Пайвандҳои дастрасӣ

Нигора Холова рӯзи 12 феврал бо тифли навзодаш Амира аз таваллудхона мураххас шуд ва гуфт, ки пас аз чанд муддати нигоҳубини кӯдакаш дубора бо таронаҳои ҷадид ба саҳна бармегардад.

Нигора Холова, овозхони маъруфи тоҷик, 12 рӯз баъд аз таваллуди нахустфарзандаш Амира аз зоишгоҳ рухсат шуд ва бо ин ба сарусадоҳои зиёд дар бораи гӯё бемории шадид ва фавташ нуқта гузошт. Ин овозхон рӯзи якуми феврали соли ҷорӣ дар таваллудхонаи рақами яки пойтахт, нахустфарзанди худро ба дунё овард.

Барои тасдиқи ин хабар ва ба хотири бо чашми худ дидани Нигора, рӯзи 12 феврал дар саҳни зоишгоҳи рақами яки пойтахт мардуми зиёд ҷамъ омаданд. Онҳо ҳам дар баробари пайвандони Нигора интизори берун шудани модару кӯдак буданд ва ҳатто аз хешовандони овозхон дар бораи сиҳатии ӯ мепурсиданд.

Суруш Холов, бародари Нигора, ки бо гулдаста барои истиқболи хоҳари худ омада буд гуфт: "Мо ҳам сарусадоҳои зиёдеро шунидем. Фикр мекунам, аз меҳру муҳаббати зиёд ба як нафар чунин сарусадоҳо паҳн

мешавад. Нигаронии мухлисон ҳам аз меҳру муҳаббати онҳо ба Нигора далолат медиҳад. Хоҳари ман шукр, ки хуб аст ва соҳиби фарзанд шуд. Ман мисли ҳар бародари дигар аз ин хушхбахтии хоҳарам, хурсанд ҳастам."

Худи Нигора бо тифли навзодаш баъди берун омадан аз зоишгоҳ гуфт, "хеле хушбахтам, ки модар шудам, соҳиби духтарча шудам." Вай гуфт, барои духтараш исми Амираро бародари хурдиаш Сиёвуш интихоб кардааст. Нигора тобистони соли 2014 оиладор шуда буд.

Исматулло Холов падари овозхонҳо - Нигора ва Сурушро тайи моҳҳои ахир зангҳову пурсишҳои пайдарпайи мардум аз вазъи саломатии Нигора нороҳат мекард. Бархе ҳатто ба онҳо занг задаву таъзия баён мекарданд.

Наздикони Нигора мегӯянд, намедонанд ин овоза аз куҷо сар зад, вале ба гуфтаи онҳо Нигора бемор набуд, балки фақат интизори нахустфарзанди худ як муддат аз саҳнаи ҳунар канор рафта буд. Бо вуҷуди сарусудоҳо, ҳоло волидону наздикони Нигора, аз он хушҳоланд, ки духтарашон тифли худро сиҳату саломат ба дунё овардааст.

Нигора Холова, аз сарояндаҳои ҷавони тоҷик аст, ки аз давраҳои наврасӣ вориди саҳнаи ҳунар шудааст. "Гӯям ё нагӯям?" аз аввалин таронаҳои ӯ буд, ки дар охири солҳои навадум аз пуршунавандатарин таронаҳо ба ҳисоб мерафт.

Холова 25 декабри соли 1989 дар ноҳияи Рӯдакӣ ба дунё омада, соли 2005 мактаби миёнаи рақами яки ҳамин ноҳияро хатм кардааст. Соли 1998 ба озмуни байналмилалии "Золотой птенец" дар шаҳри Санкт-Петербурги Русия роҳ ёфта, соҳиби ҷоиза гардид. Баъдан ӯ дар озмуни "Суруди сол"-и 2009, 2010, 2011 ва 2012 низ ҷоизаҳои намоёнро ба даст овард.

Ин овозхони ҷавони тоҷик соли 2013 бо фармони раисиҷумҳур Эмомалӣ Раҳмон бо медали "Хидмати шоиста” мушарраф гардонида шуд. Маросими хонадоршавии ӯ тобистони соли 2014 дар Душанбе баргузор гардид.

Таваҷҷуҳ ба вазъи саломатӣ ва таваллуди Нигора Холова дар ҳоле хабарсоз шудааст, ки ӯ дар хурдӣ мубталои бемории қалб буд ва мухлисонаш пайваста аҳволу зиндагии ӯро пайгирӣ мекунанд. Овозхон Нигора Холова баъд аз як муддати муроқибат аз тифли навзодаш тасмим дорад, дубора ба саҳнаи ҳунар баргардад.

Намоиши шарҳҳо

XS
SM
MD
LG