Пайвандҳои дастрасӣ

Шикояти тоҷикони боздоштшуда аз камбуди нону собун ва оби гарм


Лагери муҳоҷирон дар Голяново

Лагери муҳоҷирон дар Голяново

Сафорати Тоҷикистон дар Маскав дар лагери барои муҳоҷирони боздоштшуда сохтаи мақомоти Русия дар Голяново дар боздошт қарор доштани 10 шаҳрванди тоҷикро тасдиқ кард.

Сафорат дар иттилоъияе, ки рӯзи 6 август нашр кард, мегӯяд, ду намояндааш - Абукарим Абдураҳимов ва Афзалӣ Саидҷаъфаров - рӯзи 5 август аз ин «хаймазиндон»-и воқеъ дар гузаргоҳи Иртиш,2 дар ноҳияи Голяновои пойтахти Русия дидан карданд.

Фиристодаҳои сафорат мегӯянд, аксари бошандагони ин лагер зоҳиран шаҳрвандони Ветнаманд ва танҳо 10 нафари онҳо аз Тоҷикистон буда, аз рӯзи 31 июл дар боздошт қарор доштаанд. Сафорат рӯйхати ин муҳоҷирони тоҷики боздоштшударо, ки аз 18 то 38 сол доштаанд, дар ихтиёри Радиои Озодӣ гузошт:

1. Ризвоншоев Нусратулло Мусофирович, 14.06.1971 соли таваллуд, сокини ноҳияи Ҷ.Румӣ, деҳаи Лоҳутӣ;
2. Валиев Акбар Муродович, 05.03.1962 соли таваллуд, сокини ноҳияи Муминобод, деҳаи Навоӣ 76/1;
3. Ҳусайнов Абдулҳалим Файзуллоевич, 03.08.1975 соли таваллуд, сокини ш.Кӯлоб, ҷамоати Даҳана, уч.Гулзор;
4. Ганҷалов Мирсаид Анварович, 28.11.1990 соли таваллуд, сокини ноҳияи Носири Хисрав, деҳаи Подвоз;
5. Назаров Абдураҳмон Игамбердиевич, 27.06.1992, сокини ноҳияи Қумсангир, деҳаи Маданият;
6. Баҳромов Фурқат, 18. 09.1987, сокини н. Ҳисор, шаҳраки Ҳисор;
7. Нурбеков Исмоил Аҳмадович, 16.03.1993, сокини маркази ноҳияи Ҷиликӯл;
8. Қувватов Бахталӣ Маҳанович, 02.11.1991, сокини ноҳияи Ёвон, ҷамоати Даҳана;
9. Самадов Ҷ. А. 07.01.1995 соли таваллуд, сокини ш. Душанбе, кӯчаи Р. Набиев.
10.Раҳимов Ҷаҳонгир Мирзоевич, 23.10.1991 соли таваллуд, сокини ш. Кӯлоб, кўчаи И. Сомонӣ.


Абукарим Абдураҳимов, яке аз ду корманди сафорати Тоҷикистон дар Маскав, ки аз ин боздоштгоҳи муваққати муҳоҷирон дар Голяново дидан кардааст, рӯзи 6 август дар як сӯҳбати ихтисосӣ бо Радиои Озодӣ гуфт:



Абдураҳимов: Шаҳрвандони мо 10 нафар дар он ҷо боздошт шудаанд. Бо онҳо сӯҳбат кардем ва тамоми он камбудиҳое, ки дар сӯҳбат бо мо иброз доштанд, мо аз пайи ислоҳаш ҳастем.

Озодӣ: Ин камбудиҳое, ки шаҳрвандони боздоштшудаи тоҷик гуфтанд, кадоманд?

