Рӯзи модар дар Тоҷикистон барфӣ хоҳад шуд

Ба иттилои ҳавосанҷони тоҷик, рӯзҳои 8 ва 9 март ҳавои Тоҷикистон сард мешавад ва дар аксар манотиқ барф меборад.

Маркази ҳавошиносии кишвар рӯзи панҷшанбеи 7 март ба радиои «Озодӣ» гуфт, рӯзҳои 8 ва 9 март ҳарорати ҳаво дар Тоҷикистон сард мешавад ва ба эҳтимоли зиёд барф меборад. Ба гуфтаи мутахассиси марказ, рӯзи 8 март ҳарорати ҳаво дар Душанбе шабона 4-6 дараҷа ва рӯзона 5-7 дараҷа гарм хоҳад шуд. Бегоҳӣ борон меборад ва ба эҳтимоли зиёд он ба барфи тар мубаддал шавад. Ҳамчунин, бегоҳӣ пастшавии ҳарорат то -1 +1 дар назар аст.

Дар вилояти Хатлон ҳаво шабона 2-7 дараҷа, рӯзона 4-9 дараҷа гарм мешавад ва бегоҳӣ пастшавии ҳарорат то -1 +4 пешбинӣ шудааст. Дар вилояти Суғд ҳаво шабона аз 1 дараҷа хунук то 2 дараҷа гарм ва рӯзона аз 2 дараҷа хунук то 3 дараҷа гарм мешавад.

Дар ноҳияҳои тобеи марказ ҳаво шабона 2-7 дараҷа ва рӯзона 3-8 дараҷа гарм мешавад. Дар Ғарби Вилояти Мухтори Кӯҳистони Бадахшон ҳаво шабона аз 1 дараҷа хунук то 2 дараҷа гарм ва рӯзона аз 1 дараҷа хунук то 4 дараҷа гарм мешавад. Дар Шарқи ин вилоят ҳаво шабона 12-14 дараҷа ва рӯзона 0-5 дараҷа хунук мешавад.

Маркази ҳавошиносии Тоҷикистон мегӯяд, бориши барф баъди 9 март қатъ мегардад ва дар рӯзҳои минбаъда ҳарорати ҳаво 12-14 дараҷа гарм хоҳад шуд.