Пайвандҳои дастрасӣ

Аҳди ҳамкории крикетбозони Афғонистону Тоҷикистон


Имрӯз дар Кобул миёни Крикет Борд (Раёсати крикет) -и Афғонистон ва Федератсияи крикети Тоҷикистон тавофуқномаи ҳамкорӣ имзо шуд.
Нурмуҳаммади Мурод, раиси Крикет Борди Афғонистон ба Радиои Озодӣ гуфт, кишвараш ба Тоҷикистон барои омӯзишҳои тактикӣ ва техникии крикетбозони Тоҷикистон кӯмак хоҳад кард. Вай афзуд, Крикет Борд як тренер, як довар ва лавозимоти варзиширо дар ихтиёри Тоҷикистон мегузорад. Вай афзуд, тибқи ин тавофуқ бозии дастаи крикети «Алиф» - и Афғонистон ва тими миллии Тоҷикистонро баргузор мекунад ва болои тарҳе бо номи «Роҳи абрешим» ҳам кор хоҳанд кард, ки дар доираи он тимҳои Хайбар Паштунхва -и Покистон, «Алиф» - и Афғонистон ва Тими миллии Тоҷикистон бо ҳам мусобиқа мекунанд.
Крикет Борди Афғонистон соли 2009 ташкил шуда, тимҳояш то ба ҳол дар 40 мусобиқаи ҷаҳонӣ иштирок карда, дар 22 – тои он баранда шудаанд. Соли равон дастаи то 19 – солаҳои афғон дар сатҳи Осиё ҷои аввалро гирифта, дар мусобиқоти ҷаҳонии соли 2014 ширкат хоҳанд кард.
Афғонистон моҳи июни соли ҷорӣ дар Шӯрои байнулмилалии крикет узвияти дараҷаи 2 – ро ба даст овард ва дар сатҳи ҷаҳон дар ҷои 12 қарор дорад.
Федератсияи крикети Тоҷикистон соли 2011 ташкил шуда, соли 2012 узвияти Шӯрои крикети Осиёро ба даст овард. Бино ба иттилои Исмат Исломбек, раиси Федератсияи крикети Тоҷикистон ин ниҳод ҳоло 8 тим дорад ва асосан бо тимҳои Афғонистон ҳамкорӣ мекунад.
Крикет навъи варзишест, ки дар асри 18 дар Инглистон ба вуҷуд омада, асосан дар кишварҳое, ки таҳти мустамликаи Бритониё буданд, назири Автстралия, Ҳинд, Покистон, Шри Ланка, Зимбабве ва ғайра рушд кардааст.
XS
SM
MD
LG