Пайвандҳои дастрасӣ

Хабари нав

Нархи нирӯи барқ арзон мешавад, вале дар...


Мақомоти Қирғизистон эълон карданд, ки аз моҳи феврал нархи нирӯи барқро барои аҳолӣ ва корхонаҳои ин кишвар тақрибан 20 дарсад пойин хоҳанд овард.

Мақомоти Қирғизистон мегӯянд, аз моҳи феврал нархи нирӯи барқ дар ин кишвар пойин меравад. Нурбек Элебоев, раиси Оҷонсии давлатии танзими кори соҳоти маводи сӯхту энержии Қирғизистон, ба хабарнигорон гуфт, аз 1 феврал барои хонаводаҳо ва корхонаҳое, ки беш аз 700 киловатт-соат нирӯи барқ истифода мебарад, қимати ҳар киловатт-соат ба ҷои мутаносибан 2 сому 5 тин ва 2 сому 19 тин – 1 сому 82 тин ва 1 сому 97 тинро ташкил хоҳад дод. Оқои Элебоев гуфт , ин тасмим ба коҳиш ёфтани ҳаҷми нирӯи барқи воридотӣ аз Қазоқистон бастагӣ дорад.

Аммо барои онҳое ки камтар аз 700 киловатт-соат нирӯи барқ истифода мебаранд, ба гуфтаи ин мақом, нархи нирӯи барқ ҳамон 70 тин барои ҳар киловатт боқӣ мемонад.

Қирғизистон дар фасли сармо аз Қазоқистон нирӯи барқро ба қимати 5 сому 61 дирам барои ҳар киловатт ворид мекунад, вале ба аҳолӣ ва корхонаҳояш ҳатто дар ин фасли сармо бо нархи то 3 баробар арзонтар мефурӯшад.

Қирғизистон дар оғози солҳои 2000 мисли Тоҷикистон дар чанги бӯҳрони шадиди энержӣ қарор дошт ва маҷбур буд, дар фасли сармо дар кишвар лимит ҷорӣ кунад. Қатъ шудани содироти гази Узбакистон ба азоби мардум ва корхонаҳои ин кишвар низ афзуда буд. Аммо баъди “инқилоби лолаҳо”-и соли 2010 ва рӯи кор омадани ҳукумати демократӣ Бишкек тавонист масъалаи камбуди нирӯи барқу газро аз ҳисоби азсаргирии воридоти газ аз Узбакистон ва воридоти барқ аз Қазоқистон ба сурати умум ҳал кунад.

Ҳоло дар Қирғизистон лимити барқ вуҷуд надорад ва фарқ танҳо дар нархгузорист. То 700 киловатт-соат нирӯи барқ бо як нархи арзон, яъне 70-тинӣ ҳисобу китоб мешавад ва аз он бештараш – бо нархи тақрибан 2,5 маротиба болотар. Аммо аҳолӣ бо вуҷуди аз байн рафтани лимит боз ҳам шикоят дорад, ки 700 киловатт-соат нирӯи барқ танҳо барои таъмини ниёзҳои муҳими рӯзгор, чун рӯшан кардани хонаву телевизор ва яхдону дарзмол кифоят мекунад ва барои мисол, бо он наметавон бухории барқиро ҳам даргиронд.

Аммо дар Тоҷикистон, ки ҳар фасли зимистон ба як лимити шадиди нирӯи барқ рӯбарӯ мешавад, нархи ин навъи энержӣ пайваста боло меравад. Бори охир ширкати “Барқи Тоҷик”- фуруӯшандаи инҳисории нирӯи барқ дар Тоҷикистон – нархи онро 1 июли соли 2014 боло бурда буд. Бино ба нархномаи нави ин ширкат нархи нирӯи барқ дар кишвар 15 дарсад боло рафта, мардум ба ҷои 11 дирам барои ҳар киловатт-соат нирӯи барқ 12,6 дирам ва корхонаҳо барои ҳар киловатт-соат 30,6 дирам пардохт хоҳанд кард.

Танҳо барои корхонаи «Талко» - бузургтарин корхонаи саноатии Тоҷикистон- боз ҳам нархи боимтиёзи нирӯи барқ муқаррар шудааст. Ин корхона аз 1 май то 30 сентябр барои ҳар як киловатт-соат нирӯи барқ 7,2 дирам ва дар фасли зимистон, яъне аз 1 октябр то 30 апрел, барои ҳар киловатт-соат 11,8 дирам пардохт хоҳад кард.

Бо ин ҳол, таҳлили қиёсӣ нишон медиҳад, ки нархи як киловатт-соат нирӯи барқ дар Қирғизистон барои аҳолӣ дар чаҳорчӯби меъёри 700-киловаттӣ 1,2 сент ва барои истифодаи хориҷ аз ин меъёр ҳудуди 3 сент ва ҳамин тавр, нархи ҳар киловатт-соат барои корхонаҳояш тақрибан 3,5 сентро ташкил медиҳад. Дар Тоҷикистон аҳолӣ барои ҳар киловатт-соат нирӯи барқ 2,5 сент ва корхонаҳо 6 сент месупоранд.

XS
SM
MD
LG