Пайвандҳои дастрасӣ

Бан Ки Мун: Зеботарин бинои СММ дар Ишқобод аст


Қурбонгулӣ Бердимуҳаммадов, президенти Туркманистон бо Бан Ки Мун, дабири кулли СММ, ки дар доираи як сафари махсус вориди Ишқобод шуд, мулоқот кардааст. Дар ҷараёни сафари Бан Ки Мун ба Ишқобод бинои нави СММ дар Туркманистон низ ифтитоҳ шуда, дар ин маросим намояндагони созмонҳои байналмилалӣ, иштирокдорони Конфронси ҷаҳонии ҳамлу нақли устувор ва расонаҳои дохилию хориҷӣ ширкат варзиданд.

Қурбонгулӣ Бердимуҳаммадов зимни ифтитоҳи бинои мазкур гуфтааст, "ин ҳодисаи таърихиест, ки марҳалаи нави ҳамкориҳоро миёни Туркманистон ва СММ боз хоҳад кард". "Туркманистон барои идомаи ҳамкориҳои дуҷониба бо созмонҳои маъруфи байналмилалӣ аз қабили СММ талош хоҳад кард", - афзудааст Бердимуҳаммадов.

Бан Ки Мун низ дар навбати худ изҳор доштааст, ки аз биноҳои СММ дар кишварҳои зиёд боздид кардааст ва ҳар якеи онҳо аз ҳамдигар фарқ мекарданд. "Бинои СММ дар Туркманистон ба қаср монанд аст. Ин зеботарин бино аст. Бори дигар миннатдории худро ба шумо, ҷаноби президент баён мекунам" - гуфтааст дабири кулли СММ дар хитоб ба Бердимуҳаммадов.

Ҳамчунин вай афзудааст, ки бинои нави СММ дар Туркманистон барои тамоми биноҳои ин созмон дар дунё метавонад намуна бошад. Қурбонгулӣ Бердимуҳаммадов дар охир ба намояндагии СММ дар кишвараш мошини гаронарзишеро туҳфа кардааст.

XS
SM
MD
LG