Абдураҳимов: Як камбудии асосие ки гуфтанд, набудани маводи кофии хӯрока аст. Мардуми мо маъмулан нонро зиёд истеъмол мекунанд, вале дар ин лагер нонро кам медодаанд. Мо инро матраҳ кардем ва пешниҳод додем, ки меъёри нон барои шаҳрвандони моро бештар кунанд. Ин масъала ҳалли худро ёфт. Дувум шикоят аз он буд, ки азбаски аксари боздоштшудаҳо аз Ветнаманд, ба мардуми мо ҳам бештар ғизои биринҷӣ медоданд. Ин масъала ҳам ҳалл шуд. Тақозои дигари онҳо таъмини шароити пурраи беҳдоштиву гигиенӣ буд. Гуфтанд, ки ин шароит ба қадри кофӣ таъмин нест, яъне оби гарм намерасад, онҳо аз лавозимоти зарурие, аз қабили собун, риштарошак, дандоншӯяк ва амсоли ин танқисӣ мекашанд. Масъулин ваъда карданд, ки ин камбудиро низ ислоҳ хоҳанд кард.

Озодӣ: Шаҳрвандони тоҷик чанд вақт боз онҷоянд?

Абдураҳимов: Шаҳрвандони мо аз 31 июл дар манотиқи гуногуни шаҳри Маскав боздошт шуда ва рӯзҳои баъдаш ба ин бошгоҳ оварда шудаанд. Касе якуми август, касе - дувум…

Озодӣ: Ва инҳо то кай дар ин лагер хоҳанд монд?

Абдураҳимов: Аз сӯҳбатҳо бо намояндаи мақомоти додгоҳӣ маълум шуд, ки нисбат ба ҳар кадом аз шаҳрвандони тоҷик алакай қарори додгоҳ бароварда шудааст. Ва тибқи муқаррарот, агар тарафи айбдоршаванда ягон даъво ҷиҳати бозбинии ин ҳукмро надошта бошад, бо гузашти 10 рӯз ҳукми додгоҳ ба иҷроо медарояд. Вале ин ба маъное нест, ки ҳамаи ин 10 тоҷики боздоштшуда истирдод хоҳанд шуд. Қисмате аз онҳо то 2000 рубли русӣ ҷарима баста мешаванд барои вайрон кардани тартиби будубош дар Русия ва қисматеро ҳам ихроҷ мекунанд. Аммо ҳанӯз гуфта нметавонем, ки аз ин 10 нафар дақиқан чанд нафар ҷарима ва чанд нафар ихроҷ хоҳанд шуд, чунки маълумот ҳанӯз пурра нест.

Озодӣ: Оё сафорат ба онҳо дар сурати зарурат кумаки ҳуқуқӣ мерасонад?

Абдураҳимов: Мо бо ҳар кадоми онҳо сӯҳбат кардем. Мо ҳар қазияро алоҳида меомӯзем ва агар кӯтоҳие дар баррасии парвандаи онҳо мушоҳида шавад, аз паяш хоҳем шуд. Ҳамаи ин шаҳрвандони боздоштшудаи мо эътироф мекунанд, ки шароити иқомат дар Русияро поймол кардаанд, вале агар барои кумаки ҳуқуқӣ расман ба сафорат муроҷиат кунанд, мо бояд ба кумаки ҳамватанони худ бирасем.

Озодӣ: Муносибати масъулони боздоштгоҳ чигуна аст? Шикояте буд аз тарафи шаҳрвандони тоҷик?

Абдураҳимов: Оиди муносибати мақомоти боздоштгоҳ мо аз шаҳрвандони худ ягон шикояте нашунидем, ягон муроҷиат нашуд ба мо. Чӣ дархосту шикояте ки шуд, марбут ба вазъи маишӣ ва таъмини ғизо буд. Ба ҷуз ин шикояте нагирифтем.

Озодӣ: Оё хешовандони онҳо метавонанд аз онҳо аёдат кунанд, ё чягон чизи зарурашон, барои мисол, хӯрокашонро бирасонанд?

