Посухҳои раиси Донишгоҳи исломӣ

Ҳамду сано бар Худои яккаи Раҳмону Раҳим ва салоту дуруди бепоён бар Пайғамбарамон Муҳаммад (с), ки раҳматан лил оламин аст.
Бародар Саманд агар мо ба таҳаввулоти на танҳо минтақа, балки ба ҷаҳон нигарем, як навъи бедоршавии эҳсосоти миллиро дар рўи олам мебинем. Албатта кишварҳои минтақа низ баъд аз истиқлолият ҳар кадоме тибқи фарҳанг ва ғояҳои миллии хеш пеш рафта истодааст. Мо медонем, ки дар ташаккули фарҳанги миллии мо Ислом нақши арзандае дорад. Президенти кишвар мўҳтарам Эмомалӣ Раҳмон низ дар суханрониаш иброз намуда буданд, ки фарҳанги миллиро бо фарҳанги исломӣ муқобил гузоштан хато мебошад.
Яъне дини мубини ислом дар тули қарнҳо сарчашмаи фарҳангӣ барои бисёре аз миллатҳо буда аст ва мебошад.
Аммо, мутаассифона, ҳастанд гурўҳҳое, ки исломро василае барои ғаразҳои шахсиашон (сиёсиашон) истифода мебаранд.
Аммо дар хусуси он, ки ба кадом роҳ давлатҳо ба ислом вобаста мешаванд, ҳаминро бояд қайд намоям, ки дар ҷомеаи имрўза, ҳар кишвари олами исломиеро, ки нагиред, ҳаёти иқтисодӣ, фарҳангӣ- иҷтимоъии онҳо бо Ислом зич алоқаманд аст. Дар оянда имкон дорад, ки нуфузи Ислом боз ҳам зиёдтар шавад ва зиндагии сокинони онро бо файзи Ислом шодоб созад. Вале ин ба терроризму ифротгароӣ чандон муносибат надорад, баръакс ин ҳодисаҳои номатлуб метавонанд раванди солими баланд шудани нуфузи дини мубини Исломро коҳиш диҳанд.
Терроризм чун падидаи номатлуб ҳаргиз ба дини мубини Ислом мансуб нест, зеро Ислом динест саршор аз муҳаббат, дўстӣ, вафодорӣ ба аҳду паймон, тарғибгари таҳаммулгароӣ ва ҳидоятгари роҳи рост.
Пешрафти кишвар ва некўаҳволии мардум пеш аз ҳама ба субот ва амният марбут аст. Ҳатто барои адо намудани фароизи динӣ низ субот лозим аст. Мо мусалмонҳо имрўз ба як қатор масоил рў ба рў ҳастем, ки роҳи ҳаллашон танҳо дар дасти худи мост. Аммо, мутаассифона, мо аз паи ислоҳи ин камбудиҳо набуда, масъалаҳоро аз рўи мантиқ ҳал наменамоем ва гуноҳро ба дўши дигарон бор мекунем.

Дар ДИТ то ба ҳол чунин ҳодисаҳои номатлуб, мисли ришвахорӣ, рух надодаст. Роҳбарияти Донишкада пайваста кўшиш ба харҷ медиҳад, ки пеши ҳар гуна фасодро гирад ва Донишкадаро бо чунин ҳодисаҳои ғайриахлоқӣ ва ғайрииҷтимоӣ бадном насозад. Аз ҷумла корҳои зиёди тарбиявӣ, ахлоқӣ дар байни устодон ва шогирдон бурда мешавад, ки нафрати онҳо нисбати чунин ҳодисаҳо ба вуҷуд биёяд.
Ғайр аз ин роҳбарияти Донишкада бо Агентии муборизаи зидди ҳодисаҳои корупсионӣ барои пешгирии фасоди иқтисодӣ ҳамкории зич дорад.
Боқӣ ҳама ба виҷдону имони ҳар шахс вобастагӣ дорад.

