Пайвандҳои дастрасӣ

Хабари нав

Тими миллии Тоҷикистон ба бозии Малайзия омода мешавад


Имрӯз, 29-уми июл, мунтахаби футболи Тоҷикистон омодагиро барои бозии дӯстона бо тими Малайзия шурӯъ кард.

Бинобар хабари Федератсиони футболи Тоҷикистон ҷамъомади таълимиву тамринии даста бо раҳбарии сармураббӣ Мӯҳсин Муҳаммадиев шоми сешанбе дар урдугоҳи Академияи футболи “Истиқлол”, дар дараи Алмосии ноҳияи Ҳисор, оғоз ёфт.

Аз 4-уми август даста дар Душанбе тамрин мекунад. Ба ҳайати дастаи мунтахаб 23 бозигар даъват шудааст, ки дар байни онҳо ду легионер ҳастанд. Яке Давронҷон Эргашеви 26-сола, ҳимоятгари тими «Жетису»-и Қазоқистон ва дигаре Нозим Бобоҷонов-и 18-сола, нимҳимоятгари «Рубин»-и Қазон, мебошанд. Эргашев ба даста 5-уми август ҳамроҳ мешавад.

Вале Идибек Ҳабибуллоев, ҳимоятгари «Хайр», ки мағзи сараш такон хӯрдааст, дар бозии дӯстона бо мунтахаби Малайзия иштирок карда наметавонад. Бинобар ин ба ҷойи ӯ Умедҷон Шарифов, нимҳимоятгари 21-солаи «Истиқлол», даъват шудааст.

Бозии дӯстона байни тимҳои миллии Тоҷикистон ва Малайзия 8-уми август дар Душанбе баргузор мешавад. Довари FIFA Александр Алиеви 27-сола аз шаҳри Алмаатои Қазоқистон сардовари ин бозӣ таъин шудааст. Ба ӯ ёварони довари FIFA Сергей Васютини 27-сола ва Самад Тергеусизови 28-сола (ҳарду аз Алмаато) ба ҳайси доварони марзи майдон кӯмак хоҳанд кард.

Ёдовар мешавем, ки ин гурӯҳи ҳакамон 4-уми майи соли равон дар Душанбе бозии дӯстонаи Тоҷикистону Афғонистонро, ки бо ҳисоби 1-0 ба фоидаи футболбозони тоҷик анҷом ёфта буд, доварӣ кардаанд.

Бояд гуфт, ки ин аввалин бозӣ байни тимҳои миллии Тоҷикистону Малайзия ба шумор меравад. Дар айни ҳол дар рейтинг ё феҳристи ФИФА мунтахаби Тоҷикистон дар мақоми 124-ум ва Малайзия дар мақоми 151-ум қарор доранд.

Бозии дӯстона бо Малайзия барои мунтахаби Тоҷикистон дар мавсими имсола севум мешавад. Мунтахаби Тоҷикистон таҳти раҳбарии Мӯҳсин Муҳаммадиев баъди пирӯзӣ бар тими миллии Афғонистон, дар бозии дувум 7-уми июн дар Таллинн аз мунтахаби Эстония бо ҳисоби 1:2 шикаст хӯрдааст.

Ҳайати мунтахаби футболи Тоҷикистон:

Дарвозабонҳо: Алишер Тӯйчиев («Истиқлол»), Алишер Додов («Регар-ТадАЗ»).

Ҳимоятгарон: Давронҷон Эргашев («Жетису», Қазоқистон), Ҷаҳонгир Ҷалилов, Сиёвуш Асроров, Наим Ӯлмасов, Аҳтам Назаров, Эраҷ Раҷабов, Соҳиб Саванқулов (ҳама аз «Истиқлол»).

Нимҳимоятгарон: Хуршед Маҳмудов, Нуриддин Давронов, Фатҳулло Фатҳуллоев, Ромиш Ҷалилов, Умедҷон Шарифов (ҳама аз «Истиқлол»), Иброҳим Рабимов («Энергетик»), Амирбек Ҷӯрабоев («Хайр»), Фаридун Шарифов (ССКА «Помир»), Нозим Бобоҷонов («Рубин», Русия).

Ҳамлагарон: Фарҳод Тоҳиров («Парвоз»), Дилшод Восиев, Комил Саидов, Ҷаҳонгир Эргашев (ҳарсе аз «Истиқлол»), Аҳтам Ҳамроқулов (бе бошгоҳ).

XS
SM
MD
LG