Амалиёти нирӯҳои давлатии Сурия дар атрофи Ҳумс 5 рӯз боз идома дорад. Даргириҳо дар ин минтақаи ошӯбзада, ба гуфтаи фаъолон, алакай мунҷар ба ҳалокати садҳо нафар шудааст. Аммо таъйиди ин омор аз сӯи манобеъи мустақил мушкил аст, чунки режими Сурия дастрасии хабарнигорон ба манотиқи ошӯбзадаро маҳдуд кардааст. Бо ин ҳол, имрӯз Туркия аз қасдаш ба тадвири базудии як анҷумани махсуси буҳрони Сурия хабар дод. Русия низ ба зарурати «муколама» дар Сурия таъкид кард.
