Пайвандҳои дастрасӣ

logo-print

Созмони Милали Муттаҳид мегӯяд, теъдоди қурбониён миёни мардуми осоишта, аз ҷумла, кӯдакон бар асари афзоиши хушунатҳо дар Афғонистон ба таври бесобиқа боло рафтааст.

Теъдоди қурбониён миёни мардуми осоишта, аз ҷумла, кӯдакон бар асари афзоиши хушунатҳо дар Афғонистон ба таври бесобиқа боло рафтааст. Дар ин бора дафтари Созмони Милали Муттаҳид дар Афғонистон рӯзи 25 июл бо нашри як гузориши вижа хабар дод.

Аз моҳи январ то моҳи июни соли равон ҳалокати 1601 сокини осоишта ва ҷароҳат бардоштани 3565 нафари дигар сабт шудааст, гуфта мешавад дар ҳисоботи ахири дафтари Созмони Милал дар шаҳри Кобул.

Ба гуфтаи муаллифон, ин рақам назар ба теъдоди қурбониёну маҷрӯҳон дар ҳамин давраи соли гузашта чаҳор дар сад бештар аст. Сеяки кушташудагон – 388 нафар кӯдаконанд, ки дар қиёс ба як соли пеш 18 дар сад афзоиш ёфтааст.

Бино ба гузориш, дар ҳамлаҳои интиҳорӣ ва амалиёти низомӣ дар Афғонистон ҳамчунин 1121 кӯдак захмӣ шудааст.

Гузориши Дафтари СММ дар Афғонистон ду рӯз баъд аз он нашр шуд, ки бар асари ҳамлаҳои маргталабона дар як намоиши эътирозии мусолиматомез дар шаҳри Кобул, пойтахти Афғонистон, дасти кам 80 нафар ҷон бохта, беш аз 230 нафари дигар бо ҷароҳатҳои гуногун ба бемористон интиқол ёфтанд.

Намоиши сулҳомези “Ҷунбиши рӯшноӣ”-и ақалиятҳои ҳазора дар минтақаи Деҳмазанги Кобул баргузор шуд. Ҳазораҳо дар намоиш тақозо мекарданд, ки шабакаи интиқоли барқи 500-киловатӣ аз Туркманистон ба Кобул аз қаламрави вилоятҳои марказии кишвар, аз ҷумла, аз вилояти Бомиён бигзарад ва онҳо низ аз неруи барқ баҳраманд шаванд. Дар ин вилоят аҳолии зиёди ҳазора ба сар мебарад.

Ҳомид Чахансурӣ, cухангӯи раиси ҷумҳури Афғонистон гуфт, ҳукумат қабл аз оғози тазоҳуроти эътирозии “Ҷунбиши Рӯшноӣ” хабар ёфта буд, ки чунин ҳамла сурат мегирад, бинобар ин ба созмондиҳандагони тазоҳуроти эътирозӣ ҳушдор дода буд, ки аз баргузории он худдорӣ кунанд.

Масъулияти ҳамларо гурӯҳи “Давлати исломӣ” бар дӯш гирифт.

Ашраф Ғанӣ, раиси ҷумҳури Афғонистон гуфт, дар баробари онҳое, ки азизони худро дар ин таркишҳо аз даст додаанд, доғ дорад ва шарики дарду ғами ҳар хонавода мебошад. Вай афзуд, ҳар касе, ки дар ин таркишҳо даст дошта бошад, хоҳ аз ҳукумату давлат ва хоҳ берун аз он, муҷозот хоҳанд шуд.

Тодамичӣ Ёмамото, намояндаи вижаи СММ барои Афғонистон ин ҳамларо як ҷинояти ҷангӣ ва ғайриқобили тавҷеҳ хондааст. Сафорати Амрико дар Афғонистон дар баёнияи худ гуфтааст, ИМА дар канори дӯстону шарикони афғони худ, ки мехоҳанд дар кишварашон сулҳу суботро таъмин кунанд, хоҳад истод.

XS
SM
MD
LG