Пайвандҳои дастрасӣ

logo-print

Қирғизистон пулисҳои қочоқчӣ ва қаллобро дастгир кардааст


Хадамоти амнияти дохилии ВКД Қирғизистон чанд тан аз кормандони пулисро боздошт кардааст, ки солҳои зиёд бо қочоқи маводи мухаддир машғул будаанд.

Ба иттилои хадамоти матбуотии ВКД, ин кормандон ҳамчунин бо роҳи сохтакорӣ шаҳрвандонро дар қочоқи маводи мухаддир айбдор ва тамаъҷӯӣ мекардаанд.

Барои тасдиқи маълумот чанд ҳолатҳои хариду фурӯши санҷишӣ гузаронида шудааст. "16 ноябр тақрибан соатҳои 00:30 дар пойтахт муфаттишони ноҳияи Первомай К. Б. ва К. Ж. ҳангоми фурӯши маводи мухаддир дастгир шуданд. Онҳо талош карданд, ҳангоми боздошт ба кормандони ХАД муқобилият низ нишон диҳанд", - афзудааст манбаъ.

Аз боздоштшудагон пулҳои аломатдор дар ҳаҷми 64 ҳазор сом ва 1,8 грамм маводи мухаддир дарёфт ва мусодира шудааст.

Дар робита ба ин қазия бо моддаи "Истеҳсоли ғайриқонунӣ, нигоҳдорӣ, хариду фурӯш ва интиқоли маводи нашъадор" ва "Сӯистифода аз мансаб" парвандаи ҷиноӣ боз шудааст.

XS
SM
MD
LG