Пайвандҳои дастрасӣ

Насиба Наимхонова – номзади Тоҷикистон дар озмуни байналмилалии World University Peace Service Corps мегӯяд, ба раъйи бештари тарафдорон ниёз дорад.

Насиба Наимхонова – номзади Тоҷикистон дар озмуни байналмилалии “Посдорони сулҳи донишгоҳҳои ҷаҳон” (World University Peace Service Corps) ба раъйи бештари тарафдорон ниёз дорад.

Дар Ҷумҳурии Чин даври ниҳоии озмуни духтарони донишҷӯ бо номи "Посдорони сулҳ" ҷараён дорад ва қарор аст натиҷаҳояш рӯзи 29 январ эълон шавад. Тоҷикистонро дар ин озмун донишҷӯи 19-солаи Донишгоҳи муштараки славяниву қирғизии шаҳри Бишкек Насиба Наимхонова муаррифӣ мекунад, ки моҳи декабр барандаи озмуни “Мисс Университет” дар Қирғизистон шуд. Азбаски Насиба шаҳрванди Тоҷикистон аст, қарор шуд, ки ӯ дар ин озмун кишвари худро муаррифӣ кунад ва ба намояндагӣ аз Қирғизистон номзади дигар интихоб шуд.

Озмуни шоистатарин посдори сулҳ инак 27 соли охир зери чатри СММ баргузор мешавад ва ҳадафаш таблиғ ва саҳмгузорӣ дар сулҳу суботи ҷаҳон аст. Ташкили чунин як озмунро Анҷумани байналмилалии раҳбарони донишгоҳҳои ҷаҳон соли 1981 аз СММ дархост кард ва аз он сол ба баъд ин барнома пайваста роҳандозӣ мешавад. Вазифаи Посдорони сулҳ ширкат дар барномаи ҳимоят аз сулҳ ва таблиғи оштиву таҳаммулпазирӣ дар ҷаҳон аст. Дафтари марказии созмони World University Peace Service Corps дар шаҳри Ню-Йорк ҷойгир аст.

Насиба Наимхонова дар як сӯҳбати телефонӣ бо радиои Озодӣ аз Чин гуфт, ки аз рӯзи 11 январ дар ин кишвар қарор дорад ва то ҳол дар чанд форуми маърифативу сиёсӣ дар шаҳрҳои Пекин ва Шанҳай, аз ҷумла дар мавзӯи “Сулҳ ва иқтисод” иштирок ва суханронӣ кардааст. Ӯ гуфт, “кори мо намоиши ҳусни зоҳириву чеҳраҳои худ нест. Мо дар мавзӯъҳои ҷиддӣ андешаронӣ ва баҳс, дар бораи чолишҳои ҷаҳони имрӯз фикри худро баён мекунем. Тамоми ҷараёни баҳсу баррасиҳо ба забони англисӣ аст”.

Насиба мегӯяд, ки 12 январ ӯ дар маросими муаррифии кишвари худ бо либоси миллии тоҷикӣ ба саҳна баромад ва дар давоми як дақиқа дар бораи нақши сулҳ суханронӣ кард. “Сулҳ як манбаи шукуфоии кишвар ва хушбахтии инсонҳост. Сулҳ – ин табассуми кӯдак ва модар аст. Барои расидан ба ин ҳадаф бояд инсонҳо миёни ҳам муошират кунанд ва ба рушди иқтисодӣ даст ёбанд. Суботи иқтисодии кишварҳо ба маънои пуштибонӣ аз ҳамдигар аст”, гуфт Насиба Наимхонова дар ин маросим.

Дар ниҳоят ӯ пораи шеъри “Дӯстиро ҷустуҷӯ дорем мо”-и Мирзо Турсунзодаро ба забони англисӣ қироат кардааст:

We are looking for friendship

Conducting a dialogue for peace.

Friendship gives people happiness,

But enmity brings grief....

Насиба Наимхонова гуфт, ҳоло ӯ беш аз ҳар вақти дигар ба пуштибонии ҳамватанон ниёз дорад. Барои овоз додан ба Насиба бояд вориди вебсайти http://www.wmu.world/ шуд, тавассути бахши Sign Up – худро сабтином кард ва акси Насибаро пайдо ва Like кард.

Насиба Наимхонова зодаи ноҳияи Ишкошими вилояти Бадахшони Тоҷикистон буда, дар Душанбе ба воя расидааст. Насиба бо кӯмаки барномаи Бунёди рушди Оғохон барои таҳсил ба Қирғизистон рафт ва ҳоло дар соли сеюми бахши тарҷумонӣ аз забонҳои англисиву фаронсавии Донишгоҳи славяниву қирғизии Бишкек таҳсил дорад. Ӯ орзу дорад, ки тарҷумони забонҳои хориҷӣ шавад.

Намоиши шарҳҳо

XS
SM
MD
LG