Пайвандҳои дастрасӣ

logo-print

Номаи мухолифони ҳукумат ба Иттиҳодияи Аврупо


Додоҷон Атовуллоев ва Муҳиддин Кабирӣ

Додоҷон Атовуллоев ва Муҳиддин Кабирӣ

Гурӯҳе аз раҳбарони мухолифони сиёсии ҳукумати Тоҷикистон, ки аксарашон дар хориҷ аз Тоҷикистон ба сар мебаранд, аз ҷумла Муҳиддин Кабирӣ, раҳбари ҳизби мамнӯи наҳзати ислом, Додоҷон Атовуллоев, раҳбари Анҷумани нерӯҳои созанда, Алим Шерзамонов, раиси бахши бадахшонии ҳизби сотсиал-демократ ба Ҳидоят Бишчевич- намояндаи Иттиҳодияи Аврупо дар Тоҷикистон номаи кушода фиристодаанд.

Ин нома дар остонаи мулоқоти Сироҷиддин Аслов, вазири корҳои хориҷии Тоҷикистон дар Брюссел бо намояндагони Иттиҳодияи Аврупо ба забонҳои тоҷикиву англисӣ ва русӣ навишта ва дар шабакаҳои иҷтимоӣ низ чоп шудааст.

Намояндагони мухолифони ҳукумати Тоҷикистон аз Иттиҳодияи Аврупо хостаанд, ки "барои рӯшан шудани ҳақиқат аз ҳукумати Тоҷикистон бихоҳад, то барои намояндагони созмонҳои ҳуқуқи башар, ба хусус ба намояндаи Иттиҳодияи Аврупо иҷоза бидиҳад, бо боздоштшудаҳо дидор ва гуфтугӯ кунад ва бо парвандаи онҳо аз наздик ошно шавад."

Муаллифони нома навиштааанд: "Баъзе аз боздоштшудаҳо дар оғоз барои худ вакили мудофеъ истихдом карда буданд, вале мутаассифона, худи ин адвокатҳо низ ба тӯҳматҳои воҳӣ ва пуч боздошт ва ҳаминак зиндонӣ ҳастанд, аз ҷумла Бузургмеҳр Ёров ва Нуриддин Махкамов. Ва ҳамчунин вакилони дигар, тибқи ахборе, ки ба мо мерасад, шадидан таҳти фишоранд. Ҳатто кор ба ҷое расида, ки вакили мудофеи бархе аз боздоштшудаҳо барканор ва ба ҷояш касе ӯҳдадори «дифоъ» шудааст, ки ҳукумат ӯро таъин карда, аз ҷумла дар мавриди вакили мудофеи Муҳаммадалӣ Ҳаит, узви раёсати олии ҲНИТ, ҳамин корро кардаанд”.

Ин нома аз 7 банд иборат аст ва дар он изҳори умедворӣ шудааст, ки Иттиҳодияи Аврупо барои рӯшан шудани вазъ бо намояндагони мухолифони сиёсии ҳукумат ҳамкорӣ кунад.

XS
SM
MD
LG