Пайвандҳои дастрасӣ

Радди иддаои кушта шудани сокинони осоишта дар Сурия


Ҳукумати раиси ҷумҳури Русия Владимир Путин баёнияи созмони байналмилалии ҳуқуқи башари Human Rights Watch дар бораи кушта шудани даҳҳо нафар сокинони осоиштаи Сурия дар пайи зарбаҳои ҳавоии Русияро рад кард. Сухангӯйи Кремл Дмитрий Песков баёнияи HRW дар робита ба зарбаҳои ҳавоии Русияро “партоби иттилоотӣ” ва “матлаби беҳудаи рӯзномаӣ” номид.

Дафтари марказии HRW, ки дар Ню-Йорк қарор дорад, дирӯз аз Москва хост, ки дар мавриди ҳалокати эҳтимолии 59 сокини осоишта таҳқиқоте анҷом бидиҳад. Ба иттилои ин созмони ғайриҳукуматӣ дар пайи зарбаи ҳавоӣ ба ҳавлие дар вилояти Ҳумс 46 нафар узви як хонаводаи бузург бо шумули 32 кӯдак кушта шудаанд. Боз 13 нафар сокини осоиштаи дигар ба иддаои HRW зимни зарбаи ҳавоии дуввум дар ин маҳалла кушта шудаанд. Ин ду ҳодиса 15 октябр рух додаанд.

Дмитрий Песков гуфт, ки низомиёни русӣ қабл аз расонидани зарбаҳо мавзеъотро бо дарназардошти «амнияти аҳолии маҳаллӣ» интихоб мекунанд.

XS
SM
MD
LG