Пайвандҳои дастрасӣ

logo-print

Даргузашти Талабхӯҷа Сатторов


Cm Шоми сешанбеи 10-уми апрели соли равон дар шаҳри Душанбе бар асари сактаи ногаҳонии дил Талабхӯҷа Сатторов,оҳангсози барҷаста ва раиси Консерваторияи миллии Тоҷикистон аз олам даргузашт.

Талабхӯҷа Сатторов соли 1953 дар ноҳияи Кӯлоб таваллуд шудааст. Ӯ оҳангсоз, ходими хизматнишондодаи санъати Тоҷикистон (1966), барандаи Ҷоизаи ҷумҳуриявии ба номи Борбад (соли 1990), профессор (2000) буд.


Хатмкардаи Консерваторияии давлатии Маскав ба номи Петр Чайковский (1983), Талабхӯҷа Сатторов фаъолияти эҷодии худро ба ҳайси муҳаррири шӯъбаи мусиқии Вазорати фарҳанги Тоҷикистон (1983 - 1984) шурӯъ кардааст. Сипас ассистенти кафедраи оҳангсозии Консерваторияи Маскав (1984-1986), муҳаррири шӯъбаи мусиқии Телевизиони Тоҷикистон (1986 - 1989), мударрис, декани факулта ва раиси донишакадаи ҳунарҳои зебои ба номи Мирзо Турсунзодаи Душанбе (1983 - 2003) буд. Ӯ соли 1998 раиси Иттиҳоди бастакорони Тоҷикистон интихоб гардид. Шурӯъ аз соли 2003 муассис ва то охирин зарби қалб Талабхӯҷа Сатторов раиси нахустин Консерваторияи миллии Тоҷикистон буд.


Муаллифи оҳангҳои зиёде бо шумули квартети дутора, «Ғазал» (оҳанги вокалӣ), симфония барои оркестри симфонии бузург, рапсодия барои 2 роял ва оркестр, «Оҳанги шодӣ», «Идона» (тасвири симфонӣ), тараннуми Наврӯз (песаи консертӣ), «Садои бонувон» (оратория - балет), операи «Рустам ва Сӯҳроб» ва садҳо дигар таронаву оҳангҳои милливу анъанавист.


Асарҳои марҳум борҳо дар толорҳои бузурги ватаниву хориҷӣ садо додаанд. Ҷасади марҳум қарор аст баъди зӯҳри рӯзи чоршанбеи 11 апрел дар мазори Лучоби шаҳри Душанбе ба хок супурда шавад.
XS
SM
MD
LG