Пайвандҳои дастрасӣ

logo-print

Рӯзи 22-уми январ ба ибтикори сафорати Амрико дар Душанбе дар толори Кохи ҷавонони пойтахт филми мустанади "Girl rising" ё "Рушди духтарон" намоиш дода шуд.

Ин филмро ширкатҳои Gathr films ва CNN FILMS муштарак сохтаанд ва аз ҳаёти 9 духтар дар ҷаҳон қисса мекунад, ки аз роҳи саъю кӯшиш ва рушди маориф ба орзуҳои худ даст меёбанд. Ин духтарон, ки умдатан аз кишварҳои африқоӣ ва мусалмонӣ ҳастанд, аз тариқи дониш андӯхтан аз фақру бенавоӣ халос мешаванд ва зиндагии шоистаеро насиб мегарданд.

Сюзан Эллиотт, сафири ИМА дар Тоҷикистон қабл аз намоиши ин филм, дар суханронӣ маорифро рушди кишварҳо ва дастовардҳои беҳтар унвон кард.

Ба таъкид хонум Эллиотт, маҳз дар пайи рушди маориф ИМА ба пешравиҳо ноил гардида ва духтарону писарон ояндаи худро сохтаанд.

Вай ба ҷавонони дар толорбуда рӯ овард ва гуфт, ки тамошои филми "Girl rising" ё "Рушди духтарон" имкон хоҳад дод, то шумо ояндаи худро бо донишандӯхтан рангин кунед ва шахси фаъоли ҷомеа бошед.

Ситора, хонандаи яке аз мактабҳои шаҳри Душанбе пас аз тамомшои филми мазкур дар сӯҳбат бо Радиои Озодӣ гуфт, ки "филм таъсирбахш аст. Чун ҳаёти на танҳо 9 духтари рӯи замин, балки миллионҳо духтаронеро бозгу мекунад, ки ба сабаби набудани имконият ва ё фақру нодорӣ ва дигар сабабҳо аз мактаб дур мемонанд ва бесаводӣ онҳоро боз фақиртар мекунад."

Аммо Ситора мегӯяд, "филм аз сӯи дигар роҳнамоест, барои духтарон, ки илм омӯзанд, хонанд, саводнок шавад ва дар оянда соҳиб тахассус гараданд, то дар зиндагӣ дарнамонанд. Духтари босавод, ҳаёти хуберо хоҳад дошт."

Вай аз он изҳори таассуф кард, ки на ҳама хонандагони мактабу донишкадаҳо тавонистанд ин филмро тамошо кунанд ва барои худ сабақе бигиранд. Беҳтар аст, ки ин филм дар толорҳои синамоии Тоҷикистон ба намоиш дарояд ва аз манфиат холӣ нест.

Ахиран ЮНИСЕФ - Бунёди атфоли Созмони Миллали Муттаҳид аз кишварҳои минтақа даъват кард, то ҳама кӯдаконро ба таълими босифат фаро гиранд.

Аммо масъулони соҳаи маорифи Тоҷикистон мегӯянд, имрӯз фақат ҳудуди 5 дарсади наврасони синни мактабӣ аз таҳсили ҳатмӣ дур мондаанд, ки бештари онҳо духтаронанд. Чун аз 2630 нафари маҳрум аз таълим, 1479 нафараш духтарон будаанд. Бино ба омори ин ниҳод бештар аз ҳама дар вилояти Хатлон ин мушкил ба назар мерасидааст.

Дур мондани бештари духтарон аз таҳсил дар Тоҷикистон дар ҳолест, ки тибқи гузориши ЮНЕСКО ё Барномаи илмӣ, омӯзишӣ ва фарҳангии СММ 66 миллион духтар дар ҷаҳон мактаб намераванд ва 33 миллион духтар камтар аз писарон дар мактабҳои ибтидоӣ ҳастанд.

Ҳамзаон бар асоси гузориши ЮНИФЕМ ё Барномаи занони СММ ҳудуди 150 миллион духтар дар тули сол қурбони хушунати шаҳвонӣ мешаванд. Ва 50 дарсади ҳамлаҳои шаҳвонӣ дар ҷаҳон нисбати духтарони синни то 15 сола сурат мегирад.

Аммо гузоришҳои дигар ҳокист, ки "агар Ҳинд, боз барои 1 дарсади дигар аз духатрон имконияти донишандӯхтанро диҳад, Маҷмуи маҳсулоти дохилии ин кишвар ба 5,5 миллиард доллар афзоиш хоҳад кард.

Намоиши шарҳҳо

XS
SM
MD
LG