Қасри Сафед мегӯяд, президенти ИМА Барак Обама мунтазири “натиҷагирии возеҳ” дар мавриди истифодаи силоҳи химиявӣ бар зидди ошӯбгарони Сурия аст. Манбаъҳои мухталиф режими президенти Сурия Башор ал-Асадро бо истифодаи силоҳи химиявӣ дар муқобили ошӯбгарон муттаҳам мекунанд. Рӯзи ҷумъа сухангӯи Қасри Сафед Ҷей Карнӣ гуфт, ҳоло ягон чорчӯби вақтии қабули қарор дар мавриди Сурия тарҳрезӣ нашудааст. Ӯ афзуд, ки Қасри Сафед мунтазири натиҷагирии возеҳи хадамоти кашф аст. Рӯзи ҷумъа Иттиҳодияи Аврупо аз мақомоти Сурия талаб кард, ки ҳайати СММ-ро барои тафтиши эҳтимоли истифодаи силоҳи химиявӣ ба ин кишвар роҳ диҳанд. Рӯзи панҷшанбе Қасри Сафед бар пояи иттилои хадамоти кашф гуфта буд, ки эҳтимол нерӯҳои содиқ ба президент Башор ал-Асад аз силоҳи химиявӣ кор гирифтаанд.