи дигар дароз карданд ва ӯро ба боздоштгоҳи муваққатии рақами аввал (СИЗО) интиқол додаанд.

Дар авохири моҳи гузашта дар ҷамоати Язғуломи ноҳияи Ванҷ, зодгоҳи Абдуллобек Қувватбеков чанд сокин барои раҳоии ӯ гирдиҳамоӣ кардаанд. Як тан аз сокинони ноҳияи Ванҷ дар суҳбат ба Радиои Озодӣ гуфта буд, ки эътирозгарон аз тарафи кормандони милиса пароканда шуданд ва се нафар аз онҳо боздошт шудаанд, вале пас аз се рӯз раҳо шуданд.

Дар навори видеоие, ки дар шабакаҳои иҷтимоӣ нашр шудааст, дида мешавад, онҳо аз мақомоти Тоҷикистон мехоҳанд, Мавлавиро раҳо кунанд.

Ба гуфтаи Қувватбеков гурӯҳи 8-нафараи кормандони мақомоти интизомӣ субҳи рӯзи 18-уми июн ба манзили зисти Мавлавӣ Абдуллоҳи Язғуломӣ омада ӯро ҳамроҳи бародараш Иззатулло ва бо китобҳои мазҳабиву динӣ ва 80 ҳазор доллар маблағ бо худ бурданд.

“Чанд нафар хонаро тагуру карданд ва ҷуз Қуръон китобҳои дигари диниро ҷамъ карданд ва пулеро, ки бародарам барои фарзандонаш мехост, дар Душанбе хона харад, 80 ҳазор доллар ҳам гирифтанду бо ҳардуи бародарам бурданд”, -- иброз дошт Қувватбеков.

Боздошти Мавлавӣ Абдуллои Язғуломӣ дар ҳоле сурат гирифтааст, ки наворҳои зиёди ӯ бо мавъизаҳои пуршӯри динӣ ва даъватҳои ваҳдати динию миллӣ дар шабакаҳои иҷтимоӣ паҳн шудаанд. Манбаъҳои дигар мегӯянд, ин рӯҳонӣ бештар бо табобати беморони рӯҳӣ ва дуохонӣ машғул будааст.

Ёфтҳои бештар

XS
SM
MD
LG