Додситони ҷумҳурии Тотористони Русия Илдус Нафиқов дар пайи сӯхтор дар ду бозори бузурги пойтахтин ин ҷумҳурии мухтор, шаҳри Қазон ҷиҳати тафтиши ғайринақшавии чораҳои амнияти зиддисӯхтор дар бозорҳои шаҳр амр додааст.
Сӯхтори рӯзи 12 октябр дар бозори “Дулкин”, воқеъ дар ноҳияи Авиастроителнийи шаҳри Қазон 2400 метри мураббаъ ва сӯхтори фардояш, 13 октябр дар бозори “Витарус”, маъруф ба “бозори ветнамиҳо”, дар кӯчаи Журналистон дар ноҳияи Совети пойтахти Тотористон 4 800 метри мураббаъ масоҳати бозор бо дӯконҳо ва молҳои соҳибкоронаш ба коми оташ рафтааст. Дар ин бозорҳо асосан молҳои саноатӣ фурӯхта мешуд ва дар ҳарду даҳҳо шаҳрванди Тоҷикистон низ кор мекарданд.
