Додгоҳе дар шаҳри Атирауи Қазоқистон зани ҷавонеро бо гуноҳи омода кардани писархонди 12- солааш ба ҳайси бомбгузори маргталаб ба 7 соли зиндон маҳкум кардааст. Дар ин муҳокимаи паси дарҳои баста модарандари 18-солаи наврасро ба тарғиби терроризм ва азоб додани кӯдаки ноболиғ гунаҳкор донистаанд. Мақомоти Қазоқистон мегӯянд, ӯ мехостааст, аз ҳамин роҳ дар дохили Кумитаи Амнияти Миллӣ ҳамла анҷом диҳад. Шавҳари ин занро бино ба гузоришҳо, нерӯҳои амниятии Қазоқистон дар як амалиёти зиддитерористӣ дар соли гузашта куштаанд. Чунин амалиёт дар шаҳри ғарбии Атирау ва манотиқи атрофи он алайҳи тундгароёни исломӣ ва террористон сурат гирифта буд. Аз ҷумла тирамоҳи гузашта дар Атирау ва шаҳри Қулсари 9 тундрави исломиро куштанд.