Довари воқеъӣ Худованд аст. Ҳар як фарди мусулмон масъулияте, ки ба зимма дорад онро дар доираи имкониятҳои мавҷуда, бо тавфиқоти илоҳӣ амалӣ месозад.
Имрўз роҳбарияти ДИТ аввалан шароите барои муҳассилин дар ихтиёр гузоштааст, ки тамоми меъёрҳои шаръиро иҷро намоянд ва имконияти омўзиши улуми динӣ пурра фароҳам оварда шудааст.
Дар Донишкада аз рўи 5-ихтисос, ки нақшаи таълимии он мутобиқ ба Донишгоҳҳои олами исломӣ мебошад, сохта шудааст ва аз тарафи Вазорати маорифи Ҷумҳурии Тоҷикистон тасдиқ гардидааст. Тибқи ин барномаҳои таълимӣ, Донишкадаи исломии Тоҷикистон аъзои федератсияи Донишгоҳҳои олами исломӣ-Исеско мебошад.
Дар Донишкадаи исломӣ устодон аз Донишгоҳи Ал- Азҳари Ҷумҳурии Мисри Араб 5-нафар ва 1-нафар аз Донишгоҳи Қоҳираи Ҷумҳурии Мисри Араб фаъолият мекунанд. Инчунин ба донишҷўён Домуллоҳои шинохтаи Тоҷикистон ва ҷавонони тоҷике, ки донишгоҳҳои байналмилалии исломиро хатм кардаанд, таълим медиҳанд. Бо итминон гуфта метавонам, ки дар ДИТ ҳеҷ як маводи зиддидинӣ ҷой надорад ва ҷой дошта ҳам наметавонад.
Имрўз Донишкадаи исломии Тоҷикистон иртиботи худро бо донишгоҳҳо ва созмонҳои бузурги олами ислом барқарор намудааст. Масалан Робитаи олами исломӣ, Донишгоҳи исломии «Муҳаммад ибни Саъуд»-и шоҳигарии Арабистони Саъудӣ, Донишгоҳи «Умм-ул-Қурро»-и Арабистони Саъудӣ, Донишгоҳи «ал-Азҳар»-и Ҷумҳурии Мисри араб, Муассисаи фарҳангии Ҷумъа ал-Моҷид-и Аморати муттаҳидаи араб, иттиҳоди мадориси исломӣ ва арабӣ ва дигар донишгоҳҳои байналмилалӣ.
Ҳамаи мову Шумо ба умеди некиҳои охират кўшиш ба харҷ медиҳем ва Худованд дар ин ҷода моро муваффақ гардонад (Омин).

Чи тавре, ки маълум аст банда мисли дигар устодон дар даврони Шўравӣ илмҳои Фиқҳ, Ҳадис, Тафсир ва ғайраро дар назди устодони бонуфўзи алоҳида омўхтаам ва мутахассиси соҳаи фиқҳи исломӣ мебошам. Дар донишкада бар дўши ман масъалаҳои ташкили раванди таълиму тарбия, роҳбарии фаъолияти Донишкада ҳамчун муассисаи олии таҳсилӣ гузошта шудааст. Ба ин хотир ман ва маъмурияти Донишкада на танҳо мутахассисони варзидаи улуми динии кишварро, балки мутахассисонро аз хориҷи кишвар низ даъват кардаем.
Чунон ки дар боло зикр шуд, мутахассисон аз донишгоҳҳои маъруфи олами ислом дар Донишкада таълим медиҳанд.
Агар касе аз олимони кишвар ҳоло дар ин Донишкада фаъолият надошта бошанд, ба хотири он нест, ки мо онҳоро барои таълим дар Донишкада сазовор намедонем, балки онҳо худ то ба ҳол рағбат зоҳир накардаанд ва ё ҳозир нестанд муқаррароти заруриро доир ба таълим дар муассисаи таҳсилоти олӣ иҷро намоянд. Дар акси ҳол роҳбарияти Донишкада бо камоли майл омодаи қабули чунин шахсиятҳо мебошад. Донишкада дар паи он мекўшад, ки дастуроти Пайғамбари гиромӣ (с) муаллими башариятро амалӣ созад. Пайғамбари гиромиқадр (с) фармуданд:

«Дар миёни шумо ду чизро гузоштам, ки агар ба онҳо чанг занед ҳаргиз гумроҳ нахоҳед шуд китоби худо ва суннати ман».

