Пайвандҳои дастрасӣ

Хабари нав

Занҷонӣ мегӯяд, дар Тоҷикистон дастгоҳи махфии сабти гуфтугӯҳоро дорад


Бобак Занҷонӣ дар додгоҳ
Бобак Занҷонӣ дар додгоҳ

Миллиардери боздоштшудаи эронӣ иддао кардааст, ки дар Тоҷикистон дастгоҳи махсуси сабти гуфтугӯҳоро дорад ва он дар хидмати пулиси Тоҷикистон аст. Аммо ВКД ин иддаоро рад кард.

Бобаки Занҷонӣ, миллиардери боздоштшудаи эронӣ, рӯзи 31 октябр дар мурофиаи додгоҳияш дар шуъбаи 15-уми Додгоҳи инқилоби исломии Теҳрон иддао карда, ки дар Тоҷикистон дастгоҳи махсуси электронӣ дорад ва аз он пулис истифода мекунад. Оқои Занҷонӣ шарҳ надодааст, ки ин дастгоҳ дар куҷо насб шуда, аммо ҳушдор додааст, ки имкони сабти гуфтугӯҳоро дорад.

Ин миллиардери боздоштшуда дар додгоҳ хитоб ба мақомоти эронӣ гуфтааст, агар лозим шавад, гуфтугӯҳояшонро фош хоҳад кард. "Ин кампи электронӣ серверҳои қудратманд дорад ва пулиси Тоҷикистон аз он истифода мекунад ва агар муколамотро биёварам, то гӯш кунед, хиҷолат мекашед," -- афзудааст ӯ.

Анвар Ализода, раиси дастгоҳи Вазорати корҳои дохилии Тоҷикистон, рӯзи 2 ноябр дар суҳбат бо Радиои Озодӣ гуфт, "дар ин бора ҳеч чиз гуфта наметавонем".

Бобаки Занҷонӣ, ки дар гузашта аз ӯ ба унвони "дӯст"-и бархе аз мақомдорони тоҷик ҳам ном бурда мешуд, ин ҳарфҳоро ҳангоме ба забон оварда, ки аз фурӯши амволаш аз сӯи мақомот шадидан нигаронӣ кардааст. Ӯ гуфтааст, "иҷоза намедиҳам, ба нафъи худ баҳрабардорӣ кунед. Магар мешавад ҳавопаймои 15-миллион долларии маро севумин миллион доллар, қолии гули абрешими 900-миллион туманиро 1,100 миллион туман ва хонаам дар хиёбони Фаришта, ки 600 миллиард туман арзиш дорад, ба 143 миллиард туман фурӯшед?"

Мурофиаи додгоҳии Бобаки Занҷонӣ аввали моҳи октябр таҳти раҳбарии қозӣ Абулқосим Салавотӣ шуруъ шуд ва нахустин ҷаласаи додгоҳ ба таври ошкор сурат гирифт. Ғулом Муҳсин Ажаӣ, сухангӯи додгоҳи Эрон қаблан гуфта буд, ки парвандаи Бобаки Занҷонӣ 209 ҷилд ва 40 ҳазор саҳифаро дар бар мегирад.

Бобак Занҷонӣ аз сармоядорони вобаста ба Ҷумҳурии Исломӣ, ки дар Тоҷикистон ҳам сармоягузорӣ кардааст, гуфта мешавад барои дур задани таҳримҳои байнулмилалӣ алайҳи Эрон, бо вазорати нафт барои фурӯши нафт ва интиқлоли пули он ба дохили Эрон ҳамкорӣ мекард ва дар декабри соли 2013 ба иттиҳоми напардохтани қарзҳои худ боздошт шуд. Қарзҳои Бобаки Занҷонӣ дар назди Вазорати нафти Эрон 2,5 миллиард доллар гуфта мешавад.

Бо ин ҳама тибқи гузоришҳо, ӯ ба "бегуноҳ" будани худ таъкид намуда ва гуфтааст, ки ба унвони сарбоз ё басеҷии иқтисодӣ ба низом кӯмак кардааст.

Баррасии парвандаи Бобаки Занҷонӣ дар ҳоле оғоз шудааст, ки чанд рӯз қабл Ҳасани Деҳдаштӣ, як узви Кумитаи пайгирии парвандаи Бобаки Занҷонӣ дар парлумони Эрон бо ишора ба ин, ки шеваи сармоягузории Занҷонӣ дар кишварҳои хориҷӣ паҳлӯҳои мухталифе дорад, гуфт, ки "ба унвони мисол тайи маълумоте дар мавриди сармоягузории Занҷонӣ дар Тоҷикистон, ки аз дӯстони худ дарёфт кардаем, гуфта мешавад, ки Занҷонӣ аз 500 то 600 миллион доллар дар Тоҷикистон сармоягузорӣ ва ҳамчунин бо афроди пурнуфузи ҳукумати Тоҷикистон робита дорад."

Ба гуфтаи вай, "ҳамчунин дар пайи маълумоти ба даст омада, гуфта мешавад, ки бисёре аз амволи бонки Бобаки Занҷонӣ дар Тоҷикистон ба номи Занҷонӣ нест ва шояд ин амвол ба номи бархе аз афроди бонуфузи давлати Тоҷикистон ва афроди савуми дигар бошад."

Узви парлумони Эрон дар идома ба шеваи ба даст овардани маълумот аз амволи Бобаки Занҷонӣ дар Тоҷикистон гуфт, ки "интизор доштем дар мавриди сармоягузории Бобаки Занҷонӣ дар Тоҷикистон системаҳои иттилоотӣ ва амнияти фаъол шаванд, аммо замоне дидем, ки фаъолияте вуҷуд надорад, дӯстони худро дар заминаи мазкур фаъол кардем, то бираванд ва иттилоот дар бораи сармоягузории Занҷонӣ дар Тоҷикистонро ба даст биёранд, ки ин иқдом анҷом шуд ва пас аз касби иттилоот, маълумоти мазкурро ба қувваи қазоия ироа кардем."

Қаблан ҳам бархе аз мақомоти эронӣ иддоа карда буданд, ки Занҷонӣ дар ин занҷираи сирқати пули нафти Ҷумҳурии Исломӣ аз ниҳодҳои бонкии Тоҷикистон ҳам истифода бурдааст. Гуфта мешавад, ин 2,5 миллиард доллари интиқолдодаи ӯ маҳз дар Душанбе гум шудааст. Аммо мақомоти Тоҷикистон аз ибтидо ин иддаоро ҳамеша рад карда ва ҳатто гуфтаанд, Бобак Занҷонӣ дар Тоҷикистон чизе надорад. Ҳатто ин иддао садо дод, ки ӯ ҳамаи дороиҳои худ дар Тоҷикистонро ба як сармоягузорӣ турк фурӯхтааст.

Як силсила ширкатҳои бинокорӣ, нақлиётӣ, сармоягузорӣ ва ҷаҳонгардӣ дар Тоҷикистон, аз ҷумла ҳолдинги “Kont group Tajikistan”, ширкатҳои “Коntgroup investment”, “Asian Express Terminal”, “Asian Express Airline” ва “Kont tourism Tajikistan” ба Бобак Занҷонӣ нисбат дода мешаванд ва дар расми ифтитоҳи бархе аз онҳо ӯ ҳамроҳи раисиҷумҳури Тоҷикистон Эмомалӣ Раҳмон иштирок кардааст.

XS
SM
MD
LG