Манотиқи нашаротӣ: / Ҷаҳони варзиш

Рейтинги FIFA: Тоҷикистон шаш зина поён рафт

20.09.2007

Тоҷикистон дар рейтинги моҳи сентябр шаш зина поинтар - ба ҷои 151-ум фаромад. Ва алҳол миёни 46 дастаи мунтахаби қорраи Осиё дар мақоми 29-ум ва байни кишварҳои Осиёи Марказӣ пас аз Узбакистон (62-юм), Қазоқистон (120-ум) ва Қирғизистон (149-ум) ҷойгир шуда, танҳо аз Туркманистон (174-ум) пеш аст.

Тоҷикистон дар феҳристи нави FIFA миёни 15 кишвари собиқи Иттиҳоди Шӯравӣ дар ҷойи чаҳордаҳум мебошад. Укроин миёни ин кишварҳо дар ҷои аввал буда, дар феҳристи ҷаҳонӣ ду зина поинтар - ба ҷои 17-ум фаромад. Русия низ ду зина поинтар - 26-ум шуд.

Беҳтарин тими миллии қорраи Осиё - Ҷопон ҳафт зина боло рафт ва феълан дар ҷои 34-ум мавқеъ дорад. Тими миллии Эрон, ки алҳол дар Осиё дуввум аст, чаҳор зина болотар - ба ҷои 40-ум суъуд кард. Австралиё, ки узви Конфедеросиёни футболи Осиё мебошад, дар феҳристи FIFA як зина боло рафта, дар мақоми 48-ум қарор гирифтааст.

Дар раъси ин феҳрист бошад, миёни 208 дастаи мунтахаб Итолиё, қаҳрамони феълии футболи ҷаҳон, ҷой гирифтааст. Аргентина мавқеъашро дар зинаи дуввум нигаҳ дошт. Вале Бразил ду зина поинтар - ба ҷойи севвум фаромад. Миёни даҳ тими беҳтарини ҷаҳон, ҳамчунин, Олмон, Ҳолланд, Фаронса, Испониё, Португол, Инглистон ва Хорватия ҷойгир шудаанд.