Илова бар ин метавон тазаккур дод, ки раёсати Донишкадаи исломӣ дар тули фаъолияти худ ҷиҳати арҷгузорӣ ба Қуръони карим зиёда аз 15 озмуни «Ҳифз ва қироати Қуръони карим»-ро дар сатҳи ҷумҳуриявӣ баргузор намудааст, ки ғолибони ин озмунҳо баъди гирифтани роҳхат дар озмунҳои байналмилалии «Ҳифз ва қироати Қуръони карим» бо сари баланд ба ватан баргаштаанд.
Қобил ба ёдоварист, ки соли гузашта бо сарпарастии бевоситаи Президенти мамлакат ҷаноби олӣ мўҳтарам Эмомалӣ Раҳмон дар кохии бошукўҳи равобити пойтахт мусобиқаи «Ҳифз ва қироати Қуръони карим» баргузор гардид, ки дар таърихи Тоҷикистони азиз назир надошт.
Инчунин озмунҳои ҳифзи аҳодиси набавӣ миёни донишҷўён ҳамасола гузаронида мешавад, ки ин ба раванди ҳифзи ҳадисҳои Пайғамбарамон Муҳаммад (с) боз ҳам тақвият мебахшад.
Нуфузи донишкада ва шўҳрати он пайваста меафзояд. Аз ҷумла имрўз Донишкадаи исломии Қирғизистон ва федератсияи Россия хоҳиши омўхтани таҷрибаи таълимии ДИТ-ро доранд.
Ногуфта намонад, ки аз лиҳози мазмуни барномаҳои таълимӣ, ДИТ миёни давлатҳои собиқ иттиҳоди Шўравӣ мақоми хосро касб кардааст. Донишкадаи исломӣ ихтисоси Улуми Қурониро бо ҷалби мутахассисон ва сарпарастии ҳайати оламии Таҳфизи Қуръони карим таъсис додаст, ки ягон донишкадаҳои исломии минтақа чунин ихтисосро надорад.

Донишкадаи исломии Тоҷикистон тибқи Оинномаи худ, ки танҳо бар асоси мазҳаби ҳанафӣ мебошад, таълими улуми исломиро ба роҳ мондааст ва то ба имрўз ягон нафар аз уламо ва мутахассисони шиамазҳаб барои таълиму тарбия ба донишкада даъват нашудаанд. Бинобар гуфтан мумкин аст, ки ин овозаҳо асосе надоранд.

Ман забони арабиро ба андозае, ки барои пешбурди фаъолиятам зарўр аст, медонам ва эҳтиёҷ ба тарҷумон надорам.

Тибқи дастуроти Худову Расул (с) хиёнат гуноҳ аст. Чунончи Худованд дар ояи 27- сураи ал-Анфол мефармояд:
«Эй мусалмонон хиёнат макунед бо Худову Расул ва хиёнат макунед амонатҳоятонро дар ҳоле, ки Шумо медонед».
Тибқи ин амри худованд, ҳар мусулмон кўшиш мекунад, ки амал намояд. Ман низ дар талоши онам, ки хиёнате аз ман сар назанад.
Албатта ман низ ҳамроҳ бо гурўҳи зиёди донишмандони улуми динии ҷумҳурӣ аз бисёр устодоне, ки имрўз дар донишкада ва берун аз он таълим медиҳанд, сабақ омўхтаам.
Нисбати дипломҳои собиқ Донишгоҳи исломии Тоҷикистон ба номи Имом Тирмизӣ ҳаминро гуфтаниям, ки на танҳо дар Тоҷикистон, балки дар дигар давлатҳо низ донишгоҳҳое ҳастанд, аз ҷониби давлат эътироф нашудаанд. Донишгоҳи исломии ба номи Имом Тирмизӣ низ аз ҳамин қабил буд.
Хушбахтона баъди талошҳои зиёди Президенти кишвар мўҳтарам Эмомалӣ Раҳмон Донишкада исломӣ мақоми давлатиро касб намуд.
Муҳассилини донишгоҳи ба номи Имом Тирмизӣ шомили ин донишкада гардиданд ва онҳое, ки донишгоҳи ба номи Имом Тирмизиро хатм карда бошанд, метавонанд аз рўи барномаи донишкада маълумоти худро мукаммал созанд.

Фикр мекунам Донишкадаи исломии Тоҷикистон ва ман ҳамчун роҳбари ин донишкада ҳаргиз ваколати онро надорем, ки ба ҷамоъати Таблиғ, Салафия ё ягон гурўҳи дигар терроризмро нисбат диҳем.

Дар Донишкада танҳо фанҳои ёрирасон ва тахассусӣ аз улуми иҷтимоӣ дарс дода мешавад.
Нисбати масъалаи фатво барои риш нагузоштан бошад, хуб мешуд, ба шўъбаи фатвои Маркази исломӣ муроҷиат мекардед.
Боқӣ саволу пурсишҳое, ки аз ҷониби Шумо шудааст, дар Донишкадаи исломӣ ҳамаи пешниҳодҳоятон амалӣ шудаанд. Дар ин бора метавонед аз сайти Донишкада маълумот гиред. Аз муносибати ғамхоронаатон сипосгузорем ва кўшиш дорем, ки мутахассисони хуби соҳаи улуми исломиро тарбия намоем.
Мақсаду ҳадафи Донишкада низ маҳз аз ҳамин иборат аст.