Абдураҳимов: То рафтани мо ба ин боздоштгоҳ масъулонаш ба хешовандони афроди боздоштшуда, ки мехостанд аз онҳо хабар бигиранд ё ягон лавозимоти заруриро бирасонанд, ҷавоби рад дода буданд. Баъд аз муроҷиати мо қарор ин шуд, ки чунин лавозимот аз тариқи сафорат расонда шавад. Яъне он хешовандоне ки наздиконашон дар ин муваққатгоҳ қарор доранд, метавонанд лавозимотеро, ки мехоҳанд бирасонанд, ба сафорат биоранд . Ва аз тарафи корманди масъули сафорат ин лавозимот дар мӯҳлати кӯтоҳ бурда, ба онҳо расонда мешавад.



Светлана Ганнушкина

Светлана Ганнушкина

Ин дар ҳолест, ки Светлана Ганнушкина, як ҳомии маъруфи ҳуқуқи башар, ки низ аз ин лагери муҳоҷирон дидан кардааст, рӯзи 5 август ба Озодӣ гуфт, шаҳрвандони тоҷик ба ӯ аз ғайриқонунӣ боздошт ва ба ин лагер мунтақил шудани худ шикоят кардаанд.

Светлана Ганнушкина мегӯяд, ӯ дар қароргоҳ бо шаҳрвандони Тоҷикистон сӯҳбат дошт ва яке аз онҳо шиква кардааст, ки ҳангоми боздошт кормандони полис ноутбук ва ҳуҷҷатҳояшро гирифтаанд. Ҳамаи шаҳрвандони Осиёи
Марказӣ аз сӯи додгоҳ барои истирдод маҳкум шудаанд, вале маълум нест, ки мурофиаи додгоҳии онҳо чӣ гуна сурат гирифтааст, зеро барои баррасии парвандаи ҳар як нафар ҳамагӣ чанд дақиқа ҷудо шуда буд ва онҳо имкони дифоъ аз худро надоштанд.

Хонум Ганнушкина меафзояд, ки яке аз шаҳрвандони Тоҷикистон – Нусратулло Ризвоншоевро кормандони полис ғайриқонунӣ, як рӯз пеш аз хатми сабти номаш, боздошт карданд. Ба гуфтаи ӯ, "дар як додгоҳ додрас аз истирдоди Нусратулло сарпечӣ кардааст, зеро асноди ӯ мушкиле надоштанд. Аммо кормандони полис ба ҷойи раҳо кардани Ризвоншоев ӯро ба дигар додгоҳ бурданд ва гуфтанд, ки ҳуҷҷатҳояш тақаллубианд."

Светлана Ганнушкина гуфт, ки вазъи «хаймазиндон» тоқатфарсо аст, зеро дар ҳар хаймаи на он қадар бузург чиҳил кати симини дуқабата гузошта шудааст. «Дохили ин хаймаҳо даромадан ваҳшатнок аст, зеро баъд аз чанд дақиқа кас худро дар «камераи газӣ» эҳсос мекунад», мегӯяд ҳомии ҳуқуқи башар. Ӯ меафзояд, ки аз ин амали мақомоти Русия шармаш меояд. Аз нигоҳи ҳомии ҳуқуқи башар, "ҳама муҳоҷирон, агар ҳатто ғайриқонунӣ ҳам кор мекарданд, қурбонии системи заҳмати ғуломона ва ғайриқонуниянд, ки дар Русия дар пеши чашми ҳама арзи вуҷуд кардааст. Аз байн бурдани ин низомро на аз қурбониён, балки аз манбаъҳои он шурӯъ кард," - мегӯяд Светлана Ганнушкина.

Рая, хонуми Нусратулло Ризвоншоев, дар сӯҳбати телефонӣ бо бахши тоҷикии Радиои Озодӣ гуфт, ба ӯ рӯзи душанбе ҳам кормандони полис ба ӯ иҷоза надоданд, ки ба шавҳараш либоси тозаву ҷӯроб ва хамираи дандон расонад. «Шавҳари ман се рӯз боз дар қароргоҳ аст ва ман се рӯз боз барои ӯ либоси тоза мебарам, аммо кормандони пулис қабул намекунанд. Шабҳо дар хайма ҳаво сард аст, шавҳари ман бошад бемории сармохӯрдагӣ дорад ва вақте ӯро боздошт карданд, дар танаш фақат як футболка дошт», - мегӯяд ӯ.

