Пайвандҳои дастрасӣ

Хабари нав

Созишномаи Тоҷикистон ва Русия дар боби муҳоҷират ба тавсиб расид


Думаи давлатии Русия созишномаи миёни ин кишвар ва Тоҷикистонро дар бобати муҳоҷирати нирӯи кор, ки ҳанӯз дар 16-уми октябр дар шаҳри Душанбе имзо шуда буд, ба тасвиб расонд. Ин ҳуҷҷат ба осон кардани итиқомат ва кори муваққатии шаҳрвандони ду давлат дар қаламрави ҳамдигар нигаронида шудааст. Ба сурати умум созишномаи Тоҷикистону Русия муҳоҷирати шаҳрвандони ду кишварро ба низом меорад ва қарор аст, ҳифзи ҳуқуқҳои муҳоҷиронро дар ҳудуди ду кишвар таъмин намояд. Ҳамзамон санади байнидавлатӣ масъулияти кордиҳандагонро дар истифодаи нирӯи кори муҳоҷирон афзоийш медиҳад. Чунончи, онҳо бояд кормандро бо шароити мӯътадили кору зиндагӣ, табобат, истироҳат ва музди кор таъмин намуда, бо поёни давраи кори муҳоҷир ба ӯ ҳамаи санадҳои заруриро бидиҳанд. Ин созишнома ба муддати 5 сол баста шуда, минбаъд ҳар дафъа бо ризоияти тарафайн барои се соли дигар тамдид мешавад. Ноиби аввали вазири корҳои дохилии Русия Александр Чекалин, ки созишномаро ба вакилони Думаи давлатии Русия муаррифӣ кард, гуфт, Тоҷикистон дар судури нирӯи кор ба Русия дар ҷои чаҳорум қарор дорад ва дар соли гузашта зиёда аз 23 ҳазор шаҳрванди Тоҷикистон дар Русия расман кор мекард ва 3 500 шаҳрванди Русия дар Тоҷикистон. Вай афзуд, тавсиби созишнома ба ҳалли масъалаҳои марбут ба муҳоҷирати нирӯи кор ва пешгирӣ аз истифодаи ғайриқонунии нирӯи шаҳрвандони Тоҷикистон дар Русия мусоидат хоҳад кард. Сафири фавқулодда ва мухтори Тоҷикистон дар Русия Сафар Сафаров гуфт, созишномаи нав муҳоҷирони тоҷикро дар "майдони ҳуқуқӣ ва қонунӣ" қарор хоҳад дод.
XS
SM
MD
LG