Пайвандҳои дастрасӣ

Чаҳор даста ба бозиҳои ниманиҳоии мусобиқаи ҷумҳуриявӣ оид ба футбол барои дарёфти Ҷоми Рустам Долтабоев, ки дар шаҳри Душанбе ҷараён дорад, роҳ ёфтанд.

Дар марҳалаи муқаддамотӣ 8 даста дар 2 гурӯҳ рақобат карданд. Дастаи «Динамо»-и Душанбе, ки дар ҳарсе дидори худ пирӯз гардид, бо 9 имтиёз дар гурӯҳи «А» мақоми аввалро касб кард.

Дастаи «Румӣ»-и ноҳияи Румии вилояти Хатлон ва тими Энергетик»-и Душанбе 4-имтиёзӣ ба даст оварданд. Вале аз рӯи таносуби беҳтари тӯбҳо дастаи «Румӣ» дар ҷои дуввум қарор гирифта, ба даври баъдӣ роҳ ёфт.

Дастаи «Вахш»-и Қӯрғонтеппа низ бар ҳамаи рақибони худ пирӯз гардида, бо 9 имтиёз дар гурӯҳи «Б» ғолиб шуд. Тими «Регар» ТадАЗ-и Турсунзода, ки дар 2 бозӣ ғалаба карда, дар як дидор аз рақиби аслиаш - «Вахш» шикаст хӯрд, бо 6 имтиёз дар мақоми дуввум қарор гирифт.

Бад-ин тартиб рӯзи 11-уми март дар бозиҳои ниманиҳоӣ нахуст «Динамо» бо «Регар» ТадАЗ ва сипас «Вахш» бо «Румӣ» рақобат хоҳанд кард.

Барандаи Ҷоми Рустам Долтабоев рӯзи 13-уми март дар бозии ниҳоӣ, ки дар варзишгоҳи Донишкадаи тарбияи ҷисмонии Тоҷикистон баргузор мешавад, муайян хоҳад шуд.

XS
SM
MD
LG