Ӯ меафзояд, «ман ба сафорати Тоҷикистон телефон кардам, гуфтам, ки мо ин ҷо тамоман бесоҳиб мондаем. Шавҳарам гуфт, дар он ҷо барқ нест, ҷойи оббозӣ нест, дар як рӯз фақат ду бор гречка медиҳанд ва он ҳам бе нон…».

Амалиёти «поккорӣ дар бозорҳои Маскав» баъд он шурӯъ шуд, ки рӯзи 27 июл маъмури пулис Антон Кудряшов ҳангоми талоши боздошти як гумонбар дар бозори “Матвеевский”-и Маскав ҳадафи ҳамлаи гурӯҳи қафқозиҳо қарор гирифт. Кудряшов то ҳол дар бемористони ба номи Бурденко таҳти табобат қарор дорад. Нафари гумонбар дар таҷовуз Магомед Магомедов, ки талоши боздошти ӯ дар бозор ба занозанӣ ва латукӯби афсари пулис мунҷар шуд, ҳамроҳ бо хоҳараш Ҳалимат Расулова ва шавҳари ӯ Магомед Расулов алакай дастгир шудаанд.

Онҳо ба он айбдор мешаванд, ки ба пулис ҳамла карда, сари ӯро зада кафондаанд. Расулов ин иттиҳомро радд карда, гуфтааст, кормандони пулисро авбошони мусаллаҳ гумон бурдааст. Бар пояи ду банди Қонуни ҷиноии Русия (317 ва 318) ҳуҷум ба ходими пулис ҷурми ҷиддӣ арзёбӣ мешавад ва муҷрим метавонад ба ҳабси якумрӣ маҳкум шавад.


Боздошти муҳоҷирон дар Маскав

Боздошти муҳоҷирон дар Маскав

Ба иттилои раёсати умури дохилаи Маскав, дар ҷараёни амалиёт дар бозорҳои пойтахт 1436 тан аз муҳоҷирони ғайриқонунӣ боздошт шуданд. Беш аз 4,5 ҳазор муҳоҷир мавриди тафтиши кормандони полис қарор гирифтаанд. Фақат дар як амалиёт дар шарқи Маскав 1200 шаҳрванди Вйетнам дастгир шуданд, ки дар 20 коргоҳи ғайриқонунӣ ба тавлиди либосҳои тақаллубӣ машғул буданд. Дар ҳамон минтақа 200 муҳоҷири ғайриқонунӣ аз Миср, Марокаш, Сурия, Ӯзбакистон ва Озарбойҷон низ ҳангоми кор дар корхонаҳои бидуни иҷоза ошкор шуданд.

Сафорати Вйетнам дар Маскав аз шароити буду боши муҳоҷирони мунтазири истирдод дар шаҳраки хаймаҳои Голяново шадидан интиқод кард. Раҳбари консулгарии Вйетнам дар Маскав Ле Хонг Чюнг гуфтааст, ки “шароит дар қароргоҳ хело бад аст, дар як хаймаи андозааш 50 метри мураббаъ 40 нафар ба сар мебаранд, ин шароити комилан ғайрибашарист.”

Бо ин ҳол, амалиёти зидди муҳоҷирони ғайриқонунӣ ба вилояти Маскав ва шаҳрҳои дигари Русия густариш меёбад. Ба иттилои расонаҳо, рӯзи 5 август дар шаҳри Долгопруднийи канори Маскав беш аз 600 муҳоҷири ғайриқонунӣ ва дар Твер 264 нафар боздошт шудаанд.

Мақомоти Русия гуфтаанд, ки қарор аст, дар сартосари Русия барои муҳоҷирони ғайриқонунии боздоштшуда ба мисли "хаймазиндон"-и Голяново 83 қароргоҳ таъсис шавад.


Намоиши шарҳҳо

XS
SM
MD
LG