Пайвандҳои дастрасӣ

Мақомот Маҳмадраҷаб Ҳомидов, раиси собиқи кони "Назарайлоқ"-ро дар иртибот ба қатли Нуриддин Темиров, раиси ин кон барои пурсиш ба Душанбе даъват карданд.

Як манбаъ дар шӯъбаи корҳои дохилии минтақаи Рашт, ки нахост номаш ифшо шавад, рӯзи сешанбеи 24 сентябр ба Радиои Озодӣ гуфт, муддати се рӯз аст, ки Маҳмадраҷаб Ҳомидов дар Душанбе қарор дорад ва мавриди пурсиши мақомот дар робита ба парвандаи қатли Нуриддин Темиров аст.

Ин манбаъ гуфт, ки Маҳмадраҷаб Ҳомидовро пас аз анҷоми бозпурсии 8 нафар кормандони кон ва се нафар аз минтақаи Ҳоит, ба Душанбе интиқол додаанд.

Ин ҳам дар ҳоле, ки қаблан куллия кормандони кони "Назарайлоқ", аз ҷумла Маҳмадраҷаб Ҳомидов, аз сӯи гуруҳи тафтишот дар маҳалли кон мавриди бозпурсӣ қарор гирифта буданд.

Маҳмадраҷаб Ҳомидов соли 1954 дар минтақаи Ҳоит таваллуд шудааст. Вай аз собиқадорони кони "Назарайлоқ" мебошад, чунки қабл аз Нуриддин Темиров дар 9 соли пеш раҳбарии кони "Назарайлоқ"-ро бар дӯш доштааст. Аммо пас аз таъйин шудани Нуриддин Темиров ба унвони раиси кон, Маҳмадраҷаб Ҳомидов ба муовинати раиси кони "Назарайлоқ" мансуб гардид ва солҳо дар канори ҷаноби Темиров фаъолият дошт.

Сокинони минтақаи Рашт, мегӯянд, Маҳмадраҷаб Ҳомидов бо он ки мутахасиси ботаҷриба дар кони "Назарайлоқ" маҳсуб мешавад, ҳамчунин дар миёни мардум низ дорои обрӯ ва нуфуз мебошад. Ҳамзамон Маҳмадраҷаб Ҳомидов, аз минтақаест, ки зодгоҳи генерал Шоҳ Искандаров, фармондеҳи собиқи мухолифон ва феълан муовини раиси бахши минтақавии умури дохила дар водии Рашт ба ҳисоб меравад.

Ҳамакнун, гурӯҳи калони тафтишотӣ дар маҳалли ҳодиса кор бурда истодааст ва бар иловаи кормандони кони Назарайлоқ, умури бозпурсӣ ва ҷустуҷӯро дар маҳаллаҳои атрофи кон низ ҷараён дорад.

Аммо бо ин ҳам то ба ҳол ба гурӯҳи тафтишот муяссар нашудааст, касеро ҳамчун гумонбар дар қатли Нуриддин Темиров боздошт кунад.

Нуриддин Темирови 55-сола, ки аз соли 2007 раҳбарии кони ангишти Назарайлоқ дар кӯҳистони Раштро бар ӯҳда дошт, шаби 1 ба 2 сентябр дар утоқи истироҳатиаш кушта шуд. Тибқи иттилоъи вазорати корҳои дохилӣ, "тахминан соати 00:30 дақиқаи шаби 1-ум ба 2-уми сентябри соли равон шахсони номаълум ба утоқи истироҳатии директори кони ангишти Назарайлоқи ноҳияи Рашт, Нуриддин Темиров, соли таваллудаш 1958, истиқоматкунандаи шаҳри Душанбе даромада, бо истифода аз силоҳи оташфишони таппончаи тамғаи “Макаров” ӯро паронда, аз ҷойи ҳодиса ғайб задаанд."

Як масъули шӯъбаи минтақавии корҳои дохилӣ дар Рашт, ки аз овардани номаш худдорӣ кард, ба Радиои Озодӣ гуфта буд, ки афроди ношинос ба сари Нуриддин Темиров 3 тир ва 4 тири дигар ба баданаш задаанд.

