Пайвандҳои дастрасӣ

Мақомоти вилояти Суғд мехоҳад бинои қароргоҳи Ҳизби наҳзати исломӣ дар Хуҷандро тахриб кунад, аммо масъулони ин ҳизб иддао доранд, ки онҳоро қаблан огоҳ накардаанд ва ин амал «ғайриқонунӣ» мебошад.

Хабарнигори радиои "Озодӣ" аз шаҳри Хуҷанд иттилоъ дод, ки имрӯз 17-уми май намояндагони Кумитаи заминсозӣ, ҳукумати маҳаллӣ ва дигар муассисаҳои дахлдори вилояти Суғд ба назди бинои қароргоҳи ҲНИТ омада ва гуфтаанд, ки аз рӯи нақша бояд ин бино тахриб шавад. Дар баробари қароргоҳи ҲНИТ ҳамчунин як бинои хурди паҳлуи ин ҳизб ҳам дар рӯихат ворид шудааст, ки бояд аз байн бурда шавад. Аз рӯи нақша дар шафати қароргоҳи ҲНИТ масҷиде бо номи "Нури Ислом" бозсозӣ мешавад.

Аммо баъд аз чанд лаҳзаи рафтани намояндагони мақомоти давлатӣ, муовини раиси шаҳри Хуҷанд, сардори шӯъбаи корҳои дохила ва намояндаи ҳизби наҳзат дар Хуҷанд сари мизи гуфтушунид нишаста ва ба хулосае омадаанд, ки "қароргоҳи Ҳизби наҳзат аз рӯи қонун тахриб карда шавад." Вале аз гуфтушуниди онҳо тафсилоти бештар дода нашудааст ва ин ҳам маълум нест, ки дар кадом мавзеъи ин шаҳр барои ҲНИТ биное ҷудо мекунанд.

Намояндагоҳи ҲНИТ мегӯянд, ки аз рӯи қонун бояд онҳоро қаблан огоҳ карда бо бинои нав таъмин мекарданд ва дар чунин ҳолат барои тахриби қароргоҳашон мушкиле надоштанд. Чунки бинои қароргоҳи ҳизби худро дар шаҳри Хуҷанд қонунӣ медонанд. Аммо намояндагони мақомоти давлатии Суғд мегӯянд, ки онҳо дар мактуби қаблии худ ба ҲНИТ посух дода, онҳоро аз ин ҳолат огоҳ кардаанд. Вале ҷониби ҲНИТ мегӯяд, ҷавоби мақомотро дар бораи ғайриқонунӣ тахриб кардани қароргоҳашонро нагирифтаанд. Ҳамакнун намояндагони ҲНИТ интизори ҷавоби расмии мақомот ҳастанд, ки барои тахриби қароргоҳашон пешниҳод кунад.

Дар ҳамин ҳол Маҳмудҷон Файзраҳмонов, сухангӯи ҲНИТ ҳам имрӯз ба "Озодӣ" гуфт, ки ҳудуди 50 нафар аз ниҳодҳои мухталифи мақомоти вилоят ба маркази шӯъбаи ҲНИТ дар вилояти Суғд омада, ба масъулин гуфтанд, ки маконро барои тахриб кардани марказ бар асоси огоҳиномаи пешакӣ, ки аз тарафи Д. Абдуллоев, муовини раиси шаҳри Хуҷанд аз 23.05.2014 ирсол гардида буд, холӣ кунанд.

Ин ҳам дар ҳолест, ки рӯзи 14-уми июн Маркази санитарию эпидемиологии шаҳри Хуҷанд барои бори дуюм дар соли ҷорӣ ба дари қароргоҳи созмони вилоятии ҲНИТ мӯҳр зада, ҳукумати шаҳр ҳизбро огоҳ кардааст, ки замини дафтараш, тибқи нақша, бояд кабудизор шавад. Танҳо дар соли 2014 ин бори дуюм аст, ки маркази беҳдоштиву вогиршиносӣ ба дари ин дафтари ҲНИТ мӯҳр мезанад.

Илҳомҷон Ёқубов, раҳбари созмони ҲНИТ дар вилояти Суғд рӯзи 15 июн ба Радиои Озодӣ гуфт, маслиҳат шуда буд, ки маъмурони ин идора рӯзи душанбе қароргоҳи ҳизбро тафтиш кунанд, вале онҳо бар хилофи ин маслиҳат, рӯзи шанбе, 14 июн ба дари дафтари ҳизб мӯҳр заданд. Ӯ мегӯяд, мақомоти Маркази беҳдоштӣ далели бастани дари дафтари ҳизбро шарҳ надодаанд, вале як намояндаи ин идора ишора кардааст, ки онҳо аз “боло” чунин амр гирифтаанд.

Намоиши шарҳҳо

XS
SM
MD
LG