Раисиҷумҳури Афғонистон Ҳомиди Карзай гуфт, тасмим дар мавриди масунияти нирӯҳои амрикоие, ки баъди соли 2014 дар ин кишвар хоҳанд монд, то “8 ё 9 моҳи дигар” гирифта хоҳад шуд. Карзай дар пайи сафари ҳафтаи гузаштааш ба Амрико дар як нишасти хабарӣ дар Кобул гуфт, давлати ӯ пешниҳоди қаблии Вошингтон дар ин мавзӯъро радд кардааст. Ӯ гуфт, даври дувуми музокирот дар Кобул хоҳад гузашт. Раисиҷумҳури Амрико Барак Обама гуфтааст, Амрико дар ғайри сурати тазмини масунияти сарбозонаш аз таъқиб дар додгоҳҳои маҳаллӣ ягон нирӯеро дар Афғонистон нахоҳад монд. Ӯ мехоҳад, асокири амрикоии дахил дар ҷиноёт аз сӯи додгоҳҳои низомии Амрико муҳокима шаванд.