Сокинони минтақаи Рашт аз Нуриддин Темиров ба некӣ ёд мекунанд ва мегӯянд, вай шахси саховатпеша буда, дар корҳои хайри мардум дасти ёрӣ дароз мекард ва ба масҷидҳо низ кумак мерасонд. Гуфта мешавад, ки ӯро ба ин симат Ҳасани Асадуллоҳзода, раиси "Ориёнбонк" ва додарарӯси президенти Тоҷикистон оварда буд.

Турсунбой Боқир-уулу , вакили парлумони Қирғизистон аз ҳизби Оруномус низ рӯзи 5 сентябр дар иҷлосияи Жогорку Кенеш хостори дар сатҳи давлатӣ қадрдонӣ кардани шаҳрванди Тоҷикистон Нуриддин Темиров шуд. Боқир-уулу гуфтааст, Темиров “чанд сол пеш дар ҳалли низоъи Бодканд талоши зиёд ба харҷ дода буд.” Ба гуфтаи ӯ, Нуриддин Темиров “ба Афғонистон рафта, бо толибон музокирот кард ва дар озод кардани 4 гаравгони ҷопонӣ ширкат дошт. Бо вуҷуди инки ӯ шаҳрванди Тоҷикистон аст, хидматҳояш дар назди Қирғизистон хеле бузургтанд.“ Турсунбой Боқир-уулу пешниҳод кардааст, ки “биёед, ба ӯ мукофоти давлатӣ диҳем, ӯ сазовори чунин мукофот ҳаст.”

Боқир-уулу зоҳиран моҷарои гаравгонгирии шаҳрвандони Ҷопон ва фармондеҳони нирӯҳои дохилии артиши Қирғизистон дар поёни солҳои 1990 аз сӯи ҷангиёни Ҷумъаи Намангониро дар назар дорад.

Кони ангиши Назарайлоқ дар 300-километрии шарқи Душанбе, 90-километрии маркази ноҳияи Рашт ва 10-километрии Ҳоит воқеъ буда, захираи ангишташ беш аз 300 миллион тонна баровард мешавад.

Ба гуфтаи заминшиносон, ангишти Назарайлоқ аз навъи нодири антраcит аст, ки метавонад ба ҷои ангишти кокс истифода шавад. Ҳукумати Тоҷикистон дар пайи мушкил ва дар ин авохир комилан қатъ шудани воридоти газ аз Узбакистон барои таъмини фаъолияти корхонаҳои бузурги саноатиаш, аз ҷумла ТАЛКО, ба захираҳои ангишти дохилӣ, аз ҷумла ба кони Назарайлоқ дидаи таваҷҷӯҳ дӯхтааст. Вале ба иллати набуди зербино, ба хусус роҳҳои муносиби мошингард ва шароити сахти кӯҳистониаш, кони Назарайлоқ танҳо дар фасли гармо кор мекунад.

То чанд соли пеш кони Назарайлоқ як майдони рақобати гурӯҳҳои маҳаллии мусаллаҳ ва ҷиноӣ буд. Дар соли 2007 дар натиҷаи як ҳамлаи мусаллаҳона хазинаи ин конро ғорат ҳам карда буданд. Вале дар пайи амалиёти ду сол пеши нирӯҳои давлатӣ алайҳи гурӯҳҳои худсари мусаллаҳ дар водии Рашт фаъолияти гурӯҳҳои худсар дар ин минтақа хунсо гардида, иншооти муҳими иқтисодӣ, аз ҷумла кони Назарайлоқ, таҳти контроли гурӯҳҳои молии наздик ба раҳбарони аввали кишвар қарор гирифтанд.

Ба бовари бисёриҳо, қатли Ҳоҷӣ Нуриддин Темиров метавонад аломати оғози марҳалаи нави тақсими қаламрави нуфуз дар атрофи ин кони муҳим бошад.

Машваратдодашуда

Намоиши шарҳҳо

XS
SM
MD
LG