Манотиқи нашаротӣ: / Ҷаҳони варзиш

18-уми август - оғози мусобиқоти қаҳрамонии футболи ҷаҳон

16.08.2007

Нахуст чаҳор бозӣ дар гурӯҳҳои «А» ва «В» барпо мегардад. Дар шаҳри Сувон дастаҳои Коста-Рика ва Того, Куриёи Ҷанубӣ ва Перу ва дар шаҳри Сегвипо тимҳои Куриёи Шимолӣ ва Инглистон, Бразилия ва Зеландияи Нав рақобат мекунанд.

Ин мусобиқот то 9-уми сентябр идома хоҳад кард. Марҳилаи аввал бо ширкати 24 даста дар 6 гурӯҳ доир мегардад.

Дастаи мунтахаби наврасони Тоҷикистон, ки барои аввалин бор дар давраи ниҳоии мусобиқоти қаҳрамони футболи ҷаҳон ширкат меварзад, дар гурӯҳи «Е» 20-уми август бо тими Иёлоти Муттаҳидаи Амрико, 23-уми август бо дастаи Белгия ва 26-уми август бо дастаи Тунис рақобат хоҳад кард.


Медали биринҷии муштзани тоҷик

Маъруфҷон Файзуллоев, варзишгари тоҷик дар мусобиқоти байнулмилалӣ дар риштаи бокс дар шаҳри Урумчии Ҷумҳурии Мардумии Чин барандаи медали биринҷӣ гардид.

Абдурашид Маҳмадҷонов, раҳбари мактаби махсуси варзишии кӯдакону наврасони шаҳри Душанбе, ба радиои Озодӣ гуфт, шогирди ин мактаб Маъруфҷон Файзуллоев дар рақобатҳо дар вазни то 64 килограмм бар Муҳаммад Факхон, аз Малайзиё пирӯз шуда, дар даври минбаъда аз муштзани тими мизбон Айкелами Балати мағлуб гардид ва ҷойи севвумро касб кард.

Ба иттилоъи оқои Маҳмадҷонов дар севвумин давраи ин мусобиқот беш аз 90 варзишгар аз 13 кишвар ширкат доштанд. Вай афзуд: «Аз 14-ум то 20-уми сентябри соли равон дар шаҳри Душанбе мусобиқоти байнулмилалӣ барои дарёфти Ҷоми истиқлоли Тоҷикистон баргузор мешавад. Он як давраи омодагии муштзанҳои тоҷик ба мусобиқоти қаҳрамонии бокси ҷаҳон, ки аз 17-уми октябр то 3-юми ноябр дар Иёлоти Муттаҳидаи Амрико доир мегардад, маҳсуб меёбад.»
 
 
Ҳаҷми матн