Пайвандҳои дастрасӣ

Қаҳрамонҳои қаиқронии Тоҷикистон


Ҳасан Шарифов, раҳбари мактаби ҷумҳуриявии маҳорати олии варзишӣ, ба радиои Озодӣ гуфт, дар рақобатҳои инфиродӣ ҳудуди 70 варзишгар аз вилоятҳои Суғду Хатлон ва шаҳри Душанбе дар ду навъи қаиқронӣ -байдарка ва каноэ рақобат карданд.

Дар сабқати байдаркаронӣ миёни мардон Сергей Тулянов, аз дастаи вилояти Суғд дар масофаҳои 200 ва 500 метр ва Равшан Турсунов, аз дастаи шаҳри Хуҷанд дар масофаи 1000 метр мақоми аввалро касб карданд.

Дар рақобатҳо дар навъи каноэ миёни мардон Умед Зоҳидов, узви дастаи вилояти Суғд дар масофаҳои 200 ва 500 метр ва Умар Гулов, шогирди мактаби ҷумҳуриявии маҳорати олии варзишии Душанбе дар масофаи 1000 метр ғолиб гардиданд.

Ҳамчунин шогирдони ин мактаб Нодир Сафаров ва Ринат Ахметшин дар қаиқи дукаса ба масофаи 200 метр, Зоҳиршоҳ Набиев ва Ринат Ахметшин дар масофаи 500 метр, Нодир Сафаров ва Равшан Турсунов, аз дастаи шаҳри Хуҷанд дар масофаи 1000 метр ба дарёфти унвони қаҳрамонӣ даст ёфтанд.

Умед Зоҳидов ва Рустам Ансоров, аз вилояти Суғд дар каноэи дукаса дар масофаҳои 200 ва 300 метр ғолиб шуданд. Инчунин Умед Зоҳидов ва Умар Гулов, шогирди мактаби ҷумҳуриявии маҳорати олии варзишӣ дар каноэи дукаса дар масофаи 1000 метр мақоми аввалро касб карданд.

Сабқати занон танҳо дар навъи байдарка сурат гирифт.

Нигина Сираева, аз дастаи вилояти Суғд дар масофаи 500 метр ва ҳамдастаи ӯ Фирӯза Ҳусейнова дар масофаи 1000 метр пирӯзӣ ба даст оварданд.
XS
SM
MD
LG