Пайвандҳои дастрасӣ

Дар Қирғизистон афроде, ки дар ҳайати гурӯҳҳои мусаллаҳ дар хориҷ аз он кишвар дар ҷангҳо ширкат мекунанд, аз 8 то 15 сол аз озодӣ маҳрум карда мешаванд.

Алмосбек Атамбоев, раиси ҷумҳури Қирғизистон иловаи наверо дар қонуни ҷиноии кишвараш имзо кард. Бар асоси ин иловаи нав, акнун ононе, ки аз Қирғизистон дар таркиби гурӯҳҳои мусаллаҳ дар хориҷ аз кишвар дар ҷангҳо ширкат мекунанд, аз 8 то 15 сол маҳкум ба зиндон хоҳанд шуд.

Артур Медетбеков, коршиноси умури терроризм ва яке аз собиқадорони нерӯҳои вижаи зиддитеррори “Алфа”-и Қирғизистон дар гуфтугӯ бо Радиои Озодӣ дар ибтидо ба ин пурсиш, ки чӣ омил Қирғизистонро водор кард, то дар қонуни ҷиноии худ ё Кодекси ҷиноятӣ ин тағйиротро ворид кунад, гуфт

Медетбеков: Мубориза бо терроризм ва тундгароии байналмилалӣ аҳамияти бештар пайдо кардааст. Ҳоло аз Қирғизистон 422 шаҳрванд дар таркиби гурӯҳҳои тундрави “Давлати Исломӣ” ҷанг мекунанд, ки аз онҳо 55 нафарашонро занон ва ҳатто духтарон ташкил медиҳанд. Онҳо дар Сурияву Ироқ дар даргириҳо гӯё барои ташкили Хилофати ояндаи исломӣ ширкат мекунанд. Хилофате, ки онҳо иддао мекунанд, қаламрави Осиёи Марказӣ, аз ҷумла Қирғизистонро низ дар бар мегирад. Барои ҳамин Қирғизистон тадбири пешгирикунанда андешид. Ин иловаро дар қонун бояд хеле пештар ворид мекарданд. Ҳоло бисёре аз ҷавонон на танҳо ба Сурия ё Ироқ мераванд, балки ҷавононе низ ҳастанд, ки ба Украина мераванд ва ба ҷонибдорӣ аз нерӯҳои ҳукуматӣ ва ё ба ҷонибдорӣ аз мухолифони ҷудоихоҳи ҳукумат дар ҷангҳо ширкат мекунанд. Ин илова барои он аст, ки шаҳрвандони кишвари мо ҳангоми рафтан ба минтақаҳои ҷанг масъулиятро ҳис кунанд ва фикр кунанд, ки ба куҷо мераванд, чун онҳо барои ширкат дар ҷангҳо ва одамкушӣ бояд ба муҷозот кашонда шаванд.

Озодӣ: То чӣ андоза ин иловаи нав амнияти иҷтимоиро дар Қирғизистон метавонад таъмин кунад?

Медетбеков: Ин илова, ба таъмини амнияти давлатӣ кӯмак мекунад. Гузашта аз ин, агар касе бихоҳад, ки ба ин гурӯҳҳо бипайвандад, пеш аз пайвастан дар бораи оқибатҳои он фикр мекунад. Бар асоси ин илова, акнун шахсонеро, ки барои пайвастан ба чунин гурӯҳҳо омодагӣ мегиранд, боздошт кардан мумкин аст. Онҳо наметавонанд фикру ақидаҳои худро ба атрофиёнашон таблиғ кунанд. Барои ҳамин ин илова ба вазъи ҷомеа ва таъмини амнияти иҷтимоӣ таъсири мусбат хоҳад дошт.

Озодӣ: Оё ин ислоҳоти қонун ба эмиссарҳо ё таблиғгарони ақидаҳои тундгароӣ, ки шаҳрвандонро барои рафтан ба Сурияву Ироқ ташвиқ мекунанд, дахл дорад?

Медетбеков: Ҳоло роҳҳои гуногуни ташвиқу таблиғ вуҷуд дорад. Яке аз онҳо тавассути шабакаҳои иҷтимоии интернетӣ мебошад. Аз телефонҳои ҳамроҳ ва аз созмонҳои ғайриқонунии махфӣ истифода мекунанд. Ғайр аз ин созмондиҳандагони пинҳонӣ ҳастанд. Эмиссарҳо ҳам ҳастанд, ки зери чатри ягон созмон ворид мешаванд. Барои ҳамин, ин қонун ба ин гурӯҳи одамон низ дахл дорад.

Ба ҷуз аз ин иловаи нав, дар қонун пештар ҳам буд, ки ҳангоми ифшои қонуншиканӣ аз он пешгирӣ мекунанд ва гунаҳгорон табқи қонун ҷавоб медиҳанд. Ҳоло бо пеш омадани тағйирот дар ҷурму ҷиноятҳои байналмиллалӣ ин илова дар ҳамин арса нақши боздоранда дорад.

XS
SM
MD
LG