Чандин афсари нирӯҳои ҳавоии Амрико аз мақомҳои баланди худ маҳрум шуданд.
Гуноҳи онҳо дар саҳлангорӣ будааст, ки боиси вуқуи садамаи марбут ба мушакҳои ҳастаӣ мебошад.
Генерал-майор Ричард Нютон, муовини раиси ситоди нирӯҳои ҳавоии ИМА гуфт, баъзе афсарон бояд барои саҳлангориашон дар додгоҳ посух гӯянд.
Қазия ин аст, ки дар охири моҳи август ҳавопаймои бомбафкани Би-52, ҳомили мушаки ҳастайӣ, дар осмони ИМА як парвозе анҷом додааст. Ин ҳодисаро чун дағалтарин иштибоҳе дар муносибат бо аслиҳаи ҳастаӣ дар даҳ соли охир арзёбӣ мекунанд.
