Пайвандҳои дастрасӣ

logo-print

Таъсиси як ҳаракати оппозитсионӣ дар хориҷи Тоҷикистон


Дар шаҳри Маскав - пойтахти Русия як ҳаракати наве бо номи «Ватандор» зери роҳбарии журналист Додоҷони Атовулло таъсис ёфта ва муассисони ин ҳаракат аз худ чун аз мухолифони ҳукумати Тоҷикистон ном бурдаанд.


Додоҷони Атовулло ба нашрияи русии «Коммерсант» гуфтааст, собиқ вакилони порлумони Тоҷикистон, собиқ сарвазирон, намояндаҳои ҳаракатҳои донишҷӯӣ, рӯҳоният ва аҳзоби сиёсии Тоҷикистон аъзои ин ҳаракат будаанд.


Гуфта шудааст, ҳадафи ин ҳаракат дур сохтани ҳукумати феълӣ ва баргузории интихоботи нави демократӣ дар Тоҷикистон мебошад. Нашрияи русӣ аз қавли Додоҷони Атовулло навиштааст, таъсиси ин ҳаракат кори саҳле набудааст ва барои он нишастҳое дар Лондону Маскав, Вашингтону Берлин, Тошканду Алмаато баргузор шудаанд.


Дар ҳоли ҳозир 47 нафар узви ин ҳаракат будаанд. Гуфта шудааст, дар сурате, ки агар ҳукумати феълӣ ба истеъфо наравад, ҳаракат тариқи баргузории ҳамоишҳои эътирозӣ истеъфои ҳукуматро тақозо хоҳад кард.
XS
SM
MD
LG