Пайвандҳои дастрасӣ

Хабари нав

Муаррифии тарҳи қарорҳои марбут ба интихобот


Муҳибулло Додоҷонов, раиси дастгоҳи Кумиссиюни марказии интихобот ва раъйпурсии Тоҷикистон гуфт, чун дар мавриди талаботи қонуни интихоботи раёсати ҷумҳур ва ҳамзамон ҷараёни баргузории интихобот аз сӯи аҳзоби сиёсии кишвар дархосту пешниҳодот ироа шуда буд, дар робита ба салоҳияти худ ин кумиссиюн қарорҳои изофакунанда ба талаботи қонуни мазкурро таҳия кард.

Оқои Додоҷонов ҳамчунин гуфт, тарҳи ин қарорҳо аз сӯи аҳзоби сиёсӣ пуштибонӣ шуд, зеро дар аснод дархости онҳо комилан мавриди назар қарор дорад.

Аммо ин дар ҳолест, ки Раҳматулло Валиев, муовини раиси Ҳизби демократи Тоҷикистон мегӯяд, бахши аъзами аҳзоби сиёсӣ ба тарҳи ин қарорҳо қаблан шинос набуданд ва дар як соати ин ҷаласа имкони ҳам муаррифӣ ва баррасии ин тарҳҳо набуд. Аз ин рӯ, мегӯяд ӯ, бархе аз аҳзоб наметавонанд, аз тарҳи ҳамаи ин қарорҳо пуштибонӣ кунанд.

Вале Муҳибулло Додоҷонов мегӯяд, онҳо салоҳият надоранд, дубора дархостҳои пешниҳод мекардаи ин аҳзобро бипазиранд.

Дар ҳамин ҳол, Мӯсо Асозода, раиси дастгоҳи Ҳизби халқӣ демократии Тоҷикистон гуфт, онҳо аз кумиссиюни интихобот ва раъйпурсӣ дар мавриди тағийрот ба қонуни интихоботи раёсати ҷумҳур ва ҷараёни баргузории ин интихобот дархосте накарда буданд.

Вале оқои Асозода гуфт, ин тарҳи қарорҳои марбут ба баргузории интихобот, ки аз сӯи комиссиюни марказии интихобот ва раъйпурсӣ муаррифӣ шуд, метавонад ҷиҳати доир шудани интихоботи шафофу демократӣ мусоидат намояд.

Ин дар ҳолест, ки ба иттилои Муҳибулло Додоҷонов, қарор аст, тарҳи қарорҳои мазкур пас аз эъломи шурӯи маъракаи интихоботи раёсати ҷумҳур дар ҷаласаи нахустини комиссюни марказии интихобот ва раъйпурсӣ ба тасвиб расад.
XS
SM
MD
LG