Додгоҳи гурӯҳи 33 нафарии мансуб ба Низом Ҷӯраев

Бозбинӣ дар боздоштгоҳи муваққати рақами 2 – и шаҳри Хуҷанд, дар паси дарҳои баста сурат мегирад ва интизор меравад, ҳукми Додгоҳи олиро нисбат ба 31 нафар аз гурӯҳи мазкур иваз кунад.

Моҳи июни соли гузашта Додгоҳи олӣ ин афродро бо ҳукми худ аъзои як иттиҳоди муташаккили ҷиноӣ номид ва дар фасоди моливу аз худ кардани маблағҳои бузурги давлатӣ ва бархеро дар куштори Толиб Бобоев – собиқ муовини додситони кулли Тоҷикистон гунакор хонд ва 31 нафар аз онҳоро ба муҳлатҳои аз 10 то 25 сол ба ҳабс маҳкум кард. Танҳо 2 нафар аз ин гурӯҳ, ки ба содири ҷиноятҳои иқтисодӣ муттаҳам мешуданд, бегуноҳ дониста шуда, аз толори мурофиа озод гашта буданд.

Дар пайи он Додситонии кулли Тоҷикистон ин ҳукми Додгоҳи олиро ғайримунсифона хонд ва талаб кард, то таҷдиди назар кунад.
Вакилони мудофеъ ва пайвандони маҳкумшудагон ба мақомоти мухталиф шикоят бурда, бозбинии кассатсионии парвандаро тақозо карданд.

Ин 33 нафар ҳама сокини Исфара мебошанд ва аз пайвандону ҳамкорони собиқи Низом Ҷӯраев – пешина соҳиби корхонаҳои спирт ва кимиёи Исфара ва вакили маҷлиси вилояти Суғд ҳастанд. Ба гуфтаи пайвандону вакилони мудофеъи ин афрод, барои Додгоҳи олӣ узви як иттиҳоди ҷиноӣ номидани муттаҳамин кофӣ буд, то 31 нафарро аз 10 то 25 сол ба зиндон ҳукм кунад. Ҳамдам Ваҳҳобов, ки бародараш – Ғаниҷон Ваҳҳобов аз гурӯҳи мазкур ба 21 соли ҳабс маҳкум шуд, дар суҳбат бо Радиои Озодӣ гуфт, гунаҳкор намудани аксари кулли гурӯҳи 33 нафарӣ бо банди 187 – и Асноди ҷиноии Тоҷикистон – таъсиси иттиҳоди ҷиноӣ ва иштирок дар он, дар ҳоле ки айбдоркунандаи давлатӣ онҳоро танҳо ба содири ҷиноёти иқтисодӣ муттаҳам шинохт, аз рӯи адолати додгоҳӣ нест.

Низом Ҷӯраев аз Тоҷикистон берун рафта, таҳти пайгарди Интерпол қарор дорад. Ду бародараш: Фахриддин ва Толиб Ҷӯраевҳо ва ду вакили собиқи Маҷлиси шаҳри Исфара: Содирхон Убайдуллоев ва Илёсхон Абдуллоҷонов дар курсиҳои айбдорӣ нишастаанд.

Раиси мурофиа ва вакилони мудофеъ, ба далели дар паси дарҳои баста ҷараён доштани он аз суҳбат бо хабарнигорон худдорӣ варзиданд. Наим Мансуров, раиси додгоҳи вилояти Суғд, ки дар толори он муҳокимаи аввали гурӯҳи 33 нафарӣ аз ҷониби Додгоҳи олӣ ҷараён гирифта буд, гуфт, ҳукми Додгоҳи олӣ аз соли гузашта ҳанӯз нерӯи қонунӣ нагирифтааст ва додгоҳи кассатсионӣ онро бозбинӣ хоҳад кард.

Боздошти гурӯҳи 33 нафарӣ дар тирамоҳи соли 2007 ба думболи ифтитоҳи парванда алайҳи Низом Ҷӯраев сурат гирифта, дар ҷараёни мурофиаи аввал то моҳи июни соли 2009 16 нафари онҳо дар боздошт ва 17 тан дар озодӣ ба сар мебурданд.